الهند المسافرون العرب

أكتشف العالم بين يديك المسافرون العرب أكبر موقع سياحي في الخليج و الوطن العربي ، يحتوى على أكبر محتوى سياحي 350 ألف استفسار و نصائح عن السفر و السياحة, 50 ألف تقرير سياحي للمسافرون العرب حول العالم و أكثر من 50 ألف من الاماكن السياحية و انشطة وفعاليات سياحية ومراكز تسوق وفنادق، المسافرون العرب هو دليل المسافر العربي قبل السفر و اثناء الرحلة. artravelers.com ..
ابن فطفوطه
18-12-2022 - 12:02 am
السلام عليكم ورحمة الله وبركاتة ,,,
اللهم صلي وسلم على سيدنا محمد وعلى آله وصحبه اجمعين
احبائي واعزائي اعضاء منتدى المسافرون العرب الكرام
كل عام وانتم بخير وصحه وعافيه
هذا اول تقرير لي في هذا المنتدى وان شاء الله مو اخر واحد بقدرة قدير
وهالتقرير راح يكون عن رحلتي الأخيره لبلاد الخضره والشلالات وبلاد الشعب الطيب (( سريلانكا ))
اول شيء احب ابدي فيه وهو شلون جت سالفه السفر إلى سريلانكا !!
كنت بشهر ابريل قاعد بالدوام الصبح ولا يجيني مسج من صديق مقرب لي بس صارلي فتره مو شايفه
المهم اطالع المسج وبعد السلام واخبارك وعلومك مكتوب بالمسج انا وجم واحد من الشباب ناوين نسافر بالصيف
واذا حاب تكون ويانا تشرفنا وكذا ، وذكروا لي انهم كانوا محتارين بين 3 دول !!
والي هي ( البوسنه - الهند - سريلانكا )
انا الصراحه انصدمت ودقيت على صاحبي وقلتله الحين آمنا بالله البوسنه والهند نقول عادي
بس سريلانكا شدخلها بالموضوع ها
قالي والله سمعت انها حلوه وكذا قلتله شوف سريلانكا انساها محنا ناقصين الي عندنا مكفينا هني ههه
وقلتله اشور عليك شور فكر بالهند او اندونيسيا احسن وانا راح اشوف بالنت التذاكر وكذا قالي اوكي
وقمت ابحث بالنت وشفت تذكره اندونيسيا غاليه قلت خل تولي خ
وشفت تذاكر الهند وسريلانكا ولا متشابهين وقلت بالله خل اشوف صور سريلانكا والطبيعه الي مصدقين انفسهم فيها
والصراحه شفت ويليتني ما شفت ههه صور روعه ما صدقت وجرني رابط على هالمنتدى وشفت التقارير
وانا افتر من تقرير لي تقرير ومو مصدق ودقيت على صاحبي وقلتله اقول فلان قال هلا قلتله سريلانكا ترا زينه خلاص خل نروح لها ههه قالي صج والله قلت ايه والله روعه
ومن هاذي اللحظه بدينا الاعداد للرحله وكنا بشهر ابريل 2011
وسامحوني بوقف الحين وبكمل معاكم التقرير اليوم بالليل لاني الحين بالدوام
وراح ابدا معاكم بفتره الاعداد للرحله واول يوم لنا بسريلانكا مع الصور الي ما تنعد ولا تنحصى خ
إلى اللقاء


التعليقات (9)
بو نعوم
بو نعوم
هلا والله ابن فطفوطة
يشرفني أني أول من وضع رد على تقريرك اللي يدو من بدايته مميز
سجلني متابع معك في الصفوف الأولى
ذكرتني بتقريري أول ما كتبته كنت في الدوام
أنتظر باقي التقرير بشغف لا تتأخر علينا يا طويل العمر

شيء آخر
شيء آخر
أحب الآسلوب العفوي و البسيط في التقارير ..
متابعين و لا تطول علينا ترى يذبحنا الإنتظار ..

