حياك الله اخوي الكريم
انا شفت استفسارك هناك بالبوابه وراح اجاوب هنا
طبعا الرحله تحتاج سياره لكثرة التنقلات
من دوسلدروف الى فرانكفورت 230 كيلو والوقت ساعتين ونصف تقريبا
من فرانكفورت الى رست ساعتين وربع
من رست الى ميونخ 4 ساعات وربع
من ميونخ الى زيلامسي ساعتين ونصف ومنها سالزبورخ ساعه وربع ومن سالزبورخ الى فينا 3 ساعات
هذا بالنسبه للمسافات
لكن ممكن تجعل خط سفرك اجمل من هذا المخطط باضافة زيوريخ و انترلاكن لزيارة اروبا بارك ولويزرن الي تعجبك لانهم قريبه منها
يعني يكون المخطط ميونخ سالزبورخ . زيلامسي . زيوريخ انترلاكن والعوده اما من مطار زيورخ او نضيف جنيف والنهايه من مطار جنيف
انا بالانتظار وبالخدمه

هلا فيك أخوي علي ومشكور عالرد والمساعدة وماشاء الله عليك
معلوماتك دقيقة عن المسافات وأنا فعلا أول شي سويته لما حددت المدن اللي أبي أزورها
قعدت اشوف المسافات بين كل مدينة والثانية في موقع ماجلان
وعلى هالأساس رتبت التسلسل بس كنت محتار اشكثر يبيلها كل مدينة عشان نشوف أجمل
معالمها السياحية ولو فيه حواليها قرى اومدن تستاهل نزورها
وبالنسبة لوسيلة التنقل فهي أكيد السيارة فماعندك مشكلة من هالناحية وأنا سبق وخضت هالتجربة
العام الماضي برحلة عائلية لأوروبا شملت دول فرنسا وايطاليا وسويسراوكانت من أروع التجارب
وعشان كذا فكرنا نعيد التجربة مع اختلاف الدول التي سنزورها وهالمرة فكرنا نقضي اجازتنا في
النمسا وألمانيا ولامانع من زيارة خطافية لسويسرا ورشحنا لوسيرن لقربها من اليوروبابارك ولأننا
نفضلها كثيرا وبخصوص انترلاكن سبق وزرناها العام الماضي هي وجنيف واكثر من مدينة سويسرية
ولهذا استبعدتها أما زيورخ فلم أخترها مع العلم أنها أقرب لكن بصراحة زرتها ليوم واحد ولم أشعر فيها
بالراحة أبدا...
وبالنسبة لفكرتي المبدئية عن توزيع الأيام من خلال ماقرأت من تقارير الأخوان في المنتدى
دوسلدورف 4 أيام
فرانكفورت 2 يومين
اوروبا بارك 2 يومين
ميونخ 3 أيام
زيلامسي 4 أيام ( هل تشوف إنها كافية لأننا نحب التنقل والتجديد )
سالزبورغ 3 أيام ( حسب ماقرأت عنها فيها العديد من الأماكن تستحق الزيارة )
فيينا 4 أيام
ولو دخلت لوسيرن احتمال أخليها 3 أو 4 أيام فقط
طبعا الطيران عالخطوط الإمارتية لهذا رشحت البداية من دوسلدورف والعودة من فينا
فاشرايك في هالتوزيع تشوفه مناسب؟؟؟
ولوكان مناسب بستشيرك بجدولي اليومي والفنادق إذا مافيها ثقل عليك
اعذرني عالاطالة ومشكور مرة أخرى على الرد
تقبل تحياتي

حياك الله اخوي اشوف لوتضيف يوم بميونخ لزيارة غامش الجميله وايضا يوم اخر بزيلامسي الجميله
او ممكن تبدا الرحله من فرانكفورت وتلغي دوسلدروف لو حاب تخفف من التنقلات الكثيره
ثانيا اخوي حاضرين لجميع الرحله بس قول شنو حاب فنادق 4 او 5 نجوم
ولا تحاتي من ناحية الاماكن السياحيه
تحياتي لك

