هامبورغ المسافرون العرب

أكتشف العالم بين يديك المسافرون العرب أكبر موقع سياحي في الخليج و الوطن العربي ، يحتوى على أكبر محتوى سياحي 350 ألف استفسار و نصائح عن السفر و السياحة, 50 ألف تقرير سياحي للمسافرون العرب حول العالم و أكثر من 50 ألف من الاماكن السياحية و انشطة وفعاليات سياحية ومراكز تسوق وفنادق، المسافرون العرب هو دليل المسافر العربي قبل السفر و اثناء الرحلة. artravelers.com ..
mzwd
09-12-2022 - 05:47 pm
التاريخ: 19-8-2005
المسافرون :
انا و فهد و محمد (ثبتوا الاسامي لأن في سوالف وايد بالسفره)
خط سير الرحلة
الكويت -دبي (ترانزيت ليله واحده) -ديزلدورف - هامبورغ -ديزلدورف - كولون - برول -دبي(ترانزيت ليله واحده) -الكويت
على فكره هذي اول مره نروح المانيا و فهد اول مره يسافر اوروبا و الشباب ميح (يعني صفر) بالانجليزي وانا كنت المترجم
الفيزا
اخذ اصدار الفيزا تقريبا شهر و هالشي بس للكويتيين و السعوديين اما باقي الجنسيات تخلص بسرعه (مادري شمعنى!!)
1-دبي
غادرنا من مطار الكويت في الساعه 6 مساءا على متن طيران الامارت الى دبي بس الصراحه صج تستاهل افضل خطوط جويه
مع انها تأخرت تقريبا ساعه لكن هالشي غير مستغرب لأنها مقلعه من الكويت و المسافرين كلهم كويتيين فالوضع جدا طبيعي بالنسبه لنا
المهم وصلنا دبي بحدود الساعه 10 مساءا اهم مافي الموضوع ان اغراضنا رايحه دايركت على المانيا يعني ماكو نطره نسيت
اقولكم ان طيران الامارات يوفر ليله مجانيه (مع العشاء و الفطور) بأحد الفنادق و كان فندق ميلينيوم القريب من المطار
طبعا قبلها سويت سيرج بالنت عن الفندق الصراحه شكله وايد حلو و احنا بالباص رايحين الفندق اشوف الحبيب طنش الفندق و
دخلنا بالظلمه ورا الفندق نفسه ولا فندق ثاني بس يضيق الخلق و اييب الغم اكتشفنا بعدها ان هالمبنى مخصص للترانزيت المهم
الفندق غرفه زينه بس المقلب كان بوفيه المطعم البوفيه بالضبط عباره عن وجبه واحد فقط يعني ماكو خيارات ثانيه لما شفنا
الوضع بهالصوره حسينا بالاحباط لأن كنا مستانسين ان الاقامه معاها وجبه عشاء المهم طلعنا من الفندق رحنا سيتي سنتر تمشينا
شوي و دخلنا فيلم be witched حق نيكول كيدمان تقريبا بعد ثلاث ارباع الفيلم انا كنت بسابع نومه و طلعنا قبل نهايه
الفيلم قلنا نروح الفندق ننام و نريح ابرك لنا
هذي صورة للمجمع بعد ما طلعنا من السينما

قعدنا الصبح نزلنا للفطور هم البوفيه الله يزيد النعمه تونا قاعدين على
الطاوله ولا واحد من الجرسونات يقولنا لازم تدفعون فلوس على الاكل سألناه ليش جان يقول مسافرين الترانزيت لهم كلوب ساندويش بس
و ما يصير ياكلون من البوفيه ولا يدفعون فلوس المهم قلناله ان محد بلغنا بهالشي و عدت على خير
طلعنا من الفندق بالباص للمطار و بالمطار و احنا ناطرين طيارتنا صورت جم صوره

