- الحلقة الأولى ... آسف بأضطر اني اكتب بالعامية عشان ادقق في وصفي ...
السلام عليكم ورحمة الله وبركاته
بصراحة أنا استفدت كثير من هالمنتدى الأكثر من رائع قبل سفرتي والى الآن وهو يهل علي من خيرات معلوماته التي لا نهاية لها بإذن الله
ولذلك فأنا سأكتب تجربتي لكي يستفيد منها الزوار
فالفضل يعود لله ثم لهذا المنتدى الاكثر من رائع حقيقة في اختياري لكل شيئ هنا في نيوزيلند
الحلقة الأولى ... آسف بأضطر اني اكتب بالعامية عشان ادقق في وصفي ...
انا بذكر لكم شنو اللي قيل لي قبل السفر لما كنت في السعودية وشنو اللي شفته بنفسي بعد ما وصلت وبقول لكم الأغلاط اللي صادتني وفهمت لها بعدين وكل شي صار معاي من ... الى
في البداية اول ما زهبت اغراضي وتجهزت للسفر قالو لي ترى مطار سنغافورة كبيرة وايد يعني اكيد راح تتبهدل ويمكن تروح عليك الطيارة و بس لما رحت شفت المطار وكان كبير من صج بس ما يضيع لان هو مجرد 3 مباني وانت بس شوف في التكت اللي تبعك في أي مبني راح تقلع طيارتك وروح له واول ما تدخل المبنى راح تشوف شاشات فيها اسماء الرحلات وارقام البوابات وانتهى الموضوع
المهم اني جلست في المطار انتظر عند بوابتي بعد ما تأكدت انها هي ولما فتحو الباب ختمت الجواز وركبت الطيارة بعدها الى نيوزيلند ( كرايست شيرج ) ولما وصلنا نزلت وانا خايف من سالفة الفيزا السياحية لان التكت فيه تاريخ العودة بعد 8 شهور وقلت شكلها ترجيعتي بتصير فورية بس قلت يرجال شنو يعني اللي بيصير واللي الله كاتبه انا راضي به
المهم ان اول ما سئلتني الموظفة : انت ليج جاي هنا ؟
قلت لها : وانا مبتسم ... انا هنا لسببين الأول للسياحة لمدة شهرين والثاني للدراسة لمدة شهر بس
وقالت لي : انت تاريخ عودتك يقول غير هالكلام يعني تاريخ كيت كيت
وقلت لها : ادري بس لأن في حالة حسيت نفسي اني استفدت راح اغير الفيزا الى فيزا طالب
قالت لي : شكرا يمكنك الدخول الان
طبعا هذا الكلام ما خذ مني حتى 3 دقايق يمكن لأني كنت واثق من حالي مع اني خايف اشوي
المهم وبعد ما دخلت فتشو اغراضي مثل باقي اللي موجودين وكل هالسالفة مع التفتيش و يمكن ماخذت مني ساعة على بعضها وطلعت اشم أول شمة هوا لي في نيوزيلند
التكملة لاحقا
اكتب بالعامية وباسلوبك طالما هذا يريحك ويجعلك تبدع في سرد ذكرياتك
فحلاوة الانسان بطبيعته
(وطلعت اشم أول شمة هوا لي في نيوزيلند) حسيت انك عاشق البلد قبل لا تجيه
واصل حلقاتك ونحن متابعينك