بيروت المسافرون العرب

أكتشف العالم بين يديك المسافرون العرب أكبر موقع سياحي في الخليج و الوطن العربي ، يحتوى على أكبر محتوى سياحي 350 ألف استفسار و نصائح عن السفر و السياحة, 50 ألف تقرير سياحي للمسافرون العرب حول العالم و أكثر من 50 ألف من الاماكن السياحية و انشطة وفعاليات سياحية ومراكز تسوق وفنادق، المسافرون العرب هو دليل المسافر العربي قبل السفر و اثناء الرحلة. artravelers.com ..
مسافر في سما
06-11-2022 - 07:06 pm
في البداية احييكم احبابي في هذا المنتدى الجميل الملئ بسحابات السفر وضجيج محركات الطيارات ودقات قلوب الرحالين في بلاد الواحد الأحد .
اتمنى ألا يفهم من مقالي هذا هو النقد لمجرد النقد فقط ! إنما أريد أن أبدي رأيي حول لبنان كوجهة سياحية !
استميحكم عذرا الان لانني سوف اكتب باللهجة السعودية أو مايمكن أن نسميه اللهجة البدوية فقط لغرض ايصال المعلومة وليس العجز عن التعبير بلغتنا العربية الجميلة !
مدري وش اللي خلاني اروح لبنان السنة اللي فاتت في الصيف , مادريت عن نفسي الا وانا راكب الطيارة وطاير على لبنان على الخطوط السعودية . طبعا مابغا اتكلم عن الطيارة والحر اللي ذبحني فيها , حر مو طبيعي المشكلة انه كنا في ارتفاع غير طبيعي يعني فوق السحب او تحتها بشوي ! مدري ! المهم كل اللي اتذكره الحين انه جلس جنبي واحد سعودي شاب محترم وباين انه يسافر من زمان لبنان ! واستفدت منه امور كثيرة مابخل علي ان يقولها يعني علمني وش احسن مطاعم واحسن اماكن التمشي .... الخ ! بس قلي على حاجة ولازم تنبهون لها اذا ماسافرت قبل لبنان لاي دولة راح تعجبك لبنان اما اذا سافرت قبل كدا لاي دولة غير لبنان وماعجبتك فان لبنان ماراح تعجبك بصراحة صدمني لاني سافرت قبل كذا للمغرب بس ماقدر اقول انه ماعجبني ولكن انبسطت شوي وكنت اظن لبنان احسن .
بصراحة ماعرفت معنى كلام الرجال هذا إلا بعد ماخلصت يومي الخامس في لبنان ! كنت جالس قدام الروشة لحالي وكلمت نفسي وقلت :
انت الحين وين ؟ لبنان
كيف لبنان ؟ حامت كبدي
ليش ؟ مافيها شي زايد عن غيرها من الدول العربية ويمكن جدة احلى من بيروت بالف مرة
بيروت كاملة لايوجد فيها كورنيش الا على مسافة قصيرة جدا ومهمل جدا , واللي زاد الطين بلة انه في كم مقهى رافعين الاسعار تقول اننا في جنيف او جزيرة بالي .
انا لمن كنت مسافر بالطيارة قلت لكم كانت الطيارة حر وبلعتها بس لمن خلصت اليوم السادس في بيروت يمكن تروشت واستحميت 60 مرة من الحر والشوب اللي موجود , وكمان سديت اذني وسمعي الف مرة من الضجيج والزحمة . اسالكم بالله هذا حال يمكن اسميه سياحة ؟ حاش لله
بصراحة المغرب ارحم وافضل من ناحية الاسعار والجو والبيئة واختلاف الثقافة والموسيقى والاكل وخصوصا تلك المدينة الجميلة التي تسمى طنجة . في الصيف باردة . انا متاكد من كلامي باردة وفيها كورنيش جميل ومتواضع بس منظم فوق هذا كله نظيف ومقاهيه معقولة السعر .
راح اختصر لكم الموضوع . لبنان يمكن شعبهم شوي تقدر تقول متحضر ومؤدب وعنده ايتيكيت بس بصراحة البلد اخذ اكثر من حجمه لمن قالو انه سويسرا الشرق ! بعدين راح اهمس في اذن اي شخص ميزانيته على قد حاله "واللي يرحم والديك لاتجي لبنان , لانك ماتقدر ترفع راسك وتتفشخر ! لبنان ياخد كل فلوسك وفي النهاية ماقول انك تطلع من المولد بلا حمص ولكن اكيد بتطلع بس بصحن بابا غنوج !
انتهت المشاركة .
تنبيه : ياخوي المسافر والسايح انت جاي من بلد حار ويمكن اخد مبلغ السفر قرض , تكفى شوف لك مكان بارد او جوه معتدل وكمان سعره معقول. ماتعتقد ان كلامي في حكمة ومعقول .
تقبلو تحياتي