موج الطبيعة
موج الطبيعة
يعطيك العافية ... تعبير سلسل وسهالة البوح لتكوين فكرة السفر لسريلانكا
ونحن بشوق لما تطرحة من تفاصيل وصور .
دمت بسعادة

ابن فطفوطه
ابن فطفوطه
الله يعطيكم العافيه على هالكلام الطيب والله شجعتوني من البدايه

ام نواف ونورة
ام نواف ونورة
حياك الله اخوي الكريم والحمدلله على سلامتكم ..
متابعين معاك رحلتكم الى سيلان ,,
بانتظارك

ابودحمي
ابودحمي
الحمدلله على السلامه
متابعين تقريرك الله يعطيك العافيه

TRAVELER121
TRAVELER121
ههه أجل صاف الدوام على جنب ..
في انتظار تقريرك يا ابن فطوطه

ابن فطفوطه
ابن فطفوطه
  1. وبعد ما نزلنا


السلام عليكم ,,
والحين ان شاء الله راح اكمل معاكم فتره التخطيط للسفر وشنو صار من احداث
اول شيء طبعا انهوست بسريلانكا وقمت اتابع تقارير الاعضاء الي هني واخذ معلومات منهم واخص بالشكر للعضو ملحان
لان تقريره كان حلو ومفصل وسلس وكنت ادخله شبه يومي واشوف احداثهم
وما اطول عليكم فكان عددنا 5 شباب متحمسين للرحله
واخوكم الي هو انا ما اتحمل اسلم الامور المهمه حق احد لازم انا اسويها واتأكد منها عشان ارتاح نفسيا
فتكفلت انا بامور الحجوزات سواءا الطيران او المكتب السياحي
المهم بعد بحثي بالنت لاسعار الطيران رسيت على طيران العربيه وكان سعر التذكره 110 دينار كويتي
وكانت الاسعار الاخرى مبالغ فيها فما اهتميت لها
وجمعنا فلوس التذاكر وحطيناهم مع بعض وواجهنا مشكله اني ما اقدر احجز من النت الا بالفيزا كارد
وانا ما كنت مطلعها فدورت من الربع هم ما لقيت عندهم فقلت مالي الا اروح لمكتب العربيه للطيران واحجز من عندهم ونخلص
فقررت اني اروح للمكتب هاليومين وقبل لا اروح اعتذر واحد من الشباب مننا عن السفر معانا لان ابوه تعب حيل واخذ فلوسه
والي صار ان ابوه توفى قبل السفر ب 10 ايام ( الله يرزقه الجنه يارب )
المهم حجزت بمكتب العربيه ل 4 اشخاص طبعا وخذوا علينا عموله 6 دنانير لكل شخص يعني طلعت التذكره ب 116 لكل شخص
وكان حجزنا من تاريخ 28/6/2011 الى 8/7/2011 لمده 10 ايام وانا اخترت هالتاريخ عشان تكون امور الدراسه مخلصه بهالوقت
بس والله تعذبت من النطره لاني لما حجزت كان باقي شهر و 20 يوم للسفره وانا مو صبور
وبعد الفرفره بالتقارير شفت ان مكتب عبدالعزيز يمدحونه حيل وراسلته وعطاني جدول لفنادق 5 نجوم
فشاورت الربع وقالوا غالي وراسلته مره ثانيه لفنادق 4 نجوم وهم قالوا غالي ههه قزروها صح
المهم راسلته بفنادق 3 نجوم ورضوا عليه
وكان الجدول كالآتي :
كاندي ليله في هوناس فولز
كاندي 3 ليالي في تيلانكا هوتيل
نوراليا ليلتين في غليندومير
كالوتارا 3 ليالي في تانجيرين
كولومبو ليله في سافاير هوتيل
واكدت على هالجدول وكان مع الفطور فقط ورسلت لهم المعلومات وكل شيء وتم الاتفاق على الدفع عند الوصول
وسبحان الله واحد مننا بعد جته وظيفه بالدمام لانه سعودي واعتذر عن السفر وكنسل تذكرته قبل السفر ب 5 ايام تقريبا
فراسلت مكتب عبدالعزيز وردوا علينا اذا كنا نبي غرفه ثلاثيه او غرفتين لاننا صرنا 3 الحين
واخترنا غرفه ثلاثيه وطلعت علينا ارخص والاجمالي كان 1650 دولار يعني كل شخص 550 دولار بس
المهم بقينا 3 صامدين وناطرين الرحله بفارغ الصبر
واتى يوم الوعد يوم 28/6 وكان وقت طيارتنا من الكويت الساعه 9:50 صباحا
واخذت وياي كامرتي السوني 12 ميغا بكسل والايفون مالي بس والله كنت ناوي اشتري نيكون دي 3100 قبل السفر بس ما صارت
وهاذي صوره شناطي بالمطار وانا انطر الربع
وطبعا مثل ما انتم عارفين طيران العربيه ترانزيت الشارجه
وهاذي تذاكرنا من الكويت الى الشارجه
وقعدنا ننطر الطياره وعيب العربيه عدم الالتزام بالمواعيد فتأخرنا ساعه كامله تقريبا
بس للأمانه طيرانهم حلو وكراسيهم حلوه ونظيفه
وهاذي صوره الشارجه قبل لا ننزل

