بشرى سارة لكافة اعضاء ورواد منتدى العرب المسافرون حيث تعود إليكم من جديد بعد التوقف من قبل منتديات ياهوو مكتوب ، ونود ان نعلمكم اننا قد انتقلنا على نطاق arTravelers.com
وهو النطاق الوحيد الذي يمتلك حق نشر كافة المشاركات والمواضيع السابقة على منتديات ياهوو مكتوب وقد تم نشر 400,000 ألف موضوع 3,500,000 مليون مشاركة وأكثر من 10,000,000 مليون صورة ما يقرب من 30,000 ألف GB من المرفقات وهي إجمالي محتويات العرب المسافرون للاستفادة منها والتفاعل معها كحق اساسي لكل عضو قام بتأسيس هذا المحتوى على الانترنت العربي بغرض الفائدة.

لمزيد من التفاصيل يمكنكم مراسلتنا من خلال نموذح الاتصال, العرب المسافرون على Facebook



abusalem abusalem
قبل يومين رجعت من سويسرا واليكم رد الجميل بهذا التقرير المصور
06-12-2014 - 03:09 am

سم الله الرحمن الرحيم
بداية أحب أبين لكم اني لاأجيد كتابة التقارير وخاصة التقارير السياحية .. يعني لو أني مرشد سياحي يمكن تخسر الدولة اللي راح اكتب عنها  لكن الله بيعيني انشاءالله وبكتب لكم اللي بقدر عليه ومدعم بالصور اللي تعجبكم .. واللي خلاني أضغط على نفسي واكتب التقرير هو رد الجميل لهذا المنتدى والشباب الطيبين اللي فيه واللي ماقصروا بمساعدتي من كل النواحي وخاصة لجلب المعلومات والاحداثيات والمواقع وأسماء الفنادق وأشياء كثيرة أستفدت منها والشكر كل الشكر لجميع أعضاء هذا المنتدى وأخص بالذكر الشباب اللي ساعدوني وهم :
مشرفة القسم السويسري الأخت (swiss heidi )
خالد الجويسري
Janahaya
ابو طلال*
وماأنسى أخونا saleem20
اللي زودنا بجميع أحداثيات المواقع السياحية في كل من المانيا وسويسرا وفرنسا والنمسا .
وفعلا خدمتني كثير والله .
نبدأ التقرير على بركة الله .
قبل كل شي وقبل ماأقرر رحلتي فتحت أحدى الجرايد الكويتية ووجدت عرض على الخطوط الجوية الكويتية ولمدة بسيطة تقول بأن التذكره لجميع دول أوروبا على 140 دينار تقريبا .. قلت والله أنها فرصه أخذ لي جولة لمدة أسبوع نريح فيها شوي ونرجع .
المهم العرض على اوروبا .. قلت وين تروح يابوسالم وين تروح .. فكرت ثم فكرت 
لندن وفرنسا والمانيا شفناها سبق لي زيارتها .. قلت مافيه الا سويسرا نشوفها .. المهم حجزت على جنيف عائلة شخصين فقط . وفعلا توجهنا الى جنيف وحجزت فيها يومين على حسب نصيحة الشباب وفعلا كانت النصيحة جيدة .. فعلا جنيف عادية جدا ويومين واجد عليها ..
وحجزت في فندق بريستول وكان جدا فندق طيب وموقع حلو وقريب من البحيرة جدا وقريب من فندق فورسيزن .
وكان تخطيطي كالتالي : جنيف انترلاكن ديفون والمدة ثمان أيام ومنها تجولنا على المناطق اللي قريبه منهم .
الآن أترككم مع صور جنيف والفندق


هذا فندق بريستول من برا






وهذا فندق برستول من الداخل






وهذه صور بحيرة جنيف



وماننسى البجعة اللي تشوفها بكل مكان


تابع





المشاركات

abusalem abusalem
قبل يومين رجعت من سويسرا واليكم رد الجميل بهذا التقرير المصور


واليوم الثالث صباحا أخذت أغراضي وركبت التاكسي لأتوجه لمحطة القطار على أنترلاكن دايركت .. بس الصراحه تبهذلت آخر بهذله بالقطار لأن معاي جناط كبيره وثقيله وكان فيه تبديلة قطار في العاصمة بيرن ومدة التبديلة 8 دقاقيق .. يعني لحق أو ماتلحق كيفك .. القطار صراحه جميل وتشوف مناظر حلوه .. بس فعلا تحسفت اني ماأجرت سيارة .. ونصيحة اللي مايأجر سيارة وهو رايح سويسرا لايروح أبدا أحسن لأنها ماتصلح بدون سيارة .. فيه أماكن مايوصلها القطار والتكاسي غاليه جدا ناااااااار .. ديروا بالكم أجروا سيارة مع ماجلان وأستمتعوا .

