4 مشاهدات في دقيقتين ولااحد كتب كلمه
على الاقل احد يقولي اسم فندق زين

أنا بقولج
أول شئ بتقضين ذكرى زواج يعني لازم فندق هادي ورومانسي وانا انصحج بفندق شرق 100% انا مجربه وعجيب بس لاتنسين تقولين لهم انه ذكرى زواجج عشان يضبطون لج المكان
بس ممن اعرف كم يوم بتقعدين في قطر عشان اقدر راتب لج جدول حلو ^^
بس بعطيج بعض الخيارات الي يمن قد تفيدج:
1- مجمعات:
الستي سنتر***
اللاند مارك****
فيلاجيو*****
المول**
وذنان مول *
طبعا ترشيحي الاول والاخير لفيلاجيو
2-اماكن مفتوحه تحتاج الجو الحلو:
سوق واقف
كتارا (ألحي الثقافي)
اللولوه
حديقة اسباير جنب فيلاجيو
طبعا يفضل الذهاب لها قبل المغيب لحلاوة جو المغيب في هذه الاماكن
3- المطاعم هناك خيارات كثيره ولكن ودي اعرف هل تقصدين مطعم معين او شي وانا بدليج عليه
وحاضرين لج وتامرين امر اختي
واي استفسار انا حاضر موجود

( الرجاء نقل الموضوع الى قسم الاستفسارات )
تحياتي

اخوي بوسعد الله يعطيك العافيه وجزاك الله خير
الاقامه 3 ايام هي الويك اند طبعا
المطاعم مابه شي معين عادي اي نوع بس انا ماابي اروح
واتخبط بالمطاعم وماادل وين اروح ويضيع الوقت علي
وياليت تعطيني تفاصيل اكثر عن الاماكن السياحيه اللي ممكن اروح لها
وسوري عن التخبط بالقسم نزلت الموضوع من غير ماانتبه لقسم الاستفسارات

حلوه وحامضه
حياكم الله بديرتكم الثانية قطر والله يخليكم لبعض
أن شاء الله بكتب لج برنامج حلو بس بالاول بتجون طياررة ولا سيارة
وككم ميزانيتكم للسكن تبون غرفه ولا شقه ولا سويت؟

fahad-qtr
الله يحيك ويبقيك اخوي تسلم والله هذا من ذوقك الراقي
وماهو غريب هذا الشي على اهل قطر
لابنجي ان شاءلله بسياره وميزانيتنا محدوده يعني ماهو ذاك الزود
بس اكيد نبي شي حلو وتمام .. والسكن غرفه اوكي تكفي
ويعطيكم العافيه جميع والله خجلتوني

حلوه وحامضه
مافي خجل اختي بين الاخوان
والجو حلو حق مناسبة نفس جي صار لنا مشاء 4 ايام مطر
ام شوفي هذا موقع فيه جميع الفنادق بسعر رخيص ومميز
https://www.booking.com
برشح لج اسماء وشوفي الي يناسبج
فندق فريج شرق
فندق الشرتون
فندق الفورسيزن
فندق جراند حياة
فندق الرتز كارلونن
فندق ماريوت
هذول كلهم يطلون على البحر مباشره ولهم شاطي خاص
اما اذا تبحثين على اطلالة حلوة من غرفة الفندق
فعندج الموفنبيك تور وعندهم نادي صحي بالدور الاخير فيه بركت سباحة ومنظر جدا خلاب
وفيه قسم خاص سبا نسائي جاكوزي وسونا وبخار واتوقع يسون مساج مجاني بقسم رجالي وقسم النسائي
و اتمنى أعرف ايضاء تطلعاتج واهتمامات بحسفر يعني
تبون عشاء ومطاعم رومنسية ولا
مجمعات وشوبنق
ولا متاحف واماكن
الخ

يعطيك العافيه اخوي تعبتك معي ... بس انت وشو ترشح الافضل من هذهالفنادق
الاخ بوسعد يقول فندق شرق حلو وانا احس اقتنعت فيه وهل هو نفسه فريج شرق؟
ودي بأمكان رومانسيه وبعد سياحيه

1. الحين بذكر لج المجمعات:

