دبي المسافرون العرب

أكتشف العالم بين يديك المسافرون العرب أكبر موقع سياحي في الخليج و الوطن العربي ، يحتوى على أكبر محتوى سياحي 350 ألف استفسار و نصائح عن السفر و السياحة, 50 ألف تقرير سياحي للمسافرون العرب حول العالم و أكثر من 50 ألف من الاماكن السياحية و انشطة وفعاليات سياحية ومراكز تسوق وفنادق، المسافرون العرب هو دليل المسافر العربي قبل السفر و اثناء الرحلة. artravelers.com ..
سمية بنت عبدالله
07-11-2022 - 12:55 am
  1. السلام عليكم ..

  2. أمس تعرضنا لموقف أنا وزوجي مانحسد عليه


السلام عليكم ..

أمس تعرضنا لموقف أنا وزوجي مانحسد عليه

كنا قبل أمس في ابن بطوطة نتمشى وجانا مصري وجلس يقرق معنا بكلام شكله حافظه من 10 سنين من كثر مايكرره والسالفه ومافيها قال لنا ابسألكم سؤال واذا جاوبتوه بتربحون معنا اقامة في اي من البلدان التالية واذكر حدد تونس ومصر واسبانيا وامريكا وماليزيا وكم دولة معاهم
شامل اقامة ورحلات سياحية وتنقلات بالعربي كل شي الا التذاكر ليه علشان تروح ويوهقونك هاهاها
المهم جاوب السؤال رجلي وجلس يعبي بياناتنا بكوبون وقال بكرا روحوا لمقر الشركة في مركز الغرير اللي فيه صيف دبي وبيعطونكم نبذه عن الشركة وبيعطونكم البيانات حقت السفرة وغيرها من الأمور وهو يعبي قال لزوجي وش تشتغل قال انا طالب قال مايصحش كدا بعدين مابتربح الجايزة قول لهم ان راتبك فوق 20000 وانك موزف حكومي قال طيب بس اهم شي استلم الجائزة قال له ايوه حتستلمها بكرا موعدك الساعة اربعة ..
ويروح من عندنا ونغدي تقل مخفوفين من يحصل له اسبوع فندق 5 نجوم ههه .. ونرجع ننام ونقوم ونستعد ونكشخ ونروح .. رطعونا رطعة بالسوق الله لايوريكم وبعدين جانا مصري وودانا للمكتب حقهم اخذوا الكوبون مننا ودخلنا نعبي البيانات .. قالوا ان عندنا نظام وحابين نسمعكم اياه حبيتوه اهلا وسهلا ماحبيتوه خذوذوا كوبونكم وتوكلوا طبعا اسم الشركة ابعرضه علشان ماأحد ينغش فيها اسمها المتوسطية للاستثمارات السياحية
طبعا العصابة اللي تعطيك الشرح واللي ماسكة الشركة كلها اردنين الموضوع فيه ان !!
ودخلنا صالة كل اللي فيها خليجين دليل انهم يبون يزرفونهم عن غيرهم .. وجلس الاردني ساعة يسولف معانا وودنا نقول له الزبدة ياخي !! همن بدى يشرح وانه نظام تمليك اسبوع بالسنة ومدري كيف ويحاول يقنعك بالأشتراك وانك تصير من اعضاء الانتيرفال انترناشيونال واذا تبغى تشتري معهم في احد المنتجعات يسمونه ملكيه بنظام التقسيم الزمني وخربة وجلس يشرح لنا على ورق لمدة 5 ساعات جاني النووم وهو يشرح ورجلي متحمس لأن فيها استثمار 12 اسبوع وخرابيط .. شوي وحنا جالسين يصفقون كل اعضاء الشركة حنا انهبلنا وبالأخير توضح ان واحد عماني اشترك والله رحمته كبير بالسن وجلسوا يخذرفون عليه وصدق .. وكم عائلة طلعت بدون ماتشترك وينشبون لهم نشبة أليمة إلا اشتركوا يوم خلص قرق قلنا السعر من الأخير طيب ماعطيتونا اياه !! جتنا مدامهم هي اللي مترأستهم وقالت السعر عنا 71450 درهم , بعد ماسوينا خصم صار 50000 درهم !! الموضوع فيه انا ماشفنا شي كله كلام على أوراق مافيه شي يثبت وقالوا ياتدفعون الحين او يروح عليكم عرض الخصم وعرض 12 اسبوع زيادة وعرض طقم ذهب .. قلنا لازم نتخذ شور من العايلة وتقوم بوجيهنا ليه انتم ماتعرفون تقررون لحالكم طيب حنا صغار مالنا خبرة بالحياة وهذا مبلغ بالنسبة لنا كبير قالت لا لاتتصلون على احد قلنا اجل مو شارين قالت طيب بس ابعطيكم دقايق وطلع رجلي برا الغرفة وطلعت معه وكلمت ابوي علطول قال نصب بنصصب بس زوجي اعجبه العرض ومتخوف .. جلس يقنعنا الاردني اللي كان يشرح لنا وقال له زوجي طيب ليه انت مااشتركت قال انا ماني متجوز هيا للعوايل فقط .. قلنا كثر منها شوي وتجي عجوزهم الشمطاء , وتقول ماقررتوا ضايق صدرها على الفلوس قلنا مابعد وتجلس تقنعنا ايش اللي مخوفكم قال زوجي نبي اوراق اثبات على الشركة وتنلخم وتروح تجيب الاوراق والله الاوراق كلها مصوره وبعضها مافيها ختم شك زوجي قالت عطنا اقساط دفعة اولى 17000 قال مهب سهلة وانا للحين ماتأكلت من مصداقية الشركة وقامت تلعلع ليه منتا واسق فينا ومن هالسالفة قالت طيب ادفع لنا 5000 ورفض قالت طيب 2000 جيت قمت انا خلاص وصلت معي إلا يبوننا ندفع لييه والله بالأخير بتقول درهم ادفعوا لنا !
يوم قلنا آسفين مانبغى عرضكم وتقوم معصبة وتطلع بدون اي كلمة شكر لأنكم استمعتوا لنا وعطونا بطاقة السفرة المجانية اللي اكتشفنا انها شي ماله اصل من الصحة ..
والله تحمدنا ربي اننا ماغامرنا لو بألفين تصير لنا ليلة بأحلى المنتجعات أبرك , جربوا اكتبوا اسم الشركة بالعم قوقل والله مالقيت أحد يمدحها ولو جتكم في المستقبل احذروا منها .. وآسفة للاطالة بس والله من الغبنة اللي فيني


