انتظرك بفارغ اصبر
لاني محتاج المعلومات بنفس التخطيط هذا
وان شاءالله بعد العيد رايح
وشاكر لك

الحمد لله على السلامة

صح لسانك كلام سليم على الخطوط الأمارانية
و نحن بفارغ الصبر على أكمال تقريرك......................!

ان شاء الله اليوم اكمل الرحلة
وصلنا بحمد الله لميونخ وكانت الساعة 3 عصر
عند الدخول يعني عند الجوازات كانت زحمه فظيعه وقفنا في الدور وانتظار الى أن وصل دورنا وطبعا نحنا سامعين كلام كتير جدا عن عدم الدخول بفيزا الشنجن اذا كانت من دولة أخرى ونحنا كانت فيزتنا شنجن من فرنسا
الحمد لله دخلنا بكل سهولة من دون ولا سؤال وكانوا بشوشين حتى
الحمدلله استلمنا الشنط بسهولة كمان والعربات بدون فلوس يعني تسحب عربة وعادي
ورحنا ندور على تاكسي كبير لقينا قدام باب المطار 3 تاكسي اول واحد عراقي قلنا ب 70 يورو يوصلنا من المطار الى فندق NH München Deutscher Kaiser كنا حاجزين فيه ليلة وحده بس اللي حنرتاح فيها من السفر
المهم نرجع للتكاسي تاني تاكسي الماني قال يوصلنا ب 73يورو
وثالث تاكسي كانت وحده المانية قالت توصلنا 65 يورو اتفقنا معاها وركبنا قام شافها التاكسي العراقي وصر يخاصمها انه ليش اخذتيهم مني
المهم كانت كتير طيبة وجدا خلوقة وقالت زوجها جزائري عشان كده تعرف شويه عربي
أخذنا رقمها ووصلنا الفندق الحمد لله طبعا مافي احد يطلع الشنط طلعنا شنطنا وكانت الغرفة سبيريور جدا جدا ضيقة وصغيرة وما فيها ماكينة قهوة ولا غلاية شاي
صراحة ابدا ما عجبتني بس انا كنت متقصدة اجرب عدد فنادق وقلت افيد فيها اعضاء المنتدى الفندق عامة ما عجبني بس كان قريب من المحطة جدا جدا خرجنا من باب الفندق نجيب عشاء على طول كانت المحطة في وجهنا - نحنا كنا اول مره نروح اوروبا -
رحنا المحطة انا وماما بس والباقيين قعدوا في الاوتيل تعبانين
المحطة حلوة من جد كلها محلات حتى محلات تذكارات فيها ومستلزمات شخصية فيها يعني اللي مو مشتري شمسية على طول يلاقي من هناك او أي شي تاني.... الجو كان شمس بس برد يعني شمس حارقة بس ما في حر ابدا
اشترينا من المحطة ماء وببسي وبيتزا وكرواسان و ... و ...زالخ
المهم لما جينا راجعين الاوتيل لقينا عند باب الاوتيل يسار تقريبا لاصق فيه سوبر ماركت عادي صغير بس ارخص من المحطة بألف مره يعني فرق فظيع
في اخر يوم في الرحلة اكتشفنا انه المحطة أغلى مكان ممكن تشتري منه الموية و
طيب رجعنا الاوتيل ونمنا لأنه في جدول الرحلة اللي مرتبينه كنا حاطين المارين بلاتز و نتفرج على ميونخ ثانية يوم وكمان نتعلم كيف نحجز قطار من المحطة
