الجزء الأول : ( أستراليا _ ملبورن )
ملبورن ثاني أكبر مدن أستراليا ويغلب عليها الطابع الأوروبي أكثر
تحس أنك بأوروبا في شوارعها ومبانيها
وهذي الصور على الشارع اللي عليه فندقنا
شارع الملكة فكتوريا شارع مليء بالمحلات والمطاعم والأسواق
الجوو كان خيالي في النهار معتدل وبالليل كان بررد بس تلبس تدفى
يعني ما يدخل بالعظم زي برد الرياض والمعروف أن ملبورن أبرد مناطق أستراليا
ملاحظة :
قد يستغرق فتح الصفحة وقتاً أطول ..
خاصة ًمن ليس لديه dsl
ن نجي للمكان الأروع بملبورن واللي خلاني أتحمس أروح لها
اللي هو ( الثلج ) هو عبارة عن منطقة جبلية يكسوها الثلج بكثافة
اسمها ( Mt Buller )
كنا بنكنسل ملبورن قبل سفرنا بأيام لأن إنفلونزا الخنازير كانوا يقولون
منتشرة أكثر شي فيها
أبو فيصل : موب عشان كذا بس ..
لا .. قابلت مرشد كويتي يعمل في المكتب السياحي اللي حجزنا عن طريقه ..
عرفني عليه مدير المكتب الفلبيني وتناقشنا فكان يقول لي :
لا تروحون ملبورن .. هذي مدينة دراسية صناعية كئيبة
>> ما عنده سالفه .. أشوا اني ما صدقته ..
أم فيصل أكثر وحده كانت ما تبغى نروح لها .. لكن بعد نهاية السفره كانت تقول هي أحلى مكان رحنا له
بس أنا أصريت تكون ضمن برنامج السفر
والحمد لله ما كنسلناها
رحلة الثلج كانت من الساعه 6:00 صباحا ، طلعنا من الفندق قبل الفجر يمكن بساعة ( ظلام ) يخوّف
لأن الطرييق طوييل جدا .. أمي واخوي الرضيع ما راحوا معنا خفنا يمرض لا سمح الله أو يصير له شي ..
وفعلاً زين انه ما راح معنا .. لأن فيصل رغم انه اكبر منه صارت له مشاكل ( تشنج واصفرار وما عاد قدر يوقف على رجليه )
وصلنا تقريبا الساعه 10 إلى منطقة أسفل الجبل لتأجير الملابس ( جاكيت _ بنطلون _ بوت _ قفازات _ قبعات )
واللي يبي يتزلج يستأجر حاجياته.. وحنا حدنا ذاك الشي نسيت اسمه سطح بلاستيكي وفيه حبل تجلس عليه ويدفوونك
عرفتووه ؟
مشكلته كان استغلال واضح ( غالي جداً ) تقريباً بسعر الشراء موب الاستئجار !!
يعني مثلاً ملابس كاملة للشخص الواحد بمبلغ 40 دولار يعني حوالي 120 ريال وحنا 4 وعليككم الحساب
هنا صورة لمكان التأجير
زحمة جداً .. لا تكاد تجد موطئاً لقدمك ..
مسكنا سرا حوالي ساعة ونصف مع قياس الملابس
وأخذنا اللي استأجرناه ورجعنا لباصنا مره ثانيه عشاان نكمل الطرييق للجبل ..
كل واحد من الركاب حط أغراضه في كيس وكتب عليها معلوماته في الإستكر وبعدين حطيناها مع عفش الركاب في الباص
وصلنا تقريبا الساعه 11:00 صباحا
ا وصلنا المنطقة المثلجة اللي تشنج فيها فيصل ..
صار ما يقدر يوقف وطاحت قفازاته بعدما تزلج على اللوح ..
خفت عليه والله أقول له وقف على رجولك ويقول ما اقدر ويبكي ..
حاولت ألبسه القفازات ما قدرت لأن أصابعه متجمده ما يقدر يعكفها ..
فاضطريت ألبسه قفازات كبيرة ( دققوا في صوره وتشوفونها .. شكلها يضّحك -) )
بالعافية لقينا مكان مغلق عبارة عن مطعم دخلنا فيه وحاولت يشرب شي ساخن لكن رفض ..
انتظرنا إلى أن احس بالدفء وتطمنت عليه وواصلنا
أعلى : هذا ( رجل ثلج ) عملوه ناس وراحوا وتركوه ..
حاولنا نقلدهم بس ما عرفنا 100 %
أعلى : الممر الموصل للتلفريك ويظهر السياح بزلاجاتهم
تحت : فصوول وجهه صفّر من البررد
أعلى : حتى هذا الرجل الثلجي ما سويناه
أعلى : سيارتنا الجيب اللي استأجرناها ..
هع هع أمزح ما أدري كيف فيه ناس عايشين فوق !!
أعلى : هنا بعد ازدياد تساقط الثلج .. كأنه ضباب
