جولة فالهايد بارك
للي مازار لندن ويتسائل شلون شكل هالحديقه اللي كل سياح لندن يتكلمون عنها
للى راح لندن ووده يسترجع الذكريات
حاولت بهذي الصور اني انقلكم في جوله لقلب الهايد بارك
اولا
اذا كنت في Oxford Street
وانهكك السوق
او بدت المحلات تسكر ابوابها فأول الخيارات لقضاء باقي اليوم جولة فالهايد بارك لحين وقت العشى
فالداخل من ال Subway
اسهل الطرق للوصول للبارك
(مع اني كنت اتواحش واحس في اي لحظه احد بييني وبيسحب شنطتي!)
بيطلع وبيتمشى درب ليس قصير للوصول للبحيره ..
والاشجار اشكال او الوان .. كل جذع ماشاءلله اكبر من الثاني
فهالطريج .. بتشوف الناس كلن يقوم برياضه
والناس فهالجمله اقصد فيهم الانجليز او الاجانب فقط .. وعلى الرغم من كثرة الخليجين في لندن نادر اللي تشوف احد قاعد يستفيد من وقته
ويمارس اي رياضه ..
اهم .. منهم اللي يركض
واللي يتمشى بالدراجه الهوائيه
او بالرولر بليد (الحذاء المزود بالعجلات)
او حتى يمشي على اقدامه
مجموعات تلعب كره
وناس نايمين
وغيرهم الله يستر عليهم!
المهم
مايكون الهايد بارك .. هايد بارك! ولاتكون لندن لندن اذا ماشفت الاخوان
وطبعا اللي ظاهرين فالصوره الاصيلين او اغلب الظن يكونون سياح .. اما بعض الهنود اللي عايشين في بريطانيا
لما تسأله انت من وين يرد عليك انه بريطاني .. ويحسسك انك اذا قلت عنه هندي كأنك سابه
على الرغم من انهم من اكثر الشعوب اللي عندهم اعتزاز بوطنيتهم لكن صادني اكثر من موقف اثبت لي هالنقطه!
والغريب ايضا انه البريطانيين معروفين انهم شعب عنصري! .. فشلون اقدرو الهنود ينصهرون معاهم بهالصوره
اللي حتى شعلة الاولومبيات تسلمت لطفله هنديه تمثيلا لبريطانيا!
بعكس هنود امريكا .. ودودين وخدومين ودايما يسألون الناس انتو من وين ويفرحون لما يعرفونهم بأصلهم وانهم من الهند
المهم نرجع للهايد بارك
هالبنت كانت تلعب Hide And Seek
هالولد عجبني فيه اصراره .. جدامي في اقل من 10 دقايق طاح اكثر من 4 طيحات متتاليه
وفي كل مره يقوم يوقف ويكمل ويسوي حركات استعراضيه بعد ويطيح مع كل حركه ويستمر ..
مصر والاصرار اهوا اللي يعلم الانسان
كان ودي اصور طيحاته لكني احتراما له خصوصا انه لاحظ كاميرتي وقعد يستعرض لها فكسر خاطري
وفي العاب حلوه للاطفال ..
Typical British Old People
لو ماكان السبت جان قلت اكيد توهم طالعين من اشغالهم .. لكن بعدين طلعو يايين بس يتمشون
كل واحد في ابهى حله ..كنت بلتقط صوره لزوجين في عمرهم خليجيين بعد كانو
Cute لكن طبعا ماقدرت احتراما لهم
لانهم اكيد مابيرضون اني اعرض صورتهم ..
وفي كبلز (ثنائي إن صحت الكلمه) خليجيين ثانيين .. كان ودي احط صورتهم بس تحفظت احتراما لعيون المشاهد
مع انه واضح من شكلهم انهم كانو يبون الكل يطالعهم فكنت بحقق لهم امنيه بوصولهم لصفحات الانترنت لكن يالله على الله العوض
نرجع للهايد بارك
يلعبون بالطبق الطائر

• ملاحظه للي خاطره يلعب هاللعبه لاتلعبون قرب الاشجار

شفت اثنين يلعبون وعلق صحنهم الطائر بين الشجر .. وستخدمو مكرم القارئ حذائهم وعلق هو الاخر!
ماعرف صاحب الحذاء شلون رجع البيت يومها!
هالطفل كان يتسلق الشجره .. ماقدرت اخذ صوره واضحه لأني اولا كنت مستعجله ..
ثانيا عائلته كانت قاعده وخفت يهاووشوني
كان للقراء حظور فالهايد بارك
وللمصوريين حضور ..
وللخليجين الحضور الاكبر
كراسي الهايد بارك ..
الكراسي البيضه المخططه بالاخضر .. من اشهر الكراسي لانه اغلب زوار الهايد بارك لازم يلتقطون لانفسهم صوره على هالكرسي
الكراسي موزعه في مساحات كبيره من الحديقه
الزائر يلتقط كرسي ويقعد عليه وبعد مده من الوقت ايونه اشخاص ياخذون منه نقود قرابة الباوند ونص
كسعر للكرسي .. مرتين رحت الحديقه وقعدت مايقارب الساعه او نص وقمت ولااحد خذ مني اي مبلغ
لكن في احيان اخرى ياخذون ..
قوارب الهايد بارك
تأجر القوارب الزرق المنتشره في بحيرة الهايد بارك ب باوند للكبار 6 ولاطفال 2 لمدة نص ساعه
تقاد مثل قيادة الدراجه الهوائيه تقريبا ..
يعطونك وقت محدد تتجول في انحاء البحيره على راحتك فيه ..
لكن للي يتعدى الوقت في طراد مخصص اييك عشان يناديك ..
سمعت حوادث كثيره وشهدت حادثه بعيني وللاسف ماكانت كاميرتي معاي لكثير من الناس اللي يطيحون فالبحيره واهما يحاولون ينتقلون من قارب للثاني
او يستعرضون
او واهما نازلين في ابهى حلتهم!
في مياه البحيره الخضراء نسبياً
ومايكون الهايد بارك بدون اما ايس كريم لندن فالحر
او
The hot chocolate
الشوكليت الساخنه لين غابة الشمس وبرد الجو
ومن احلى البرامج اللي احب اسويها فالهايد بارك اطعام البط ..
عادتا قبل مانيي نمر لأي سوبر ماركت على الطريج ونشتري خبز ونييبه عشان نطعمهم ..
ويتجمعون البطات والاوز والحمام بشكل جميل
في نهاية هاليوم طلعت من بوابه غير اللي دخلت منها البوابه اللي تنقلني لي النايتس بريدج
كانت المناظر فهالطريج رائعه ..
نصيحه اختتم فيها جولتي
استمتعو تمشو ولايهمكم احد ..
اخذو اكلكم ودلتكم او فرشو بساط فالارض وقعدا
الPicnic مرتبه
فالHyde Park
متعه ..
واتمنى انكم استمتعو فالجوله وفي اول تقاريري في بوابة لندن
ملاحظه: الصور من تصويري الشخصي تعمدت ماأحط توقيعي عشان ماشوه الفكره .. الرجاء عدم استخدامها بدون اذن
تمنيت الصور كلها تكون بالحجم الكبير لكن للأسف واجهتني مشاكل تقنيه