- قلت له: احب المغامره .
- طبعا هذا الاخ يدعى ابو مشعل وهو من الكويت الشقيقه.
- قال مكان نسهر فيه الليله وتراني عازم ضيوف .
- قلت: حياهم الله .
- قلت له : ياصحبي ما كاين صرف .
- جلس يضحك ويختم لي الجواز
لا اعلم ما هو الشعور الذي كان ينتابني للذهاب للمغرب ...!
كانت الفكره تراودني من صيف 2007 ولكني لم اتمكن من الذهاب لعدم امكانيه الحجز ام ان القدر هو سبب التاخير .
ولكن مع بدايه 2008 كان للعشق بدايه
خلال شهر يناير 2008 كنت اجهز بعض المعلومات عن معشوقه الملايين لرغبتي الجامحه للذهاب وزيارة هذا البلد الجميل , جميل باصالته وعراقته وطيبه شعبه المحافظين على تراثهم .
ففي تاريخ 2312008 كان موعد السفر الى البلد الحلم .
ااذكر اني ليله سفري لم تنم عيناي وكل هذا شووق ولهفه لرؤيتها .
كنت قد رتبت السكن من خلال البحث عن طريق الانترنت ومن خلال بحثي المتواصل وصلت الى نتيجه واحده وهي ان مراكش هي المدينه الاجمل وهي كانت كذلك .
فقد عزمت انت تكون الرحله كامله في مراكش لرؤيتها وكان لي ما اردت .
حصلت على شقه جميله في ناظري من خلال موقع الانترنت كما ذكرت سالفا وكانت سعرها لليوم الواحد ب 600 درهم وهي كانت في منطقه شعبيه قريبه من جامع الفنا حيث انه كان الحافز الكبير لاختيار هذه الشقه .
ما يميز هذه الشقه انها محتفظه بالطراز المغربي من خلال غرفه الجلوس و والاثاث حيث اردت ان ارى التصميم المغربي البحت وكان لي ما اردت .
كنت قد حجزت على الخطوط المغربيه بمبلغ 2300 ريال وكان الاقلاع فجر الخميس الساعه 4:30 الصباح
وقد وكنت في المطار الساعه 2 الصباح .
فجأه دوا صوت من خلال المكبرات الصوتيه بموعد اقلاع الرحله وتوجيه المسافرين للصعود للطائره سرت في نفسي قشعريره واحساس بالبروده لا اعرف اسببها
ركبت الطائره وكانت شبه خاليه
يعني الواحد ياخذ راحته في النوم مزبووط
حاولت انام بعد الاقلاع لكن لم استطع فجاه اعلن الطيار استعدادنا للهبوط في مطار القاهره الدولي
لم تستغرق مده مكوثنا في مطار القاهره اكثر من ساعه وبعدها عاودنا التحليق في الفضاء .
طبعا انا اشوف بعض الاخوان السعوديين فيهم فررحه غير طبيعيه وانا جالس اشووفهم واسترق النظر اليهم .
وكان فيه ناس نايمه وناس تسولف وناس مشغله الاب توب تسمع اغاني وانا احاول انام ولكن ما فيه حيله .
قبل الهبوط بحوالي ساعه كان في المقعد الامامي شخص طول الرحله نايم ( ما شا الله عليه ) واستيقض وشافني لحالي قال تعال جنبي نسولف انا وايك قلت له مو مشكله ( طبعا انا فرحت كنت ابي اسال اي واحد عن المغرب وكيف الاجراءات الامنيه ) وجلسنا نسولف ودار بينا حوار طويل لكن باكتب لكم مقتطفات منه .
قال : اول مره تجي للمره للمغرب ؟
قلت : ايه .
قال جاي لحالي ولا خوياك في المغرب ؟
قلت له : والله لحالي واول مرره بس انا احب اسافر لحالي .
قال : اجل الله يكون في عونك .
قلت له : ليه ؟
قال :انا هذي ثاني مره اسافر مع اني ما جيت منها الا قبل اسبوعين .
قلت له : يعني تووك جاي منها قبل اسبوعين ورجعت لها مره ثانيه ؟؟؟
قال :ايه وجاي المره هذي لحالي وابشرك ما اتصلت حتى على الدوام عشان اخذ اجازه اذا وصلت للمغرب اتصلت عليهم عشان يعطوني اجازه اجباريه .