سامعكم يا زفوتين .. والله موب دب .. الملابس حطتني دب
لا يفوتكم قفازات فيصل اللي قلت لكم عليها تضحك
أبو فيصل : كلما شفت هالصورة قلت : ( يا خبلنا ) والله غامرنا ..
ركبنا هالتلفريك .. تركبه بدون ما يتوقف .. يعني لازم تنط وهو يمشي والنزول نفس الشيء
هو أصلاً مخصص للزلاجين المحترفين اللي يطلعون القمة وينزلون تزلج ..
ركبناه ومعنا فيصل ما منعوه .. ما فيه شيء يمسكه إلا ماسوره بعيده عن يده ..
وانا ماسكه وخايف عليه يزلق من تحت
برد والثلج ينزل على عيوننا ومرتفعين الأرض بعيدة ..
فكنت أفكر لو نطيح وش بيردنا ..
صراحة خفت كثير وما صدقت وصلنا
تحت : وهذا رجل ثلج كبير سووه قرووب شباب
على شكل كرسي يمكن مو واضح بالصووره فكل من مر يجلس عليه ويصور
سره طاابوور
بعد ما وصلنا درجة التجمد دخلنا كوفي شوب مغلق شربنا و تغدينا فيه
وقبل المغرب بشووي كان موعد المغادرة بالباصات
وهذا كان باصنا
الخطوط الناقلة ( شركة APT ننصح بها .. قمة في كل شيء ) >> دعاية
وهذي صورة من طريق الرجعه
كانت رحلة الثلج هذي شي روعه
أنبسطنا فيها مرره
صح الطرييق طوييل ومتعب بس يسوى ;))
واليوم الثاني خططنا نروح الوايد لايف وحديقة الحيوانات
وبعد بباص لنفس الشركة ..
السواق كان خطيير خفيف دم طوول الوقت ينكت عشان
ما يحسسنا بطول الطريق ..
اول ما ركبنا شاف بنت نايمه .. قال لكل اللي في الباص .. اللي بيكون متجهم الوجه وعبوس رجاء ينزل لباص ثاني ..
المهم اسمه ( د. فيل ) وهو يشبه الدكتور / فيل ويقول ينادوني باسمه لأنه يشبه له كثير
أبو فيصل : ليش ما حطيتي صورته نتذكره ؟
هنا الصور
تحت : أول محطة توقف للرحلة .. منطقة مشهورة بالطيور الأليفة ..
متعودة على السياح يعطونها أكل .
ووقفنا في هالمكان عند الطيور وعزمنا د. فيل
على شاهي فريش على الطبيعة وكيك ياازيين طعمه ذااك الكيك
هذي صوورة الشااهي
واو .. شاهي على كيف كيفك في الهواء الطلق ..
واللي مخدره زوجة الدكتور فيل في ( سطول نحاسية )
طعمه رائع جداً
بس ما طلع شكل البخار
وركبنا قطار البخار
شوفوا كييف إذا يبوون يجلسوون
وبعدها رحنا لحديقة الحيوانات zoo
طبعا المعروف أن أشهر الحيوانات بأستراليا
الكنغر & الكوالا
وبعديين على الطريق رحنا لمزرعة فيها مطعم لتناول طعام الغداء
أبو فيصل : طبعاً إحنا مادخلنا معهم للمطعم لأن أكله مهوب حلال ( خنزير وويسكي ) ..
فكنا حاسبين حسابنا ماخذين معنا أكل خفيف وانتظرناهم بالحديقة الخارجية ..
وكانت فرصة آخذ راحتي بالتصوير
بس رهيبة هالمزرعة شي
رهيبه وبس .. شي جنان .. ناسبتني جداً ..
قلت ياليت الأهل كلهم معنا
وكل هذي الصور الجاية
( صور إحترافية )
تصوير : أبوفيصل ;))
احترافيه .. كثري منها
أعلى : هذا مثل حقول العنب .. أشجار مصفوفة بشكل دقيق .. وموصلينها بخيوط
أعلى : عربة قديمة محتفظين بها للزينة يمكن .
أعلى : مزرعة مجاورة وتظهر الأغنام الاسترالية اللي ما احد يبغاها عندنا ..
شوفوا وش تأكل يمكن تغيرون رأيكم
أعلى : المواقف الخلفية للمزرعة
أعلى : محراث قديم
أعلى : أفضل الصور في رأيي .. جربوها كصورة لسطح المكتب على أجهزتكم
تحت : تصوير بالجوال للمنطقة المحيطة بالمزرعة :
أعلى : ( المنطقة المحيطة بالمزرعة .. وتظهر الخيول بعيدة )
> <
أنتهى الجزء الأول ..
إلى اللقاء
الرجاء عدم التعليق إلى حين الانتهاء من طرح الأجزاء الأربعة
شكراً لحضوركم وتجاوبكم