ALI_Q8_77
هلا أخوي علي وبصراحة مدري اشلون اشكرك على سعة صدرك وتعاونك معي ومع الجميع في البوابة
بالنسبة لأيام ميونخ انا كنت بخصص يومين للمدينة نفسها ويوم لزيارة غارمش بس يمكن اضيف يوم نفس
ماشرت علي
بخصوص دوسلدورف بالنسبة لي هي هدفي الأول من الرحلة عشان كذا اخترت طيران الامارات
لأنها الوحيد مع القطرية اللي لهم خط مباشر لها
الفنادق أغلب اللي حاط عيني عليهم من فئة ال5* بس لايمنع4* إذا في شي نظيف وراقي وموقعه ممتاز
وأنا بذكرلك الفنادق اللي مرشحها وقولي اش الأفضل بينهم
1- دوسلدورف انتركونتيننتال أو هوليداي إن ( عندي عضوية فيهم )
2- فرانكفورت ويستن جراند فرانكفورت أو NH فرانكفورت سيتي
3- اوروبا بارك كولوسيو
4- ميونخ ميركور سيتي سنتر أوكمبينسيكي أو هوليداي إن سيتي سنتر أوسوفيتيل أوكونقشوف(مدري صح نطقه)
5- زيلامسي فيلاسي (منظره بالصور رائع بس تفاجأت فيه أخوان ذموه وحذروا إنه سيئ ) أو جراند أوديرسونبيرج
6- سالزبورغ كراون بلازا أو شيراتون
7- فيينا أفضل الفنادق القريبة من حديقة شتاد بارك ماريوت أو هيلتون أو انتركونتيننتال أو راديسون ساس
هذا فيما يتعلق بالسكن أما بالنسبة للأماكن السياحية عندي خلفيه عنها بس بعرضها عليك لاحقا
لترشحلي الأفضل بأولوية الزيارة
آخر شي بقوله اعذرني عالإطالة ولك جزيل الشكر
تقبل تحياتي

حياك انبدأ بالفنادق
1- فرانكفورت ارشح لك NH نظرا لموقعه المتيمز بجانب شارع زيل للتسوق والفندق نظيف وبمكان روعه
2- اوربا بارك فندق ممتاز
3- دوسلدروف الاثنين ممتازين
4- ميونخ كمبنسكي بشارع الماركات وهو راقي جدا .. كنقشوف فندق رائع بوسط المارينا بلاتز .. وعندك فندق المريديان رائع خطوات عن المارينا بلاتز
5- زيلامسي سي فيلا وسي هوتيل والكراند على البحيره مباشره وانصحك بواحد منهم اما ديرسونبيرج على قمة الجبل
6 - سالزبورخ الافضل الشيراتون والثاني الكراون بلازا وهو ممتاز واذا تبي زياده شوف موضوعي عن الفنادق مع افضل الاماكن
https://artravelers.com/p/re/330555
7- اما بخصوص فينا كلهم ممتازين وانا راشح لك الماريوت ورديسون ساس
اما بخصوص الاماكن والرحلات فهي لا تعد ولا تحصى .. لكن بالاول بانتظار اقتراحك على الاماكن الي تحب اتزورهم
ولك تحياتي

ALI_Q8_77
مرحبا أخوي علي
بصراحة انا اطلعت على موضوعك المتعلق بالفنادق والقرى السياحية بالنمسا وأكيد بستفيد منه كثير
بس احترت بشغلة إني كنت مستبعد أقيم في انسبورك وكنت مخطط اكتفي بزبارة لها من زيلامسي
لمدة يوم كامل بس لما قربت المناطق اللي ذكرتها فيها شفتها كثيرة وخفت مايكفيها يوم واحد لتغطيتها
مدري إنت تشوف انسبورك تستاهل نقيم فيها يومين أو يكفي نروحلها زيارة من زيلامسي ونعود بنفس اليوم
الفنادق إن شاءالله مبدئيا بستقر على اللي رشحتهم لي وأشوف امكانيات الحجز فيهم
بس بخصوص فندق ميونخ موقع ميركور او كمبينسكي أفضل ؟؟؟
وبستفسرعن الفنادق اللي سبق ذكرها تقبل طفلين أقل من 5سنوات في الغرفة هل عندك فكرة بهالخصوص لأني بحجز من كومبير هوتيل لأحصل على أفضل سعر
ومشكور أخي الكريم وإن شاءالله برتب المناطق اللي نبي نزورها وبعرضها عليك لترشحلي الأجمل
تقبل تحياتي

