مافي مواقف قريبه من المطار تكون امان ؟؟ لأني سمعت عن مسجد قريب من المطار فيه مواقف وكذلك مجمع الظاهر فود سنتر أو المول -- وهل يتوفر تكسي هناك لتوصيلي للمطار ؟
الفترة 7 أيام

مرحبا أخوي
مواقف مطار الدوحة الدولي غالية (5 ريال في الساعة) والمواقف طويلة الأمد أرخص بقليل بعض الشيء بنظام اليوم أو اعتقد 2 أو 3 ريال في الساعة مب متأكد.
المواقف هي مع مبنى المغادرين a و b ماتحتاج لتاكسي حتى تصف وتروح المبنى.
لاتوقف سيارتك عند المسجد بتتخالف واحتمال يتم سحبها. صارت للوالد مرة كان مسافر أسبوع ولما رجع لقى سيارته سحبها المرور للحجز.
عند إشارات المطار بتلاقي مواقف لمطاعم وخلف هالمطاعم سوبرماركت كبير (سفير) وعنده مواقف... لكن أنت وحظك... عن تجارب... أنا صفيت كذا مرة ولله الحمد ما صار شي... لمدد ما بين يوم ويمين و4 أيام وأسبوع.
وعموماً.. إذا اتخذت هالقرار انك تصف عند هالمطاعم أو المحلات أو السوبرماركت... تقدر في أسوء الأحوال أنك توصل مبنى المغادرين مشي لمدة 5-8 دقائق والله يعينك على الجو هالأيام..
والله يحييك

بوفهد80
اخوي الغالي سمعت عن فندق اوركس اللي ملاصق للمطار لو صفيت سيارتي فيه مشكلة ؟؟
فيه صورة حطها احد الأخوان توضح موقع الفندق :
فديتك ممكن احداثية مواقف فندق اوراكس وهل احط السيارة في مواقف الفندق ولا خارج سور الفندق وهل احط السيارة وانا متطمن ؟ مايسحبونها ؟
وهل في سيارة تكسي اقدر احصلها توصلني للمطار؟؟
وهل الافضل انزل العائلة للمطار مع الشناط ثم اروح اوقف بالفندق وادور لي تكسي يوصلني للمطار؟

ما في في قطر فندق له مواقف برسوم، ماعندي فكرة عن هالفندق لكن حسب الخريطة انه ملاصق لحدود المطار وبالتالي تقدر تروح منه مشي الي مبني المغادرين.
اذا حصلت مواقف عامة تابعة للفندق تقدر تصف مااعتقد في اي مشكلة والله اعلم
أنصحك تنزل العائلة وتصف السيارة وعقب ترجع لهم
والله يوفقك

بوفهد80
بيض الله وجهك .. طيب عندك احداثية المطار
وكم مسافة مشي اذا بصف السيارة بالفندق وبمشي لصالة المغادرين ؟

وجهك لأبيض طال عمرك
للأسف ماعندي إحداثيات المطار
لكن عموماً.. إذا انت جاي بالبر من جهة السعودية... احسب من أول دوار تواجهه في الدوحة خذ الرابع يمين (قبل لا توصله ب 500 متر تقريباً بتلاقي على يدك اليمين محطة بترول التيسير وقبل الدوار محل PC One على يمينك بعد، بعد ذلك بس كمل سيدة عدي كل التقاطعات والإشارات لين توصل المطار.
مسافة المشي من هالمواقف إلى مبنى المغادرين في تقديري حسب اللي أشوفه في الخريطة أقل من 10 دقايق بالكثير
والله ييسر لك

احداثية المطار
كما ظهرت لي و عليك عند تسجيلها التاكد من صحتها من الجهاز بعمل زوم ومشاهدة المكان

بتوفيق
مواقف المطار السعة بخمس الريال وهناك مواقف طويله الامد تطلع ارخص ولكن لااعتقد انها اكثر من 3 ايام لذلك من الافضل تضع سيارتك في مواقف فندق لان اغلبها مجانيه ولا اعلم هل هذا مخالف او لا
بنسبة الى المطار فهناك اشارات تدلك على المطار من اول طريق سلوى

ماجد القطري
مشكور يالشيخ اجل شكلي بوقفها بموقف فندق اوركس

بوفهد80
بيض الله وجهك