1. مستوى النظافة ممتاز اللحف والشراشف ماشاء الله تنام وانت مرتاح


2. الموقع شوية بعيد عن السنتر واذا حبيت تقدر تروح مشي


3. مستوى الفندق ممتاز


4. التعامل جدا راقي


5. الموقع ممتاز جداُ جداُ


6. اخرج من باب الفندق ولف يمين واديها مشي


7. فيه 3 شاشات تلفزيون


8. المطبخ مجهز وفيه غسالة صحون وغسالة ملابس

السلام عليكم ورحمة الله وبركاته
اولا : المعذرة لتأخري في كتابة هذا التقرير , ولكن كان لدي ظروف خلال الفترة الماضية.
ثانياُ: التقرير مبسط ومختصر ومافي صور ...ماشاء الله الأعضاء ماقصروا من ناحية الصور كفوا ووفوا.
بسم الله نبدأ...
الحمدلله الرحلة كانت موفقه رغم شوية المقالب اللي حصلت معانا لكن كأول مره نزور اوروبا ونؤجر سيارة ونتعامل مع القارمن لأول مره كمان ونلف االلف اللي لفيناه , فاعتقد ان احنا كده
مسار الرحلة : الوصول لميونخ واستلام سيارة من المطار والتوجه لكابرون النمساويةومن ثم ميونخ مره اخرى ثم فرايبورغ واخيرا فرانكفورت
الفنادق
في كابرون familienappartments eder
الشقة ثلاثة غرف

مستوى النظافة ممتاز اللحف والشراشف ماشاء الله تنام وانت مرتاح

الموقع شوية بعيد عن السنتر واذا حبيت تقدر تروح مشي

صاحب الشقق تعامله ممتاز و يعطيك كتيبات عن الاماكن السياحية وكان يصدف يقابلنا واحنا خارجين يسالنا فين رايحين اليوم وينصحنا اذا كان اليوم مناسب لزيارة هذا المكان او لا. وعلى فكره حمام الشقه اكرمكم الله فيه شطاف ..عاد هو يقول انا مركبه عشان العرب وماشاء الله بالفعل كل الموجودين كانوا سعوديين .يعني الشقه مجهزه من كله حتى غلاية المويه والمكوى انا كنت جايبه معايه لاقيتها بالاضافه لغسالة الملابس وغسالة الصحون.وبصراحة اللي شجعنا ناخذذها كمان سعرها ممتاز.
في ميونخ NH MUNCHEN DUETSCHER KAISER
بصراحة موقع الفندق امام محطة القطار ..ومتوفر حوالينه كل شئ تروح منه مشي للسوق والنافوره والمطاعم

مستوى الفندق ممتاز

التعامل جدا راقي

عند الوصول طلبنا اضافة سرير في الغرفة الثانية فاجابت الموظفة مافي امكانية نضيف سرير للغرفة اللي انتوا حاجزينها (غرفه ستاندرد)لان مساحتها صغيره اذا تحبوا نرقي الحجز لغرفه سوبيريور ونضيف السرير مقابل رسوم اضافيه قلنا مافي مانع وتم تجهيز الغرف.
يعيبه وجود محلات السكس شوب على يمينه وشماله لكن لاحظت وجودها في المنطقه المركزيه بصفه عامة
في النهار مافي غير صور على البترينات وفي الليل سمعت انه فيه اشياء ثانية الله يحفظنا ..والحمدلله كنا من المغرب ندور النوم .
في فرايبورغ الجميلة MERCURE HOTEL FREIBURG AM MUNSTER

الموقع ممتاز جداُ جداُ

اخرج من باب الفندق ولف يمين واديها مشي

تحت الفندق في بيكري كنا نفطر عنده وتقطع الشارع والسوق كله خلفك وكمان مطعم تركي قريب كنا نتغشى عنده والسوق يوم السبت يتحول لكرنفال رائع من بسطات الورود للاستعراضات والفرق الجميلة والرسامين على الرصيف . وبصراحة التسوق في فرايبورغ روعه . معليش خرجنا عن موضوع الفندق لكن من كثر ماحبيت هذي المدينة وعشنا فيها ذكريات جميلة.
نرجع للفندق الغرف مجهزة بسريرين والصوفا بيد تلاقيه كمان مفروش , مساحة السرر ماشاء الله ممتازة يعني كبيره وتعتبر خيار ممتاز للعائلات
البنات اللي في الرسيشن جفصين اول ماجينا طلبت اضافة سرير للغرفه الثانية وبدفع التكلفة>> وانا مادري ان السرير الاضافي اساسا موجود >> المهم هذي انفتحت عليه ليه انتوا كم شخص وليه ماكتبتوا كده في الحجز احنا 2 كبار و4 اطفال وانا كاتبه 2 كبار و2 كبار يعني حقهم ماخذينه لكن اش تقول طلعتلنا المانية رزيلة حبت تتفلسف وتكملة الموقف جاتنا اختي ثاني يوم ووصلت الفندق واحنا محنا موجودين واستلمتها ليش ماقالوا لنا ولازم تدفعي رسوم اضافية عن كل يوم 15 يورو وكانت هذي قيمة السرير الاضافي في الغرفه لكن اللي حصل انه ماجابوا سرير اضافي وماكان اصلا فيه مساحة في الغرفة وكانت السرر كفاية . وعند التشك اوت اضافوا الرسوم على الفاتوره ودفعها زوجي ولا كلمهم.
ع العموم هذا الكلام لايخليكم تترددوا عن الفندق . ترى احنا نفسنا لو رحنا فرايبورغ مره ثانية ماننزل الا فيه. وعلى فكره فيه مكيف وسعره ارخص من فنادق اربعه نجوم ومافيها مكيف.
فرانكفورت ADINA APARTMENT HOTEL FRANKFORT NEUE OPER
الفندق ممتاز بصفه عامة
الموظفين ودودين
الخدمه ممتازة
الشقه غرفتين وصاله وحده من الغرف رئيسية بحمام , فيه صوفا بيد في الصاله طلبنا شراشف ومخدات واستخدمناها
النظافه ممتاز

فيه 3 شاشات تلفزيون

المطبخ مجهز وفيه غسالة صحون وغسالة ملابس

الموقع : يعني تمشي شويه للسوق وكنا نروح يوميا ومانحس بالمشوار , فيه مطعم تركي في الشارع اللي خلفه في الزاويه لوخرجت من الفندق يمين في يمين واذا طولت كمان فيه مطعم اظن اسمه الامير تابع لفندق وفيه بقاله هنديه في الشارع اللي وراه ومن الفندق تخرج شارع قدام تلاقي النهر.
كده انا تعبت ارجوا نه يعجبكم هذا الجزء والى اللقاء الى جزء آخر..