هالصور حق مبنى جديد راح يكون مخصص لطيران الامارات نفس تصميم المبنى الحالي

و طارت طيارتنا الساعه 8:30 صباحا بدون تأخير (طبعا لأن ماكو كويتيين غيرنا مع عائله وحده)
بس احلى مافي طيران الامارات الالعاب الموجوده بالشاشه مع مشاهده الاقلاع و الهبوط
2-ديزلدورف (الوصول)
تقريبا الساعه 1:30 الظهر اول ما نزلنا من الطياره حسينا وقتها ان احنا مسافرين صج خصوصا لما الواحد يشوف هالمنظر
و هالجو

دخلنا قاعه الجوازات (هناك لازم كل واحد يكون ماسك جوازه بروحه ما يصير واحد يعطي الموظف جوازات العايله كلها مع بعض)
و بلش التحقيق ..شنو سبب الزياره ؟؟ و جم فلوسكم الكاش؟؟ و جم يوم راح تقعدون؟؟ ووين راح تقعدون؟؟:11sted_co خلصنا منه رحنا حق استلام الجناط
(الحقائب) و لأول مره بحياتي تطلع جنطتي اول ما اوصل خذينا اغراضنا بعدها طرحنا سؤال جوهري (المانيا و وصلناها الحين
وين نروح؟؟؟)و احنا بنطلع من المطار الى ارض الله الواسعه تواير جنطتي تطلع صوت مزعج فكل شوي اسحبها بطريقه غير على
و عسى يروح الصوت شافني ضابط الجمارك جان يناديني بروحي انا قلت الله يستر سألني اذا في فلوس او شي ممنوع او سجائر
بالجنطه قلتله و انا ابتسم (im non smoking) عشان يحس اني واثق بنفسي (طل بويهي البدليات على افا من يشيل) قلت دام لقيت واحد
ثقه سألته شلون نروح حق محطه القطار قالي اصعد فوق تلقى قطار اسمه (air sky) اذا ماني غلطان هذا قطار معلق يوصل لي محطه
قطار الرئيسيه مالت المطار (Duesseldorf Flughafen) اول شي قاعدين ندور شلون نشتري تذاكر حق الاير سكاي (يعني ملتزمين بالقوانين)
طلع الموضوع ببلاش المهم ركبنا لقطار و وصلنا للمحطه الرئيسيه سألنا عن موعد القطار من ديزلدورف الى هامبورغ عطانا خطتين
الاولى تبدل قطار واحد بDuisburg و توصل هامبورغ الساعه 7 و الثانيه تبدل مليون قطار وتوصل 11 بليل بس ارخص بوايد من
الاولى قلنا خلك على مينونك ندفع زياده بس نوصل عشان نرتاح لأن الرحله كانت متعبه بشكل مو طبيعي 7 ساعات بالطياره
هذا غير المسافه الى هامبورغ 4 ساعات بالقطار حجزنا التذاكر و نزلنا للرصيف
موقع محطه القطارات على الانترنت http://www.raileurope.com/us/index.htm
خلال الطريج كانت المناظر الطبيعيه لا توصف لدرجه اني نسيت اصور بس حصلت هالصوره و من اللون الاخضر تنسى شكل التراب

3-هامبورغ (3 ليالي)
وصلنا هامبورغ بحمدالله و رعايته

طلعنا من المحطه شفنا تكاسي قلنا ناخذ واحد يوصلنا الفندق كل ما نقول حق واحد فندق كمبنسكي يقول روحوا مشي
حرام عليكم بعد كل هالرحله و نروح مشي المهم امرنا لله رحنا مشينا و وصلنا الفندق كنا على وشك ان ننام باللوبي
كل الاجراءات مشت عال العال رحنا الغرفه ولا ماكو مكيف و باب الحمام(تكرمون) مافيه قفل !! كلمنا الرسبشن بخصوص التكييف
قالولنا ننطر لي ثاني يوم على ما تفضى الغرف شوي ولله ما قصروا ودونا غرفه ثانيه بس نفس مشكله قفل باب الحمام
و هذا موقع الفندق http://www.kempinski.com/en/hotel/index.htm
وهذي صورة من برنامج Google Earth توضح المسافة بين فندق كمبنسكي و محطة القطار

