فيينا المسافرون العرب

أكتشف العالم بين يديك المسافرون العرب أكبر موقع سياحي في الخليج و الوطن العربي ، يحتوى على أكبر محتوى سياحي 350 ألف استفسار و نصائح عن السفر و السياحة, 50 ألف تقرير سياحي للمسافرون العرب حول العالم و أكثر من 50 ألف من الاماكن السياحية و انشطة وفعاليات سياحية ومراكز تسوق وفنادق، المسافرون العرب هو دليل المسافر العربي قبل السفر و اثناء الرحلة. artravelers.com ..
yuko
05-08-2022 - 10:50 pm
السلام عليكم
مساكم الله بالخير ياجماعة الخير
أنا ياأخواني ويا أخواتي الأعزاء خططت لقضاء شهر العسل لهذه الصيفية للذهاب إلى
فيينا - زيلامسي - ميونخ - باريس
لمدة 13 ليلة
وسويت الفنادق من مكتب سفر وسياحة وعطيته عربون 2000 ريال
وسويت حجوزات دولية وداخليه من ميونخ إلى باريس عن طريق مكتب آخر لفرق السعر
وعطيت الجوازات قبل أسبوعين لأحد المكاتب الموجودة عندنا في شمال الرياض
لكي يقوم بعملية إجراءات التأشيرة من السفارة
المهم ياجماعة الخير ما أبي أطول عليكم
وكنت أصرف صاحب مكتب الفنادق وصاحب الحجوزات اللي حجزت من عندهم لأنهم يبون
باقي الحساب وكل يوم بكره بكره
وأنا فلوسي جاهزة بس متخوف من الفيزا إنها ماتطلع لأن موعد استلام الجوازات يوم السبت
اللي هو أمس أي بعد اسبوعين من تسليمها إلى المكتب
ومن صباح الله خير أمس وأنا أدق على صاحب المكتب ومحل جواله أبو الشباب أو يعطيني
مشغول المهم وأنا ما ارتحت أمس كله قلت بس أكيد فيه شيء
وما انتظرت يوم صليت العصر رحت لهم ويوم رحت له حسبي الله عليه والله لايوفقهم
قالي أن السفارة رجعت كل الجوازات ولاختموا عليها وعلى كلامه أن السفارة جاهم قرار
أنه ممنوع المكتب يجيب جواز لازم الشخص نفسه يجي ويسوي مقابلة
وأنا على فكره عطيته ( 1500) ريال لعدد (2) جواز أنا وزوجتي
وعلى فكره زوجتي ماكانت تدري أننا نبي نروح الدول اللي ذكرتها
لأن ودي أحطها مفاجأة لها وقايلها نبي نروح دبي
عموما وأنا عنده وما أدري وش أسوي طبعاً لما كنت عنده تجيهم اتصالات
ولايردون ساحبين على العالم والجوازات اللي معه وتم رفضها كثيرة حوالي (100) جواز
وقالي أن فيه عوائل رحلتهم الاسبوع هذا
وأنا رحلتي 24/7/2009م ومايمديني على السفارة لو أبروح أنا لأن مافيه وقت
وقلت إنشاء الله إنها خيره وقلت عطني فلوسي خلني أروح بس
وقال ماراح نرجع كلها لأن السفارة ماخذين رسوم
وأنا بيني وبينكم ماودي أدخل معهم في متاهات وموناقصهم
لأنه من النوع الذين لايفهمون إذا تحدثت معهم بأدب وبعضهم من العرابجة
اللذين من الصعب التفاهم معهم بأي لغة كانت فقلت أتحسب عليهم أفضل
وقال باقيلك 800 ريال وأنا وإياه إلا أن وصلنا 1000 ريال
وقلت في نفسي إن شاء الله تكون دفعت بلا
وبعده طلعت منهم ودقيت على المكتب اللي حجزت من عنه الفنادق وقلتله السالفه
وقال راح اكنسلها
وتوجهت بعدها للمكتب اللي حجزت من عنده التذاكر هذا الكلام العصر
وقلتله السالفة وعلى فكره أنا معطيه (4000) ريال عربون
وقال على كذا تبي تروح عليك قيمة التذاكر الداخلية من ميونخ إلى باريس
وقيمتها (1450) للشخصين وكان في وقتها لما حجزتها
قال ترا يأخذون الفلوس دايركت قلت أوكيه
يعني اللي راح علي حتى الآن حوال (2000) ريال
وبعدها وأنا عند المكتب تبيع السفريات قلتله دبرلي حجز لأي مكان المهم أروح
لأني مجهز أغراضي ومرتب وضعي بخصوص الاجازة وشاري ملابس
المهم حجزت على مصر وكان عنده حجز وبعدها هونت قلت احجز على تركيا
لأن تركيا كانت الخيار الثاني لي عندما اخترت النمسا
وكان سعر تذكرت تركيا (3300) ريال للشخص والحجز أوكيه
وأنا الآن بصدد البحث عن المناطق الجميله وكل مايخص تركيا
وسوف أبحث من جديد مثلما بحثت عن المناطق الجميله الخاصة بالنمسا
وبالتوفيق للي يبون يروحون للنمسا واللي راحو ورجعوا
كما أتوجه بالشكر الجزيل للمشرف بيمو وجميع الأعضاء الذين أجابو على اسئلتي واستفساراتي
والله يعطيكم العافيه وعلى تفاعلكم وصبركم على اسئلتي وجميع من سأل في مايخص النمسا
وتقبلوا أحر تحيات أخوكم
يوكو


