اسبانيا المسافرون العرب

أكتشف العالم بين يديك المسافرون العرب أكبر موقع سياحي في الخليج و الوطن العربي ، يحتوى على أكبر محتوى سياحي 350 ألف استفسار و نصائح عن السفر و السياحة, 50 ألف تقرير سياحي للمسافرون العرب حول العالم و أكثر من 50 ألف من الاماكن السياحية و انشطة وفعاليات سياحية ومراكز تسوق وفنادق، المسافرون العرب هو دليل المسافر العربي قبل السفر و اثناء الرحلة. artravelers.com ..
شفيف1
13-12-2022 - 05:52 am
أحيكم بعد رحلة مكوكية زرت فيها المغرب واسبانيا لأول مرة كان لهذا المنتدى الرائع الفضل بعد الله في نجاحها وسأحاول التركيز في هذا التقرير على التفاصيل الهامة لمجريات الرحلة بعيدا عن السرد الممل والذي لا فائدة منه من خلال النقاط التالية وارجو منكم الدعاء وان يستفيد كل من يعبر هذا المتصفح وسيكون الحديث هنا عن اسبانيا وستجدون تقرير المغرب في بوابة المغرب مروا عليه هناك واوصي بقراءة تاريخ الاندلس قبل الزيارة او الاستماع لاشرطة طارق السويدان عنها حتى يكون لديك تصور شامل عن تاريخ المنطقة – الاسعار الموجودة هنا تقريبية بسبب النسيان ربما زادت او نقصت كم هللة – الهدف من زيارتي هي الاثار الاسلامية قرطبة – غرناطة – اشبيلية – ملقا :
كان الحجز من مكتب عطلات العمودي بجدة يوم 23-7 الى 5-8 2009م عبر الخطوط المغربية الى كازا الميزانية بالتذاكر 15000 ريال سعودي شاملة كل شيئ حتى تأشيرة اسبانيا اللي طلعتها من القنصلية اليونانية بجدة700 ريال شنقن
حجزت في ملقا فندق لاس فيقيس las vegas 4 نجوم وهذا رقمه 952217712 وانصح به للعوائل وهو مطل على الشاطئ وبه مسبح وشفت صورته قبل ما اتمم من مكتب اسفار وسط طنجة وبه شاب مغربي لطيف جدا اصبح صديقي واسمه ******** *********** وكانت التكلفة مع الافطار 3800 درهم مغربي لمدة اربعة ايام مع حجز تذاكر الباخرة ذهابا وايابا وقلته ابغى باخرة سريعة قال هذي اسرع باخرة الى الجزيرة الخضراء اسمها frs لونها احمر وهناك ايضا رحلات لطريفا لكن الجزيرة اقرب لملقا وكان موعد السفر من طنجة فجر الثلاثاء 28-7-2009 قلت للفندق ابي تكسي الساعة 5 الفجر لان الرحلة 7 ونص الابحار واعطيته 20 درهم وصلت الميناء وتو الجوازات تصحى وانتظرنا في الطابور وكان العدد قليل واخذ جوازي وسال من وين طلعت الفيز قلته من القنصلية اليونانية بجدة سكت ما رد وختم الجواز ودخلنا صالة انتظار صعود الباخرة ساعة ثم دعونا للصعود وشيكوا على الجوازات وتذاكر السفر وصعدنا وما ادري وش جاب عدنان ولينا في بالي وتايتنك والمنظر مع شروق الشمس على طنجة في غاية الروعة تصدقون اني قعدت في شرفة الباخرة اتفرج على المناظر لين وصلنا الجزيرة الخضراء وبالفعل الباخرة سريعة استغرقت ساعة تقريبا وعجبتني من الداخل وتشيل في بطنها سيارات بعد وبعض السفن مشت قبلنا وما وصلت الا بعدنا المهم نزلنا وانا اشم رائحة الاندلس الحلم الذي لم يتحقق لي من سنين
وكانت جوازات اسبانيا سريعة ولم ننتظر طويلا خرجت للصالة كانت الساعة قرابة 11صباحا بتوقيت اسبانيا وسألت عن باصات ملقا قالوا تخرج من الميناء مسافة كيلو تلقاها على اليسار ومشيت على رجولي لين وصلت وقصيت تذكرة ب12 يورو تقريبا والانطلاق الساعة 1 ظهر وقعدت بالمحطة اتفرج وريحت من تعب المشي على الاقدام – المحطة منظمة ودقيقة في مواعيدها جدا - لين ركبنا الباص والاسبان معي طبعا لكن سواق الباص منتفخ شوي مدري ليش حاولت اساله كم وقت حتى نوصل الا وينافخ كان ودي اتوطى في بطنه قلت في نفسي خل بكش العرب لا يحوسونك ههه – وهذا ما لحظته على بعض السواقين فيما بعد - ومشينا ومن اليمن البحر ومن اليسار جبال خضراء وطبيعة خلابة وشعور لا يمكن وصفه ومرينا ماربيا واخذ ناس ثم منطقة اسمها –بين المدينة- ومدري من وين جابوا هالاسم المهم السواحل والناس وزحمة ع الشواطئ وجمال رباني ضيعناه وصلنا ملقا 4 العصر واظن ان المسافة كانت 180كيلو اخذت تكسي ب 7 يورو ع العداد طبعا -العداد قبل ما يمشي مثبته على يورو و40 كلهم كذا مدري ليش - وصلني الفندق بعد ما اعطيته العنوان – والتكاسي قسم بالله غالية في اسبانيا قضت على ميزانيتي - كنت اتمنى ان اعرف اسوق زين واستاجر سيارة توفر علي كثير- وصلت الفندق وطلبت غرفة مطلة على الشاطئ والفندق جميل واعجبني بس واخذ ملابس السباحة وع المسبح ساعتين ثم رجعت الغرفة وبدلت واكتشاف للفندق والمنطقة وتمشيت ع الشاطئ لين 12 بالليل – حسيت وانا في اسبانيا ان رائحة النفط تخرج من ملابس مدري ليش - المهم المنطقة امنة جدا احسن من المغرب بكثير والنظام والقانون يحمي الجميع ثم نوم لين 8 صباحا وصحيت وصليت ثم نزلت افطرت واتصلت على القنصلية السعودية في ملقا وسلمت عليهم وعرفتهم بنفسي وقالوا ارسل صورة من الجواز وارسلت لهم صورة الجواز – وهذا رقم السفارة في مدريد 0034913834300 والفاكس 0034913021212وهذا رقم القنصلية في ملقا 0034952324497 والفاكس 0034952397616 وخرجت من الفندق ومعي كيس صغير فية كتاب الانجليزي وحليب وبسكوت تمر وعلبة ماء وع محطة القطار ركبت