بانكوك المسافرون العرب

أكتشف العالم بين يديك المسافرون العرب أكبر موقع سياحي في الخليج و الوطن العربي ، يحتوى على أكبر محتوى سياحي 350 ألف استفسار و نصائح عن السفر و السياحة, 50 ألف تقرير سياحي للمسافرون العرب حول العالم و أكثر من 50 ألف من الاماكن السياحية و انشطة وفعاليات سياحية ومراكز تسوق وفنادق، المسافرون العرب هو دليل المسافر العربي قبل السفر و اثناء الرحلة. artravelers.com ..
الماسة السوداء
04-12-2022 - 03:41 am
  1. الزبده صرنا جماعه جنا رايحين كشته

  2. الرحله الي كان مقرر لها

  3. بعدها انطلقنا بالباص لدريم وورلد


السلام عليكم ورحمه الله وبركاته
اعزائي اعضاء هذا المنتدى الرائع
احب اقدم لكم تقريري عن سفرتي هالصيف لتايلند كعربون شكر لكم بعد ماساعدني هالمنتدى وساعدتني تقاريركم لمعرف الكثير عن هالبلد الرائع
في البدايه كنا محتارين بخصوص الوجهه وبعد ماافترينا على الكثير من مكاتب السياحه حصلنا عرض مايتفوت طبعا بعد غلاء اسعار التذاكر والحجوزات بالنسبه للعام الي طاف
قمنا بالحجز على طول حقي وحق بعلي العزيز وحق شنقل ومنقل (عيالي الاعزاء)
بعدها بيوم قام الوالد بالحجز معانا حقه وحق الوالده وخواتي الثنتين واخوي وسحبو معاهم بنت اختي الثالثه
وبعدها بجم يوم لحقونا بالحجز بنت عمتي وريلها وولدها الصغنون

الزبده صرنا جماعه جنا رايحين كشته

الرحله الي كان مقرر لها

بانكوك ليلتين وبعدها ناخذ طياره( طيران اسيا) على شنقماي 3 ليالي ونرد ناخذ طياره لبانكوك ومنها على طول نبدل طياره لبوكيت نقعد فيها 5 ليالي وبعدها نرد بانكوك وناخذ سياره 4 ساعات لي هواهن نقعد فيها ليلتين وبعدها نرد لبانكوك 4 ليالي حق التسوق
صباح يوم الاحد او بالاحرى من غبشه كنا مرتزين في المطار الساعه 3 الفير

فديت ديرتنا الي بلا لون

اول ماوصلنا المطار كانت الساعه 7 عندهم خذنا لنا 2 فان لنا وحق شناطنا من المطار واسعارهم كانت زينه

وعلى طول الفندق
سكنا في بايوك سكاي الفندق نظيف ومرتب وتقريبا يم اغلب المجمعات والسوق الليلي
وهذي غرفتنا

طبعا من التعب بس نزلنا اغراضنا وتعشينا ورحنا مكتب يم الفندق مال تورز حق نرتب كشته لثاني يوم
وتفقنا على دريم وورلد
ثاني يوم من الصبح رحنا نتريق في البوفيه والحلو ان مطعمهم في الطابق ال77 يعني تجوفون الديره من تحتكم اشحلاتها

بعدها انطلقنا بالباص لدريم وورلد

" >
العايله السعيده

بالنسبه لنا خذنا الرحله بالغدا مادرينا ان اكلهم ماينأكل جوفو وتلوعو

بعدها دخلنا في الثلج وكان وناسه بس بنتي الله يهداها مطلعه سيقانها وماتت من البرد ماخلتنا نستمتع اكثر

الحديقه عموما تونس حق الكبار والصغار يعني قعدنا فيها من 9 الصبح لي 5 العصر
وفيها حركات حلوة حق التصوير

هذي المجسم دليل لوجود حمام عزكم الله

طبعا وصلنا الفندق بعدها تعابه ولبنا شأرنا على السوق الليلي على قوله اخوانا المصريين
عيز خيل ابوي
تابعوني لتكملت الرحله لشنغماي

اول جزء


التعليقات (9)
شموعه
شموعه
واو :x1::x1:تقريرشكلو حلو من اولو
الحمدالله على السلامه ويارب تكونو استانستو كثير وتقريرك جا بوقته بسافر بشهر اكتوبر بأذن الله فايليت
تشرحين بالتفصيل وايش المحاسن والمساؤي بعد وكيف كان وضع الاطفال متعب ولا عادي واعتبريني اول المتابعين يسعدكم

