السلام عليكم

هذا تقرير متواضع مني لكم حق سفرتي الاخيره الى النمسا في صيف 2011 و بالتحديد كانت من 22/6 الى 13/7/2011 و التقرير ان شاءالله راح يكون مفصل و راح يكون شامل عن رحلتي و اهو اول تجربه لي في عمل التقارير و اتمنى انها تنال على رضاكم و اعجابكم۔

و بسم الله نبدأ

في البدايه انا من عشاق السفر و بالتحديد الى الدول الاوروبيه و ذلك لجمال طبيعتها و اجوائها البارده و الممطره و سبق لي اني سافرت 4 مرات لبريطانيا ولم اشبع منها ولا راح اشبع منها بس هالصيف قلت بغير وجهت سفري و حبيت اني اوجه سهم رحلتي الى قلب اوروبا و حيث يسميه البعض جنة الله في الارض

انا اساسا كان بخاطري اني النمسا و لكن لم اتشجع لها من قبل كما تشجعت و تشوقت لها هذا الصيف و الي زاد تشوقي لها هو هذا المنتدى مما يحتويه من تقارير بغااااية الروعه من اهل المنتدى و الي فعلا وااايد اخذت منها و استفدت منها۔

طبعا انا ما احب التعامل مع مكاتب السفريات لاني دايما احس انها استغلاليه و كذلك ما احب اسافر مع قروبات لاني ما احب ارتبط معاهم و احب اني اكون مستقل ولذلك كانت السفره فيها نوع من المغامره و لكن بفضل الله كانت جدا ممتعه و لا حسيت اني بدوله غريبه و لا دوله اول مرة اطبها۔

مثل مانتو عارفين اجراءات السفر تكون كالتالي:
1- تحديد وجهة السفر ، و قد تم تحديد وجهة السفر و كانت النمسا لاني كنت اسمع وايد ناس تتكلم عنها و غير تقارير اهل المنتدى و بالاخص المصوره منها لان الصور تزيد من التشويق۔

2- تأشيرة الدوله المراد السفر اليها ، و طبعا قبل اسفر لازم نشوف الدوله تحتاج تأشيره ام لا و طبعا دول اوروبا تحتاج الى شنغن فيزا و هي فيزا تشمل جميع دول اوروبا ماعدا بريطانيا لها فيزا خاصه فيها، و بخصوص الشنغن فيزا طبعا النحاسه لازم تكون متواجده في عمل الفيزا وهي لازم تاخذ الفيزا من سفارة الدوله الي بتنزل بمطارها (مثلا بسافر النمسا لازم اخذ الفيزا من سفارة النمسا) و اجراءاتها طويله لازم عندي تامين سفر و لازم ارفق صوره من التذكره و صور عن حجوزات الفنادق فا بس هالشغله الوحيده الي سويتها عن طريق مكتب سفريات و للعلم سفرتي للنمسا و المكتب عمل الفيزا من الفرنسيه بس الحمدلله الجمارك ماقالولي ولا شي خير شر و المكتب ضمنولي هالشي ان النمسا يمشونك ولا يسالون اي شي غير باجي الدول الي تلزمك تاخذ فيزا من سفارتهم ۔

3- حجز التذاكر ، طبعا حجزي عن طريق الانترنت و من موقع الطيران مباشرة و حصلت التذكرة على القطرية بـ 260 دينار ( كويت - دوحه - فيينا)(فيينا-دوحه-كويت) بس كان ترانزيت 6 ساعات بالروحه و 3 ساعات بالرجعه و طبعا القطريه وااايد حلوه من كل النواحي ولكن عيبهم الوحيد المطار و لهذا السبب ماحجزت منهم، و شفت الاماراتيه كانت 290 دك (كويت - دبي - فيينا) بالروحه كان ترانزيت 8 ساعات و طبعا المطار الخاص للاماراتيه غني عن التعريف و بشهادة الجميع و اذا كان ترانزيت 8 ساعات و اكثر يقدمون ضيافه و هي عباره عن غرفة مجانيه في فندق ميلينيوم + سندويشه و عصير او جاي مجانا۔ و بالرده هم ترانزيت دبي بس كان عندي اكثر من خيار من ساعه لي 16 ساعه و طبعا خذيت 16 ساعه و فيها نزلت في فندق حدائق الجوهرة و ريحنه و خذينه جوله سريعه عالسوق و احنه الي رادين۔

4- حجز الفنادق ، طبعا اهم شي قبل لاتحجز الفندق تسوي برنامج عشان اعرف شنو الاماكن الي بروحلها و شنو الفنادق الي راح اسكن فيها و انا في رحلتي قعدت في خمس فنادق و مصح و طبعا راح اوافيكم بالتقرير بالفنادق و حالتها و طبعا حجوزاتي كلها كانت عن طريق (booking ) ماعندا فندق واحد و بالاصح كان مصح مو فندق۔

5- تجهيز عدة السفر ، طبعا عدة السفر اقصد فيها الجنطه الشخصيه او جنطة الظهر غير جنط الملابس وهي نخلي فيها الجوازات و التذاكر و صور من حجوزات الفنادق و قلم و مفكره صغيره شمسيه كاميره مناديل و كذلك مناديل رطبه ( نابكنز) و سائل اليدين (سنيتايزر) وتكرمون ورق المراحيض لدورات المياه نظاره شمسيه دواء ...الخ و كل واحد و عارف احتياجته۔

و لحد هني اكتفي اليوم لاني جني وااااايد قرقعت و دخت و قفلت الصراحه :)))

بس للعلم الحلقات القادمه مافيها قرقه و راح تكثر فيها الصور و الشرح المختصر المفيد عكس هالحلقه لانها الحلقه الاولى و فيها كل شي قبل السفر اما الحلقة اليايه راح تكون غير ان شاءالله

و هالصورة للتشويق :))






الى اللقاء