بما اني اليوم سجلت في الترم الصيفي والأختبارات بعد ثمان طعش يوم ورحلة اندونيسيا كانت محصلتها الف وميتين صوره لذلك صعب اصنف وافرز واعدل وازبط تقرير مفصل لكن بعطيكم مقتطفات وان شاء الله تحوز على رضاكم
أولا البلد جميل ويستحق الزياره
واهله عسل وطيبين
وامان ولله الحمد والمنه
ولغتهم سهله
وافراد الرحله انا {{ باللهي احسبك ما رحت ومصور بالزوم من سطح بيتكم هههاي
وابناء عمتي راكان وعلي
طبعا كلنا مصورين وكل واحد معه عدته بس صدقوني بما انها اول زياره فضلت في اوقات كثيره اني استمتع بالمشاهد عن اني اصور لذلك ما خرجت بالصور الي كنت أأمل اني اخرج بها من بلد جميل مثل اندونيسيا
من اجمل التجارب في اندونيسيا وجبل بونتشاك تحديدا
الدباب

طبعا اول يوم ركبته كنت متجود=متمسك بالسواق بأقوى ما عندي
بعد يومين ثلاثه صرت احط سماعات الأيبود وماسك الكميرا اصور والدباب طاير
وهذا بوليسهم مصوره وانا راكب بالدباب

وهذا ابوخالد مبسوط بالهبايب الي تجيه بالدباب وسواقه الزاحف خاش معنا جو هههاي

طبعا الأماكن السياحيه حدث ولا حرج
البلد سياحيا من الدرجه الأولى وللجميع شباب وعوائل
جلست 16 يوم وفيه اماكن كثيره حاطها بجدولي لكن ما حصلي فرصه ازورها
لذلك لا ملل في اندونيسيا
وهذي احد الأماكن وهي حديقة الزهور مكان جميل ومتعوب عليه لكن بالنسبه لنا كشباب تحسفنا على المشوار لانه ما تهمني الزهور ولا العاب الأطفال الي فيها لذلك لقيت سكة قطار صغيره ومسكت عليها

سفاري وما ادراك ما سفاري
من جد كرهت حديقة الحيوان الي بالملز
كل الي اقدر اقوله انها كلام كبير ولا تنسى
وهذا بس = قطو كبير {{ وراه ما قلتها بوجهه هههاي
مدري ليه هالصوره تذكرني بدعاية شوكلاطه الي عليها الأسد مدري شركة انتاج افلام كرتون

وهذا من الحيوانات النادره الي اول مره اشوفها
النمر البنقالي
لا احد يضحك صدز بنقالي وما يهج اذا قلت جوازات جوازات

واذا خلصت من كل العروض لا يفوتك عرض الكوبوي تدخله مجانا
من جد عرض احترافي ويبهرك وتحس انك حاظر تصوير فلم امريكي

طبعا مصنع الشاهي كانت من الأشياء البايخه الي رحت لها لكن الحدائق الي داخله جميله جدا وتستحق الزياره والكوفي شوب الملاصق له وهذي صور للحدائق الي داخل المصنع كلها شاهي بس جب ابريقك وسكرك
الصورتين كلهم اتش دي ار وبدون حامل عشان كذا الدقه لك عليها

وآخر يوم بالفله مسكت على يعسوب والصبح بعد

طبعا اول مره اشوف هالحشره من هالقرب واكتشفت انه صدره لو تدقق فيه كان مرسوم عليه صورة رجال لابس نظارات شمسيه وشنب وسكسوكه
سبحان الله

وسلامتكم واتمنى انه هالملخص اعجبكم وارحب بأنتقاداتكم وتساؤولاتكم