بعدين اخذنا جوله مكوكيه بهامبورغ و خذينا هالصور

هالصور على بحيره Alster جدام فندقنا

هذي صور على الجسر بين البحيرتين

محمد و اهو يتحرش بالبط
بعدين رحنا الداون تاون او السوق بس كان كل شي مسكر لأنه يوم احد

يومها محمد كان يحن يبي صيدليه عشان يشتري علبه للعدسات بس لأن حظه حلو حتى الصيدليات مسكره

هذا نهر بالداون تاون مادري شسمه

هالتمثال موجود بكل مكان بالسوق مادري شقصته

و هذا مبنى البلديه و اذا تلاحظون الخيام البيض هذي تكون موجوده بالساحه مقابل البلديه كل يوم احد و هي عباره
عن سوق شعبي
نرجع حق الصور من جولتنا حول البحيره خذت منا تقريبا ساعتين مشي

و هذا قروب شياب و عجايز يتمشون بالدراجات الهوائيه وكل شوي يوقفونهم عند تمثال و مادري شنو يقول الدليل
احنا نمشي بس عند كل تمثال نحصلهم مشاءالله صج سريعين

و هذا مسجد بنهايه البحيره

هذي محطه القطار من الداخل و تعتبر من المحطات الكبيره

هذا المنظر من مطعم الفندق
صور من الداون تاون

عروض اكروباتيه

نرجع مره ثانيه للبحيره

مثل ما شايفين فيها تأجير قوارب
صور للفندق من جهه البحيره

هذا فهد سوبر ستار السفره يموت على شي اسمه تصوير

الخضره ترد الروح

وقبل مغادرتنا بيوم اكتشفنا مطعم ايراني قريب من فندقنا ولله و تعشينا ذاك الجيلو كباب الطيب (ذبح اسلامي) مع كوب اللبن و ردينا الفندق
على فكره هامبورغ منطقه هاديه حلوه حق الراحه والاستجمام وثلاثة ايام كفايه عليها و لاحظنا ان فيها ايرانيين وايد بس الي يميز المنطقة ان مافيها خليجيين
حق الي يحب يغير جو و يحس انه صج مسافر
محطه القطار

هذا الشارع الي فيه فندقنا و جدامنا محطه القطار وقت المغادره
و واقع الحال يقول (يالله يا قلبي سرينا ضاقت هامبورغ علينا)
بعض المواقع المفيده بخصوص هامبورغ
https://artravelers.com
ان شاء الله في الايام القادمه اكمل باقي الرحله لديزلدورف و الافلام الكوميديه الي صارت فينا هناك
بس لا تنسون الردود


رحلتي الى ألمانيا
التعليقات (8)
Q8ti
Q8ti
يعطيك العافيه على الموضوع الممتع شكلها خوش سفره
واحنى في انتظار باجي الرحله

Hesham
Hesham
mzwd

.. ...

