السلام عليكم ورحمة الله وبركاته ..
حبيت انقل لكم هذا التقرير المتواضع لرحة شهر العسل .. وان شاء الله
افيدكم ..
كانت السفره بشهر 7/2010
والصراحه كنا مخططين حق سفرتنا قبلها بفتره و كانت السفره مميزه
و فعلا استانسنا و زرنا اماكن وايد حلوه ..
وماضيعا ولا يووم بالسفره وكل يوم كان حافل و ممتع ...
طبعا سامحوني على الصور لاني ماكنت مفكره اني اسوي تقرير
تدرون شهر عسل و ماكان عندي وقت اكتب كل شي
و اصور كل شي.. فا عدلت الصور الي فيها زوجي و حاولت اني اخليها
تكون بأوضح صوره ..
اولا : مخطط سفرتنا كان كالآتي :
من مطار الكويت -----> الى مطار ابوظبي -----> الى المانيا
ومن المانيا اجرنا سيارتنا
الخاصه > الى سالسبرغ ( ليلتين في سالسبرغ )
ومن سالسبرغ -----> الى زلمسي (6 ليالي في زلمسي )
ومن زلمسي -----> الى سويسرا ((زيوريخ)) (8 ليالي في زيوريخ)
ومن سويسرا زرنا ايطاليا (( منطقه اسمها كومو)) و فرنسا (( منطقه
اسمها شامونيكس))
ومن سويسرا ----> الى المانيا ((ميونيخ)) ( 4 ليالي في ميونيخ )
ومن المانيا ----->الى الكويت ...
واليوم الي وصلنا فيه كانت مباراة (المانيا x اسبانيا) كأس العالم ..
وكان لويه بالمطار و مشجعين و حووسه شوي ... طبعا (مطار ميونيخ)
ولقينا هالياهل التختوخ ... بس الله يسامحه كان وايد ثقيل ههه
وبعد مانزلنا جناطنا .. ورحنا حق مكاتب السيارات الي بالمطار طبعا
اهما مكاتب وايد و مكانهم معروف ومايظيع ابدا .. داخل المطار .
واجرنا سياره واجاراتهم مو وايد غاليه معقوله ..
و هذي صورة السياره ..
صج انها طويله بس كانت مريحه و سياقتها حلوه وايد و فيها
نفقيتر
طبعا النفقيتر الي يايبينا معانا من الكويت خارها شوي
و الحمدالله انه السياره فيها منها ومن نفسها ..
وبعدها رحنا بطريقنا بإتجاه سالزبرق وهي منطقه بين المانيا والنمسا
سكنا بفندق هوليدي إن ما انصحكم فيه
موقعه كان بعيد عن السنتر و كنا نمشي وايد على ما نوصل السنتر
خصوصا انه مواقف السيارات عندهم غاليه فا ماكنا نحركها ..
المنطقه حلوه و ماتحتاج اكثر من ليلتين لانها صغيره بس وايد
استانسنا فيها
جوها كان حلو وشعبها حييل طيب ..
وطبعا اول يوم وصلنا متأخر و ماتمشينا فيها نمنا على طول من التعب
و ثاني يوم طلعنا من الصبح ..
وهذي صوره واحنا تونا طالعين من الفندق بإتجاه السنتر مال المدينه ..
طبعا مشي و مسافه مو قريبه وايد بس الجو كان حلو و المشي ممتع
شوفو الفندق ورا عاليسار ,,,
هذي صور بين المحلات والمطاعم ...
هذا محل للتصوير بس يلبسونك ملابسهم القديمه و يبيعولك الصوره ..
طبعا في ملابس حق البنات بس تحتاج وحده مو متحجبه مع الاسف
لانه المصور مكشوف الناس كلها تطالعك وانت تصور .. كانت الصوره
حلوه ..
هذا متحف لموسيقار مادري شسمه نسيت بس قديم .. و هذا المكان
كان بيته
و حاطين داخل آلاته الي كان يعزف عليها وهالسوالف بس مادخلنا
لانه مانحب سوالف المتاحف وجذي ..
وماله داعي نصوره من برا بس احنا شفنا الناس تصور ومع الخيل
ياشقره ههه
وهذا الكشك بنص الشارع بين المطاعم والمحلات .. حلوه الالعاب عنده بس ماشريت لانهم فخار واخاف يتكسرون بالطريج ..
وبعد التمشي بين المحلات .. رحنا لتأجير القواري
(( الدراجات الهوائيه ))
والصراحه اونس شي عندهم لانه تفتر على النهر و الجو واايد حلو
وتدش بين الحدايق الموجوده و شي حلو الصراحه واايد استانسنا ..
وهذا النهر الي نفتر عليه طبعا كبير بس بينه مسافه والثانيه في
جسر يقطع النهر و يوصلك للجهه الاخرى نفس الجسر الي بالصوره
وطبعا المكان كله للدراجات و مافي سيارات الا بشوارع محدده و
مكان سير الدراجات محدد للأمان ..
واهني طبعا الحدايق الي نمر عليها واحنا نمشي ..
وهذي من الجسور الي يقطعون النهر ..
وهذي صوره توضح جزىء من النهر ..
وطبعا ذكرت لكم من قبل انه شعبهم حييل طيب ..
واحنا ماشين و بيدنا خريطه المدينه وشكلنا تايهين ندور فيها
ةقف لنا واحد و عرض خدماته علينا طبعا اهوا من اهل المدينه بس
مافادنا بشي لانه مسكين بس يبي يساعد واهوا مايعرف شي ..
اخر شي قاله زوجي تعال صور وتوكل على الله ههه..
وهذي بعد بين الحدايق ..
وطبعا بعد ساعات من العناء و الفراره ... قررنا انه ناكل .. و طحنا
على مطعم ايطالي عجييب و من اليوع ماصورنا الاكل
تذكرنا التصوير بعد ما نظفنا الصحون ههه
بس كانت الباستا لذييذه ..
وبجذي انتهى يومنا الثاني بسالسبرغ نمنا ليلتنا الثانيه ومن الصبح
جهزنا اغراضنا ومشينا بالسياره متجهين الى
زلمسي بس قبل لا نطلع من سالزبرغ مرينا على حديقة حيوانات ..
بس كان الجو شوي حاار و ما استانسنا بالحديقه كلش ..
حديقة الحيوانات بسالزبرغ على جبل و حلوه لكن يبيلها جو
حلوو والمشي فيها متعب شوي لانه تصعد جبل مشي..
وهذي صوره للحديقه من برا
وهذا صوره لقفص النمر
طبعا قعدنا بالحديقه ساعه وحده بس ما افتريناها كلها لانه كان
حر واايد ..
و بس بعدها اتجهنا الى زلمسي ..
وبجذي خلص تقريري عن مدينة سالزبرغ
و .. ترقبو بقية التقارير ...
التقرير التالي راح اتكلم فيه عن زلمسي ان شاءالله ....
تقبلو تحياتي ...