الجزء الثاني
سدني / أستراليا Sydney Australia
مقدمة ملطوشة :
سيدني مدينة صاخبة .. بمبانيها الشاهقة وكثرة ناطحات السحاب فيها ..
العاصمة الأسترالية الغير متوجه أو بعبارة أخرى المدينة التي توجت نفسها ومن خلال شهرتها بلقب العاصمة دون صفة رسمية بدلا من العاصمة الرسمية والفعلية ( كانبيرا )
وأهم معالمها :
(Sydney Harbour Bridge)
جسر هاربر سدني :
أبو فيصل : شكلنا بنوظفك مرشدة سياحية يا بنتي
ودار الأوبرا الشهيرة
Opera House
التي تقام فيها حفلات سمفونيات الأوركسترا الفنية
من أهم معالم أستراليا إن لم يكن الأهم على الإطلاق
يقصدها السياح من شتى دول العالم
أعلى : دار الأوبرا من قريب ( المدخل الأساس )
أعلى : هذا تاكسي القوارب الصفراء حاط رجله
وهذي صور التقطناها من ساحات دار الأوبرا
أبو فيصل : المرأة الظاهرة في الصور أدناه وكذلك ( الخال ) .. لا تمّت لنا بأي علاقة .. قسم
منطقة أو ميناء ( الدارلنج هاربر) التاريخي بوسط المدينة
منطقة حلووه قداام النهر فيها أسواق ومطاعم وحدائق ومقاهي وسينما ثلاثية الأبعاد
والأحلى شكل المباني المقابلة لها
أكثر مكان شفنا فيه خليجين في سدني خصوصا بالليل ..
حتى أن المطاعم فيها تقدم الأكل الحلال ( مطاعم شامية وهندية وغيرها )
والمركز التجاري الكبير في هذه المنطقة يتكون من ثلاثة أدوار ..
تراعي ذوق الخليجيين والعرب بشكل عام ..
فهي لا تغلق إلا في ساعة متأخرة من الليل
( دائماً وفي كل بلد : إبحث عن العريبيا تجدهم في شوارع السهر والتسكع )
والحلوو أنها كانت قريبة من فندقنا ( ستار ستي ) نروح لها مشي
تحت : هنا البوابة الخارجية للفندق ( جهة الشقق الفندقية ) وتظهر سيارات الليموزين ال vip حوالي خمس سيارات خاصة بالفندق
( ليش ما ركبونا صدز ؟
)