مع تكسي ب 5 يورو والمحطة وسط ملقا نسيت اسم المنطقة وهي قريبة نوعا ما من الفندق وقصيت تذكرة على قرطبة ب 34 يورو تقريبا وقالوا الرحلة 12 قلت زين وتجولت في المحطة وناظرت الساعة وهي 12 الا قلت الحق ويوم جيت قالوا صح النوم الرحلة راحت ايش اثر ساعتي على توقيت المغرب وتورطت والحل قالوا رح شف المواعيد ويوم جيت قالوا رحلة بعد 10 دقيق رح لمكتب يعدل لك التذكرة رحت وبسرعة حطت اسبانية الختم ورجعت لحق التذاكر وانتظار طويل الا الرحلة راحت صارت الاخلاق عندي تجارية ويش السوات رحت للمكتب مرة ثانية قالت لا زم تدفع 8 يورو زيادة ياناس ياهوه قالوا هذا النظام قلت ومتى اقرب رحلة قالوا 2 قلت تم وضبطت الساعة وسرت اناظر كل شوي في ساعة المحطة وساعتي وكل شوي اتاكد من الوقت لين رجعت المغرب ركبنا القطار 2 ولقيته فخم وعجبني مرة ومرتب مو مثل قطارات المغرب او السعودية وتخيلوا اخذ ساعة واحد فقط لين قرطبة والمسافة اظنها 220كم والمناظر بديعة وما فيه وادي الا وبه ماء مبهجة جدا وصلنا و نزلنا ومشيت على رجولي خارج المحطة وتمشيت في المدينة التي اصبحت حديثة وكان يهمني الاثار والمواقع التاريخية وبعدين اخذت تاكسي ورحت مسجد قرطبة ب5 يورو– معظم الاسبان اللي قابلتهم لا يتكلم انجليزي ولا عربي واصبحنا نتفاهم بالاشارة – وصلت المنطقة والسياح الاروبين كثيرين بها وتجولت وكان الالم بداخلي على فقدان الاندلس وشفت جميع ما تحويه من اثار واجمل شيئ منظر النهر بجانب مسجد قرطبة ثم دخلت مطعم وما طلعت من المنطقة الا يوم قرب موعد الرجوع لملقا الساعة 8 مساء وكنت حجزت العودة من ملقا عشان ارتاح – ملاحظة استخدام دورات المياة بدون شطاف يجب اخذ الحيطة قبل الدخول حتى لا احد يتوهق –
رجعنا ملقا ورحت للباصات وهي قريبة من القطار وقصيت ليوم الخميس ع غرناطة ذهاب واياب تقريبا ب22 يورو على 10 صباحا وتمشيت على رجولي لين الساعة 12 وملقا غاية في الجمال بالليل وبها شارع مليان مقاهي جميل مرة بس نسيت اسمه ثم اخذت تكسي وعلى الفندق ونوم لين 8 صباحا افطرت وجهزت اموري وخرجت مشي على رجولي قلت اسوي رياضة لين محطة الباص 40 دقيقة حتى اوفر من ها التاكسي وانطلقنا 10 تماما – مواعيد الباصات والقطارات في اسبانيا دقيق جدا ومنظم واللي يتاخر راحت عليه ولو تعطل باص هناك باصات بديلة جاهزة وهي نظيفة وجديدة – الطريق كله خضار والمياة في الاودية وجمال رباني سبحان الله - وصلنا غرناطة 12 ظهر واطن المسافة 190 كم واخذت تكسي على طول وعلى قصر الحمراء ب 9 يورو لانه بعيد عن المحطة وفوق جبل ويوم وصلت الا والزحمة والعالم من جنسيات مختلفة وصفينا سرى وقصيت تذاكر ب11 يورو الدخول تقريبا ولا اخفيكم اصابتني صدمة من جمال القصر وروعته وفكرة تصميمة وكم لعنت ابو عبدالله الصغير اخر حكام غرناطة على ضياعه الاندلس ودخلت معروضات القصر وبقاياه والملفت كثرة المياة به والزهور والاشجار والفواكة المهم تجولت لين 6 مساء ثم اخذت باص صغير بيورو ونص لين وسط غرناطة ومشيت على رجولي ادور مطعم ما لقيت وتجولت في وسط غرناطة كم هي رومنسية وكان موعد رجوعي 8 مساء قلت اكل في المحطة واخذت تكسي ب7 يورو ووصلت ثم انطلقنا الى ملقا – من لم يذهب الى غرناطة فهو لم يعرف حقيقة الاندلس – وصلنا ملقا 10 وقصيت تذاكر ع اشبيلية بالباص لبكرة ذهاب واياب ب 25 يورو تقريبا وتمشيت في ملقا ولقيت شارع يتجمع فيها الناس وبه مقاهي كثيرة نسيت اسمه مرة رائع وبه الكثير من العرب وغير الاسبان ثم رجعت الفندق 12 بالليل ونوم لين الصبح وافطرت واخذت تكسي ب5 يورو لين المحطة وركبنا الباص 9 وعلى اشبيلية التي يسميها الاسبان سيفييا وصلنا 12 الا ربع وهي ابعد مدينة عن ملقا تقريبا 250كم واقرب للبرتغال ونزلنا ومشيت على اقدامي الى منطقة الاثار وهي قريبة جدا من المحطة ولقيت سياح كثيرين ايضا ودخلت القصور الاثرية للمسلمين والحدائق الغناء والتي بها مختلف الطيور وتصدقون اني سمعت اصوات عصافير اول مرة اسمعها وحضارة المسلمين عظيمة في اشبيلية ثم زرت الكاتدرائية وهي قريبة من الاثار ولم ادخلها بس شفتها وتجولت حولها وتغديت في مطاعم قريبة منها واكلت "البقية" وليتني ما اكلتها سببت لي مغص بالباطن لين رجعت المغرب و8 مساء غادرنا اشبيلية ووصلنا قرابة 10 ونزلت وقصيت تذاكر على بكرة السبت الى الجزيرة الخضراء 12 ظهرا وتجولت في ملقا وجلست في مقهى على الشاطئ واسكريم ملقا لذيذ جدا وطارق بن زياد ييني كل ما ناظرت البحر ليش كمان ما ادري ثم رجعت الفندق 12 بالليل ونوم الين 8 صباحا وافطرت وتمشيت في ملقا ودخلت قصور اندلسية ابهجتني قريبة من الفندق وكنت مخطط ازور المتحف الوطني لكن الوقت ما اسعفني ورحت محطة الباصات ومشينا على الجزيرة الخضراء وصلنا 2ونص ثم مشيت على رجولي الين الميناء لانه قريب وسالت عن اقرب سفينة لطنجة قالوا الساعة 4 ريحت بالمحطة ثم ختمنا الجوازات وركبنا السفينة والاندلس خلفي والحزن في داخلي على امل زيارتها خاصة في المرة القادمة
اذا حصل تقصير في هذا التقرير التمسوا لي العذر
ودمتم سالمين