فارس الشرق55
فارس الشرق55
الف حمد الله على السلامه-- ان شاء الله تكونو استانستو - تقبلي تحياتي

الماسة السوداء
الماسة السوداء
ثاني يوم انطلقنا لمطار بانكوك
متجهين لشنغماي على طيران اسيا

سكنه في فندق رويال برنسس
الفندق نظيف ومرتب واحلا مافيه ان السوق الليلي تحتنا على طول

طبعا من الاشياء الي المفروض ماتطوفونها في تايلند المساج
اسعارهم رخيصه بالنسبه حق صالوناتنا وتلقاهم منثرين بكل داعوس
وكل يوم بعد مانتسوق ونرقد الياهال ننزل ونصطف كلنا حق المساج

ثاني يوم رحنا سفاري

منها عروض للفيله ويراوونكم شلون الفيل يرسم

وكان من ضمن البرنامج ركوب البامبو
بس نزل علينا مطر وكلنا تحت مظله وحده>>يعني وجود المظله وعدمها واحد

بعد ماتبللنا من الزين توجهنا لحديقه الزهور

وبعدين عروض القرده

طبعا هالبرنامج كله بيوم واحد من الصبح لي المغرب
كانت في برامج ثانيه بس الوالد ماتشجع لها مثل الشلالات لانها تبعد مسافه 3ساعات او اكثر بالسياره فتكيسل الدرب
ومنها طحنا يومين تسوق ومساج في شنغماي
وبعد انتهاء المده توجهنا للمطار للرجوع لمطار بانكوك ومنها ناخذ طياره لبوكيت

عندي تعليق على هالطيران اهو افضل شركات الطيران داخلي بس كلش مايهتمون بالشنط يعني على كثر تنقلاتنا كسرو شناطنا وصارو مايسوون كلش ملش واغلبنا في رجعتنا قطيناهم وخذنا شنط يدد من هناك

واخيرا بوكيت المنطقه حلوة وتينن

سكنا في فندق ديفانا باتونق
اهو بعيد عن البيج شوي بس المكان حلو مثل الشاليهات

الصراحه اكثر المناطق الي عجبتنا في تايلند بوكيت الطبيعه عندها اتينن والبحر والجزر واو
نزلنا مكتب تورز وحجزنا على بي بي ايلاند
خذنا سبيد بوت لكن الله لايراويكم اشسوا فينا هالبوت
كل مامشينا شوي بندت مكينه شوي الا مكينتين الدرب الي ياخذ ساعه خذناه في ساعتين وشي
والي دار راسه والي قام يرجع من وقفت البوت نص البحر الصراحه برنامج خ
بدايه الانطلاق والكل مستانس
بعدها بشوي الكل سايح ومعفس ويهه خ

تابعوني

ameri44
ameri44
الحمدلله على سلامتج وبانتظار باقي التقرير
أنا مسافر بعد يومين لتايلاند نبي نشوف باقي التقرير عشان نستفيد مثل ما استفدنا من باقي أعضاء المنتدى

الماسة السوداء
الماسة السوداء
بالنسبه حق الوضع هناك الديره حلوة ونظيفه بس الاكل اهو الشي الوحيد الي توهقنا فيه
اكلهم كلش ماينأكل يعني ريحه بروحها تييب لج القلابه بما بالج بأكله استغفر الله مادري شلون ياكلونه
اما الاطفال استانسو بس كان تعب لنا خصوصا حزت السوق بسرعه يتعبون ويحنون يعني لو يصير اني اعيد الكره مره ثانيه اروح بروحي من زوجي من غير عيالي
فارس الشرق
الحمدلله كانت رحله موفقه وتسلم على المتابعه

الماسة السوداء
الماسة السوداء
اميري
ابشر ان شاء الله ماتروح الا مخلصه التقرير

mzen2100
mzen2100
تحياتي اختي الكريمه سوف اتابع تقريرك حتى النهاية
اخوك ابو بدر

بانكوكي_2
بانكوكي_2
الله يعطيج ألف عافية .. تقرير من بدايته رائع و مميز .. تصوير أيضاً مميز .. تسلم إيدج .. بإنتظار باقي التقرير .. ..
أخوج .. " بويعقوب " .. ..

د. المخوضر
د. المخوضر
الحمدلله على السلامة
ومتابعين للتقرير الحلو والصور الاحلى


خصم يصل إلى 25%