وبعد ما نزلنا

وكان لازم نقعد اقل من ساعه على طيارتنا الثانيه بس مثل ما قلت تأخرت الطياره الأولى ووصلنا هناك ولا الشباب يبون يشترون شيء ياكلونه من المطار وقلت لهم يالله وخليتهم وقلت بروح اشوف الطياره الثانيه شنو صاير عليها
وعطيتهم صورتين ورحت عنهم
المهم لما رحت اسأل عن الطياره ولا الفلبينيات خرعوني يالله بسرعه احنا ناطرينكم الناس كلهم راكبين وانا انصدمت
ورحت اركض لربعي يالله ياهو بسرعه ورحنا نركض للطياره ولقينا جم سيلاني ناطرينا بالباص وركبنا معاهم وحركنا للطياره
وركبنا الطياره
وقالوا لنا ان مده الرحله 4 ساعات ونص من الشارجه لي كولومبو والطياره كانت مليانه على الاخر
وهاذي صوره الغيوم واحنا بالجو
وقبل الوصول تقريبا بساعه او ساعه ونص عطونا بطاقه الدخول لسيريلانكا لان مافي فيزا للدخول وتعبيها ببياناتك بالانجليزي
ووصلنا لكولومبو الساعه 7 ونص مساءا ومتأخرين ساعه كان لازم 6 ونص والمشكله المكتب ناطرنا بالاستقبال فقمت احاتيه
وهاذي الصوره اول ما دخلنا للمطار
ورحنا عند ختم الجوازات ولا شافنا الشرطي الي يختم وينادينا تعالوا عندي تعالوا ورحناله ولا يطرد السيلانيه الي عنده ههه والمشكله شقام يسوي قام يتبسم ويأشر على مخباته وانا مت من الضحك وقتله اي افا عليك بس
ولما خلص الختومات اخذت منه الجوازات وقتله مشكور وخليته خ
ورحنا ننطر شناطنا
وقعدنا تقريبا 20 دقيقه ننطر وشناطنا مو راضين يطلعون ورحت سألت واحد ولا يقول شناط العربيه مو هني مكان ثاني وقمت اضحك على نفسي ورحنا لهم بسرعه
طبعا اخذنا اغراضنا وكل شيء ودخلنا قاعه الاستقبال ولا مافيه احد شايل اسمنا ولا شيء
وقمت اسأل عن مكتب عبدالعزيز محد يعرفه قلت وليه شنو السالفه ولا واحد ما قصر من اهل مكاتب السياحه خذاني وعطيته رقم المكتب ودق عليه
ولا طلع الحبيب عباله احنا جايين بطيران الاماراتيه الي جايه قبلنا بفتره وشاف محد وصل مننا ومشى وقال خلاص انطروني جايكم
ورحت اخذت شريحه ديالوغ ب 1000 روبيه وفيه رصيد 950 روبيه ( المكالمات الدوليه فيه بالنسبه لنا هني بلاش )
من هالمكتب
وصور في قاعه الاستقبال بالمطار
طبعا قعدنا ننطره وطول علينا تقريبا ساعه يمكن
