الكويت المسافرون العرب

أكتشف العالم بين يديك المسافرون العرب أكبر موقع سياحي في الخليج و الوطن العربي ، يحتوى على أكبر محتوى سياحي 350 ألف استفسار و نصائح عن السفر و السياحة, 50 ألف تقرير سياحي للمسافرون العرب حول العالم و أكثر من 50 ألف من الاماكن السياحية و انشطة وفعاليات سياحية ومراكز تسوق وفنادق، المسافرون العرب هو دليل المسافر العربي قبل السفر و اثناء الرحلة. artravelers.com ..
توبليرون
11-12-2022 - 05:55 am
السلام عليكم
احبابي الكرام ...اليوم راح نشوف ليلة من ليالي رمضان وهذ الليله دأبنا على القيام بها في كل يوم جمعه ببيت الوالدة الله يحفظها ويحفظ جميع امهات المسلمين وصادف هالجمعة ليلة القرقيعان ....
تجمعنا ببيت الوالدة يبدأ قبل الأذان لصلاة المغرب والأفطار والتجمع عند التلفاز لمشاهدة مدفع الافطار
وسماع الاذان حسب التوقيت المحلي لمدينة الكويت وضواحيها
قام الجميع بأكل التمرات والرطب ثم ترديد دعاء الافطار بصوت مسموع حتى يردده الصائمون الصغار معنا
وهذا الرطب البرحي المفضل للعائله
بعد ذلك تم شرب الماء او اللبن او العصير وطبعا سيد مشروبات رمضان الخليجي
الفيمتو
توكلوا بعدها الرجال للصلاة واحنا بعد
الحين نشوف الفطور وهو هالمرة مو بس شغل ام محمد لا يكون كل عايلة جايبين طبق وهذه العادة معروفة عند الكويتين بايام رمضان او غيره من تجمعات ...ولان تعرفون رمضان
فأغلب الاخوان يفضلون الفطور في بيوتهم العامره
المهم هذا فطورنا والاساس فطور ام محمد
الاطباق والملاعق وبداية البوفيه
سلطة الناتشوز من عمل بنت اختي ...احب طعمها
سلطة النقانق والجرجير..واكيد الجبن صورتها قبل الخلط
سلطة الباذنجان والزعتر وطبعا فيها خس وبطاطس والصلصه
بس هي طلبي ولكن ما اعرف تفاصيل مكوناتها
احبها جاهزة خ
برياني الدجاج بالطريقة الكويتيه
الدقوس ضروري على السفرة الكويتيه
التشريبة سيدة المائدة الكويتيه في رمضان
شوربة العدس
صب القفشة
فطاير متنوعه من عمل اخوي ...لذيذة جدا
مخففين منهم
طبقي مطلوب من بعض الخوات ...لانه لذيذ الطعم
سندويشات منوعه طالبتهم اختي
احنا نسميه كباب بس اسمه الحقيقي على ما اعتقد خبز عروق
ورق عنب ..من عمل اختي
كمان سندويشات ...طلب لاختي الثانيه
بيتزا الجبن وبيتزا السجق
وبعد الاكل هذا اكيد يبيله تقعد الراس لكل صايم وهذا الشاهي
والقهوة العربيه
وبعده صار وقت فرحة الصغار واللي كانوا ينطرونها كل سنة بفرحه كبيرة
وهو وقت التقرقع لهم
واكيد الكل حافظ والا ها ما راح تحصلون قرقيعان
نبدأ بأنشودة البنات
قرقيعان وقريعان **** بيت قصير ورميضان
عادت عليكم صيام**** كل سنة وكل عام
يا الله سلم ولدهم **** يا الله خله لمه
عسى البقعة ما تخمه**** ولا توازي على أمه
عطونا الله يعطيكم**** بيت مكة يوديكم
يا لمكة بالمعمورة**** يا ام السلاسل والذهب والنورة
اما الصبيان الله يحفظهم دايما يقولون
سلم ولدهم يالله خله لامه يالله.
هذا اذا لم يكونوا يعرفون اسم الولد وفي حالة تعرفهم عليه يتذكرون اسمه او اسمها قائلين بصوت واحد، سلم عبدالله او فاطمة
والحين نشوف قرقيعان عيالنا ولبس الاولاد
اللبس سروال وفانيله عجبني الفانيله عليها قواقع بحريه
والسروال عليه هالحركات شبك وقواقع هذا للرجل اليمين طبعا
وهذا جهة اليسار نفس الوزار وعليه رسمة ولد متوزر
استراحة محارب ...قصدي مقرقع
تفضلوا من جيسي
وهذا لبس بنوتاتنا دراعه زري
يقولون لكم تفضلوا
القرقيعان بالطبق الخوص الطريقة القديمة
وهذه بالعلب الحديثة
وهذه لولد بنت اختي شايفين الرسمة وين ...اي شطار هذه
الرسمة موجودة على نص الدينار الكويتي وهي كانت مرسومه بعد على
الصديري ماله اول صورة في لبس الاولاد فوق
وهذه علبة قرقيعان اخته ...وطبعا الرسمه موجودة على ربع الدينار الكويتي
وهذا اخر قرقيعان حصلته
قرقيعان عيال خواتي الصغار
واخيرا اقول لكم
لا تنسون الفطرة ...زكاة الفطر
ان شاءالله يتقبلها منكم
وعساكم تعودونه وكل سنه تصومونه