التعليقات (9)
بن كارترايت
بن كارترايت
ياحبى لك .. تذكر العام وكنا نبغى نجتمع فى مكان والغوا الموضوع ... وشلون مت حر بطياره ! يمكن سما!
اما جده احسن من بيروت! رطوبه وكورنيش كله قوارض..... بعدين البراد بالجبل قسم ان تثلج ....

violetq8
violetq8
والله ترى كل واحد له وجهة نظر حلو
مثل ما انت شايف في توقيعي رحلاتي و سفراتي واجد و الحمدلله و فضل منه جل جلالة
ف اقدر اقولك ان كلامك غير صحيح انا اول سفرة لي الي لبنان 2004 و حتى الان لم انساها من جمالها و انا تونيراد من ايطاليا و على فكرة ترى انا من شلة المغرب و كنت اجيها من 1999 رحت لكازا وأكادير و اقولك *لبنان غير
هناك عوامل تجعل السفرة حلو وهية
1- التوفيق من الله 2- التخطيط الجيد قبل السفر 3- الفندق الجيد 4- معرفة الاماكن السياحية هل تصلحلك ولا لا يعني واحديروح لمنطقة بحرية و يقول يبي تسوق او واحديروح باصيف الي شرق اسيا و يبي براد و يلبس جاكيت
5- الناس الي تخاويها هل هي مملة ولا لا او انكتسافر لحالك ترى مالها طعم كلش * والله ولي التوفيق
و ترى سالفة مت حر بالطيارة هذا شغل الطيران السعودي مو لبنان
ترى هذه وجهة اخوك violetq8 و قد اختلف معك و قد اتشارك معك و لا تنسى ان لبنان توهاطالع منها سوريا و دشتها اسرائيل و طلعة منها الله يكون بعونهم

~ Be Happy
~ Be Happy
اخوي
لولا اختلاف الاراء لبارت السلع
وتدري ليش ماعجبتك لانك قبل لاتوطا ارضها قعدت مع هالشاب اللي عطاك شوية سلبيه والسلبيه هاذي دخلت فيك مهما كانت لبنان جميله مراح تشوفها حلوة لانو خلاص خذت سلبيه او انشحنت سلبي مابغا ادخلك في معمعة علم نفس
وبعدين ايش جاب لجاب بيروت X جدة
مختلفنا اذا قلت دبي دبي صراحة حضارة العرب كلها تحس انك باليابان من كثر التطور صح لبنان مو زي دبي بس حلوة وانهدت كم مره من القصف ومع ذلك تشوف انها ترجع تتعمر وشعبها الشعب الصامد
هالجبال الخضراء وجو الجبال الساحر والاماكن الخيالية زي مغارة جعيتا تقولي زي جدة :2kwzj
عموما وجهة نظر احترمها

أم شوشة
أم شوشة
اتفق معاك بالراي
بعدين راح اهمس في اذن اي شخص ميزانيته على قد حاله "واللي يرحم والديك لاتجي لبنان , لانك ماتقدر ترفع راسك وتتفشخر ! لبنان ياخد كل فلوسك وفي النهاية ماقول انك تطلع من المولد بلا حمص ولكن اكيد بتطلع بس بصحن بابا غنوج !