وبس وصل ولا معاه الملف مالنا وفيه كل شيء العقد والجدول وكل شيء ووقعت على العقد ودفعنا فلوسنا وودانا للسايق برا
هذا الملف
طبعا حطيته باسم رفيجي لانه هو اكبر واحد
وهذا السايق مالنا والباص ماله
وهذا هو السايق واسمه فارس وكان يشتغل بالكويت قبل ويتكلم عربي مضبوط واحلى مافيه انه طويل بال ولا يكشر
وحركنا تقريبا الساعه 9 بالليل وبدينا طريقنا لفندق هوناس فولز
وطبعا مثل ما انتم عارفين الدنيا ظلمه عندهم وكل شيء يتسكر مبجر وقعدنا نمشي بالظلمه ولا شايفين شيء
وقلناله شوف لنا مطعم نتعشى فيه يقول كل شيء مسكر الحين بس راح اشوف لكم ويمكن نلقى
ولقينا مطعم ودخلناه ولا يقولون سكرنا خلاص ( احباط ) خ واخذنا منه كولا وطلعنا واكلنا شيبس وبسكوت كنت جايبهم معاي من الكويت
واستمرينا بالطريق وملينا والي انسدح والي حط راسه ونام
وبعدين دخلنا طريق جبلي ظلمه ما تشوف فيها اي شيء وكان طريق وعر وممل بالليل لان طول هالطريق تقريبا 35 كيلو صعودا
ووصلنا للفندق والساعه تقريبا 12 ونص صباحا وسوينا تشيك ان
وهذا لوبي الفندق
وهذا ممر الغرف وطبعا ظلمه والناس كلها نايمه
وهاذي غرفتنا
طبعا السرير الي بروحه هذا حقي لاني ما احب احد يمي خ
دوره المياه اعزكم الله
طبعا بدلنا ملابسنا وتوضينا وصلينا كل الصلوات جمع وقصر ما عدا الفجر لاننا كنا مصلينها
وسكرنا قفل الباب عشان ما يدخل علينا غوريلا ولا شيء خ حدي متأثر بهينج كونج
وكل واحد طب بفراشه مثل السباحين من كثر التعب وانا كنت جاي مواصل ومو نايم
بس هذا ما كان مانعني اني اضبط المنبه على الشروق عشان ما تطوفني هاللحظات خصوصا واحنا قاعدين فيه بس هالليله
وحطيت المنبه على الساعه 5 الفجر وحطيت راسي ونمت
واكمل وياكم باجر ان شاء الله واول ما قعدت شنو سويت والصور الي صورتها بهذا اليوم الي كان اكثر يوم صورت فيه والسبب روعه المناظر المحيطه بالفندق
وسامحوني على الإطاله لان هاذي بدايه التقرير واحتاج اني اقول كل شيء واوعدكم المرات الجايه تكون مختصره شويه واخلي الصور تتحدث اكثر مني
الى اللقاء

ابن فطفوطه
ابن فطفوطه
الله يسلمكم ويخليكم ما قصرتوا
traveler121 ههه اي والله صاف الدوام وشكلي بداوم هني بالمنتدى
شرفني مروركم العسل


خصم يصل إلى 25%