قلت له : ما شا الله .
المهم يوم اعلن الكابتن عن هبوط الطائره وربط الاحزمه الناس قامت وتحس ان الطائره دبت فيها الحياه
ولما لامست كفرات الطائره ارضيه المدرج سمعت تصفيق بحرااره غريبه كان المنتخب فائز بكاس العالم .
المهم نزلنا الساعه 11:30 تقريبا الصبح بتوقيت المغرب وانا اتبع خويي هذا لاني قلت له ما ادري وين اروح قال خلك وراي قلت له ابشر بس انت وصلني لين اختم جوازي وبعدين الله يسهل عليك قال ان شا الله .
كان الاجراءات جدا سهله في الدخول وطلعت خارج المطار والقى سائقي التكاسي ينتظرون قالي واحد وين بتروح قلت له مراكش قال ب 1000 درهم قلت له معصي وليه هذا السعر الغالي ؟ قال هذي تسعيره ثابته وكنت غير مقتنع لا اعرف ما هو السبب .
شوي جاني واحد وقالي نفس الكلام ورضخت لكلامه طبعا كان فيني من التعب ما الله به عليم واول مرره وعيوني طايره اشووف كل شي كان سائق عمره تقريبا 40 سنه ومعه ولد شبااب تقريبا عمره 17 سنه وجلسنا طول الطريق نسولف عن المغرب والسعوديه وكيف الانديه والكره المغربيه مع اني ما احب الكره بس حسيت اني انفع احلل في استوديوهات الاوربت كله عشان الوقت يمشي طبعا وخلال الطريق قالي وش رايك نوقف نشرب اتاي قلت له مابغيت ما اعرف ليه رفضت هذا الشي هل هو خووف او الرغبه السريعه في الوصول لمراكش عشان استريح .
اخذ الطريق تقريبا ساعتين ونصف ولما وصلنا مراكش قال تعرف المكان اللي بتسكن فيه ؟ قلت لا والله ما اعرف بس راح اخليك تتفاهم مع صاحب الشقه وهو يوصف لك المهم اتصل عليه وعرف الوصف والحمد لله وصلنا بسلام .
قلت له خليك هنا واقف خلني اشوف السكن وارجع لك طبعا اغراضي في السياره ما عدا الجواز والبطاقات البنكيه هذي معي نزلت وشفتها مثل ما كنت في الصوره .
اعجبني التصميم خصوصا انه قديم والعماره كانت شوي قديمه بس مدري ليه ارتحت فيها او اني مع التعب اشوف كل شي زين .
نزلت اغراضي وعطيتهم جوازي وقلت وين الشغاله ؟ قال موجود 3 شغالات طبعا ما ينامون في الشقه بس انت وقف عند البااب ونادي على اي وحده وتجيك !!!
بعدين عرفت ان الشغالات لهم شقه في السطح اي واحد يبغا شغاله ينادي عليهم وتجي له تزبط له اللي هو يبغاها وترجع لشقتهم مره ثانيه واذا بغيت تعطيهم بخشيش مو مشكله ولو ما اعطيتهم بعد مو مشكله .
قلت لشغاله انا ميت من الجوع وفيني نووم يا ليت لو تسوين لي اكل قالت لي وش بغيت تاكل قلت لها اي شي انا بامووت من الجووع قالت مو مشكله واعطيتها فلوس ما كلمت 5 دقايق الا هي راجعه وفي يدها اغراض كثيره قلت لها معقوله بالسرعه هذي جبتي الاغراض ؟ قالت السوق قريب منك وتخليني اروح القي نظره من خلال البلكونه والقا السوق مقابلي تمامي بس طبعا سوق شعبي وانبسطت قلت حلو يعني لو بغيت اي شي بس اقطع الشارع واشتري اللي ابغاه .
المهم سوت لي الاكل وحاولت انا انام بس ما قدرت لان المكان شوي مزعج تسمع اصوات السيارات والدبابات والخيول يعني في هذا المكان لاتعرف شي اسمه نووم الا لو بتنام بدري يعني الساعه 10 بالليل الى الساعه 6 الصباح وغير كذا انوااع الازعاج بس انا كنت مبسووط مرره ابغى اشوف البساطه وابغى اعيش في داخل الشعب المغربي .