أم شوشة
أم شوشة
والله لبنان ياخذ الجحل من عيونك اللى عندوه ميزانيه يروح اوربا ولا هى نفس الصرف اللى هنا هناك
وماغلاها الا حنا يالسعودين سوا بنات او شباب او شياب شافوا الوجه الحسن وضاعت علموهم
لاتزعلوا وجهه نظر بس كلن قال رحنا لبنان اكلهم مشاويهم معاك لكن رحت بالصيف اللى طاف حر كفخت شوراعهم لاعب بها الحرب
والله انصح اوربا ثم اوربا صح شعب مودب بس كل شيء وله حقة
تدفع بالسوليدر بالحر والازعاج والمغازل الشخص 100$ ليه مايسوى ادفعه بسويسرا اقلها على جو طبيعه اكل يوسع الصدر واسم انو شيء عليه القيمه انو انا شفت سويسرا

مسافر في سما
مسافر في سما
بن كارترايت
اكيد متذكر !!!! ماكانت الطيارة سما ابد ! الخطوط السعودية وشكله كان في مشكة بنظام التبريد ! طبعا انا لمن اقول جدة افضل من بيروت مو قصدي الرطوبة لكن قصدي التنظيم ومساحة الكورنيش الكبيرة ! طبعا جدة تحتاج الى قرن كامل من السنين حتى تصبح وجهة سياحية مثل بيروت .
تقبل تحياتي كارترايت !

مسافر في سما
مسافر في سما
violetq8
اتفق معك اخوي في اللي قلته عن عوامل نجاح اي رحلة . لكن برضه اي شخص يقدر يعطي رأيه بكل موضوعية . أنا متعود دائما أكون بعيد عن العاطفة . يعني لمن اروح بلد ماروح وانا احبه ولا اكرهه ولكن اعطي البلد مجال يبدي نفسه ويوريني كل شي فيه . بعدين اسجل انطباعاتي . ولمن انتقد شي انتقد الشي السلبي . مثل الطبيب يفحص الجزء المريض منك مو الجزء السليم . اعتز بذكرياتي في لبنان اقلها انه البلد مافي شحادين واكله لذيذ وخصوصا مطعم" بربر" سيد مطاعم الشام !
تقبل كل احترامي

abdulaziz2004
abdulaziz2004
كلامك صحيح اخوي بس وين الديرة الي جوها بارد في الصيف واسعارها حلوة وتصلح للشباب انت عارف ان اغلب سياحة شباب الخليج القاهرة بيروت المغرب وكلها حول بعض بس المغرب يمكن بعض مدنها باردة يعني وين نروح انا بصراحه ناوي اسافر نهاية جولاي ومحتار وين اروح بس تقريبا مالي الا بيروت على الاقل انظف من القاهرة

مسافر في سما
مسافر في سما
~ Be Happy
الحب بلوة . ياما قابلت ناس يحبون اشياء غريبة !
على كل حال انا مصر على كلامي انه جدة افضل واكثر رقة ولكن ينقصها اشياء تنعش السياحة فيها وهي صناعة الترفيه وكذلك نقطة مهمة أود أن يعرفها الجميع مستحيل ثم مستحيل تنتعش السياحة في اي مجتمع محافظ وخصوصا بمثل درجة المحافظة الموجودة في السعودية . لان السياحة في معناها العميق هي الانطلاق بلا حدود والحرية الشخصية . وكثير من الدول لاتساوي شيئا في مجال السياحة لو لم تكن تعطي السياح مجال حرية اكبر !
تقبل تحياتي


خصم يصل إلى 25%