صحينا ثانية يوم 10 الصبح ونزلنا رحنا المارين مشي بدون تاكسي مشي يمكن ربع ساعة بس وصلنا المارين اوله في ماكدونالدز وتمشينا فيه شفنا تمثال اخضر واقف و الناس شوي متجمعين حواليه رحنا نشوفه ونتصور جنبه كان تمثال امرأة خضرا وفجأة ........ تحرك التمثال ههه طبعا كانت شحاته بس و الله روعة كانت من جد هذه مو اسمها شحاته هذا اسمه عمل والله و متعب كمان .... لقينا كافيه بجلسات بعد جلسنا فطرنا صراحة ماكان لذيذ ابدا مع انه الالمان زحمة عنده - بعدين احد يفهمني ليش ما عندهم كرواسان بالجبنة البيضا .. ماني فاهمه - المهم شوي لقينا رساميين قاعدين يرسمو على الرصيف رسمه رائعة شوية كمان لقينا فرقة تغني وتعزف وكمان اسلوب لكسب المال والله روعة مو متل عندنا الافريقية تفضل تدق على شباك السيارة وتزورك حتعطيني يعني حتعطيني
دخلنا C&A وماعاد خرجنا هوا تقريبا نفس فكرة ستي بلازا عندنا مو أفضل يعني بس... بعدها اللي معانا تعبه ومعاهم بيبي وشوي باقي افراد العائلة الكرام كانوا كسالى طبعا ما نسينا ندوق الايس كريم وصراحة ما كان لذيذ مع انه ذقنا من محليين مختلفة بس كان اقل من عادي
طبعا الخليجين مليانين في كل محل ... وصلنا الين ماكدونالدز وبرجر كينج جلسنا تغدينا بطاطس - برجر سمك - ببسي - وكله كان الحمدلله بس فرق بينه وبين عندنا
المهم رجعنا مشي على الاوتيل عشان نعمل التشيك اوت من الاوتيلNH ونغيره ونروح Sofitel Munich Bayerpost
لأنه حجزنا كان فيه لمده ثلاث ايام وكنا اخذين فيه سويت الليلة ب 1200 ريال بس والله كان روعة السويت عبارة عن دورين كل دور في حمام بس الحمام اللي في الدور اللي تحت كان مو مره مفيد لانه بدون بانيو أو شور بصراحة السويت كان واسع جدا بس مافي نظافه يعني مستوى النظافة منخفض وصراحة هاذا حسيته بكل فنادقهم
اهم حاجه - اللي الله يجزيه خير نبه عليها احد الاعضاء هنا بس ماني فاكره مين- اول ما توصل الاوتيل قبل ما تستلم الغرفه تطلب منهم يشيلو الموجود في الثلاجة وكل شي بفلوس كده بالضبط تطلبوا منهم يشيلوا كل شي بفلوس لأنه اتضح انهم ينزلوا قنوات ماهي كويسه على التلفزيون ويحسبوها عليكم والحمد لله نحنا شلناها
جلسنا شوي في الفندق وتوضينا صلينا ظهر وعصر ويلله خروج كملنا عالمارين بلاتز نتمشى ونتفرج اللين وصلنا كنيسه عندهم كبيره وقاعده تدق اجراسها والناس واقفه زحمة فظيعه عندها يتفرجوا عليها سألنا قالولنا ما تدق عندهم الا كل سنة مره او كل فتره مره المهم بعد تعب ومشي طلعنا ما خلصنا ربع المارين بلاتز تعشينا والله نسيت فين و رحنا المحطة كان حجز القطار سهل حجزنا رحلة لقارمش 5 اشخاص الدرجة الاولى ب270 يورو طبعا جدا جدا غالية
بكره ان شاء الله اكمل معاكم
أي سؤال وأي استفسار انا حاضره

