السلام عليكم ورحمة الله
التوقيت : 9 مساء
يوم : الثلاثاء 21 ابريل 2009
اقلعنا من مطار الرياض الى مطار دبي
مطار غاية بالروعة مقارنة مع مطارنا الموقر الاشهب وكذلك ارووع من مطار ماليزيا مع ان مطار ماليزيا ايضا رائع جدا ولا يمكن مقارنته مع مطارنا الدولي وحطو تحت الدولي 70 الف خط
وصلنا تقريبا الساعه 10 ونص او 11
وطيارتنا لماليزيا الساعه 3 بتوقيت دبي يعني 2 بتوقيتنا صباحاً ..
اخذنا لفة بالسوق الحرة نقضي وقتنا الطوويل
مطار ماليزيا
وصلنا بعد رحلة مدتها 6 ساعات وربع
الساعه 1 الظهر
طبعا ماصورت كثيير لاننا كنا مستعجلين من كثر الارهاق والتعب
تعرضنا لمضايقات من بعض الاشخاص في المطار مدري وش تسمونهم < ماتعرف تعبر
ابلشونا الا يوصلونا للعاصمة
طبعا استغلاليين قالو بنوصلكم ب 250 رنجيت مايعادل 300 سعودي
قلنا ليه بترجعونا السعوديه ترا كلها 70 كيلو
ومن هنا ومن هنا لين اخذنا تاكسي ب90 رنجت حوالي 100 سعودي
بعدين عرفنا ان فيه بدروم تحت باص يودي للعاصمه يمكن 15 رنجت اذا ارتفع سعره
بس ماكنا نعرف
ومصممين يحجزون فندقنا من المطار مع اننا كنا حريصين مانطيح بهالمقالب بس عاد ربي كتب هالشي
ورضخنا لهم لانهم بصراحة نشبو بحلوقنا وحجزوا لنا بفندق اسمه راديوس للاسف ماصورته نسيت
تقريبا هو 3 نجووم بس حلو جدا نظافه حلوة واهتمام وافطار على كيف كيفك وغيره من المميزات للعلم سعره 230 رنجت ماليزي لليله يعني يا بلاش
وسيده على العاصمة كوالالمبور
على فندق راديوس
هذي اطلالة غرفتنا من الفندق
المهم نزلنا عفوشنا وبدلنا وطلعنا نتغدا في برج كوالا يسمونها المنارة
قصينا تذاكر تشمل برج المشاهده + حديقة الحيوان + ركوب الخيل + مدينة الثلج
طبعا استخدمنا برج المشاهده وحديقة الحيوان لان ركوب الخيل مايستهوينا ومدينة الثلج تصلح للي معه اطفال كبار شووي
طلعنا برج المشاهده
وهذي صور من برج المشاهده للعاصمه كوالا
لقيت لكم صورة لفندقنا من خلال البرج
شوفوه ذاك اللي فيه حوض سباحة فوق
شفتووه؟
بعدين نزلنا لحديقة الحيوان تراها مو كبيره صغيره بس فيها ثعابين وطيور وزواحف وبرمائيات وقرود وارانب < وش بقى !
ذي مدري وش اسمها !
ابو جنيب مدري ام جنيب يقول بعلي انها معروفه عندنا يالسعوديين
كاتبين عليها انها ماخوذه من الصحاري قلت ايه قصدهم سعوديا عريبيا
ترا زوجي مصورها بطريقه احترافيه باستخدام الماكرو لايفوتكم
ضفدع وعوه بس من شكله
بعدين طلعنا للتوين تاور او بتروناس
وبالعربي البرجين التوأم
اطول ناطحات سحاب على مستوى العالم
رحنا للسنتر حقه اسمه klcc
اختصار ل كوالا لمبور ستي سنتر
سنتر عجيب وفخم
عندهم اشياء عجيبه وخاصه كشكاتهم شي جنان
واللي يبي يرووق يطلع برا من ورا السنتر نافورة عليها حركات خبال تستهبل
اللي يبي يجلس ويتفرج ويشم هواء
اليوم الثاني
طلعنا لشارع العرب اسمه عندهم بوكيت بنتانج او عرب ستريت بس الاول معروف اكثر
شارع حلو وعجقه على قولت اخواانا اللبنانيين
فيه حركات غريبه واستعراضيه يعني واحد معاه ثعبان واللي يبي يصور يجي حياه الله
والثاني يرسم عالحجر واللي يرسم اشكال تضحك بطريقه كاريكاتوريه
ومحلات تبيع اشياء غريبه ومطاعم عربيه ومولات صغيره بس حلوة
اخر المشوار رحنا سوينا مساج رجول
شي ماينتفوت عندهم
هذي هي اللي سوت لي اللي عاليمين وطلعت ماتسمع ولاتتكلم وانا راح وقتي وانا اشرح وين رجولي توجعني معه
الله يشفيها قولوا امين
عندهم مساج سمك
حط رجولك والسمك ياكل الجلد الميت
بس صراحة ماجازفنا ننوكل وحنا احياء !!
وهذا محلهم من برا
ياكثر محلات المساج عندهم
زي مطاعم الشاورما عندنا
اليوم الثالث توجهنا الى جزيرة ( بيننج )
انتظروني في الجزء القادم .. رحلتي الى ماليزيا ( جزيرة بيننج ) ..
اختكم/ ام عبدالعزيز