الكويت المسافرون العرب

أكتشف العالم بين يديك المسافرون العرب أكبر موقع سياحي في الخليج و الوطن العربي ، يحتوى على أكبر محتوى سياحي 350 ألف استفسار و نصائح عن السفر و السياحة, 50 ألف تقرير سياحي للمسافرون العرب حول العالم و أكثر من 50 ألف من الاماكن السياحية و انشطة وفعاليات سياحية ومراكز تسوق وفنادق، المسافرون العرب هو دليل المسافر العربي قبل السفر و اثناء الرحلة. artravelers.com ..
اموت بالسفر
27-03-2022 - 01:42 pm
.... هلا وغلا بك ومرحبتين وسهلا ... كيفك وشلونك وش اخبارك ان شاء الله تكون بخير يارب ...
انا ناوي ازور معرض الكويت 23 نوفمبر 2004 وبصراحه انتهزها فرصه ازور الكويت الشقيقة والحبيبه لاني بصراحة ولو زعلت علي ماسبق لي اني زرتها .... طبعا يمكن اكون لوحدي حتى الان ابي طول الله عمرك التالي :
1- احجز طيران على يوم الثلاثاء 23 نوفمبر ( طبعا انا طالب بكالوريس) فأبعتذر من الدكاتره ليوم الاربعاء ( وأبجرب الخطوط الكويتيه اذا فيه رحلة ).
2- ابي احجز فندق كذا حلو يكون في الستي سنتر عشان مااتعب من التكاسي ويكون قريب من المعرض .
3- بالنسبة ابي وصف للمعرض ( الموقع).
4- بالنسبة لأسعار الفنادق اسمع انها غالية حبيتين .
5- كيف الجو عندكم في الفترة هذي اكيد منتو بعيدين عن جونا لكن اخذ معاي صيفي او شتوي.
6- بالنسبة للأماكن اللي تنصحوني ازورها ( بشرط ماتكون كثيره ) .
وأخيرا الله يوفق كل من ساعدني او قرا كتابتي ومشكورين وماقصرتوا وفديت والله اخواني الكواتا كلهم ...:d


التعليقات (9)
اموت بالسفر
اموت بالسفر
وين الشباب مافيه احد ( نعذركم رمضان وعبادة ) عموما لاتطولون علينا ومشكورين

آخر الفرسان
آخر الفرسان
الباحثة ماتقصر ان شاء الله هي صاحبة الخبرة والاختصاص وان شاء الله تفيدك

kuwait2world
kuwait2world
اول شي ياهلا ويامرحبا فيك بديرتك الثانيه
1- ماانصحك بالكويتيه بس المشكله وين بتنحاش منها للسعوديه زيد اخو عبيد
2- بالنسبه للفنادق ادخل الصفحه هذي واكتب في خانة النشاط ( فنادق ) راح تطلع لك اغلب الفنادق غاليها ورخيصها مع تلفوناتها ومواقعها :
http://www.ekyp.com/a-index.aspx
واذا تبي فنادق في الستي سنتر العاصمه لاتبعد عن شارع فهد السالم والسالميه لاتبعد عن شارع سالم المبارك وانصحك بفندق السالميه بلازا بشارع السوق وتحته مركز تجاري.
3- بالنسبه للمعرض اذا انت تقصد ارض المعارض ارض المعارض بعيده عن السالميه شوي يعني يبيلك تاكسي ولايوجد فندق قريب منها واهي تقع بالقرب من منطقة مشرف وعلي الدائري السادس .
4- اسعار الفنادق غاليه حبتين نفس ماسمعت وهذا عيب الفنادق بالكويت.
5- اما عن الجو عندنا صيفي بس يوم عن يوم يتحسن وانصحك اذا زيارتك هالاسبوع خذ صيفي معاك.
6- بالنسبه للاماكن اللي ننصحك فيها ادخل المقالات اللي تتكلم عن الكويت وانت راح تتعرف علي اماكن كثيره ممكن تختار حسب اهتماماتك.
أتمني اني اكون فدتك بشي وعلي العموم حلوه الكواتا...:P