رحلتي الى اسبانيا
التعليقات (9)
abdulaziz75
abdulaziz75
ما شاء الله !! تقرير مميز جدا وفيه فائدة شخصية لي لا تتصورها .. الله يوفقك
وشكرا لك

الليل و النهار
الليل و النهار
تقرير ممتاز
بس ما فيه صور ؟؟

شفيف1
شفيف1
abdulaziz75
هلا بك عبدالعزيز
وشكرا لمرورك
مودتي

شفيف1
شفيف1
الليل و النهار
مشرفنا الرائع
اهلا بك
حاولت ارسال صور لكن ارفاق الملف من الادارة لايسمح لماذا
واشكرك

ثامر2007
ثامر2007
أسعدنى قراءة تقريرك .

شهم الشرارات
شهم الشرارات
تقرير رائع , حلو انك تقرا شي معين وتحصل به عدت فوائد وهذا ان دل يدل على قدراتك المنبثقه لتلك الامور
تقبل مروري

الرباطي
الرباطي
الله يسعد ايامك
تقرير جميل

ALKOKAB
ALKOKAB
.
.
.
تقرير بسيط
ولكن يحمل من الفائدة ما لا تحمله تلك التقارير الجسيمة
شكرا لك عزيزي شفيف1
..

شفيف1
شفيف1
ثامر2007
مرورك الذي يسعدني دائما اخي ثامر


خصم يصل إلى 25%