السعودية المسافرون العرب

أكتشف العالم بين يديك المسافرون العرب أكبر موقع سياحي في الخليج و الوطن العربي ، يحتوى على أكبر محتوى سياحي 350 ألف استفسار و نصائح عن السفر و السياحة, 50 ألف تقرير سياحي للمسافرون العرب حول العالم و أكثر من 50 ألف من الاماكن السياحية و انشطة وفعاليات سياحية ومراكز تسوق وفنادق، المسافرون العرب هو دليل المسافر العربي قبل السفر و اثناء الرحلة. artravelers.com ..
الذيب العربي
05-12-2022 - 01:57 pm
اهلا بكم احبابنا اعضاء وزوار هذه البوابة الرائعة
عدنا لكم مرة اخرى بتقرير عن مطعم قمنا بزيارته قبل ايام وهو
سبازيو 77 spazio77
الموقع / برج المملكة الدور 77
الدخول للبرج من طريق العروبة من جهة العليا مول ..
طبعا المطعم راقي يقدم الاطباق العالمية
كان الذهاب اليه وقت العشاء .. شخصين فقط
اليكم الصور واعتذر لكم عن قلة جودتها .. لانها كالعادة بكاميرا الجوال
والاضاءة كانت خفيفة لم تساعد على اظهار الصور بالشكل المطلوب
وكل ما اصور صورة بالفلاش التفت علي كل الي فالمطعم
من هنا كان الدخول للبرج
وفي الاسفل قبل الصعود .. يوجد شخص يسأل وين رايح
هل عندك حجز ؟ طبعا حنا جايين بدون حجز
ويسوي ان المطعم مزدحم .. وهو مافيه الا كم شخص !!!
هنا ركبنا المصعد ووصلنا للدور 77 على كلامهم في خمسين ثانية !
هنا اول مادخلنا المطعم .. وتتضح الاضاءة الخافتة
ومثل ماذكرت كل ماصورت التفت علي الي فالمطعم .. وانا كأني مادري
هذه الاطلالة من فوق ويتضح برج الفيصيلة .. لكن اتوقع في النهار تكون الاطلالة افضل وايضا التصوير
هذه طاولتنا
وهذا المنيو كالعادة صورته لكم من الجلدة الى الجلدة ..
وكان طلبنا
فيلية البقرة البرازيلية حسب ترجمتهم
و موز الغنم
وحليت ب فوندون شوكولا
اول ماقدموا لنا ضيافتهم !!
وهذي السلطة spazio medley ب 89 ريال
بصراحة مقلب مقطعين خس وحاطين جبنة وطماتين وعطونا
طبعا هذي موصين عليها ...
هذا فيلية البقرة البرازيلية tenderloin ب 112
توقعت ماراح اخلص الصحن من كبرها
بس لما شفتها اقول في نفسي عسى يمدينا على ماما نورة قبل ما يقفل
بصراحة كان لذيذ الطعم
و هذا موز الغنم lamb ب 118
يقولون جالسن يطبخونه 7 ساعات
وايضا الكمية كما تشاهدون ليست مقارنة للسعر
وايضا كانت لذيذة ..
نجي للتحلية فوندون شوكولا chocolate fondant ب 46
اشوا ان خويي ماقلط معي
وهذي الفاتورة 458 ريال
بعد ماطلعنا فيه باب على اليمين .. قلنا خلنا ندخل نشوف
غرفة اوكسجين تبع المطعم
طبعا وكوفي فيه طلبات ومينيو ..
دخلنا صورنا وطلعنا جلسته حلوة شكلها
وبعدها توكلنا على الله .
بالمختصر ..
تجربة رائعة للمطعم وخصوصا انه في الدور 77
الافضل لمن يريد الذهاب يكون وقت الغداء
الافضل انك ما تجي وانت جوعان مرة
طبعا عند الوصول للبرج يوجد خدمة صف السيارات ب 30 ريال واذا ماتبي تدفع .. انزل للمواقف تحت ببلاش
تقييمي ووجهة نظري
المكان 10 /10
النظافة 10 /10
الخدمة 10 /10
الاكل 8 / 10 ماشبعنا .. ذواقة
الاسعار 8 / 10 بحكم المكان و الكمية المقدمة
اتمنى اني قدمت المفيد ل العرب المسافرون
تحياتي