سحابه
سحابه
السلام عليكم ورحمة الله وبركاته
حمد لله على السلامه أخوي ...وشكرا لك على سردك الممتع...
قبلها سويت سيرج بالنت عن الفندق الصراحه شكله وايد حلو و احنا بالباص رايحين الفندق اشوف الحبيب طنش الفندق و
دخلنا بالظلمه ورا الفندق نفسه ولا فندق ثاني بس يضيق الخلق و اييب الغم اكتشفنا بعدها ان هالمبنى مخصص للترانزيت المهم
حنا بعد في الصيف رحنا لدوسلدورف على الاماراتيه في العوده كان فيه ترانزيت في دبي
في ميلينيوم المطار ...أول مارحنا دخل زوجي من جهه وكانت فخمه بعدين قال للتكسي روح ورا
يوم رحنا لين الفندق عادي بس غرفه حليوه ... أثره للترانزيت
كان بوفيه المطعم البوفيه بالضبط عباره عن وجبه واحد فقط يعني ماكو خيارات ثانيه
غريبه !!!
أخوي حنا أول مادخلنا عطونا على عددنا
  • كوبون عصيرات وشاي وقهوه ( صالح لمرة واحده في أي وقت 24 ساعه في الكوفي شوب..مااستخدمناه)
  • كوبون فطور ( طبعا ما استخدمناه كنا في عاشر :thumb_ico :36_1_50: )
  • كوبون غداء ( وكان بوفيه فيه كل شي ولذيذ بشكل خيالي والله كأنه طبخ بيت :222: :1076: :15: ...وسعنا صدرنا فيه :36_1_51:

بعد الأكل اللي مش حالك في أوروبا )
شكرا لك أخوي وبانتظار تواصل إبداعك .
أختك سحابه .

mzwd
mzwd
Q8ti
Hesham

:
1- 8 ( )
2- ( )
3- 3 4
4- ( )

mzwd
mzwd
  1. 4-ديزلدورف (6 ليالي)

  2. و هذي صوره المترو و لها سالفه


نهايه مشاركتي السابقه قلتلكم ان في مواقف صارت لنا بالسفره
قبل لا نروح ديزلدورف حجزنا التذاكر قبلها بيوم عشان نحسب حسابنا عدل :gathering (يعني مرتبين الشغل) و طلعنا مبجر من الفندق و نطرنا عند الرصيف قبل موعد القطار بتقريبا
نص ساعه راحوا الشباب يشترون لنا من بيتزاهت :1076: و انا ناطر عند الجناط المهم شفنا ان قبل قطارنا في تقريبا 6 قطارات قلنا مو مشكله دام ان احنا عند الرصيف و ماراح
نتحرك القطار الي حجزنا عليه يروح ديزلدورف دايركت بدون تبديل قطارات كان موعده الساعه 3 العصر واحنا ناطرين في قطار طول مو راضي يمشي و احنا ناطرين قطارنا يوصل عشان
نركبه صارت الساعه 3 و القطار ما تحرك و احنا ناطرين على الرصيف الشباب يقولون ليكون هذا قطارنا و انا اقولهم لا قبل قطارنا في 6 قطارات بعدين دورنا
شوي و يتحرك القطار و انا اشوف القطار انصدمت :shocking: لما قريت على الشاشه الي على القطار Duesseldorf وقتها حسيت اني ربعي راح يعدموني لأني ضيعت القطار :36_1_7: مع ان احنا
مجابلينه صارلنا تقريبا ربع ساعه على طول قلت اصلح غلطتي رحت حق مكتب الحجز و قدرت احجز على القطار الي بعده بساعه الا ربع مع دفع رسوم تغيير الوقت 3 يورو لكل شخص
بس هالمره راح نبدل قطار في Dortmund المفروض يوصل هناك الساعه 6:30 و القطار الي رايح ديزلدورف يتحرك الساعه 6:38 المشكله ان قطارنا متأخر عن موعده ربع ساعه
و القطار الي راح نركبه يتحرك بعد 8 دقايق سألنا الموظفين بالقطار قالولنا ان القطار الي راح نركبه ناطرنا لأن قطارنا متأخر المهم وصلنا دوترموند و احنا ناطرين
عند باب القطار و كل واحد معاه جنطته مستعدين للماراثون الي راح يصير لأن ماكو وقت و احنا نوصل عند رصيف 11 و لازم نروح رصيف 16 يعني مسافه و الوقت قصير لحق لا تلحق
فتح باب القطار و احنا ركض جنا ضايعين نركض بس ماندري وين نروح :bounce8: شفنا السلم رحنا على طول (طبعا شكلنا وقتها يموت من الضحك) يالله يالله بسرعه ولا واحد يوقفنا بعد
ما عرف ان احنا عرب سألنا وين رايحين قلناله ديزلدورف طلع الرصيف اهو نفسه بس الجهه الثانيه (نزلنا على اليمين نركب على اليسار) حسينا بالاحراج كل هاللويه على
الفاضي و القطار الي ناطرينه بعده ما وصل الشخص الي ساعدنا طلع شاب مغربي يدرس طب بالمانيا (مشكلتنا انا انا مع فهد من النوع الي يتكلم بسرعه المغربي فكر ان احنا يمنيين) لي اليوم و احنا نضحك على هالسالفه :36_11_6:

