السلام عليكم ورحمة الله وبركاته ..
ربي يسعد أوقاتكم جميعاً بكل خير وسعاده
حبيت أنزل تقريري المتواضع عن لبنان وإن شاءالله إنه ينال لو ع قدر بسيط من إعجابكم وحبكم له ..
وطبعاً توفيقي في هجري السفره بعد الله .! كان لهذا المنتدى الرائع اللي أعجز عن شُكري له
أستفدت كثير من مواضيع وتقارير و ردود الاعضاء ..
ف كل شخص أستفدت منه يعطيه ربيٌ ألف خير وعافيه ويجعلها ربي بموازيين حسناتكم أجمعين ...
.
تخطيطي للسفره !! ماكان قبل موعد السفره بفتره طويله ،، تقريباً كان قبل شهر ونص من الموعد
والحمدلله بتوفيق ربي تسهلت لنا الأمور ..
كان اختيارنا ع خطوط ناس وهذي مو أول مره أجرب هالخطوط دولياً .. وكانت ممتازه .,
السفره مدتها 8 أيام ..
من 16 / 2 إلى 24 / 2
كان الإقلاع يوم الثلاثاء من الرياض الساعه 7:50 مساءاً ..
مدة الرحله ساعتين وعشرين دقيقه ..
الوصول بتوقيت بيروت 9:20 مساءاً
للأسف ماصورت لكم ولا صوره من الطياره أو المطار ..
لأنه صار موقف أول مانزلنا المطار وضايقني بشكل كبير ..
يعني ماتمنيت اني ادخل لبنان ع ضيقة خلق وتعامل من بعض اللبنانين بهالشكل ..
حنا كنا أول ناس ننزل من الطياره بحكم جلوسنا أول شي ..
فكانت الكاونترات في المطار كلها فاضيه ..
رحنا ع اول كاونتر صادفنا وماكان مكتوب لا لبنانيين ولا لأجانب ..
فجأه وحنا واقفين وب تنختم لنا الباسبورات
سمعنا واحد لبناني يصارخ ويقول مو أنا اللبناني أوقف وأنتظر والسعودي يجي مكاني وتمشي وتتسهل له أموره
مو السعودي اللي يجي مكاني وانا في بلدي ..
هالكلام ماكنت أحسبه علينا ..
بس يوم طالعت وراي لقيت الكل يطالع فيني ( لأنه أنا كنت واقفه عند كاونتر وأهلي عند كاونتر ثاني )
بعد ماسمعت هالكلام رديت عليه وصار بينا خلاف وجا عنده كم شخص وسكتوه
وقتها ماوصف لكم الضيقه اللي جاتني وحسيت فيها من أول دخول لي في لبنان ..
بس الحمدلله عدّا الموضوع ع خير ..
وكان فيه كم لبناني صار يتأسف لي ويقول ماعليكِ منه هو مجرد شخص ومن هالكلام ..
. .
حجوزات الفنادق .. قبل ماسافر كنت يومياً أشيك ع الفنادق والغرف المتوفره وأسعارها ..
بس ماحبيت أحجز عشان ماتورط بالفندق لما أروح له ..
ف لما وصلنا لفينا مع التاكسي ع تقريباً 3 فنادق .. وماعجبنا شي بعدها كان إختيارنا ع فندق Bel azur والحمدلله توفقنا فيه
أول يومين خذينا غرفتين وكانت مطله ع الشارع لأن الغرف المطله ع البحر فل ..
وبعدها انتقلنا للغرف المطله ع البحر ..
. .
بالنسبه للسياره .!
قبل مانسافر كلمت شركه تأجير سيارات بإنها توفر لنا تاكسي يجي يستقبلنا في المطار ..
ومن ثاني يوم يرسل لنا سياره بسايق باليوم ..
بس صراحه كان سعر التاكسي اللي وصلنا ع الفندق غالي جداً لانه طلب 80 دولار ..
ف غيرت رأيي من هالشركه وكلمت شركه ثانيه ..
واتفقنا ع انه السياره بالسايق في اليوم ب 60 دولار والبنزين علينا ..
كنا تقريبا في اليوم ندفع للبنزين 20 دولار وأحياناً أكثر شوي ..