ماعلينا نكمل .. ركبنا هذا القطار

وتوجهنا الى انترلاكن عروس سويسرا وأنا أسميها عروس أوروبا
وأول منظر شفناه في بداية دخولنا هذا المنظر العجيب


المهم وصلنا فندقنا اللي أسمه
Hotel de nord
وهو فندق 4 نجوم وكان متوسط يعني ماهو جميل جدا .. لكن موقعه صراحه قوي وبزاوية الشارع والبلكون كانت تطل على منظر فضيع جدا
وهذه بعض من صور الفندق






وبعدها قلت يالله نشد الرحال ونتمشى شوي في انترلاكن ونستكشف هذه القرية الجميلة الصغيرة
واليكم بعض صورها

أول شي لفت أنتباهي فندق فكتوريا وكان جدا جميل وبنص الشارع الرئيسي

وهذا القطار الصغير ياخذك بجولة حول انترلاكن

وهذا الشارع الرئيسي للمنطقة



وفجأة وقف راعي القطار وقال أنظروا الى هذا الجبل عليه رسمة وجه أنف وشفاه وعينيين ودقق وتشوف


قربت شوي قلت يمكن

قربت أكثر .. والله فيه شوي 

المهم كملنا طريقنا وقال هذا المكان تقدرون تركبون قطار صغير يوديكم الى قمة جبل أخضر تشوف أنترلاكن كلها من فوق .. قلت تم
وركبنا القطار وكانت هذه المناظر









وبعدها قلت يابو سالم مايصير الكلام هذا .. لازم تأجر سيارة وبعدها توجهت الى شركة هرتز ولقيت لي سيارة نيسان حليوه موديل جديد ماشيه 3 آلاف كيلو فقط وخذيتها 5 ايام بــ 560 فرنك سويسري تأمين شامل .
وبعدها قعدت الصبح وتريقنا بالمطعم وشدينا الرحال الى أعلى قمة في جبال الألب وهي قمة ينفرو

وهذا مطعم الفندق

وهذه بعض المناظر الجميلة على الطريق






وهنا ركبنا القطار الأول


وهذه المناظر وانا بالقطار



المهم وصلنا للمحطة الأولى وهي بأرتفاع تقريبا 1500 متر


وبعد ها نصعد هذا القطار الى قمة ينفرو



ونقف بأستراحه 5 دقايق عند هذا الارتفاع الواضح بالصورة

وبعدها ندخل النفق الى أعلى قمة

وأخيرا وصلنا الى قمة الجبل




طبعا فوق توجد مطاعم ومقاهي وهدايا وكل شي . شلون سوا المجمع الصغير فوق القمة هذي مدري 
وهذه الصور وحنا راجعين على طريقنا بالقطار









abusalem abusalem
قبل يومين رجعت من سويسرا واليكم رد الجميل بهذا التقرير المصور


ليوم اللي بعده قعدت الصبح وفتحت الدريشه والا هذا والا الجو على كيف كيفك .. الغيوم نازله والجو ممطر وشي خيال




وقلت وين تروح يابو سالم وين وين .. قلت مافيه الى البحيرة الزرقاء .. وقلت للماجلان ياولد قال سم طال عمرك قلت ابي البحيرة الزرقاء قال تم 

المهم توجهنا لها ولكم صور الطريق المؤدي لها والبحيرة نفسها والمطعم الموجود بداخلها

























وهذه موجوده حول البحيرة 



وبعدها توجهنا الى شلالات تروميل باخ














أنهار صغيره في كل مكان .. سبحان الله






abusalem abusalem
قبل يومين رجعت من سويسرا واليكم رد الجميل بهذا التقرير المصور


بعدها شدينا الرحال الى مصنع نستله للكاكاو
وهنا أقدم نصيحه لكم المصنع اذا مو ضروري لاتروحون له أبدا والله طريقه متعب جدا وجبلي وخطر ويلف فيك 80 لفه على ماتوصله ودخنا دوخه والله .. يعني اللي يبي يشوفه يشوفه بالصور هذي وكفاية .. لأن طريقة المتعب مايسوا صراحه ... بس لما وصلناها شفنا شي حلو على الأقل خفف علينا عنوة الطريق
صور وجولة داخل المصنع












