بشرى سارة لكافة اعضاء ورواد منتدى العرب المسافرون حيث تعود إليكم من جديد بعد التوقف من قبل منتديات ياهوو مكتوب ، ونود ان نعلمكم اننا قد انتقلنا على نطاق arTravelers.com
وهو النطاق الوحيد الذي يمتلك حق نشر كافة المشاركات والمواضيع السابقة على منتديات ياهوو مكتوب وقد تم نشر 400,000 ألف موضوع 3,500,000 مليون مشاركة وأكثر من 10,000,000 مليون صورة ما يقرب من 30,000 ألف GB من المرفقات وهي إجمالي محتويات العرب المسافرون للاستفادة منها والتفاعل معها كحق اساسي لكل عضو قام بتأسيس هذا المحتوى على الانترنت العربي بغرض الفائدة.

لمزيد من التفاصيل يمكنكم مراسلتنا من خلال نموذح الاتصال



بهبهانيه بهبهانيه
بهبهانيه في ربوع ديزني لاند
17-12-2014 - 06:04 am


بسم الله الرحمن الرحيم

و اخيرا صار عندي وقت عشان اكتب تقريري


اول شي احب اشكر كل من قدملي معلومه ولو كلمه عن باريس وعن ديزني لاند وفعلا استفدت من هالقسم

التخطيط للسفره صار باقل من شهر

بعد مارجعت من لندن في عطله عيد الفطر شهر 9 عام 2010 شفت انه عيد الاضحى قادم والعطله بتكون عندنا 10 ايام تقريبا وبما انه الله قسم لنا نروح الحج السنه قلنا لازم نستغل العطله ونسافر


بالاول كان التفكير في مدريد بس مع البحث لقينا عرض مقدم من KLM رحله من الكويت ال امستردام الى باريس بسعر زين (مادري جم ريلي اللي حجز وقالي سعرهم زين) بس اللي يبي يعرف انشالله بسأل ريلي واقولكم

فقررنا نروح ديزني لاند


الحله مكونه من 3 اشخاص ( شخصين كبار انا وزوجي + طفل عمره سنتين ونص)

وفعلا تم الحجز بعد البحث





المشاركات

بهبهانيه بهبهانيه
بهبهانيه في ربوع ديزني لاند



يوم الاثنين 15/11/2010
كان موعد السفر الساعه 1:25 صباحا .. رحنا المطار الساعه 10:30 وكان زحمه وايد الكل بيسافر بس عند KLM ماكو احد فخلصنا الوزن بسرعه و رحنا قعدنا بقاعة دسمان

هي قاعه مخصصه للي حاجزين على الدرجه الاولى واعتقد لي عندهم برفلج اتوقع



القاعه فيها بوفيه مفتوح وخدمه انترنت ونادي للاطفال ومساج يعني زين بعيد عن لويه المطار وهمن الواحد يقضي وقته



تعشينا وريحنا شوي وعالساعه 12:30 نزلنا من القاعه وقلنا نتسوق شوووي



خلصنا بسرعه ورحنا الطياره والحمدلله طارت بموعدها

http://news.myjoyonline.com/photos/news/klm1.jpg

قضينا الوقت بالافلام والنوم ( بس نص ساعه) وبعد 6 ساعات تقريبا وصلنا امستردام


من مطار امستردام





كان المطار كبير و زحمه بعد واحنا لازم نلحق طيارتنا Air France مابقى شي اقل من ساعه وركض لي البوابه

وصلنا الطياره الثانيه واستغرقت الرحله ساعه وثلث

وصلنا باريس بالسلامه


اخذنا باص حتى يوصلنا فندقنا في ديزني لاند ب 37 يورو





في الطريق



الجو كان باااارد


وصلنا الفندق

ماجيك سيركس

كان مسوي عرض تحجز يومين تاخذ يوم مجاني احنا كنا حاجزين 4 ايام فحصلنا على يوميين مجانا بالفندق

يا سلااام





سوينا الجيك ان

عيب الفندق شي واحد مافيه سيرفس يعني هلب يور سلف شيل جناطك ووصلهم بنفسك لي الغرفه

عموما اغلب فرنسا جذي فنادقهم :\

وهذي غرفتنا





و هذا الفيو من الدريشه



الباث روم والشور





قلنا نريح شوي ونمنا ولانه اول يوم لنا فقررنا انه من باجر نروح ديزني اليوم التجول برا ديزني

ريحنا ساعتين وقعدنا ولا في شي صاير

@@


عيون زوجي ملتهبه ولونها احمر وتنزل ماي لونه ابيض @@ من شنو ماندري !!!


