بريطانيا المسافرون العرب

أكتشف العالم بين يديك المسافرون العرب أكبر موقع سياحي في الخليج و الوطن العربي ، يحتوى على أكبر محتوى سياحي 350 ألف استفسار و نصائح عن السفر و السياحة, 50 ألف تقرير سياحي للمسافرون العرب حول العالم و أكثر من 50 ألف من الاماكن السياحية و انشطة وفعاليات سياحية ومراكز تسوق وفنادق، المسافرون العرب هو دليل المسافر العربي قبل السفر و اثناء الرحلة. artravelers.com ..
almgwar
09-06-2022 - 11:49 pm
  1. مقدمة

  2. المواصلات

  3. السكن

  4. الدراهم

  5. التسوق

  6. اماكن لازم تروح لها

  7. الانقليز


مقدمة

مدينة لندن مدينة عريقة وقديمة وتعتبر من اكثر المدن العالمية جذبا للسياح كما انها تعتبر مركز العالم الاقتصادي ومايميز لندن انها تجمع الكثير من الثقافات ففيها الثقافة الانجليزية ( احلف) وكذلك الاوربية والصينية والهندية والافريقية وطبعا العربية

المواصلات

ازين وسيلة للمواصلات هي التكاسي بالنسبة للمشاوير القصيرة والتكسي عندهم مريح ومالين الشوارع وتكاسيهم ماتشتغل الا عالعداد وعدادهم اقشر يحسب المسافة والوقت مع بعض يعني لو عطلك بطريقك تفتيش بتقعد بها وفيه وسيلة ثانية عملية ورخيصة جدا وتصلح اذا كنت رايح مع شباب وهي الاندرقراوند(قطار الانفاق) وهي اول مرة بتصير صعبة لان خطوط السير مختلفة يعني الضيعة اول مرة فيك فيك وبالنسبة للعائلات الكبيرة انصح باستئجار سيارة كبيرة ( ميني فان وسعرها تقريبا 120 باوند مع السواق فاليوم) لان التكسي مايشيل اكثر من خمس اشخاص ... واذا كان عندك مشوار طويل ( مثل المطار والا خارج لندن) فانصح التعاقد مع مكتب ميني كاب والدفع يكون له بمبلغ مقطوع وهو ارخص من التكسي الاسود ... وبالنسبة للسفر بالطيارة من لندن فافضل شي انك تحجز على الرحلات اللي تطلع من مطار هيثرو وما انصح بمطار قاتويك والا لوتون ( مع ان اسعار التذاكر ارخص) لانك بتدفع الفرق بالمشاوير والغثاء

السكن

السكن بالفنادق الخمس نجوم غالية بالحيل وتتراوح الاسعار من 150 الى 300 باوند بالليلة واذا كنتوا شباب فانصح بالفنادق الثلاث نجوم والا الموتيلات او يسمونها بالبيد اند بريكفاست صح انها ميب زي الفنادق الخمس نجوم بس تمشي حالها وآمنة خصوصا ان الفندق ماتقعد فيه الاوقت النوم بس فماتفرق وان كانك مستحي تقول اسم الفندق اذا احد سألك وين ساكن قل اني ساكن مع اهلي بشقة ابوي وافضل الفنادق خمس نجوم او اربع هي : الريتز والقروفنرهاوس والدورشيستر وتشرشل وبارك لين هيلتون ورويال لانكستر وثيستل ماربل ارش والكمبرلاند
والشقق المفروشة تعتمد حسب الموقع (في بعض المواقع سعر الشقة بين 1800 الى 5000 باوند بالاسبوع) ) لكن فيه شقق اسعارها معقولة بس بعيده شوي عن مجمعة العرب
افضل مناطق السكن هي المايفير وبارك لين وماربل آرش والنايتسبريدج
ولاانصح بالسكن في ادجوارود او الكوينز واي خصوصا للعائلات لانها مليانة عصابات اكراد
نسيت اقول ان الكثير من فنادق لندن وشققها المفروشة مافيها مكيف واذا احتريت انقز لارقوس ( انظر ارقوس فالتسوق) واشتر لك مروحة قعادي
المساجد
فيه مسجد كبير جنب الريجنت بارك يصلون فيه كل الصلاوات ... ويوم الجمعة تقدر تصلي فمقر السفارة بكيرزن ستريت

الدراهم

عملة بريطانيا هي الباوند وتعادل 6.2 ريال تقريبا ... وافضل وسيلة لحمل الدراهم هي الشيكات السياحية وافضلها توماس كوك وخذها بالباوند ازين علشان ترتاح من فرق العملة ... وللمشتريات انصح باستخدام بطاقات الائتمان
واذا بتشيل معك كاش فانصح انك تشتري باوندات او دولارات من السعودية ولا تجيب معك ريالات لانهم بيسرقونك بفرق العملة

