بشرى سارة لكافة اعضاء ورواد منتدى العرب المسافرون حيث تعود إليكم من جديد بعد التوقف من قبل منتديات ياهوو مكتوب ، ونود ان نعلمكم اننا قد انتقلنا على نطاق arTravelers.com
وهو النطاق الوحيد الذي يمتلك حق نشر كافة المشاركات والمواضيع السابقة على منتديات ياهوو مكتوب وقد تم نشر 400,000 ألف موضوع 3,500,000 مليون مشاركة وأكثر من 10,000,000 مليون صورة ما يقرب من 30,000 ألف GB من المرفقات وهي إجمالي محتويات العرب المسافرون للاستفادة منها والتفاعل معها كحق اساسي لكل عضو قام بتأسيس هذا المحتوى على الانترنت العربي بغرض الفائدة.

لمزيد من التفاصيل يمكنكم مراسلتنا من خلال نموذح الاتصال, العرب المسافرون على Facebook



s0d0a0 s0d0a0
اجمل رحلة الى اسطنبول
12-11-2014 - 04:29 pm

حبيت اكلمكم عن رحلتي الجميلة الى اسطنبول
كان هذا في شهر 11/2007
تصدقو اول مرة اروحها و مو بطيارة
لكن بالباص
من جدة الى اسطنبول مرورا بأنطاكيا
صحيح الطريق طويل لكن يعلم الله كيف كان على قلبي زي العسل
اتفقت انا و خالتي للسفر بجنون الى اسطنبول وجهزنا الاوراق و الجوازات والفيزا من السفرة التركية بجدةو حجزنا بالباص عن طريق شركة نور للنقل السياحي و بصراحة المعاملة حلوة و الكراسي واسعة و مريحة وبسعر 250 ريال فقط الي مدينة انطاكيا طبعا طلعنا الباص يوم السبت بعد الساعة 10 ليلا و كانت المفاجئة الاولى بالنسبة لي
عارفين ليش عشان كل الي في الباص كان عددنا 10 اشخاص فقط
باص كبير 50 راكب مسافرين فيه بس 10 اشخاص
المهم بعد ما مشي الباص كانت اول وقوف له في مدينة ضباء عشان صلاة الفجر وبعدين كمل السير الى تبوك على الساعة9 صباحا بجانب مطعم بصراحة حلو يسوي شكشوكة و حمص و شاي حار و كان الجو مرة بارد ممكن الحرارة 5 درجات طبعا اهل جدة مو والفين على الاجواء الباردة وكملنا الطريق الين وصلنا للحدود السعودية و كانت شبه فضية و بسرعة انتهينا و دخلنا الحدود الاردنية وتابعنا السير حتى قبل لا نوصل الحدود السورية مع صلاة العصر جنب الباص و صلينا ظهر مع العصر وتابعنا السير وبالأمانة معاملة الحدود السعودية و الاردنية وحتى السورية جدا راقية ومحترمين على عكس ما توقعت من جلافة و شدة في الحديث و لكن الحمد لله على المعامله الحلوة
المهم تابعنا السير وصلنا مدسنة حلب على الساعة10 مساء وكنا جيعانين على الاخر تصوروا من فطور تبوك فاكرين وجنب الباص عند مطعم حلبي على كيفكم يقدم المشاوي و الطواجن و الفطاير ومن شدة الجوع طلبنا كل شي واكنا اكل ممكن من زمان ما اكلت زي كذا المهم تابعنا السفر وسط البرد الشديدو الظلام حتى خرجنا من منفذ باب الهوى السوري و دخلنا الحدود التركية و على طول تفتيش سريع و انتهينا وبعد تقريبا ساعة من دخولنا للحدود و صلنا انطاكيا و الحمد لله على السلامة و راح نكمل الموضوع الشيق في وقت لاحق وعندي الكثير جدا بخصوص اجمل رحلة الى اسطنبول





