ترانس
17-10-2022 - 08:14 pm
على اذان الفجر صحيت من نومه مش ولا بد... كانت هذي اخر ليله قبل الرجوع للوطن .... قمت من الفراش ولا ودي اقوم .... اثناء الوضوء سمعت اذان ثاني!!! استغربت كيف اذانين بينهم 5 دقايق... المهم نزلت الشارع شفت مسجد بين صفة مطاعم . دخلت والا مافيه الا اثنين اتراك كل واحد يصلي لحاله في اخر المسجد... مدري اهم صلو ؟ طيب متى تو اذن من 10 دقايق.. تقدمت للصف الاول صليت و طلعت جهة كورنيش البسفور .. وقفت على جسر المشاه اتفقد معالم بيزنطه للمره الاخيره ... نظره لبرج غلاطه وعلى اليمين جسر البسفور يغطيه الضباب وعلى يمينه انوار تشاملجاه وبعدين قصر الخلافه الاسلاميه وخلفي بالضبط جامع سليمان ... في الجو غيم ينعش القلب... والناس بدت تسرح لاعمالها بهمه ونشاط .. نزلت من جسر المشاه باتجاه الكورنيش ... كان قصدي اتمشى على شارع كينيدي حتى يحين موعد الافطار بالفندق الساعه 7 ولكن كان بانتظاري شي ماتوقعته..
خلوني ارجع شوي تقريبا قبل 5 ايام .. كنت اسولف مع موظف الاستقبال وهو شاب تركي وسيم جدا ومؤدب جدا .. كنت اقول له وش رايك انا ابغى اطلع اتمرن في حديقه جولهانه القريبه من الفندق وكان الوقت لسه بدري بمعنى انو الشمس تو ما اشرقت.. سكت شوي وقال ما انصحك تروح هناك في ذا الوقت!!! قلت له : ليش؟؟؟ قال لي : الحديقه يجونها ناس مرتفعين يشمون غرا ويتعاطون حبوب .. وتخيل واحد فاقد ممكن يتعرض لك بسكين او يمكن يكونون اكثر من واحد ويحوطونك ... قلت والله صادق خلنا نبعد عن الشر احسن المهم السواليف طالت ولكن هذا النصيحه اللي وصلها لي مشكورا...
المهم اليوم وانا اتمشى على بدايه الكورنيش و لوحدي ما فيه ولا انسان ذيك اللحظه ... السماعات في اذني وماشي باتجاه الشرق
الا تمر سياره باتجاهي .. ويطلع لها ( كلب ) من جهة اليسار ينبح على السياره ويلحقها... شوي ويجي ركض باتجاهي انا ... السياره عدت خلاص وراحت وبقيت انا والكلب وجها لوجه ينبح علي وانا وقفت مكاني بيني وبينه مترين شوي ويجون 5 كلاب غيره طلعو لي من جهة اليسار بينهم واحد أسود .. والله تيبست وقلت هذول شايفينك قطعة خبزه دافيه على الصبح وبيفطرون عليك. والله مدري كيف جا في بالي الاذكار اقولها والكلاب تنبح علي وانا رافع صوتي بالاذكار واتحرك بشكل بطيء جهة اليمين ناوي اقطع الشارع وابعد عن طريقها يمكن ما تبغاني امر من جهة اليسار .. المهم اني حاولت امسك اعصابي مع اني في وضع صعب ولا حد حولي لا اوادم ولا سيارات .. وحاولت اني ما احط عيني بعين الكلاب عشان لا تفهم اني اتحداها والله اقطع الشارع على اقل من مهلي مع ان ودي لو اطير لكن مايمدي اهرب من حيوان اكيد بيجيبني بلحظه الكلب الاسود حسيت فيه حط فمه في بطات رجلي يشمشم فيها وانا مواصل على الاذكار والان قطعت الشارع للجهة الثانيه وهو معاي .. الا ويتركني ويمشي قدامي . بس تركني الا يجي واحد يركض قطع الشارع وهو ينبح علي لكن الحمد لله ما قرب مدخل الحديقه صار على يميني الحين ما بيني وبينه الا 20 متر . دخلتها والله فكني من كمين ما انساه
تذكرت تحذير الشاب التركي لمن قاللي لاتطلع في ذا الوقت .. بس اهو حذرني من الفئه الضاله ... مو من الكلاب الضاله
اه يا استانبول ....
https://www.youtube.com/watch?v=ERtLIRt_70U&feature=related
والله موضوع الحيوانات في اسطنبول عجيب
كل زاوية تلاقي كلب أو قطو منسدح
وتقول مافي شي في هالدنيا
الحمدلله ع سلامتك مرة ثانية