baderol
09-06-2022 - 10:57 pm
السلام عليكم
اولا خل اعرفكم برحلاتي السياحيه ..انا من رواد لندن الدائمين وسويسرا وفرنسا ...ودبي
رحلاتي على مدى الحياه تتمحور بين البلدان المذكوره ......
كنت شهر فبراير بلندن ويوم رجعت حسيت ودي اروح شي يديد ...دخلت المنتدى وكلام الاعضاء شجعني
اروح اسطنبول ..وفعلا حجزت التذاكر والفندق من الانترنت وكان الفندق بجانب تقسيم سكوير ...
ورحت سطنبول ..اول ماوصلت بالمطار حسيت كل واحد يبي يتخامطني قتلهم نو ثانكس جان يقولي
السلام عليكم؟ قلت ايه عرف اني عربي المهم مارديت لانه ادري يبي يوصلني غصب طيب ..رحت وقفت
التاكسي العادي ورحت الفندق ...
سويت جيك ان ورحت الغرفه ونمت كنت تعبان وقعدت العصر ....وهنا بديت اشوف الديره ...حطيت الهدفون وشغلت
الايبود كعادتي في كل سفراتي لانه الايبود يسليني بالمشي ...كان الهدفون معروف انه غالي وينباع في محلات
ابل ستور سعره باليورو 250 ...
المهم اول ماطلعت من الفندق مامشيت حتى متر اشوف الناس كلها تطالعني ؟؟ وبديت اطالع شكلي فيني شي
غلط؟ ماكو شي ..رحت كملت مشيت مريت على اكثر من واحد يحاول يكلمني رغم اني مشغل الايبود ...
قمت اطالع تحت وانا امشي ..وبالغصب وصلت تقسيم ..والخز مانتهى ..عرفت انه الهدفون هو السبب ..سكرت الايبود
ورحت شريت سماعات عاديه وحطيته ..وكملت بالشارع العجيب ..لكن المقاطعه والتوقيف ماستمر كل واحد يشوفني
السلام اليكم هبيبي؟ لاحول يعني وبعدين متى اقدر اتمشي واشوف البلد على راحتي ...باختصار لاعت جبدي
حادثه اخرى
كنت اتمشى بليل يعني الساعه 11 وكانت المطاعم مكتضه فجاه واحد وقفني في تقسيم وقالي تبي مطعم قلت
خل اشوف شنو عنده قتله ودي مطعم انترناشونال او امريكي ...باختصار وداني مطعم قالولي تدفع 50 قبل لاتدش
قلت شنو!! شالمطعم اللي ادفع قبل لا ادش ...المهم مشيت وماعجبني واستغربت ولقطت اسمه بعدين عرفت
انه هالمطعم يبيع خشاشي مخدرات !!
حادثه اخرى
الصبح وكان يوم المفروض يكون مشرق لول ركبت تاكسي الاصفر العادي وقتله جواهر مول (المفروض استخدم المترو بس ماكنت اعرف له )
المهم التاكسي واهو يوديني يقولي في مجمع احلا ليش ماتروح له ؟ قلت لا مره ثانيه الحين ابي جواهر مول لانه مطرشين لي عليه ابي محل فيه
مشي مسافه جان يرد يقول بس هالمجمع خاايس روح الثاني احلا؟ قلت لاحول الله ..يايبا انا ابي جواهر قتلك مطرشيني علي
وقعد يتحلطم موعاجبه !!
ويوم وصلنا انا شفت العداد لين قبل مايصفط اب 15 ليره تركيه .قبل لانصفط بثواني ويوم صفط طلعت ال15 جان
يصرخ ويرطن بالتركي .قتله شفيك؟؟؟ واحاول مني مناك جان يقولي 45
قتله شنو؟؟ انا شايفه 15 وقعد يصرخ ويشوح بايده ..لاعت جبدي وماعرفت اتصرف جان اعطيه 50 تتوقعون رد ال5؟
ضحك جان يقول بخشيش بالعربي!!
دشيت المجمع وانا فيني مليون قهر وقهر حتى ماشفته عدل لاني ماحب احس اني غبي تمشيت شوي
ورجعت الفندق واحلى وانترنت على احلى اقرب طيران ورديت الكويت وقلت توبه
ودفعت للرجعه سعر تذكره يديده مع انه عندي تذكره رده ثانيه
تر في حادثتين بعد بس احس كافي لول اللي قلته
ملاحظات:
اهناك يكرهوني اني عربي صراحه ..المحلات الجيب واللي شكلها يفشل يكتبون عليها بالعربي والمحلات الراقيه مايكتبون حرف عربي
ومحلات الجيب العربي بكثره تشوفها بكل مكان وتحسسك انك تتبع هالمحلات الرخيصه
لاتستخدم التاكسي مهما كان خلك على المترو افضل ...
لاتتكلم عربي ولا انجليزي ولاشي مع اي احد يحاول يوقفك مع العلم انهم كثيرون يعني بتاذى
الصراحه اللي متعود على مصر يمكن تطلع عنده اسطنبول واو
حسيت في لحظة من اللحظات طال عمرك انك واحد من المشاهير - ما تمشي متر الا اتحس العالم اتطالع فيك --
لا بالله قوللنا اذا انت من المشاهير مين اتكون ؟؟
على العموم الف الحمدلله على السلامة وتراها الي نصحك انو تركيا افضل من سويسرا ولندن وفرنسا ودبي غدرك .