الباحثة
الباحثة

السلام عليكم ورحمة الله وبركاته
حياك الله أخي أموت بالسفر بالكويت ويا هلا ومرحبا فيك في بلدك الثاني .
وما قصرت .
و الحمد لله أخوي امير الظلام أخوي kuwait2world سبقني وما ما قصر و جزاه الله خير كفا ووفا بارك الله فيه وفيكم .
بالنسبة للكويتية جرب لأنها ساعات تضبط وتصير تمام خصوصا انه الرحله قصيره ..
اقرب الفنادق لأرض المعارض اذا كنت تقصد ارض المعارض الدوليه بمشرف فهو فندق كراون بلازا ..
بالفروانيه واعتقد اسعاره اخف من غيره .. وميزته انه قريب من المطار و ايضا حواليه سوق الفروانيه
ان حبيبت تتسوق ..وايضا من السهوله الوصول لباقي الاسواق مثل السالمية والعاصمه عبر الخطوط السريعه و التاكسي ما يقصر ..
وايضا هناك فندق ساس وريجنسي والمسيله / خط واحد منهم لأرض المعارض ..
بالنسبه للجو ما زال صيفي وان كان يبرد شوي بالليل , فاحترازا خذ لك ثوب واحد خريفي لمواجهة اي طارىء ..
وبالنسبة للأماكن فمثل ما أشار عليك أخوي kuwait2world يا ريت تدخل على المواضيع وعندك موضوع مثبت عن دولة الكويت ..كي تطلع على الاماكن الي تفضلها سواء اسواق أو اماكن ترفيهيه او متاحف على فكره لا تطوف( المركز العلمي بالسالمية )
وان شاء الله تستمتع فيه وبالكويت كلها وحياك الله مره ثانية ..
تحياتي ..............

اموت بالسفر
اموت بالسفر
ياهلا والله وسهلا بكم ومعليش اتعبتكم انتم والله تاج راسي وماقصرتوا ( يلوموني في حب الكواتا ) هذا وانا مابعد زرت ديرتكم اجل لو زرتها وش ابسوي (ههه) هاه يا kuwait2world وش رايك ب(كواتا ) حلوه
وماقصرتي يالباحثة تصدقين عاد دائما في ردودك للاخوان والاخوات تشفين الغليل وتخلين الواحد مستانس ومنبسط ...
تحياتي لكم وان شاء الله اكتب لكم قريب اني راح اكون بالكويت بكره اوبعد بكره ( باجر او بعد باجر ) ههه اشوفك ياkuwait2world تتحرش في خطوطنا السعوديه وش فيها تراني ازعل (ههه)

اموت بالسفر
اموت بالسفر
اخوي kuwait2world رابط الفنادق مافيه الا اربعة او خمسة فنادق بس شنو الحل ( ابي معلومات عن الرجينسي وعن فندق السالمية بلازا وعن فندق كراون بلازا بالفروانية وعن اسعارها لو سمحتوا) مابي اثقل عليكم

الباحثة
الباحثة

حياك الله أخوي أموت بالسفر وجزاك الله خير على هالمشاعر الطيبة
وما أدينا الا الحق الواجب تجاه أهلنا
و إن شاء الله تزور الكويت وتنبسط فيها وتكرر الزيارات ..
وتفضل على هالموقع و إن شاء تجد كل الي طلبته بخصوص الفنادق
وإن رغبت بأي سؤال فلا تتردد وإن شاء الكل لن يقصر والاخوان ما شاء الله تبارك الله شقردية ..
فنادق الكويت http://www.kuwaithotels.info/kh/hotels.asp
تحياتي ..........

اموت بالسفر
اموت بالسفر
اختي الباحثة مايصير كذا انتي تحرجيني بأخلاقك وتعاملك الله يرزقني زوجة مثل طيبتك يارب ...

اموت بالسفر
اموت بالسفر
أبسأل بالنسبة للسيارة تنصحوني استأجر او بالتكسي ( وكم سعر السيارة لليوم الواحد ) طبعا اللي اعرف ان 10 دينار كويتي يعادل بالسعودي تقريبا 120


خصم يصل إلى 25%