1. السلاك عليكم ورحمة الله وبركاته

السلاك عليكم ورحمة الله وبركاته

اول حاجه اتمنى تعذروني جميعا لاني ماعرف اسوي تقرير .. ولااعرف أرفق صور لاني جديده في المنتدى وعالم المنتديات.. لكن بقول الشي اللي شفته واللي سحرني واللي جنني هي مدينة (كولمار) الفرنسيه colmar يمكن يكون الكل يعرفها .. بس من ناحيتي ولامره حصلت حد كاتب عنها وحتى اذا اجي اسوي سيرج احصل كولمار ماليزيا ..
احنا كنا ساكنين في منطقة فرايبورغ الالمانيه علشان يورب بارك وزوجي غرامه خريطة قوقل يحب يشوف شنو اقرب شي لنا ونقدر انروح له بالسياره .. وقالي في مدينه فرنسيه قريبه ودي اشوفها بعدها رحنا سالنا عنها قالوا لنا انها كثير حلوه وقريبه بالسياره اقل من ساعه.. توكلنا على الله ورحنا واحمد ربي ان احنا رحنا لها لان من جد هالمدينه فيها سحر غريب من اول نظره عشقتها عشق موطبيعي على طول قلت لزوجي فديتك أشكرك لانك جبتني هنا وطول الوقت اقول ياليتنا سكنا فيها بدال فرايبورغ من حلاتها .. وبعد من كثر ماحبيتها خليت زوجي يجيبني لها مره ثانيه قبل لانسافر قلت له لازم انودعها.. وانا فيها حسيت اني رحت عالم غير اللي انا فيه يمكن اتحسون اني ابالغ بشعوري بس والله هذا اللي صارلي ..
المدينه في الشكل قريبه من سترازبورغ لكن في نظري انا اشوفها احلى من سترازبورغ والشوبنق فيها خيالي شريت لي ولعيالي بمبلغ ابدا ماتوقعته وبعد في منطقه جنبها اسمها (ميلوز فرنسيه) بعد تسوقنا فيها سوقهم روعه لكن شكل كولمار احلى بمليون مره .. عن جد مدينه عريقه من تدخلها تحس ان القرن رجع فيك 100 سنه ورا..
ولحسن حظي اول مادخلنا هالمدينه كان الجو بارد وممطر ولقينا قطار صغير يسوي تور على المنطقه على طول ركبناه وحصلنا في كولمار بعد متحف فيه اشياء من اثار الفراعنه وفيه بعد مومياءات كان صغير بس بعد حلو .. انصح اي حد يروح الغابات السوداء انه يخصص يوم حق كولمار وصدقوني ماراح تتحسفون وراح تدعون لي
انا جبت لكم روابط من اليوتيوب وفي كثير عن هالمدينه بس لازم تكتبون الاسم بانجليزي اللي يحب يشوف اكثر يدخل اليوتيوب .. هذا الرابط فيه شخص يعرّف بمدينة كولمار روحوا صفحة ويب وانسخوا الرابط بعدين لصق وانتر راح يفتح لكم
https://www.youtube.com/watch?v=nUFBpihEGWk
وهذارابط ثاني فيه صور كثيره لكولمار
https://www.youtube.com/watch?v=ENmjlpuzX4Y
اتمنى ان الموضوع ينال اعجابكم وأي حد زار هذه المدينه يعطيني انطباعه عنها
دمتم بخير جميعا