- تحيه طيبه للإخوان والأخوات الذين اشتقنا لهم في هذا المنتدى الطيب
تقرير زيارتي للمغرب من 12 فبراير إلى 26 فبراير
السلام عليكم ورحمة الله وبركاته
تحيه طيبه للإخوان والأخوات الذين اشتقنا لهم في هذا المنتدى الطيب
أقدم لكم تقرير زيارتي للمغرب من يوم 12 فبراير إلى يوم 26 فبراير 2009 ....عموما راح اشرح بالدارجة ديالنا أحنا الخليجين ا و بالأصح بالسعودي .
كنت مرتب مع العائلة بزيارة الأهل في المغرب في إجازة المدارس وكما تعلمون كانت الإجازة أسبوع واحد فقط أضفت أسبوع على الإجازة وصارت أسبوعين .. يعني يمدي الواحد يتمشى ويوسع صدره ويرجع وهو مقند ألراس ...كان واحد من أقاربي ماعمرة سافر خارج المملكة سبق انة وعدني العام الماضي وفي نفس الفترة يلحقني المغرب لأنة متولع ونفسه يشوف المغرب واخلف بوعدة ورجع الان ووعدني ثاني مرة بان يلحقني ...انا قلت لة هذا رقم جوالي وهاذا عنوان سكني في المغرب اذا كنت جاد وناوي وصلت مطار ابوظبي كلمني وابشر بسعدك عين فراش وعين غطاء تلقاني قدامك في المطار
الحجز للأسف كان يوم الخميس 12 فبراير الساعة 10:30 صباح من البحرين أبوظبي الدار البيضاء والرجعة الدار البيضاء ابوظبي الدمام على خطوط الاتحاد... حاولت احصل رحله من الدمام الى ابوظبي بس للأسف الاتحاد جدولها من الدمام يوم الثلاثاء حاولت أقدم سفرتي على يوم الثلاثاء عشان أتحاشى زحمة الجسر وما تدري ايش يصير عليك في الجسر بس الظروف حتمت إلا يوم الخميس
المهم فكرت فيها زين بيني وبين نفسي قلت ياولد أش رأيك تروح للبحرين يوم الأربعاء بعد انتهاء الدوام وتنام أنت وعيالك بفندق والصباح تروح للمطار من قريب ..كلمت واحد من الأقارب وماقصر وعدني أنة يمرني الساعة 2 ظهر يوم الأربعاء وبالفعل مشينا للبحرين وعينك متشوف إلا العج وغبار طول الطريق ماتشوف كبوت السيارة من شدة الغبار ..المهم تسهلت الأمور وصلنا للبحرين وجلسنا ندور على فندق وكانت الفنادق شبة مليانة و يالله يا لله لقينا فندق سكنا ودعت خويي وفي الصباح توجهنا للمطار وطارت الطيارة في الوقت المحدد الى ابوظبي كذلك كانت الرحلة من ابوظبي الى الدار البيضاء في الوقت المحدد
وصلنا مطار محمد الخامس تمام الساعة 07:00 مغرب انهينا أجرأت الجوازات والجمارك في لمح البصر وبدون أي عرقلة استقبلونا الأهل في المطار وكان الجو بارد نسبيا ..والله فرق من عج وغبرة إلى جو ما ودك تفارقه .....ما أطول عليكم زي ما تعرفون أليلة الأولى احتفلو فينا الأهل والأقارب وتعشينا وبعد العشاء رحت للفراش وهاتك نوم لاني كنت صاحي من الساعة 6:00 صباح وفي الطيارة النوم ما هو حولي حاولت بس للأسف ما قدرت ولقيت لي شباب شرواكم ما فيه إلا سوالف عن المغرب وكل واحد يدلي بالمعلومات إلي يعرفها والي أول مرة يزورها قاعد يسجل من العناوين والتعليمات والخ.
صحيت على الساعة 7:00 شبعان نوم وافتح النافذة إلا الشوارع فاضيه والشمس ما بعد تطلع تقول كان الوقت بدري علما باني كنت موجود العام في نفس الوقت من شهر 2 وكانت الشمس تشرق على الساعة 06:50 بس السنة هاذي حتى الناس ما يتحركون إلا من الساعة 08:30 وفوق .. صليت الفجر وألا الشعب نايمين شكلهم سهرا نين وما رقدوا لا الفجر .. محتفلين بنتهم وحفيدهم لهم سنة ما يشوفونهم إلا عن طريق المسنجر طلعت في حدود الساعة 8:30 واوقف التاكسي وعلى طول على درب عمر فيه شلة مغاربه متعرف عليهم من سنتين دائما أروح أتمشى الصبح وأمر عليهم سوالف وضحك ومن ثم اخذ جريدة مع فنجال كحلا في قهوة باريس اوقهوة رمسيس وأشوف الرابح والجاي وإقراء إخبار المجتمع وكالعادة المرة هاذي لقيت محلات الشباب ما بعد تفتح روحت لقهوة رمسيس واحلي فنجال كحلا(حاولت اسويها في البيت ما عرفولها الأهل يبيلها مكينة) قعدت أتصفح الجريدة وكانت الإخبار عن الفيضانات والمنكوبين من الفيضانات.. الله يكون في عونهم .. والا اخبار تهريب الحشيش والقبض على العصابات في الناظور والخ.......
اكمل معكم باقي التقرير في اقرب فرصة
أرجو من الإخوان والأخوات تزويدي بطريقة طرح الصور وبالتفصيل الممل ترى أخوكم عمرة ما نزل صورة في المنتدى
بس والله شكله موضوعك حماسي لانه اسلوبك وتوضيحك في قمة الجمال وكانني مسافر معاك
لكن سجلني متابع
ونستنى البقيه
تحياتي