• لأنها خاصة بصالة الكوبر ( القمار ) اللي في الفندق

أكبر صالة قمار في سيدني يرتادها المشاهير ..
إضافة إلى المسرح الكبير بجوارها تقام فيه الحفلات الفنية
هنا تحت صور لمنطقة الدارلنج هاربور اللي تكلمنا عنها
بعضها في النهار وبعضها في الليل
حوض السمك الأكواريوم
فكرته أنك تمشي في ممر مغلق زجاجي
وعلى يمينك ويسارك وفوقك أسمااك القرش وحيوانات بحرية من سلاحف ضخمة وغيرها ..
بعضها أول مرة أشووفها وبعضها ألوانها تعجبك ..
شي جديد بالنسبة لنا وممتع
بس ما صورنا كثيير لأن التصويير ما يووضح في هالمكان
والأكواريوم له عدة فروع في المدن الكبيرة باستراليا ..
إخترنا منها سيدني لأنها الأكبر
Sydney Wildlife World
( عالم الحياة البرية )
طبعا كلها في نفس المنطقة
وتم التركيز هنا على الكانغارو والكوالا باعتبارهما رمزان للبلد
الكنغارو لأنه على حد قولهم : ( يمضي قًدماً )
والكوالا لأنه مسالم ولطيف .. وبالفعل هم كذلك
أنا اشهد
ونجي عااد للمعلم الأهم اللي هوو
(Sydney Tower )
برج سدني :
شكله من الخارج
يصنف على أنه من أعلى 15 مبنى في العالم
طلعنا له فووق
المنظر روعه تشووف سدني كاامله
من المطل الدائري:
وهنا صور لشارع مشهور عندهم
( شارع جورج ستريت )
(George Street)
والمبنى الظاهر هنا عبارة عن قصر للملكة فيكتوريا تحوول إلى سووق
وإحدى الحدائق بالقرب من دار الأوبرا :
إنتهى الجزء الثاني
الرجاء عدم الرد والتعليق ..
إلى حين الانتهاء من طرح الأجزاء الأربعة
( باقي جزئين : قولد كوست + بريسبن )