المشاركات

s0d0a0 s0d0a0
اجمل رحلة الى اسطنبول


رجعنا مرة ثانية
اول ما وصنا انطاكيا اخذا سكن عبارة عن غرفة بسريرينو بسيطة بسعر30 ليرة فقط على اساس فقط ننام من الساعة 2 فجرا حتى قبل الظهر و خلاص واول ما حطيت راسي على المخد نمت بسرعة من التعب وما حسيت نفسي الا الساعة 10 صباحا وعلى طول قمنا و تجهزنا و سلمنا الغرفة و رحنا للاوتوقار او ما يسما عند محطة الباصات واخذنا باص من انطاكيا الى اسطنبول مرورا بأنقرة سعر التذكرة للشخص 50 ليرة وطول ما احنا في الباص نتفرج على الجبال و الثلوج و الانهار و الشوارع و بصراحة اقدر اقول على تركيا انها جنة الله في ارضه عارفين كم ساعة الطريق؟ 16 ساعة
و كل 3 ساعات يجنب جنب محطة عشان الي يبغى يدخل الحمامات الله يكرمكم و اللي يبغى ياكل و خلافه
و الشي الغريب في شركات النقل الداخلي للباصات داخل تركيا انهم عندهم سياسات ما شيين عليها
مثلا ضروري اغلاق الجوال طوال الرحلة
ممنوع خلع الجزمة الله يكمكم
ممنوع التدخين داخل الباص
ممنوع الاكل و الشرب داخل الباص عدا المقدم داخل الباص
لانه كل شوي يجيبو شاي و قهوة و عصائر و بسكويتات و كيك وكل ساعتين يحطوا معطر كلونيا للركاب (( حركات)) حتى وصلنا محطة باصات اسطنبول على صلاة الفجر ورح نكمل معاكم ايش الي صار معانا اول ما وصل الباص نزلنا منه في وقت لاحق و انتظر تعليقاتكم


aldosee aldosee
اجمل رحلة الى اسطنبول


2007
ماشاء الله
وتبقى الذكريات
نحن متابعون ذكرياتك التى يبدو انها جميله
ولا نقول الا عكس ماتقوله شركات التأمين في جده
((تنذكر وتنعاد))

طبعاً بمشيئة الله


HINOO HINOO
اجمل رحلة الى اسطنبول


الله يعطيك العافيه

كمل حديث الذكريات متابعين بقوه

بس ما عندك صور للطريق


الهجرة الهجرة
اجمل رحلة الى اسطنبول


باين علينا بنجلس امام هذة الصفحة مستنيين باقي التقرير
بس فين الصور


s0d0a0 s0d0a0
اجمل رحلة الى اسطنبول


اولا اعتذر عن نشر اي صور لضروف خاصة و لكن عليكم ان تتخيلو.
نكمل معاكم القصة وبجرد نزولنا من الباص بدأت الامطار تنزل بغزارة واحسست وقتها ان اسطنبول ترحب بنا كثير ومن هنا بدأتفاؤلي القوي لهذة الزيارة
كان في واحد في انتظارنا عند محطة الباصات وكان مرتب لنا السكن فقط وعلى طول اخذنا الى فندق اسمه ((مديسون)) في منطقة تقسيم بصراحة فندق فخم 4 نجوم واول ما وصلنا للفندق كنا متعبين من طول الرحلة البرية التي استغرقت 16 ساعة ولكن بمجرد اخذ دش حمام ساخن و رايت الناس في الشوارع انتابني شعور بالنشاط و بصراحة طار النوم وعلى طول خرجنا للشارع من الساعة 8 صباحا ونلفلف في الشوارع من ميدان تقسيم و قاعدين نشوف الناس رايحة لأعمالها في الباصات و نازلين من المترو و التكاسي بصراحة منظر حلو جدا و فطرنا من العربيات الي تبيع السميت مع الجبن و شايو من شارع لشارع ومن محل لمحل تصدقو ماشعرنا بالتعب ابدا الين الساعة3.5 عصرا شعرنا بالجوع الشديد ودخلنا احد المطاعم المتفرعة من سارع الاستقلالوكان صغير بس يجنن اكلهم مشاوي وايدامات ومحاشي و تغذينا و بعدها جانا شعور بالخمول و التعب المهم وصلنا الفندق على الساعة 7 تقريبا واحنا مهدودين من التعب وعلى طول نوم الى اليوم الثاني وبصراحة كان يوم جميل عشان استطلعنا المنطقة بالكامل


الدُرهـ الدُرهـ
اجمل رحلة الى اسطنبول


ذكريات روووعه وتشد الواحد لتركيا

الحمد لله على السلامه وتتهنون يارب

تحياتي ...


s0d0a0 s0d0a0
اجمل رحلة الى اسطنبول


اليوم الثاني
صحينا على الساعة 8 صباحا و فطرنا في الفندق بوفيه مفتوح و على الساعة 9 نزلنا من الفندق و اتجهنا عكس جهة دوار تقسيم و دخلنا محلات كثير و اشترينا بعض الاغراض و تمشينا وحتى موعد الغذاء و بعد الغذاء رجعنا الفندق و غيرنا ملابس ونزلنا اغراضنا و تابعنا التجول في ميدان تقسيم و شارع استقلال و بصراحة زي هذا الشارع ماحصلت لانه مرة عجبني تحصل فيه كل شي و مشينا فيه حتى اخره وبعدها دخلنا السينما فيلم رعب حتى الساعة 8.30 مساء وتعشينا و رجعنا الفندق على الساعة 10 و على طول نوم لانه ورانا رحله سياحية من ترتيبنا من الصبح وراح اكملكم ايش صار بكرة