رحلتي الى الكويت
التعليقات (9)
q8ya metnaqla
q8ya metnaqla
ماشاءالله ام يوسف عليكم بالعاافيه الفطوور
وهالقرقيعان اللي يونس الكبار قبل الصغار
انا يقرقع عطوني قرقيعان
عليكم بالعافيه وعساكم من عواده ان شاء الله

الشايب العاشق
الشايب العاشق
ما شاء الله
تقرير عشنا معه لحظة بلحظة
الف شكر لكم
و عساكم من عواده .
و كل عام و أنتم بخير
تحياتي ،،،

ام هدوله
ام هدوله
تسلم ايدج يا احلى خاله عالموضوع الرائع ولمساتج الفنية اهي اللي تحلي قعدتنا وانشالله يعوده علينا كل سنة

dl3 $hrgawy
dl3 $hrgawy
الله يتقبل منا و منكم صالح الأعمال ..
بالعافية عليكم.. و الله يخليكم للوالدة و يخليها لكم يارب
بس عندي سؤال خبز العروق فيه لحم مفروم ؟؟

سلطان المجمعة
سلطان المجمعة
ماشاء الله تقرير جميل ورائع
وتسلسل الاحداث شوقتنا لمتابعته
يعطيك العافية أختي الكريمه على هالجهد المميز
تقبلي تحياتي

توبليرون
توبليرون
q8ya metnaqla
اهلا بحبيتنا مشرفة الكويت نورت الكويت برجعتج اعتقد كنتي مسافرة ......القرقيعان واهل القرقيعان كله لج تستاهلين.....الفطور حلو باليمعه الحلوة واليهال والقرقيعان لازم ما نترك تراثنا ....مع ان تصدقين هالسنة قليل اللي يقرقعون ...
يعافيج ربي ...وعساكم مو عواده

توبليرون
توبليرون
الشايب العاشق
الشكر لمروركم الغالي اخوي الغالي ابو عبدالله ....نور المنتدى كله بمرورك ...وهذا من ذوقك اخوي وعساكم من عواده

توبليرون
توبليرون
ام هدوله
هلا والله بام وليد ....شفتي سلطاتج خ والجمعة حلوة دايما بوجود ام محمد الله يطول بعمرها والخوات العزيزات واكيد انتو بنياتنا
وعساكم من عواده .....السنة اليايه ان شاءالله نبي قرقيعان لكل اعضاء المنتدى

توبليرون
توبليرون
dl3 $hrgawy
ويتقبل من جميع المسلمين ان شاءالله ...
الله يعافيك حبيبتي دلوعتنا ...
الله يخلي لك كل غاليك....
بالنسبة لخبز العروق اي فيه لحم مفروم ...طحين ...خضار ..ويقلى بالزيت......اسعدني مرورك الكريم


خصم يصل إلى 25%