محب السعودية
08-11-2022 - 01:58 am
السلام عليكم.
ان شاء الله سوف ازور قطر لمدة يومين تقريبا ..ونحن عائلة
ياليت تعطوني شقق او فنادق غرفتين ثلاثية و صالة لان عددنا 6 بحيث كل 3 اشخاص في غرفة.
واهم شيء النظافة والموقع المناسب
وبغيت برنامج سياحي لمدة يومين يصلح للعوائل ..
وهل اخلي اليومين كلها في الدوحة بس..؟؟؟؟؟
وعليكم السلام ورحمة الله وبركاته أخووي محب،،
صباحك ومساك كله نور وسروور،،
تنورون بلدكم الثانية أنت والعائلة الكريمة إنشاءالله،،
بخصوص الشقق عندك خيارات كثيرة فمنها شقق لافيلا وعندهم فروع كثيرة، وشقق فندق هوليدي فيلا (Holiday Villa) هذوله مكانهم في منطقة المنتزة وبصراحه شققهم نظام فندق وجديدة وروعة ودايما يكون ضمن البكيج عندهم الفطور المجاني مع استخدام النادي الصحي اذا ما خاب ظني، وعندك بعد ششق رتاج ولهم فروع كثيرة لكن انا انصحك وبقوة في شقق فندق هوليداي فيلا واسعارهم ترى حلوه ومعقوله،، وممكن تحجز من موقعهم في النت،انزين الحين خلنا نجي على الاماكن الي تقدر تزورها في بلدك الثاني قطر،،
1- سوق واقف (طبعاً ما عليه كلام ويفضل زيارته الفترة المسائية، يتميز بالمطاعم والمقاهي والشيش والاكلات التراثية)
2- كتارا (الحي الثقافي) مكان حلو يستحق الزيارة وتتمشى فيه بعد في الفترة المسائية وعندهم شاطىء جميل ونظيف بس دخول الشخص بمئة ريال لكن بما انكم 6 اشخاص ممكن يرخصون لكم يعني خصم خاص.
3- اللولوه (طبعاً هو قريب من الحي الثقافي يعني كلهم في منطقة وحده وهي الخليج الغربي) مكان حلو يستاهل الزيارة تشوف الطراز المعماري الحديث وتتمشى على المارينا وتشوف اليخوت المختلفة وتتقهوى هناك في الكوفي شوب بس ترى حاسب تروح صوب محلاتهم مع المراه لانه اسعارهم نار وايد خ.
4- متحف الفن الاسلامي ويستحق الزيارة الفترة الصباحية.
5- مجمع الستي سنتر تتمشى هناك وعندهم مطاعم ومنطقة العاب حلوه وتقدر تدخل السينما وتشوفون لكم فلم حلو (فلم هندي بحيث يكون اكشن على رومانسية ورعب على مغامرات كله في فلم واحد ههه).
6- مجمع فيلاجيو يستحق الزيارة بصراحة لانه هو مختلف عن باقي المجمعات من ناحية التصميم وفي منطقة العاب حلوه وتصلح للكبار.
7- حديقة اسباير تستحق الزيارة.
أي خدمة ثانية طال عمرك ترانا في الشوفة،،