4-ديزلدورف (6 ليالي)

ووصلنا ديزلدورف الساعه 7:30 تقريبا و نفس مشكله محطه هامبورغ شلون نروح الفندق و نفس الطريقه التكاسي مو راضين يوصلونا (احنا حاجزين بفندق هوليداي ان) طلع الفندق بنهايه الشارع الي فيه المحطه تقريبا 100متر و هم رحنا الفندق مشي
موقع فندق هوليداي ان ديزلدورف http://www.ichotelsgroup.com/h/d/hi/1/en/hd/dusle
موقع الفندق من محطة القطار

و كالعاده اخذنا جوله مكوكيه استكشافيه بديزلدورف و تعشينا بمطعم تركي (ديزلدورف فيها اتراك وايد)
المنطقه بصورة عامه سياحية و تجارية بس جوها عجيب الوقت الي فيه درجه الحراره بالكويت 45 بدزلدورف تكون 20 (بس نصيحة لازم تاخذون ملابس لكل الفصول لأن كل يوم عندهم جو غير) احنا يوم نلبس شورت و نفس اليوم بليل نلبس جاكيت
بالنسبه للمواصلات هناك في القطار العادي الي يوصل بين المناطق و في المترو الي يمشي بالشوارع و في underground نفس المترو بس يوقف بمحطات اقل و تحت الارض داخل ديزلدورف بس
ادري كثرت عليكم بالكلام اخليكم مع الصور

هالصوره بأحد المجمعات بشارع konigsalle عباره عن طربال معروض عليه بحيره و اسماك تتحرك و لما تمشي عليه تسمع صوت الماي و السمك يتحرك بعيد عنك (عجبتني السالفه)

حديقه بشارع konigsalle
هذي صور منوعه من نفس الشارع

هذا تمثال امام متحف قريب من الشارع
بعدين اتجهنا لنهر الراين و البرج

(استراحه المحارب)