s0d0a0 s0d0a0
اجمل رحلة الى اسطنبول


اليوم الثالث
ملحوظة مهمة : انا اول مرة ازل اسطنبول و ما عرف عنها اي شي عشان بس تكونو عارفين و لا اي واحد من معارفي او اقاربي سبق و سافر عليها و غلطتي اني قبل ما اجي اسطنبول ما جمعت معلومات كافية و لكن على نياتكم ترزقون
لمن حينا من النوم الصباح باكر تجهزنا و فطرنا في الفندق ونزلنا لشركات السياحة عشان نسأل ايش برامجهم بصراحة اعطاني عرض على جزر الاميرات سعر الشخص100 ليرة ((عبارة _حنطور_غذاء)يعني يبغى 200 ليرة لشخصين فكرت فيها و قلت خليني اروح بنفسي و من غير شركة السياحة و اسأل اجرب وانا مقتنع خرجت للشارع و اخذت تاكسي بالعداد الى ميناء كاباتاش طبعا بعد ما سالت من فين تطلع العبارات و اعطوني العنوان مشيت على الساعة11 صباحا سعر التذكرة1.7 ليرة و بصراحة استغربت من سعرها و حسيت انه شركات السياحة راح تكسب من ورانا كثير جدا و اول ما وصلنا المينا كان في واحد بحريني مع زوجته نصحني بأن افاصل في الاسعار عند وجبة الغداء في مطاعم ((بيوك اضه)) مثل مطعم علي بابا لانه دايما يبالغو في الاسعار وهذي معلومة جديدة المهم اول ما وصلت الجزيرة سألت عن مكان الحنطور و طلعت الحنطور بسعر40 ليرة لفة على الجزيرة بصراحة مرة حلوة وبعدين تغذينا سمك و جمبري وبعد الغذاء استأجرنا دراجات بالساعة بسعر 2 ليرة في الساعة ورجعنا على الساعة 5 عصرا كنا وصلنا مينا كاباتاش وما اعرف انه في مترو يوصل لتقسيم و انا قاعد اوقف تاكسي واختلفنا في السعر شافني واحد و قالي ليش ما تركب المترو و راني فين المكان و على طول طلعت المترو و بسرعة وصلنا لمنطقة تقسيم و بصراحة مرررررة رحلة ممتعة خاصة لمن تعتمد على نفسك مو على شركة سياحة وانتهى اليوم على كذا


s0d0a0 s0d0a0
اجمل رحلة الى اسطنبول


اليوم الرابع
فاكرين ايش سويت امس لمن نزلت و رحت لشركة السياحة و اعطاني البرنامج .
تمام انا عملت اليوم نفس الشي خاصة بعد ما تأكدت انه عندهم برامج حلوة بس غاليه جدا وممكن الواحد يعتمد على نفسه و ممكن يوفر نص المبلغ و من غير مبالغة
المهم سألت عن البرامج للأماكن التاريخية وقال الشخص الواحد 140 ليرة
اعتمدت على نفسي وبصراحة مو عيب لمن الواحد يسأل عن المكان لانه في النهاية راح تخوض تجربه مع نفسك و دايما خليك متفائل انه راح تنجح رحلتك رغم ما فيها من مشاكل
المهم وقفت تاكسي وصلنا للسلطان احمد ب10 ليرة الين قدام مسجد السلطان احمد و دخلت و اعجبني البناء خاصة انه في عصر ما كان المعدات و الانشاءات متطورة زي الوقت الحاظر و الاخلاص في العمل و بعدها لقصر طوبكابي ودخلنا القصر سعر التذكرة للشخص20 ليرة و قيمة الجهاز المترجم 10 ليرة و استغرق الوقت داخل القصر حدود 3 ساعات كاملة وبصراحة تمنيت لو كنت عايش في العصر العثماني من شدة اعجابي و انبهاري بالامبراطوريه العظمى.
انتهينا من القصر على الساعة4 عصرا و تغدينا في مطعم شاورما على كيف كيفكم و بعدها مشينا للسوق المسقوف و مشينا فيه الين تكسرت رجولنا من المشي و السوق ما انتهى تصدقو و اخذنا تاكسي و على الفندق وكانت الساعة 9.30 مساء و انتهى اليوم
انشالله يكون يوم ممتع و قدرنا نوصف اهم احداث صارت فيه



يمكنك فتح موضوع جديد للمناقشة او الاستفسار والمشاركة.

احجز الفندق بأعلى خصم:
خصم يصل إلى 25%

Share

اجمل رحلة الى اسطنبول