بسم الله الرحمن الرحيم
وبه تستعين
بخصوص الجدول المبدئي للأماكن التي نود زيارتهافهو كالتالي
دوسلدورف
الوصول بيكون عالساعة 1ونص الظهر بتوقيت ألمانيا طبعا يعتبر جيد ومبكر بس لأنا بنكون مواصلين
من الرحلة اللي قبلها واللي تقلع الساعة 3 وبنتوقف ترانزيت بدبي ساعتين ونص بيكون ارهاق
شوي فبنكتفي بجولة في شارع الملوك اللي بيكون فيه فندقنا الانتر ونرجع نرتاح استعدادا لليوم التالي
والذي يعتبر الانطلاق الحقيقي لبداية الرحلة ( طبعا يوم الوصول ماحسبته من أيام إقامتنا في دوسلدورف )
اليوم الأول : جولة في مدينة دوسلدورف ( بس بعرف إذا فيها ممكن ناخذ جولة في نهر الراين )
اليوم الثاني : الذهاب لكولن وقضاء اليوم بها
اليوم الثالث والرابع : ؟؟؟ مدري ينفع نزور بروكسل البلجيكية أو بروج أو امستردام الهولندية وهل تستاهل
لأني شفت المسافات تتراوح بين ال240كم وال280كم
أيضا قرأت في أحد التقارير أن هناك آوت لت قريب من دوسلدورف بس ناسي وين بالضبط ومدري هل يستاهل
الواحد يخصصله يوم اولا
هذا بخصوص دوسلدورف وياليت لو في اقتراحات او تعديلات لأماكن تنصحني فيها ؟؟؟
فرانكفورت
اتوقع بنقضي اليومين في التجول في المدينة وشارع الزيل
ماعندي فكرة اذا فيها اماكن معينة؟؟؟
اوروبا بارك منتهي امرها بس يمكن اليوم اللي بنمشي منها نمر نشوف لوكسمبورغ الفرنسية بس هذي فكرة
قابلة للتنفيذ أو الإلغاء
ميونخ
اليوم الأول المارينا بلاتز وكارل بلاتز
اليوم الثاني الحديقة الأولمبية وفيها عالم تحت الماء ؟؟ على مااعتقد وبقربها معرض BMW
اليوم الثالث ؟؟؟ فيه حديقة انجليزية او اي شي تقترحه
اليوم الرابع زيارة قارمش
وفيه فكرة تراودني يمكن لو قررنا نقيم كم يوم في انسبروك اخلي زيارة جارمش منها لأنها اقرب ؟؟
زيلامسي
اليوم الأول نقضيه في زيلامسي وبحيرتها
اليوم الثاني قمة كابرون
اليوم الثالث الزحليقة الصيفية + إحدى القرى المجاورة
اليوم الرابع قرية باد جاستن أو وولف قانق او فوشي
سالزبورغ
إنت ماقصرت ذكرت الأماكن السياحية فيها
اليوم الأول التجول في المدينة القديمة والسنتر
اليوم الثاني زيارة البحيرات ال7 وأحذ جولة في نهر السالزاك ؟؟ بس بتأكد إذا تنفع مع بعض
اليوم الثالث ؟؟ محتار طبعا مستبعد الكهف الجليدي ومنجم الملح وقلعة سالزبورغ لأن معاي اطفال بس هل تنفع
قمة بيرج وقصر موزارت ؟؟
وبالنسبة لحدائق ميرابل هل أخصصلها يوم أو تنفع اضيفها مع أحد الأيام السابقة؟؟
فيينا
اليوم الأول جولة في فينا وشارع الكارنتر وساحة ستيفن
اليوم الثاني قصر الشانبرون +ملاهي براتر
اليوم الثالث برج ونهر الدانوب وشارع ماريا هلفز
اليوم الرابع حديقة شتاد بارك + مرتفع كاهلين براغ ( بعرف يستاهل أو لا )
طبعا هذا الجدول قابل للتعديل والحذف والاضافة
آخر شي انتظر إبداء رأيك إنت وباقي الإحوة في الأماكن وأهم شي ضروري لو فيه حديقة حيوان
كبيرة وممتعة في اي من المناطق السابق ذكرها ياليت تقولولي عليها لأن عندي طفل نفسه يشوفها
عالطبيعة ووعدته أوديه لأكبر حديقة حيوان إذا سافرنا إن شاء الله
اعذرني عالاطالة وتقبل تحياتي