قريب من غروب الشمس رحت اتمشى في جامع الفنا واعجبني بشد خصوصا انك تشوف الناس والرقصات الشعبيه واعتقد الاعضاء اسهبوا في وصف جامع الفناء ونمت تقريبا الساعه 1 بالليل
اليوم الثاني صحيت بدري على اصوات ازعاج السيارات والناس خصوصا ان الشقه في الدور الثاني يعني الاصوات احس انها معي في غرفه النوم طلعت اتمشى شوي ولقيت لي محل حلويات واخذ لي كروسان وخبز جدا لذيذ ورجعت للبيت عشان اكل وجلست اشوف التلفزيون شوي وبعدين طلعت اتمشى والف الشوارع على رجولي وما حس
يت بنفسي الا وانا في شارع محمد السادس وبالتحديد مقابل قهوه ملينيوم وجلست في الجلسات الخارجيه وانا كنت اشرب الاتاي مقابلي جالس لشخص لوحده لابس بدله رسميه ويطالع فيني وما كنت اعيره اي اهتماام .
طبعا الشخص كان كبير في السن عمره في حدود الخمسين واللون الابيض مغطي على معضم الجزاء راسه وقالي : الاخ خليجي ؟
قلت له : ايه والله ومن السعوديه بالتحديد .
قال: ما شا الله شكلك دايم تجي هنا ..!
قلت له بالعكس اول مرره اجي .
قال : اول مره تجي ولحالك ؟
قلت له: احب المغامره .
طبعا هذا الاخ يدعى ابو مشعل وهو من الكويت الشقيقه.
ودار بينا حديث طويل استمر حوالي 3 ساعات وعزمني على الغدا في القهوه والحمد لله خلصنا من الغدا وانا عيوني ما اقدر افتحها فقلت له وش رايك نتقابل في الليل وخذنا ارقام بعض وارجع للشقه واقول للحارس يا ليت لو تصحيني الساعه 10:30 المساء قالي اوكي .
حاولت انام من الساعه 6 الى الساعه 10 المساء ولكني لم استطع وفجاة رن جرس الشقه والقاه الحارس قلت له تراني صاحي وعيوني تراقب عقارب الساعه وغطيت في سبات عميق لم اصحى الا الساعه 11 الصباح في اليوم الاخر طبعا كنت في الصاله اتفرج على التلفزيون .
صحيت واشوف الساعه واتذكر موعدي مع الاخ ابو مشعل ولقيته متصل علي اكثر من مره واتصل عليه ولا رد علي قلت شكله زعل مني.
وانادي على الشغاله واقول لها مشينا للسوق ابغى ننزل للسوق مع بعض وابغى تسوين لي غدا طاجن وحريره
قالت طيب وننزل مع بعض واتمشى في السوق طبعا السوق شعبي للغايه ومكتووم يعني انا ما قدرت اتنفس وجالس اقول في نفسي كيف هذي الناس جالسه في هذا المكان .
خلصنا اغراضنا وفجاه يرن الجوال والقاه ابو مشعل وتاسفت له وقلت له تعال عندي عازمك على الغدا . ( ابي ارد عزيمته اللي في ميلينوم ) والله ويجي وناكل احلى طاجن ونشرب احلى حريره .
بعدها قال فيه خويي ابو بدر ان شا الله راح يوصل من الكويت اليوم المغرب وبنروح نستقبله في مطار مراكش . قلته له مو مشكله بنروح ونستقبل خويك .
قالي :طبعا اليوم سهرتنا بتكون في النرجس .
قلت له : وش هو النرجس .
قال مكان نسهر فيه الليله وتراني عازم ضيوف .
قلت: حياهم الله .
طبعا ابو مشعل كان مو مرتاح في السكن اللي هو مستاجره فكلمت له راعي الشقه اللي انا ساكن فيها لو كان عنده شقه في مكان اخر وبالفعل استاجر ابو مشعل هو وخويه ابو بدر شقه خلف ماكدونالدز مباشره وكان سعرها لليوم الواحد 600 درهم .
ونسهر احلى سهره في النرجس وكل واحد خذ له تاكسي ورجع لشقته .
قمت من بكره على صوت الجوال من ابو مشعل اعتقد الساعه 3 العصر
قالي : وينك في الى الحين نايم .