حياج الله أختي ببلدكم الثاني قطر،، (تنورونا بزيارتكم إنشاء الله، ومبروكين على ذكرى زواجكم وعقبال المئة سنة)،
أختي العزيز خلينا نبدأ بالفنادق ( الاخوان ما قصروا عطوج الاقتراحات المختلفة، مثلاً عندج فندق شرق وشيراتون والريتزكارلتون حلوين ماعليهم كلام ومن أفخم الفنادق عندنا لكن أسعارهم غالية حيث تبدأ من 1000 ريال وفوق ونفس الحاجة بالنسبة لفندق جراند حياة، لكن ثقي كل الثقة ان الخدمة الي تقدمها هل الفنادق توازي خدمة السبع نجوم خاصة الريتزكارلتون) بالنسبة لو ميزانيتكم محدودة وتقدرون تدفعون من 500-800ريال فعندكم ( فندق موفنبيك القديم، فندق مروب الموجود في منطقة الاسواق "هذا فندق جديد وخدمة ما عليها كلام وخدمة ولا أحلى وقريبه من الاسواق فقط مشي دقايق وقريبة من متحف الفن الاسلامي"، فندق سيف الدوحة الجديد وقريب ايضاً من الكورنيش والاسواق، فندق موفنبيك تاور هذا لو قدرتي تحصلين في غرف بسعر 700 و 800 فبيكون جيد لانه موقع وايد حلو فهو يقع في المنطقة الدبلوماسية وهي منطقة هادئة وقدام البحر وفندق فورسيزون، وعندكم فندق ملينيوم في السد بس ممكن سعره قريب ال900 ريال وفندق هوليدي بعد حلو) "أعتقد اي فندق تحجزونه وتوضحون في انكم بحاجة لترتيب خاص بالغرفة لمناسبة معينة فبيقوم به الفندق بكل تأكيد"
شوفي أختي الغالية أنا راح بذكر لج الاماكن الي تستحق الزيارة والوقت الي تستحق فيه الزيارة وعقبها انتم الي تحددون وقت الزيارة لها:
1- الحي الثقافي "كتارا" (الحي الثقافي يتميز بالكورنيش الرائع وبعض المقاهي والمطاعم "غالية ما أنصحج فيها" هني أنتم تقدرون تروحون العصر مثلاً حيث انكم تدخلون الشاطىء حيث رسوم دخول الشاطىء مئة ريال ويتسبح زوجج وتجربون بعض الالعاب البحرية مثل ركوب الاسكوتر وغيره، عقبها تتمشون على الكورنيش "لا تنسون تجربون شاي الكرك من كرك وجباتي")
2- جزيرة اللولوة (هي عبارة عن منطقة داخله البحر وتتميز بعماراتها ذات الطابع المميز وفيها ممشى بحري وفيها المقاهي المختلفة وبعد فيها المارينا حيث تشوفون أفخم أنواع اليخوت الموجودة "طبعاً من بعيد ماتقدرون تدشون اليخت ههه")
3- سوق واقف (أنصحكم بزيارته في الليل بعد لانه هو سوق مفتوح في كل حاجه تخطر على بالكم من أكلات شعبية وعالمية بخور وعود وعطورات ثياب وفي قسم خاص لبيع الطيور والحيوانات الله يعزج، "جربي خبز الرقاق مع الجبن والبيض وكوب شاي كرك "حاجه ما تتفوت")

• لوتلاحظين أنا معظم الاماكن الي ذكرتها لج نصحتج بزيارتها في المساء لانه الجو يكون هادىء وحلو ومافي شمس لان شمسنا بصراحه ما عليها كلام تعطيك في الباطن الايمن للمخيخ الايسر"شدخل مادري ههه"

الحين بذكر لج المجمعات:

1- مجمع الستي سنتر (يفتح الصباح من الساعة 10 وحتى المساء الساعة 11، يتميز بوجود جميع المحلات ذات الماركات المختلفة "تحصلون خصومات حلوه واسعار حلوه" وجود سوبرماركت كبير وهو كارفور، ركن المطاعم في المطاعم المختلفة من وجبات سريعة وغيرها، السينما ومنطقة الالعاب " ما أنصحكم بسينما الستي واايد لانه صار قديم".
2- مجمع فيلاجيو (يستحق الزيارة حيث يتميز بتصميمه المميز والجذاب، فيه المطاعم المختلفة والسينما "أنصحكم بهل السينما حيث أنها جديدة وحلوه وكراسيها مريحه، لكن عيبها انه مافيها مكان مخصص للعائلات او النساء لحالهم عكس سينما الستي فيها اماكن للعائلات والنساء بروحهم" فيها منطقة العاب واايد حلوه.
3- عندنا مجمعات ثانية مثل اللاندمارك مجمع المول مجمع رويال بلازا مجمع حياة بلازا وغيرها الكثير لكن هل الاثنين يستحقون الزيارة والباقي ماأنصحج فيهم لانه لا جديد فيهم ولكن فيهم سينمات صغيرة.

• أنصحج بزيارة المجمعات في وقت الظهيرة يكون أحسن الزحمة أخف وتحصلون موقف للسيارة بسهولة.

ألحين خليني أقولج عن بعض الاماكن العامة الممكن زيارتها:
1- متحف الفن الاسلامي (يتميز بوجود الاثار والقطع الفنية المميزة والتي تعود الى الاف السنين، "يستحق الزيارة بصراحة" انصح بزيارته في الصباح حيث يقفل الساعة 5 مساءً)
2- حديقة اسباير (هي بجنب مجمع فيلاجيو وعبارة عن ممشى وحديقة ويتميز بأشجاره ذات الطابع المختلف والبحيرة الصناعية الموجودة بالحديقة "يستحق الزيارة")
3- عندكم حدائق وايده عندنا مثل حديقة دحل الحمام وحديقة الحيوانات وعندكم بعد كورنيش الدوحه المميز والحلو ممكن تتمشون العصر وتسمتعون بمناظر حلوه "ههه" مثل الشباب وهم يستعرضون بالاسكوترات.

• في شيء ثاني ممكن تسونه بعد الي هي رحلة السفاري حيث في شركات تقوم برحلة سفاري لمنطقة سيلين جنوب قطر حيث تحتاج الى قلب قووي "ههه" حيث ياخذونك الى المخيم الخاص بالشركة لكن قبلها تخوضون تجربة التطعيس حيث تقوم السيارة وانتم فيها بالقيام بحركات استعراضية خطرة على الطعوس، وعقبها على المخيم على حسب فترة غداء او عشاء والاسترخاء على البحر بعدها ترجعون للدوحه "هي فكرة حلوه ترى"
• أنا أسف جداً على الاطالة وأتمنى أني أكون أفدتج بشيء ياأختي العزيز،،

وأتمنى لكم رحلة وحياة موفقة،، وأي خدمة ثانية أنا وباقي الاخوان تحت أمركم طال عمرج،،