التعليقات (9)
غادة الرياض
غادة الرياض
معروفين هذولي من عام 2000 وهم يلاحقون عباد الله
ويسمى نظام التايم شير
واذكر انو في امريكا نفس الشي نشبو لنا
وللاسف الي اعرفهم اشتركو فيه مالحقهم الا الفقر
لانو كل ماقلتي ابي احجز يقولون لك مافيه هالفتره
تطلبين النمسا يقولون لك ماعندنا الا في سيرلانكا
واكبر دليل
خوذي لك جوله في المسافرون العرب في كل الاقسام وجيبي لي واحد يقول انو حجزي نظام تايم شير
لا وازيدك عندنا محلي داخل المملكه بعد
نصب عيني عينك

saadf
saadf
شكرا لك على ذكر تجربتك وتحذير الاخرين
فعلا هؤلاء نصابين
واستغرب كيف دبي اللي مكافحة الجريمة فيها عالي وتاركين هؤلاء على راحتهم ؟؟
لا بد من ايقافهم عند حدهم
وانتم الحمد لله اللي فككم منهم والوقت اللي ضاع يعوضه الله

medo_r7
medo_r7
فعلا هذي الشركات كانت موجود بكثرة في السعودية و الان اختفت و طلعت بدبي
انا توهقت معهم اول ايام زواجي عام 2005 و دفعت اول قسط تقريبا 800 ريال و لا عاد دفعت لهم شي
درس و تعلمت منه
مشكورة

الناصر
الناصر
فعلا شركت نصب في نصب
واكبر دليل انهم متواجدين في مطار دبي عند وصول رحلات الخليج فقط
يجب على دولة الامارات ان تمنعهم

البداية فكرة
البداية فكرة
مشكورة اختي على النصيحة وجزاك الله الف خير ...وسبق تعاملت معاهم في عام 2007 وانا عارف انهم نصابين لكن زميلي الله يهديه قدروا يسحبونه لمقر الشركة وبالاخير جت سليمة ولا اشتركنا ....
الله يذكرها بالخير فيه فتاة بحرينية شافتنا انا وزوجتي في مجمع الدانه في البحرين واقفين عند موظف شركة نصابة يقول لي عندي سؤال ... فأنا احب اجاوب على الاسئلة فقط وامشي ههه مااستمر معاه ولا استمع لشرحه ابدا .... فمرت من جنبنا البحرينية وقالت لزوجتي بصوت مسموع : خليهم يولوا ذولا نصابين ....
الموظف احتاست علومه وسكت وانا مشيت وحاس انه وده اني امشي لانه كل شيء انكشف وماراح يقدر ينصب علي ..ههه

البداية فكرة
البداية فكرة
الناصر
طيب وش رايكم ياجماعة نرسل ايميلات لحومة دبي نشتكي من الشركة ذي وهم مابيقصرون ... لان كتابتنا بالمنتدى مايكفي بالرغم من اهمية التحذير منها ...

أبو فيصل 2007
أبو فيصل 2007
مشكورة أختي حتى بالرياض موجودين للاسف !

سمية بنت عبدالله
سمية بنت عبدالله
غادة الرياض
اجل يستهبل علينا امس ويقول مافيه بالسعودية هذا النظام لأن مافيها سياحة !! ولاتقدرون تشتركون في النظام الا من عندنا

سمية بنت عبدالله
سمية بنت عبدالله
saadf
والله إني مستغربة للحين ماأحد من أهل البلد رفع عليهم دعوى قضائية :/ , واذا على الوقت القهر اني كنت محددته للمقاضي وراح علي اليوم بنرجع ولاشريت شي


خصم يصل إلى 25%