يسمح لك بتذوق بعض المنتجات بس مو تخلصها كلها 

وبعدها الى صالة المشتريات



وبعدها طلعنا من المصنع للعوده الى الفندق


ومرينا محطة البانزين وعبينا السيارة فل وكانت المفاجأة بأن تعبئة السيارة بالكامل تقريبا 22 دينار كويتي يعني تقريبا 300 ريال سعودي


وبعدها رجعنا للفندق وقعدنا الصبح ومنها توجهنا الى منطقة ديفون وسكن فندق بارك سويت
واليكم الفندق من الداخل والخارج والمدينة ككل












البدوي مايخلي فرشته ولا قهوته 


واليوم التالي توجهنا الى مدينة آنسي الفرنسية علشان نتقهوا فيها ونتمشى شوي ونتغدا
وبالطريق وجدنا الجسر الخشبي المعلق وكان منظره جدا جميل





وبعدها وصلنا الى آنسي كانت فعلا جميلة وخاصة آنسي القديمة
واليكم بعض صورها





وبعدها توجهنا الى مدينة ايفيان الفرنسية الذي يوجد فيها نبع ايفيان والذي يتم انتاج مياه الصحه المشهوره ايفيان
كانت مدينة صغيره ولكنها جميلة وأخذت فيها جولة بسيطة على البحيرة وقهوه وبعدها رجعنا ديفون
واليكم صور ايفيان
هذي اللوحه ونحن بالطريق الى ايفيان .. قريت ميلان .. قلت اروح لها ماروح لها ... لاياعمي خلها بعدين 

وبعدها دخلنا ايفيان



وهذا النبع داخل المصنع

وهذا خارج المصنع والماي طبعا مايوقف شغال على طول سبحان الله

وهذا أخوكم أبوسالم يشرب من النبع

وأخيرا رجعنا الى ديفون واليوم الثاني توجهنا للمطار وسلمنا سيارتنا عندهم ورجعنا الى الكويت الحبيبة .
كانت رحلة ممتعة .. وهذا التقرير مثل ماوعدتكم وسامحونا على القصور لأني مثل ماذكرت لكم الخبره مامن خبرة بكتابة التقارير ويعطيكم ألف عافيه .


MBSA MBSA
قبل يومين رجعت من سويسرا واليكم رد الجميل بهذا التقرير المصور


الحمدلله على السلامة

التقرير كان جدا ممتع والتصوير اكثر من رائع

يعجبني سرد التقرير مرة وحدة بدون تمطيط

ما شاء الله عليكم تم تغطية اماكن كثيرة بفترة محدودة ...... وما اجمل فصل الربيع قبل زحمة الصيف.

تحياتي


يوتوبيا يوتوبيا
قبل يومين رجعت من سويسرا واليكم رد الجميل بهذا التقرير المصور


ماشاء الله تبارك الله اخوي رحله رائعه وغيرتوا فيها شوي من رتمكم اليومي

والمناظر ولا أحلى خصوصا من المطل ...


فارس من خيال فارس من خيال
قبل يومين رجعت من سويسرا واليكم رد الجميل بهذا التقرير المصور


الحمد لله على السلامه
ماشاء الله عليك يابو سالم زياره سريعه وتقرير اسرع
وبصراحه الصور جميله جداً جداً
الله يعطيك العافيه وبسأل عن نوع الكاميرا لو سمحت
تصويرها رائع



abusalem abusalem
قبل يومين رجعت من سويسرا واليكم رد الجميل بهذا التقرير المصور


مشكورين على المرور

ونورتوا والله .

أخوي فارس من خيال الكاميرا هي من نوع

Nikon Coolpix P500

وهذي صورتها




المنحااش المنحااش
قبل يومين رجعت من سويسرا واليكم رد الجميل بهذا التقرير المصور


تقرير جدا رائع تسلم يبو سالم لاعدمناك


كوتي كوتي
قبل يومين رجعت من سويسرا واليكم رد الجميل بهذا التقرير المصور


الحمد لله على السلامه اخو ابو سالم

سرد التقرير مره وحده شي حلو عشان نقرا التقرير بدون تقطيع

الله يعطيك العافيه يابو سالم



يمكنك فتح موضوع جديد للمناقشة او الاستفسار والمشاركة.

احجز الفندق بأعلى خصم:
خصم يصل إلى 25%

Share

قبل يومين رجعت من سويسرا واليكم رد الجميل بهذا التقرير المصور