الجزء الثالث : أستراليا / جولد كوست
أو الساحل الذهبي كما يسميها السواح هناك ..
تتميز المدينة بشواطئها التي تعتبر من أنظف شواطئ العالم الرملية حسبما قرأنا
أبو فيصل : ( ما رحنا للشواطئ .. كلها مفاصيخ )
بدايةً :
صور السكن
سكنا بشقة فندقية في فندق ( Q1 )
شفنا صوره في النت قبل لا نرووح مرره حلوو
بس توقعنا إذا وصلنا بيكون أقل مستوى من اللي شفناه بالصور
لأن أغلب الفنادق يحطون صور إغرااء ماتكون واقعية 100%
بس هذا صراحه شي يجنن
بالنسبة لي لو أجلس طول يومي فيه ما أطلع عاادي
خصوصاا غرفتي
أكثر ما يميزه أن كل شي فيه أبيض الجدران والأثاث المودرن والشبابك قزاز وكبييره
سكنا بالدوور أتوقع ال 70 نسييت والله بس شي في السبيعينيات
q1 يعتبر من أطول المباني إن لم يكن أطولها على الإطلاق
ميزة الشقق فيه واسعة ومجهزة بكل شيء تتخيله ( من إلى )
جدرانه ( قزاز x قزاز ) يعني وانت جالس في الصالة تشوف كل المباني تحتك ..
ولأنه أطولهم ما أحد يقدر يكشفك حتى لو في الليل
أخليكم مع الصور
ستشاهدون على يمينكم ( البلكونة ) شبابيكها تنفتح لنسمات الهواء العليلة ..
والجلسة فيها لا تمل خاصة الصباح مع كوب النسكافيه
ممكن أن تنفتح جميع جدرانها على الصالة وتصير الشقة ( حوش كبير )
وممكن تغلقها إذا خفت على الأطفال
تحت : مثلما قلت لكم .. كل شيء قزاز
( الجدار الفاصل بين الحمام وغرفة النوم زجاج ) وعليه ستارة إليكترونية
تحت : غرفتي المصوونه :
وهنا حمام مشترك
أيضاً جداره زجاج
المطل من غررفتي
وهنا لقطات من جهة الصالة :
لا يفوتكم اللي بيسافر ..
يقع Q1 في أشهر منطقة في جولد كوست
منطقة السيرفيرس بارادايس
SURFERS PARADISE
القلب النابض للمدينة
تشتهر بالمقاهي والمطاعم والمحلات التجارية والماركات ..
ووجود أكثر الفنادق الراقيه فيها ..
وهذي لقطات من البرادايس :الأماكن السياحية :
عالم الأفلام
MOVIE WORLD
فيها تشووف اللي يصير خلف الكواليس في تصوير
الأفلام السينمائية شي خطير ويبهر الوااحد لما يشووفه
أبو فيصل :
يعني تجلس في مسرح كبير مثل المسارح الرومانية المكشوفة ..
وبعدين يسوون قدامك عرض يتضمن الخدع السينمائية مثل الانفجارات والحرائق والمطاردات بالسيارات والدبابات والهيليكوبتر ..
وطبعاً مدخلين شخصية ظريفة في العرض يموّت من الضحك ..
ويستعينون ببعض المتفرجين عشان التفاعل الجماهيري ..
وفي نهاية العرض تنبهر بشدة عندما يكشفون لك الخدع اللي صارت
وبعد فيها ألعاب خطييرة نوعا ما ..
محد رضى يركب معي كلهم خوافين >> مهوب خواف .. قد ركبتها .. بس ما أحبها
يقولون اركبي لحالك وحنا نتفررج
وش الفايدة ما تحس بالمتعه إذا محد جنبك
غير العرووض اللي أول ما تدخل يعطونك ورقه كل show ومتى وقته ووين مكانه
وفيه أشياء أنت تدخلها مثل عرض SHREAK رباعي الأبعاد وسكوبي دو ... إلخ
وفيه عرض الكاوبوي وعرض بات مان كلها جميلة
وطبعا زيارتها تاخذ يوم كامل منك من الصباح إلى المغرب وقبل ما يسكروون يسوون حركه مشابهه لحركات ديزني
مسيرة للشخصيات الكرتونية
وهذي بعض الصور :
وفيه ركن للعرب والمسلمين ..
تخيلوا فيه مصلى وقاسمينه نصين رجال ونساء >> صرااحه ما توقعتها
ولووحه بالعربي مكتوب عليها :
( تنظفوا فإن الإسلام نظيف ) ;))عالم البحار
( SEA WORLD )
وهو منتزه بحري
تشاهد فيه جميع الأحياء المائية
وعروض الدلافين و أسد البحر و والبطريق ..
والألعاب الخطرة أيضا ( لكنها أغلبها مائية ) ..
ونفس السالفه تنعاد ما يبوون يركبوون معي
بس زيين ركبوا معي بعضها يعني أهوون من المووفي وورد
تحت : لقطات ثلاث خارج المنتجع عند بوابته :
أعلى : يلاحظ صورة الدلفين في حركة طائرة بهلوانية ( يسار الصورة )
( إفتح يا سمسم .. بدر وأنيس يا حليلهم )نجي عااد للبطه
(ducktour )
وهي عبارة عن سفينة لها كفرات برمائية تمشي بالبر وبالبحر
أول ما تركب يمشوونك في الشوارع تشوف بعض المعالم ..
وبعديين تغطس بالبحر
تجربه جديدة حلووه والأحلى الجوو كان مرره حلوو
هذي صورها وبعض الصور اللي التقطت منها
وكنووع من التسلية خلوا كل الأطفال اللي ركبوا يسوقونها ..
وقبل لا ننزل عطوهم شهادات ( رخص ) اجتياز القيادة مكتووب عليها اسمائهم هع هع
شغالتنا يوم شافتها بعدما رجعنا للبيت صدقت
إنتهت صور جولد كوست
الرجاء عدم الرد إلى حين الانتهاء من طرح الجزء الرابع ( الأخير )