التعليقات (8)
سعود بن محمد
سعود بن محمد
بصراحة قصتك تضيق الصدر، لكن لعلها خيرة إن شاء الله، و الله يعوضك عليك
  • بالنسبة لرسوم الجواز في السفارة فهم يأخذون 315 عن كل جواز
  • أنا قدمت جوازاتي بالسفارة بنفسي، و كان هناك مناديب و لم أرى أنهم رفضوا أحداً منهم، لذا فإني أشك في رواية المكتب.
  • إجراءات الفيزا واضحة، و لا يشترطون حضو ر أو مقابلة العائلة، و اليوم و لله الحمد استملت جوازاتي و الفيزا.


الفجر
الفجر
هلا اخوي
اذا ودك بالروحة ان شاء الله يمديك روح للسفارة النمساوية ويطلعونها في ايام ان شاء الله خذ حجوزاتك واشرح لهم قصتك وبيساعدونك ان شاء الله..
واذا ما حصل لك يمكن انها خيرة ..

بيمو
بيمو
لا حول ولاقوة الا بالله
اخوي يوكو .. ( عسى ان تكرهوا شيئا وهو خير لكم ) .. والحمدلله على كل حال.. صراحه حسيت من نبرة صوتك في اخر كلامك انك كنت متشوق للنمسا .. ولكن مثل ماقالوا الاخوان اذا نفسك لسه ماطابت من النمسا روح السفارة التشيكية او اليونانية وقلهم انك حاجز ومخلص امورك لانو اجرائاتهم سريعة وفي مدة قليلة تقارب ال 10 ايام .. واذا تعاونو معك كان بها .. وإلا فأعتقد ان تركيا تنتظرك بشوق وتناديك وتقول هلُمّ إلينا نطيّب خاطرك !!
بالتوفيق يالغالي ولاشكر على واجب .. والله يكتبلك الخيرة اينما كنت ..

كيان55
كيان55
الله يعوظك خير ,,
نفس ماحصل معنا السنه اللي طافت********بعض المكاتب كذابيين
وهاذي السنه خلصنا كل شي قبل السفر ب 4 اشهر

بو ليان
بو ليان
الله يعوضك خير ,,

ali_otb
ali_otb
بصراحة ،، لو اني مكانك ،،
كان قدمت على اي سفارة ثانية ،، للحصول على الشنقن ،،
وقضيت انا والمدام اسبوعين هنا ،،، لين تطلع الجوازات ،، وبعدها ،، نسافر ،،
مدري ليش الواحد وده يسافر بسرعة بعد الزواج ،، مدري وش الحكمة ،، وين الفوائد ،،
انا اشوف ان السفر بعد اسبوعين من الزواج مناسب جدا ،، خصوصا لما تكون العلاقة بينكم اكثر ميانه ،، وتزداد العلاقة اكثر واكثر ،،
بس الله يكتب اللي فيه الخيره لك ،، والخيره فيما اختاره الله ،،
تحياتي لك يالغالي ،،،
علي

huda1a1r
huda1a1r
الله يعوض عليك ... وانا مع الاخوان رح بنفسك للسفارة علهم يتعاونون معك ... وان ما قدرت حول على تركيا ،وجمع المعلومات غير متعب مثل النمسا ...انا حاجز امس على الخطوط العربية الى تركيا وكانت قيمة التذكرة لاتتجاوز 1500ريال للشخص ولكنها تتوقف في الشارقة وتنزل مطار صبيحة في استانبول شوفها يمكن تعجبك، و احد وكالائها مكتب سياحي في العقارية القديمة نسيت اسمه بس تلاقي كل وكلاتها في موقع الخطوط العربية في النت ...... والله معك انا مثلك كنت ناوي السنه هذي على النمسا بس ماكتب الله لظرف ما وان شاء الله طالع تركيا بداية شهر 8....الله معك

الحـــــر
الحـــــر
شوف وانا اخوك انا اقترح عليك انك تؤجل سفرك الى النمسا الى 10/ شعبان ,, وبالنسبة لها الوقت الي بين زواج والسفر اطلع لمكة وخذ لك عمرة وتمش في جده
بالنسبة لي انا قدمت على السفارة من 3 اسابيع وطلعت التأشيرة خلال 10 ايام فقط
وانا اشوف اذا مازلت معزم على النمسا ترا يمديك وبالتوفيق


خصم يصل إلى 25%