- راح اكتب عن انطباعي عن المطعم و كيفية الذهاب اليه ..
السلام عليكم
اول مرة اكتب عن مطعم و اعتقد انه ما في احد كتب عنه في البوابه فقلت بما اني امس اكلت عنده و يا ريتني ما رحت ( الحمد لله على كل حال )
راح اكتب عن انطباعي عن المطعم و كيفية الذهاب اليه ..
اول شي انا عندي نظام في حياتي العائليه عندي يوم الاثنين هذا الغداء لازم يكون بره سواء على البحر من طبخ البيت او في مطعم .. و السبب انشغالي بالعمل عن بيتي اثر علي كثير فكانت فكرة جعل يوم خاص بالغداء امرا مهما لي ..
بالامس كنت في البوابه و بالتحديد في موضوع اخونا wesmy1 في موضوعه الثري ( دليل جدة ) ..
شفت المطاعم في اول صفحه و فجئة شفت صورة مطعم ناندوز !!
حنيت ايام زمان ايام لندن و كامبريدج .. و قلت لازم اودي زوجتي وبنتي هناك عشان يعرفوا الاكل الحاار و العشق الابدي ليه ..
تذكرت انه زمان قبل حوالي 10 سنوات او اقل كان مكان المطعم في شارع التحليه مقابل مركز التحليه .. !! و بعدها قفل و لا اعلم السبب ..
الرقم كان في الموضوع يدل على انه في شارع صاري و انا ساكن قريب منه !!
معقوله امر في الشارع و لا اشوفه !!
اتصلت على الرقم المدون في الموضوع و اذا به يكون مطعم ايطالي !! قلت للي رد علي تعرف مطعم ناندوز اعطاني الرقم ..
فرحت !!
و اتصلت علي الرقم و للاسف !!
مفصول من الخدمة !!
قلت ما لنا غير حبايبنا في 905
قالي في فرعين له : شارع صاري و الثاني في السلامه !!
قلت له اعطيني اللي في السلامه !!
اخذت التلفون و اتصلت ... و رد على احد الاشخاص و قلي : Ice and chili can I help you !!
قلت له : مش هذا ناندوز !! قالي كان ياماكان !!
وقالي نحن غيرنا الاسم و لكن نفس الموظفين و الاكل !!
طبعا انا قلت اوكي جايكم ان شاء الله ..
رحت البيت و اخذت ام العيال و قلت لها راح اعيشك جو ناندوز اللي في بريطانيا .. وليتني ما رحت ..
اتركم مع الصور و تقيمي للمطعم بالكامل في نهاية التقرير ..
هذا الديكور ... من الداخل
المطعم فاضي و ما فيه اي احد نهائيا !!
بس الديكور يعيشك الجو خاصه من يعرف ناندوز الاصلي ..
نيجي للمنيو الخاص بالطلبات للاسف و مافيه شي مميز !!
طبعا يقولي الجارسون انه ناندوز راح يفتح من جديد بعد سنه تقريبا لانه العقد انتهى من زمان .. و الظاهر انه العمال اللي فيه جلسوا في مواقعهم و فتحوا مطعم .. باسم مختلف ..
المهم ...
طلبنا دجاجه كامله و اجنحه دجاج و سلطة سيزر و 1 منغا و 2 كوكتيل ..
طبعا جايبين حاجات تتسلى فيها ..
طبعا من شدة قهري على الاكل و الطعم العادي جدا ..
صورت الطبق الرئيسي بالمقلوب ..
و المطعم اكتشفت انه له فرع ثاني في الصواري لاند مارك ..
و طبعا الفاتورة ... كانت شوي غاليه على الطلبات ..
و للاسف قمت بالاعتذار لعائلتي الصغيره عن الخطاء الغير مقصود ..
و هذه المشكله ترجع لسببين :1- استخدام العمال و الموظفين في المطعم اسم ( ناندوز ) وهم ليسوا كذالك !!
2- عدم تحديث بيناتهم في دليل الهاتف !!
تقيمي للمطعم 2.5 من 10
الجيد فيه هو الديكور اللي اعتبره 30 -40 من الديكور الخاص بالمطعم ...
و اللي يبغى الوصف ليه ممكن من خلال قوقل ماب .. على الرابط التالي : http://maps.google.com/maps/ms?ie=UTF8&hl=en&msa=0&ll=21.57535,39.14499&spn=0.00224,0.004662&t=k&z=18&msid=112009920895668966064.000481588aca33cc61736
و السموحه اذا طولت عليكم في الكلام و قللت لكم من الصور ..
هل أفهم من تقييمك للمطعم أن مأكولاته غير لذيذة ؟
ما تقييمك عن النظافة والخدمة والأسعار ؟
لك التحية