وعليكم السلام ورحمة الله وبركاته
هلا وغلا اهل ديرتي
وحياكم الله بين اخوانكم وخواتكم وان شاءالله اتفيدون وتستفيدون
شقق الويست اند كي غاليه في الصيف ..الشقه ام غرفتين مش اقل من 2500 باوند في الأسبوع ..
2 هايدبارك سكوير اسهل من ناحية الحجز..
تقدرون تحجزونها عن طريق موقع بوكنق وغيره ..
والفرق في السعر واجد ..
واي خدمه احنا في الخدمه

ما قصرت ولد بلادي القطري بس باسألك شقق الهايدبارك سكوير تو مكيفة أم لا؟
وشقق الويست اند كي في السايت مالها مكتوب الاستوديو غرفة وصالة الليلة 115 باوند؟ اشرايك؟

سعرها مناسب ..والتكييف تقدرون اتأجرون مكيف 60 باوند في الأسبوع اذا احتجتوا ..
واي خدمه احنا في الخدمه

مشكور أخوي وما قصرت وجعلك تسلم يارب

اختي قطرية الويست اند كي ما عندهم ويب سايت
هي شقق خاصة تأجرينها من المالك مباشرةً او عن طريق وسيط عقاري (سمسار)
و السعر اللي حصلتيه في النت اقل مدة للاقامة 90 يوم و هذي شقة من الشقق عارضنها صاحبها في النت
بالنسبة لل 2 هايد بارك انا اشوف موقعها احلى عن الويست اند كي لكن مافيها تكييف .. و الشقة ام غرفتين تقريباً سعرها 260 باوند في الليلة

يا بعد روحي يا غلا الأمارات وجعلج تسلمين يا بنت زايد ...
مشكورة وما قصرتي على المعلومات القيمة واللي بردت قلبي .. بالنسبة لشقة بدون تكييف نو واي نسكنها...
والويست أند كي اتصلت بالسمسار وقال لي ما دامج تبينها بعد شهرين أن شاء الله باوفرها لج بس ما في حجز من ألحين
قبل ما توصلين بيومين اتصلي فين وأن شاء الله خير
يعني ما خذت منه عقاد نافع على قولة المصريين .. أخاف أعتمد عليه وبوهقني وما ألاقي عنده وقتها وأكون ضيعت على نفسي كل الحجوزات !!!!

قطرية كول
حبيبتي والله ما سوينا الا الواجب ^_^
بالنسبة للسماسره العرب نصييحه من اختج لا تعتمدين على كلامهم لأنهم عادي يوهقونج و قبل السفر ب يومين يقولون والله ما عندنا حجز و زحمة و مضغوطين ولا الشقق ما تتأجر للفترات القصيرة و ... الخ
خصوصاً اللي يقولون قبل ما توصلين بيومين اتصلي ترى ينخاف منهم و نعرف ناس من جماعتنا صارتلهم هالحركة و اتبهدلو في فنادق لندن و عددهم كبير ما شاء الله
اذا تبغين شقق في الويست اند كي بعطيج رقم واحد ثقة اسمه خليل نحن متأكدين منه لأن يشتغل في مكتب عقاري معروف في الاجورود و يسويلج ورقة حجز و ضمان و ياخذ منج عربون (تراه ياخذ 80% من المبلغ) بس التعامل معاه مريح لأنه يعطيج شي مضمون و يطرشلج صور الشقة بالايميل
يعني مب مثل الباقين يوعدونج و يخلونج تشترين سمك فالبحر :d

تسلمين الغالية وياريت تعطيني رقم مستر خليل ولا عليج أمر مع اني خايفة وكنت مقررة أسكن بفندق!!!
وبالنسبة حق سايت شقق الويست أند كي مو مكتوب فيه أنهم ما يأجرون لأقل من 90 يوم
هذا السايت شوفيه....
شقق الويست أند كي https://artravelers.com

قطرية كول
هذا السايت شوفيه....
شقق الويست أند كي https://artravelers.com
مكتوب فديتج بس انتي ما انتبهتي
شوفي فوق يسار الصفحة كاتبين Minimum Stay: 90 Nights
و الارقام ممنوعة على العام بس دامج موجوده بحطلج الرقم بسرعة انقليه و بمسحه قبل ما يطبون علينا المزعج و القطري و يخالفونا بعدين ههه
هذا رقم خليل عاد يا لحقتي ولا ما لحقتي : 00447908670120