التسوق

تعتبر مدينة لندن مدينة التسوق بلامنازع واشهر اسواقها الهارودز والسيلفريدج وبوند ستريت وسلون ستريت بالاضافة الى اكبر شارع تسوق فالعالم اللي هو اكسفورد ستريت واسعار البضايع خصوصا الماركات ارخص من الاسعار بالسعودية
وفيه اسواق شعبية مثل شبرد بوش وسوق الاحد لكن بضاعتها ردية ( اردى من سوق حجاب )
ايه نسيت محل ارقوس حبيب الشعب وهو محل للتسوق عن طريق الكتالوج يعني تشوف الكتالوج اللي فيه كل التفاصيل عن البضايع والاسعار وتروح المحل وتكتب رقم البضاعة حسب الكتالوج وتدفع قيمتها وتستلمها من كاونتر خاص بالتسليم والمحل فيه كل شي من الابرة للثلاجة وميزته ان الاسعار متفاوته يعني التلفزيون مثلا تلاقي بمية باوند وتلاقي بالفين باوند ولهم محل بادجوارود
الاكل
مثل ماقلت بالمقدمة لندن خليط الثقافات وبما ان الطعام جزء من الثقافة فلندن خليط من المطاعم ( فهمتوا شي؟ )
افضل المطاعم العربية هي مطعم فخر الدين بالبكاديلي ومروش بادجوارود وفيه مطعم ايراني كويس بادجوارود والمطاعم الصينية ازينها فسوهو لكن خطرة بالليل يعني للغداء بس
وفيه مجموعة من المقاهي والمطاعم الايطالية في النايتسبريدج ( والله من الغزلّي )قدام الهارودز .
والمطاعم السريعة فيه بيتزا هت وماكدونالد وبرقر كنق وتلاقونها في كل عاير
واللي رايح مع اهله والا شباب وماخذين شقه انصحهم بالطبخ بالبيت واغراض الطبخ كلها متوفرة بالادجوارود وفيه محل كبير اسمه الوادي الاخضر ( موب حق اشرطة عيسى الاحسائي ) بشارع اسمه آبر بيركلي ستريت فيه كل شي ولحم ودجاج ذبح اسلامي نظيف واسعاره زوينة .
التلفونات
انصحك ماتاخذ معك شريحة السعودية( بس جب معك جهازك) لانها غثاء وقلق واول ماتوصل خذ لك شريحة بريطانية ( فودافون افضل شركة)
وعب رصيدها وارسل رسالة برقمك لاهلك واللي يهمونك .
وللاتصالات الدولية فيه كروت خاصة ورخيصة جدا بحيث يوصل سعر الدقيقة للرياض لاقل من ريال

اماكن لازم تروح لها

شارع الادجوارود : هالشارع لادخلته كنك داخل الرياض او القاهرة محلات ومطاعم كلها عربية فيه قهاوي للشاي والمعسل وفيه محلات بها مجلات وجرايد واشرطة حتى شريط عزازي تلاقيه هناك ( تراي جاد) وفيه حلاقين عراقيين ولبنانيين كويسين هناك ويحلقون ويحددون الدقن ( الحلاقين الاجانب مايطيعون يحلقون لك الدقن لانه ممنوع)
متحف الشمع : ويقع في مارلبون ستريت وفيه تماثيل من الشمع لشخصيات مشهورة عالمية وعربية .
حديقة الهايدبارك : وهي اشهر حديقة بلندن وفيها ركن الخطابة المشهور ولك الحق ان تقول اللي تبي ولا همك احد لكن من حق اي واحد يمنعك انك تصوره ... ويقام الركن كل يوم احد من العصر لليل .
ساعة بق بن وعين لندن والبرلمان وبيت رئيس الوزراء : ماقد رحت لها لكن اسمع بها واشوفها من بعيد
التروكاديرو: مجمع للالعاب الالكترونية وفيه بولينق وسيارت تصادم .... زين للبزارين

الانقليز

الانقليز بطبعهم ثقيلين دم وشعب بخيل بالحيل لكن شعب مؤدب ولايغلط عليك و صادق ولا يكذبون واجد وعمليين جدا وملتزمين بالنظام بشكل عجيب ولا اذكر اني قد شفت انقليزي يقطع اشارة او يذب له قوطي او حتى منديل بالشارع مثل مايسوي ربعنا ولا اذكر اني شفت حادث سيارات الا نادراً وهذا بسبب التزامهم بتعليمات المرور ... لكن لازم تصير حذر معهم وتكون كلمة بليز وسوري واكسيوزمي وثانكيو دايم على لسانك لاحاكيتهم وعاملهم باحترام كبير والا يحتقرونك ولا يعطونك فيس وهناك تاخذ راحتك عالاخر ولا احد يسألك وين رايح؟ والا فين تشتغل ؟ وسنه كاملة محد سألني وين اثباتك؟ دامك ماشي بالسليم ولا تغلط على


التعليقات (3)
درجة أعمال
درجة أعمال
ههه
حلوة و المعلومات مع أنها سطحية و مختصرة بس جيدة مع عدم موافقتي على بعضها ...........
تحياتي

f.e.a
f.e.a
حبيت ارجعلكم موضوع قديم
خ

alkuwaity
alkuwaity
بعض المعلومات حلوه والبعض مبالغ فيه بارك االله فيك اخوي


خصم يصل إلى 25%