ومو راضيه توقف الدموع ..

سالنا الرسبشن عن فارمسي قالولنا ماكو الا بالمجمع القريب من الاوتلت


وعلى طوووول حجزنا شتل من عندهم روحه ورده


رحنا المجمع و اخذنا من الفارمسي غشووول وقطره للعين



وبما انه وصلنا لازم نتسوق وناكل لنا شي :)


وقع الاختيار على مطعم



قلت حق ريلي انه مطعم عربي

راح دش عندهم يطلب جان يرجع يقولي مطعم عربي بس ترا ماهو اسلامي اللي يشتغلون فيه مسييح ا


انتبهو على هالنقطه مو ليش انه اسمه عربي ولبناني على بالكم اسلامي

المهم طلبنا منه سندويجه حمص وشبس وكولا




والسعر كان




الله يعافي الرخص اللي عندنا

عز عز يا كويت


لعبنا ولدي شوي



و رجعنا الفندق بدلنا وصلينا ورتبنا امورنا

وطلعتا بللليل نتمشى في ديزني

طبعا البارك والاستيديو مسكرين بس رحنا جهة المطاعم والكافيهات



تمشينا وشفنا محلات ديزني و خذينا فكره عن المطاعم الموجوده






حبيبي بلانت هوليوود



بس ما دخلناه لانه سلم طويل ومعانا عربانه طفل وانا حامل مافيني اصعد

كملنا المسير للاخر وشفنا



وبالاخير وقع الاختيار على ميكي كافيه وكان فيه دور ونطرنا

احلى مافيه الشخصيات اللي تمر على الطاولات صورنا معاهم وميكي ماوس احتفل بعيد ميلاد احد الاطفال واحنا شاركناهم :)

كانو بالطاوله اللي يمنا





ردينا الفندق الساعه 9 وكنا صج تعبانيين

ماحسينا بروحنا على طووول الي السرير نوووووووووووووم





انتظروني باليوم الثاني


سونيتا سونيتا
بهبهانيه في ربوع ديزني لاند


تقرير حلوووو من أوله يعطيك العافيه اختي ومتابعينك


فيصل فيصل
بهبهانيه في ربوع ديزني لاند


حمدلله علي السلامه بهبهانيه
الباص 37 يورو كلكم ولا لكل شخص
ومتابعين معاك


كويتية^رحالة كويتية^رحالة
بهبهانيه في ربوع ديزني لاند


ماشاء الله تقرير من بدايته روووعه


يعطيج العافية بهبهانية ومتابعين معاج


بهبهانيه بهبهانيه
بهبهانيه في ربوع ديزني لاند


المشاركة الأصلية كتبت بواسطة سونيتا
تقرير حلوووو من أوله يعطيك العافيه اختي ومتابعينك
الله يعافيج ان شاءالله الباقي يكون حلو بعد :)

المشاركة الأصلية كتبت بواسطة فيصل 2006
حمدلله علي السلامه بهبهانيه
الباص 37 يورو كلكم ولا لكل شخص
ومتابعين معاك

الله يسلمك فيصل .. كان لك فضل كبير سألتك وايد قبل لا اروح

الباص كلنا ب 37 .. شخصين كبار ما احسبو الطفل

المشاركة الأصلية كتبت بواسطة كويتية^رحالة
ماشاء الله تقرير من بدايته روووعه


يعطيج العافية بهبهانية ومتابعين معاج


الله يعافيج اختي وشكرا عالمتابعه ان شالله يعجبكم الباقي


غردينيا غردينيا
بهبهانيه في ربوع ديزني لاند


بداية حلوه ننتظر الباقي


أصيل العود أصيل العود
بهبهانيه في ربوع ديزني لاند


تقرير روووووووووعه استمري ونحن معك


zezo&paris zezo&paris
بهبهانيه في ربوع ديزني لاند


الموضوووع شكله حلو
مكمل معى متابعك


× كراش × × كراش ×
بهبهانيه في ربوع ديزني لاند


..



بإنتظارك بهبهانيـة ... :)





.’.’.’.



يمكنك فتح موضوع جديد للمناقشة او الاستفسار والمشاركة.

احجز الفندق بأعلى خصم:
خصم يصل إلى 25%

Share

بهبهانيه في ربوع ديزني لاند