التعليقات (9)
الرياض دياري
الرياض دياري
بالعافيه عليكم وتقرير ولا اروع
تسلم يالذيب وماهو غريب عليك الابداع

سارووونه
سارووونه
يعطيك الف عافيه ذيبنا على هالمطعم الي مايشبع ابد
بس تظل تجربه فريده وجميله ماراح تنسونها ابد ...
مت ضحك على هالجمل ..
وكل ما اصور صورة بالفلاش التفت علي كل الي فالمطعم
بس لما شفتها اقول في نفسي عسى يمدينا على ماما نورة قبل ما يقفل
اشوا ان خويي ماقلط معي
الله يوسع صدرك بالعافيه ...تحياتي لك ..

ولدسدير 1
ولدسدير 1
صراحه المطعم فخم وجوه رومانسي
بس اكلهم طراره
والدليل السلطه

احس انكم ما شبعتوا
وتسلم على هالتقرير المميزوبالعافيه على قلوبكم ...

أمير الحرف
أمير الحرف
ههه اللي عجبني يمديك تلحق ماما نورة
اصلا الواجب تفلها عند الرومنسية والا ماما نورة قبل ترووح هناك
وبعدها تدخل عليهم وتناظر الفاتورة وتعمل نفسك اكلهم ماعجبك ههه
وتأخذ كم قطعه والحمد لله اهم شيء تغيير الجو . مشكور أخي

The universal
The universal
ماشاء الله وش هالزين ..
تصدق كنا محتارين بينه وبين مقهى الفندق نفسه بس اخترناا حق الفندق ..
بس تقرير حلو وخفيف وفيه الفاايده ..
من جد وش فيهم طارين الاكل الطماط عذرهم معهم غالي بس ما فيه ارخص من الخس

مالها حدود.
مالها حدود.
المراقب اللطيف: الذيب العربي
(مزعجتكم هناك )
.
.
تقريرك جنان!
وفكاهي في نفس الوقت
اما سالفه ال458 ريال - شخصين
ف عليكم بالعافيه
لا صار الموضوع:عزيمه ف الفلوس ماتنعدّ
ولا صار تلقائي: الله يعين
.
.
مالي عدّ بالرياض
وبما ان المنظر يغري
احتمال لا رحت الرياض حق معرض الكتاب الجاي امرّه
ولكن غدا
.
.
وبالمره
وشهي غرفة الأكسجين؟ وش تسوي يعني

فيصل
فيصل
والله مشكلة المكان يحدد اللاسعار
طلعت منهم واول بوفيه بالعروبه وانت متجهه شرق
بس أفضل ما فيه المكان أنا رحت له مرتين بالغداء والعشاء الافضل طبعا الغداء و المملكه كلها تشرح الصدر ^_^ الظهر

Impact
Impact

المطعم جميل ورومنسي ,,
ويصلح رومانسي اكثر من اي شئ اخر ,,
صدقني جو العشاء افضل من الغداء جربته في كلتا الوجبتين ,,
والي احبه اكثر ال cafe جوه حلو وعنده وجبات خفيفة مثل ال Sushi والساندويتشات والبيتزا وال Pasta و اكيد الحلويات

تقرير جميل ذيبان ويعطيك الف عافية على نقل تجاربك لاخوانك الاعضاء ,,
الحلو فيه انه يقدم خدمةSet Menu على حسب طلبك تختار المقبلات والصحون الرئيسية الي تبغاها ويقدمها لضيوفك في ورقة منفصلة اذا انت حاب تحدد الطلبات مثلاً
لديه اجواء خاصة للمناسبات واي طلب ممكن يلبيه لك !!
تحياتي ياغالي

كتكات783
كتكات783
رائع وتجربة تستحق التقرير
الفخامة موجودة والأجواء رومنسية والطعم على حسب تقييمك ممتاز لكن الأسعار مقارنة بما يقدم فأعتقد مبالغ فيها


خصم يصل إلى 25%