قلت: عقب سهره البارح تبغاني اصحى من الظهر . والله خلني انوم لين اشبع عشان اصحصح لكم مضبوط .
قال :خلاص. وش رايك نتقابل في ملينيوم ؟
قلت :وهو كذلك.
مرت نص ساعه على بال ما اخذت لي شور وبدلت ملابسي وانزل واخذ لي تاكسي ب 10 دراهم للكوفي والقاهم ينتظروني . ونجلس في الكوفي تقربا 3 ساعات ما بين سوالف وتذكر احداث سهرتنا الخنفشاريه
على المغرب تقريبا رحنا نتمشى في جامع الفنا وجلسنا الى الساعه 11 بالليل وابو بدر يقول ترا اليوم الياسمين ينادينا .
قلت له : وشو بعد ذا الياسمين ؟
قال: ما عليك انت امش معنا وابشر بعزك .
قلت : والله انا اعرف انكم قدها وقدود بس ما عرفت الياسمين .
قال : نفس الياسمين بس بطريقه مختلفه شوي .
قلت : اللي تبيه يصير .
ونسهر سهره خفافيه حلوه وراقيه
وجلسنا طوال ثلاث ايام وهذا جدولنا بس كانت جدا ممتعه
اخر يوم لي في مراكش كان يوم الخميس انطلقنا بسياره الى كازا عشان اجلس فيها يوم قبل السفر وبالفعل ونحجز في فندق فال انفا تقريبا سعر الغرفه ب 800 درهم .
ونتمشى في شاطئ عين دياب الجو كان روعه لكن فيه شوي بررد .
قلت لهم عشاني بكره مسافر ترا عشاكم علي ( مسوي كريم )
المهم واعزمهم في مطعم في نفس الفندق بس كان عشا معتبر واهم شي طلبته الكبسه لاني كنت مشتهيها بقووه .
يوم جا يوم الجمعه صحيت بدري وافطر وخويااي نايمين وما بغيت ازعجهم جهزت عفشي واخذ لي شور واحلق يوم جت الساعه 12 الظهر واصحيهم قلت يا الله لازم ترا نمشي للمطار .
وصلنا للمطار ودخلنا وابو مشعل ما قصر يعلمني وين اروح ووين اجي قصيت البوردينق وعطيتهم شنطتي وجلسنا في كوفي جلسه احلى من الحلوه نسترجع فيها ايامنا الماضيه .
قبل الاعلان عن موعد صعود الطائره بنص ساعه قلت لهم يا الله خلووني اروح اختم جوازي وانتظر في طيارتي ووادعتهم بحراره يوم جيت عند موظف الجوازات شاف جوازي وجلس يقلب فيه وقالي : ما عندك شي نتذكرك فيه .
قلت له : ياصحبي ما كاين صرف .
جلس يضحك ويختم لي الجواز
الناس اللي بعده اللي يفتشون المسافرين وقفوني تقريبا نص ساعه تفتيش والسبب لاني كنت لابس بدله رسميه ويبغوني اعطيهم فلوس وانا اقول في نفسي والله ما ادفع ريال واحد طبعا ما بقى شي ما نبشوا فيه الين طلع فرشه الحلاقه وجلس يلعب فيها بالموس ويقول شكلي باجيب الكلاب البلويسيه تجي تشمها ( طبعا ما ركتها غاليه )
قلت له : جب اللي انت تبغى بس اهم شي الطياره ما تفوتني .
ويجيني صاحبه وقالي : ما عندي شي ميه درهم عشان نخليك تمشي .
قلت له : والله لو معي باعطيك بس ما معاي اي شي .
قال : اجل قفل شنطتك وروح .
طبعا خلال النص الساعه هي كرهت نفسي وخصوصا اني مابي الرحله تفوتني ووراي دوام وما صدقت على الله انه قالي امش
وانا امشي واقول في نفسي وش يخليني اجي لبلاد عربيه خلني على الدول الاوربيه احسن .
ركبت الطياره وفيني من التعب مال الله به عليم .
الين وصلت للرياض بحفظ الله ورعايته .
ملاحظه : هذا التقرير كتب على عجاله وب باذن الله باضيف فيه رحلتي الثانيه والثالثه والرابعه خلال عام 2008 . وما سبب انزعاطي في هذا البلد الغريب .
اترككم في رعايه الله
تحية طيبة
ومااقول الا
الله يهنيك