بعدين قررنا ان نصعد البرج نسيت سعر التذكره بس كانت رخيصه و صورت هاللقطات

و هذي صوره المترو و لها سالفه


احنا عجبنا موضوع المترو يوديك كل مكان بديزلدورف طبعا احنا ركبنا ببلاش شكينا بالموضوع مو معقوله مافي تذاكر لقينا جهاز التذاكر بالمحطه بس ما فهمنا شي في تذكره حمره و خضره و صفره و زرقه محنا عارفين الفرق بينهم لأن كل شي مكتوب بالالماني و مافي احد يساعدنا و المترو مافيه الا السايق و 90% من الناس ما شفنا معاهم تذاكر ولا هم يحزنون قلنا حشره مع الناس عيد مره و احنا بالمترو شفنا واحد يخزنا خز شكينا بروحنا :16: شوي جان يقوم و يسأل الناس عن التذاكر وصل عندنا سألنا عن التذاكر قلناله ما عندنا طلب جوازاتنا انا كنت الوحيد الي حاسب حسابي و مصور جوازي عطيته الصوره
وسوالنا تحقيق وين ساكنين عطيناه اسم الفندق طلب منا عنوان الفندق وقتها ما نعرف العنوان بالضبط وضحناله ان احنا سياح و ما نعرف الطريقه و ما شفنا احد ياخذ تذاكر ولا موظف ممكن نشتري منه التذكره حتى لو عليها رسوم زياده المهم قلتله احنا معترفين ان احنا غلطانين بس اكيد في حل بديل قال ماكو الا الشرطه (مادري ليش تذكرت فيلم همام في امستردام) و الريال صارله سنه يطقطق بجهاز معاه و احنا ماندري شالسالفه بس شكينا انه نصاب لأن ما يلبس يونيفورم (لبس موحد) وصلنا آخر محطه و نزلنا فهد
قالي سأله عن هويته عشان نتأكد انه مو نصاب توني بسأله عن هويته ولا الدوريه واصله :11sted_co و نفس التحقيق مره ثانيه قالنا جدامكم حل من اثنين اما تروحون المخفر او تدفعون
غرامه 40 يورو امرنا لله ندفع ولا ننام بالمخفر دفعناله الغرامه و مشينا و احنا نتحلطم و متحسفين على المبلغ لأن سعر التذكره بحدود 5 يورو و الغرامه 40 يورو
(تعور القلب) ...المشكلة ان احنا طول ما كنا بدلزدورف نركب ببلاش و ما صادونا الا آخر السفرة
بعدها طبقنا خطة ان لما نركب القطار كل واحد يقعد بروح و نمثل ان ما نعرف بعض وقبل لا ننزل نأشر لبعض بالنظرات (بالضبط كأن عصابه بتنفذ عملية خطف:36_6_10: )
نرجع حق محور حديثنا و صور ديزلدورف

و هذي صور حق old town

نهر الراين كان قريب منا قلنا نروح نشرب عصير هناك و نشوف هالمناظر

هذي سفينه تسوي رحلات سياحيه من ديزلدورف لي كولون للشباب و الشابات بس و الشياب و العجايز على السفينه الي وراها

حسينا بالملل لأن خلال يومين بس افترينا ديزلدورف كلها هالكلام كان العصر اتفقنا نروح كولون
رحله كولون ان شاء الله بالمشاركه القادمه
بعض المواقع المفيده
https://artravelers.com
محل لتأجير الدراجات الهوائية بدزلدوورف
Rad ab
عنوانه Triedrich st
Tel:336661
و في محل ثاني بالشارع الي وراه

bualaa
bualaa
الاخ الكريم mzwd
أهنئكم بعيد الفطر السعيد
وكل عام وأنتم بالف خير
معلومات وصور رائعه تسلم وما قصرت.
تحياتي لك

mzwd
mzwd
bualaa يعطيك العافيه اخوي وانتظر الجزء الثالث و الرابع

mzwd
mzwd
الاخ Maxima
اول شي انت قلت سؤالين و كتبت ثلاث اسئله
بالنسبه للسؤال الاول :
حاولنا نشوف و نسأل عن احلى المناطق بالمانيا و بمساعده مواضيع المنتدى اخترنا هامبورغ لأنها منطقه هاديه و حلوه و فيها بحيره كبيره و ديزلدورف تعتبر عاصمه الاناقه مثل ما يقولون عنها و كولون فيها مصنع الكاكاو و اقدم كنيسه (اذا ماني غلطان) من الحرب العالميه الاولى و برول فيها مدينه الالعاب فانتازيا لاند
السؤال الثاني:
بالنسبه للتذاكر (على الاماراتيه و ترانزين بدبي ليله بالروحه و الرده) + 3 ليالي فندق كمبنسكي هامبورغ+6 ليالي بديزلدورف كلفنا تقريبا 400 دينار كويتي
و بالنسبه للمصروف الشخصي طبعا يعتمد على الشخص بس تقريبا 250-300 دينار كويتي للشخص كافيه و تزيد (بس بدون هدايا او مع هدايا بسيطه)
السؤال الثالث:
الصراحه اهي مو كامرتي لكن اول ما اتأكد من نوعها راح احطلك رد بالموضوع


خصم يصل إلى 25%