ليش ما في تفاعل
لسه الجاي أحلى و أحلى
واذا ما لقيت تفاعل ما رح اكمل
وين اعضاء النتدى ؟؟؟؟؟؟؟؟؟؟؟

السلام عليكم ...حمدلله ع السلامه أولا
الحمدلله لحقت عل الموضوع من البداية
متابعتنج أختى

الله يقويك انا متاابع معك اختي واصلي ^_^

1. ورجعنا الى محطة القطار كنا حاجزين قطار الساعة 9.45

اليوم إن شاء الله الرحلة كانت على قارميش ، مع انه كنا خايفين انه ما يكون في ثلج لأنه الجو عندهم كان شمس شديده
المهم توكلنا على الله وانطلقنا بالقطار اللي كان ثلاث ارباعه فاضي جدا قليل عدد الاشخاص فيه
طبعا فعلا الواحد ما يحس بالوقت لانه بيتفرج على المناظر الرحلة تقريبا اخذت ساعة ونص أو ساعتين مو متأكدة بعدها وصلنا لمحطة قارمش ومنها أخذنا تاكسي الى التلفريك على طول اخذ مننا 30 يورو اعتقد بس لا تنسوا انه 5 اشخاص وطفل يعني السيارة كبيرة
نزلنا عند مبنى في درج تطلعوا منه على طول حتلاقو شباك التذاكر قدامكم وزحمة عليه جدا وكلهم كانوا أجانب - يمكن لانو الوقت كان بدري - التذاكر كلفت 60 يورو للصعود لأعلى قمة والنزول
الحمد لله ركبنا التلفريك وطلعنا كان واضح انه مافي ثلج المهم وصلنا لأعلى قمة عندهم كان برد جدا بس شمس فطيعه يعني من بعد هالرحلة تحولنا الى سمر جدا جدا فوق في كشك يبيع سوفونير ومحل ثاني بطاطس وببسي وابل باي اخذنا منه بطاطس وابل باي بس كان ابدا مو لذيذ تصورنا ودورنا ونزلنا بدرج قصير الى مطعم مغلق عشان نفطر او نتغدا وكل الاكل كان الحمد لله على النعمة ابدا مو لذيذ بالعكس تماما
ووجوه البياعين غير مبتسمة للعرب و المسلمين اطلاقا ولا كأنهم متعودين علينا ابدا
المهم خلصنا نزلنا بالتلفريك للمحطة الثانية وكانت احلى بفارق يعني اعلى محطة ماكانت حلوة واللي اسفل منها هي الاحلى وبرضو فيها مطعم الو اطلالة حلوة وواضح انه اكله افضل ومليان خليجيين- فيه منطقة كان الثلج فيها ما ذاب والكل بيلعب فيها
الحمد لله تصورنا ولعبنا ونزلنا بالتلفريك لنفس المبنى الى طلعنا منه وكان الوقت 6 عصر عندهم خرجنا من المبنى ومشينا مسافة قصيرة للبحيرة فيها قوارب وفي منطقة العاب صغيرة للأطفال وفي شط صراحة ما رحنا لأنه الناس كلهم في - مو لابسين - وفي مطعمين بجلسات
جلسنا في تاني واحد وكانت الطاولة على طول عالبحيرة بعد شوي قال صاحب المطعم لازم تقوموا تغيروا مكانكم وترحوا على طاولة ثانية بعيدة عن البحيره وتحت مظله قلنا ليش قال عشان في مطر حينزل دحين غيرنا مكاننا وطلبنا شوربة طماطم وشوربة بطاطس وسلطة و فطيرة بالجبنة وايس كريم وكله كان ابدا مو كويس يعني الحمد لله عالنعمة
وشوي ولسه الاكل ما وصل وينزل مطر فظيع وكثير والجو صار خيال وبرد رائع ومنظر البحيرة اروع و أروع
بعدها صارت الساعة 8 ونحنا متفقين مع سواق التاكسي يرجعلنا بنفس هالوقت مشينا الى مبنى التلفريك في وسط المطر لأنه مافي وسيلة ثانية وانتظرنا سواق التاكسي الى أن وصل

ورجعنا الى محطة القطار كنا حاجزين قطار الساعة 9.45

كان المطر في نفس قارمش البلدة وقف بس الجو برد وخيال البيبي اللي معانا ملابسه كلها تبللت وخفنا عليه يمرض طلعنا ندورله على محل نشتري منه ملابس المهم طلع جنب المحطة على اليسار في c&a اشترينا منه ووصل القطار ومنه الى ميونخ والحمد لله نمنا ونحنا ميتين تعب
اليوم الثالث
كنا مقررين نروح فيه على الليجو لاند - وما أدراكم ما الليجو لاند - صراحة روعة
نبدأ الحمد لله فطرنا من المحطة وحجزنا القطار تذاكر مو درجة أولى لخمسة اشخاص ب 30 يورور وصراحة فرق في الجلسه عن الدرجة الاولى بس ابدا ماتعتبر سيئة
وصلنا الى محطة مدينة ليجو لاند ومنها نزلنا ومشينا شوي لقينا موقف الباص الى ياخذ على نفس الليجو لاند مجرد ماتقرب من مدينة الالعاب تسمع من العشب صوت موسيقى روعة والمدينة عامة كانت رائعه واتعب اقول رائعة وفي عند المدخل على اليسار محل ايس كريم صراحه لذيذ وكان الذ واحد اكلته في المانيا و النمسا كلها
المهم وبعد يوم حافل لعب وتصوير ودعتنا المدينة بالمطر الشديد يعني من جد جوهم غريب في البداية شمس فظيعه وفجأه مطر
رجعنا بالباص عالقطار ومنه الى ميونخ أكلنا ونمنا والحمد لله
بكره حاكمل معاكم أول ايام زيلامسي الرائعة- كيف رحناها ؟؟ وفين نزلنا فيها ؟؟؟