الجزء الرابع والأخير بالنسبة لأستراليا :
برزبن Brisbane
جلسنا فيها يووم وااحد بس لأن جولد كوست ما فيها مطار دولي
وحنا كنا بنروح لهونج كونج فقال ابوي :
أحسن نروح ننام فيها ليلة لأن رحلتنا كانت في الصباح بدري
هذي بعض صوورها
من شباك الفندق :

أبو فيصل :
لأن وقتنا قصير وكنا نبغى نشوف كل اللي يمدينا عليه ..
سألت عن جولة سياحية على المدينة ) city tour )..
فقال لي موظف الفندق فيه طريقة أحسن لك وأوفر ..
تقص لك تذاكر لمدة 24 ساعة عن طريق المواصلات عبر النهر >>وأعطيك خريطة لكل المحطات اللي يمر عليها ( تاكسي النهر ) ..
وبالفعل سويناها فكان القارب التاكسي ينقلنا من جهة لجهة بشكل منظم ..
لأن النهر يفصل المدينة جزئين ..
وكل محطة تلقى عندها جدول بمواعيد وصول القارب ( تقريباً كل ربع أو ثلث ساعة )
والمنطقة اللي تعجبنا أو نحتاجها ننزل فيها ..
مره ننزل للتسوق ومره للتمشيه ومره للمقاهي والمطاعم .
وهكذا
وسلامتكم ..
أتمنى نكون قدمنا أنا وعائلتي جزء من الجميل لهذا المنتدى الرائع ..
الذي كان الفضل - بعد الله - يعود له من خلال أعضائه الرائعين في نجاح رحلتنا ولله الحمد
وسيكون لي إن شاء الله تقريرين منفصلين عن :
سنغافورة
هونج كونج
في أماكنهما المناسبة إن شاء الله

تحية طيبة :
الف شكر يا ابوفيصل على هذا التقرير الرائع ، و الصور ايضا رائعة ، و ربي يخلي لك فيصل و اخوانه
و خواته و امهم .
تحياتي ،،،

الشايب العاشق
أهلاً وسهلاً بالعمدة
أشكرك على الحضور العطر
وأسعدني رأيك تجاه الموضوع
تشرفت بكلامك وجزاك الله خير على دعوتك الطيبة

ما شاء الله عزيزي ابوفيصل
تقريرك ممتاز وسلس وتصوير رائع .. وشوقتنا لاستراليا وايامها الجميلة
سبق وان ادرج في تقاريرك الثلاثة الاماكن السياحية في كل من مالبورن وسيدني وجولدكوست
وافتقر الجزء لمدينة بريزبن من الاماكن السياحية والترفيهية
اتمنى ادراجها ان وجدت
مع تحياتي

السلام عليكم
شكرا على التقرير الرائع بس ممكن توضح تاريخ الرحله وعلى أي خطوط

الله يعطيكم ألف عافيه يا ابو فيصل وبنات ابو فيصل ..
أخف تقرير قرأته في المنتدى سرد ممتع وصور حلوه ..
وخاصه سدني الي معها أستعدت أحلى الذكريات ..
دمتم بالف خير ..