حياك الله اخوي بالنسبه للاطفال لكل فندق سياسه معينه باعمار الاطفال .. وبيكون مكتوب بسياسة الفندق في الموقع نفسه .. والخيارات غالبا اضافة سرير في الغرفه او الحجز بغرف العائليه .. فميلي رووم .. بس تأكد من سياسة الفندق من الموقع نفسه .
اما بخصوص انسبروك ممكن اتروح لها رحله يوم واحد من الصباح حتى المساء .
اما بخصوص فندق ميركور هو قريب من شارع المارينا بلاتز لكن لا يقارن بالكمبنسكي من حيث الفخامه والمستوى
واذا تبي نصيحتي احجز على لي الميرديان
بخصوص السياسه العامه للفنادق راجعها مثلا ببوكنق او الموقع الي كتبته

1. قرب فرانكفورت واسمه : Wertheim Village

حياك الله اخوي
الجواب
بالنسبه لدوسلدروف
انصحك تزور بروج .. وايضا الاولت لت ما انصحك يكفيك التسوق بفرانكفورت وميونخ
فرانكفروت
الاوت ليت

قرب فرانكفورت واسمه : Wertheim Village

• مدينة الملاهي فريزت بارك ( Freizeitpark ) تبعد 30 دقيقة فرانكفورت

لكن كما قلت الايام قليله وانصحك بالتسوق بفرانكفورت لانه مشهوره بهاذا اما بخصوص لوكسمبورخ ممكن تقصد ستراسبورخ الفرنسيه القريبه من اوربا بارك 40 كيلو تقريبا حلوه وكنت انا فيها الصيف الماضي لمدة يومين وهي حلوه وهادئه جدا
ميونخ
الجدول جيد لكن اجعل غارمش باليوم الثالث واذهب لها من ميونخ 90 كيلو تقريبا واركب التلفريك وشوف بحيرة ابسي
سالزبورخ
شوف ممكن زيارة ريف جميل سانت قلقن وولف غانق هاذا اولا حديقة الميربال جميله جدا وومكن تقضي يوم كامل وتضيف معها رحلة بنهر السالزك
اما بخصوص منجم الملح والكهف الجيلدي ما انصحك خصوصا للاطفال
لكن زور قصر موزارت
فينا
الجدول ممتاز لكن برايي تلغي القمه وشوف مغارة هتلر بس ترى بارده جدا بالداخل وخصوصا على الاطفال
زيلامسي
اجعل زيارة لبادكستن او انسبروك واجعل ولف قانق من سالزبورخ او سانت غلقن
وممكن زيارة شلالات كريميل وتجلس عند اول محطه لانه متعب .. بالاضافه تاجير القوارب بالبحيره
: :: :: :: :: :: :: :: :: :: :: :: :: :: :: :: :: :: :: :: :: :: :: :: :: :: :: :: :: :: :: :: :: :: :: :: :: :: :: :: :: :: :: :: :: :: :: :: :: :: ::
اما بخصوص حديقة الحيوان الي اعرفه هاذي وهي جميله
Alfre Brehm Platz
وتغلق 3.30 عصرا
وهاذا موقعهم
http://www.zoo-frankfurt.de/index_e.html
ذكرني لو نسيت استفسار
ولك تحياتي