سماء المدينة
07-12-2022 - 12:06 pm
السلام عليكم ورحمة الله وبركاته
خلال زيارتي لسوريه في شهر مارس 2008 زرت احد المطاعم وحابه اكتب تقرير بسيط عنه
المطعم يقع في دمشق القديمه في المنطقه المحيطه بالمسجد الأموي واعتقد انه هو اقرب مطعم للمسجد
في ذاك اليوم نزلنا وتمشينا في سوق الحميديه والمسجد الأموي ومشينا مشينا مشينا مشينا
اتعب وانا اقول مشينا لدرجة ماحسينا بالوقت ..
ماانتبهنا الا للجووع وكل مامشينا اشوف البيوت الدمشقيه القديمه اللي للأسف تحولت لمطاعم ..
المفروض تحول لبيوت مفروشه للإيجار لأن السكن في أحد هذه البيوت تجربه فريده ..
صرنا كل مانشوف مطعم ندخل يقولون لنا (( عندكم حجز)) ,, وطبعا حنا نهز روسنا لا ..
ويرفضون اكتشفنا ان كل المطاعم لازم حجز مسبق مع العلم ان المطاعم فاضيه ياربي وش الدبره
حتى اذكر احد المطاعم كان اسمه ((باب الحاره)) وكان بصراحه رائع الديكورات مره روعه..
لكن للأسف لازم حجز .. رجعنا وقلنا بس نروح لبيتنا في مضايا ونتعشى فلافل وصفيحه ..
وحنا راجعين صادفنا هالمطعم حتى انا من اليأس والله مادخلت قال زوجي انا ابدخل اسأل
انا قعدت برا قلت اصور اضيع وقت لأني متأكده انه بيرجع بيقول يلا وين السياره بس..
وهاذي بعض الصور .. اعتذر عن عدم وضوحها لأن بعض قطرات المطر كانت تهطل علي..
طلع زوجي يحمل البشاره قال تعالي .. مو لازم حجز .. واخيراً
قبل تدخلون معانا شوفوا صورة المطعم من برا ..
وهذا المدخل..
رحلتي الى سوريا
جلسنا وجابوا لنا المنيو المطعم بصراحه رايق .. وهدوء وديكوراته راقيه
حسيت اني قاعده في صالون سعاد خانوم ..
هذا المنيو ولاحظوا الأسعار جدا معقول .. صحن الفتوش ب 60 ليره والحمص ب 50 ليره وكريمين الصراحه
الكميه تكفي وتزيد ..
بعد ماطلبنا مقبلات ومشاوي وكبب .. كبه مشويه ومقليه وعلى السيخ ((الأخيره انصح بها وبقوه))
وعصيرات .. الذ ليموناده بالنعناع .. الحق يقال الاكل نظيف وشهي وطازه ..
اثناء انتظار الطلب ..اخذت بعض اللقطات ..
طبعا ماصورت كل الطاوله (( تعرفون الجوع ومايسوي)) وكنت ناويه اني لما انتهي اصور باقي المطعم
لكن نظرا لوجود عائلتين بجانبنا ..عائله تركيه وعائله باكستانيه وكلهم محجبات استحيت اصور ..
نسيت اقولكم الحساب كله مايتجاوز 1000 ليره .. والله ان نص الاكل اخذناه معانا من كثره ..
امنى لكم زياره موفقه ..