- السلام عليكم ورحمة الله وبركاته
السلام عليكم ورحمة الله وبركاته
في هذا الصيف من عام 2009 قررنا ان تكون وجهتنا ورحلتنا الصيفيه الى أم الدنيا مصر وتحديدا شرم الشيخ .. ياعيني عليج ياشرم وتم حجز تذاكر الطيران على متن طيران الجزيره وكانت قيمة التذكره لي انا شخصيا ب 90 دينار كويتي واختلف السعر من شخص الى شخص آخر على حسب اليوم الذي حجز به .... وتم حجز السكن ايضا عن طريق الانترنت في فندق موفنبيك جولي فيل واللي اكتشفنا بعدين انهم غيروا اسمه الى جولي فيل ماريتيم وايام واحنا ندور اسم الفندق مو عارفينه لين عيال الحلال قالولنا انه السالفه جذي وجذي وحجزنا وتوكلنا على الله ولله الحمد وحجزنا الغرف وطرنا الى وجهتنا الى شرم الشيخ ... وتحديدا الى خليج نعمه
هالسنه يتكون قروب الرحله من 6 اشخاص والحجز كان لغرفتين متجاورتين كل 3 اشخاص بغرفه .. اندور الرخص عادي
سعر الغرفه لليله الواحده للشخص الواحد في غرفه ثلاثيه بعد ان قسمت على 3 اشخاص بالغرفه الواحده طلع 12,250 دينار في السبورت ايريا ... الله يديم الرخص يابلاش والله
في سبع ليالي قضيناها في شرم الشيخ طلع للفرد الواحد في سبع ليال 85,750 دينار يابلاش
فهل من متابعين ان شاءالله للتقرير ؟؟
انتظروني سأسرد لكم تفاصيل الرحله بداية من وصولنا الى شرم الشيخ والمشايه الى نهاية الرحله والعوده الى الكويت
بداية لقطه جويه لخليج نعمه من الحبيب قوقل ايرث الله يخليه لنا
والحين بتشوفون ان شاءالله صوره لفندقنا من الجو عبر اثير قوقل ايرث العامر
هذا اهو فندقنا ومكان غرف نومنا اللي حجزناها ... طبعا المنطقه اللي حجزنا فيها اسمها السبورت ايريا وهي شوي بعيده عن المطعم اللي كل يوم نتريق فيه
يعني مشي على ريولك يبيلك 10 دقايق كل يوم بهالحر طاق درب رايح راد ... بس ماعليه المشي رياضه
ولازم تطلع من الفندق وتمر على الشارع الرئيسي وتكمل لين اخر شي صوب البحر عشان نفطر سهالات كله يهون في سبيل البطن وترس المعده
عدل يابو خمس نجوم عدل
وهذا طريق الذهاب الى المطعم للتريق
انزين وصلونا معاكم يالنحس شدعوه عاد
المفروض يسوون مظلات طول الطريج لي المطعم عشان الواحد مايحس بالحر ... شدعوه بيدرون عنا عاد اذا قلنا جذي
هالحمامتين لو هني بالكويت جان صاروا مجبوس حمام
واخيرا وصلنا للمطعم ... يالله اكلوا عليكم بستين الف عافيه ... ها ارتحتوا الحين ؟؟ دبيتوا من مالذ وطاب ؟؟
صباح الخير ب 6 لغات ...اللي عرفت منهم ماشاءالله علي تبارك الرحمن اربع لغات الثنتين الباجي مادري ملوت وين الصراحه
عاد عقب ماتتفطر ... وترد شوي الفندق اتريح وتاخذلك شوي قيلوله وتشوف هالقتلى والجرحى اللي مسدحين على السراير جدامك ... مالك الا تنفضهم نفض وتقعدهم من النوم رايحين مسافرين عشان تنامون؟؟
وتطقلك فره في المشايه مالت شرم الشيخ وتشوف هالرحلات مني ومناك وتدور حجوزات للرحلات اللي بخاطرك تروح لها ... الله يالمشايه ... يالله توكلنا على الله
أحد الاسواق الجانبيه في المشايه اللي تبيع تحف
ياسلام عليكم ... عاد هالله هالله بالعدنيات الطيبه ماوصيكم
احد المطاعم والقهاوي في المشايه
هذيل سلمكم الله اهم اصحاب المطاعم والقهاوي اهم يسوون رحلات اهم يرقصون كل شي يسوون ماشاءالله عليهم
لا ويسوون عروض فلكلوريه بعد جنه صج
وهذيل اصحاب القمصان اللي عاليمين اهمه اللي يعلمونكم عن الرحلات وكل واحد وشطارته
زين الحمدالله اخيرا
عاد يقولك تشتهر مشاية شرم الشيخ بالقهاوي المتاخمه على جانبي الطريق وتكتظ بالاوادم اللي قاعدين فيها
عاد نقعد معاهم ونتطمش حالنا حال هالناس
ماشاءالله روس روس
هذا كان الجزء الأول وخلوكم معاي ان شاءالله في الاجزاء القادمه