انترلاكن
آآآآآآآآآه ياجنة الله في أرضه
كان وصولنا لها عن طريق القطار من محطه Gare de lyon باريس واستمرت الرحله ست ساعات
خلالها تم تغيير القطار في مدينه بيرن السويسريه ومن بيرن لانترلاكن اخذ الطريق تقريبا ساعه .
هذا القطار من بيرن لانترلاكن .. حصلت لنا فيه قصه سخيفه وهي اننا لما لما ركبنا القطار
بعد ركض في محطه بيرن نتيجه لتأخر قطار باريس-بيرن ركبنا القطار وانفاسنا تكاد تنقطع ! ركبنا
وكل واحد فينا كان يسمع صوت نفس الاخر من تعب الركض ,, بعد 10 دقايق قالوا التذاكر .. طلعت التذاكر
الا واثرها مجرد حجز مش تذكره تخيلوا !!! فكانت معي تذاكر ثانيه تبع جنيف وكانت مضبوطه
اما من بيرن لانترلاكن فكانت حجزفقط واعتقد انه المكتب اللي في الرياض قالنا اذا رحتوا بيرن
قصوا التذاكر واحنا نسينا ! المهم كانت اشكالنا مره مالها داعي فقلت له اذا دفعنا ينحل الموضوع
قال ايه فدفعنا .. بس من جد كنت متضايقه لاني كنت اظن ان التذاكر كامله .
وصلنا انترلاكن على وقت العصر عملنا التشك ان في فندق كريستال .. كان مستواه متواضع
وقديم الا ان الغرفه اللي نزلنا فيها مرتبه ونظيفه .
وهذي صوره من البلكونه
المهم كنا ميتين جوع طلعنا من الفندق ف لقينا بجنبنا Migros
فكان فيه مطعم حلو ويقدم كل يوم بوفيه بتشكيله مختلفه فطبينا فيه واكلنا لين شبعنا
بعد كذا رحنا نكتشف المنطقه وفعلا شي خيالي .. الطبيعه والجو مو معقول
انترلاكن يكفيها ساعتين او بالكثير 3 ساعات عشان تلفها كلها بس سبحان الله
تحس فيها بسعاده وراحة بال لاتوصف .
لايفوتكم الثلج
اذا بتكلم عن أهلها فهم مره طيبين وحبيبين ومحترمين في تعاملهم وحتى لباسهم .
طبعا اغلبها سيّاح من مختلف الدول وهذا اللي يعطيها نكهه وتحس انه اهلها يبون يطلعون
بأحلى صوره .
بالنسبه للاوتيلات في انترلاكن معظمها تقريبا مافيها مكيفات ماعدا واحد او اثنين نظرا
لبروده الجو و بالاضافه لوجود المطاعم والمقاهي والمحلات
الخاصه بالهدايا والتذكارات والشوكولاته واكيد الساعات والشنط
يم يم شوكو
قلوب
هذي المكتبه فيها اشياء حلوه
هذا المحل غني عن التعريف .. حبيب ابو عزيز
اخذت منه مكسرات هنديه وشاهي .
للاسف مده اقامتنا فيها يومين
اول يوم قمنا بالاكتشاف والتجول والاستمتاع بالجو والطبيعه
ورحنا حجزنا قطار لجنيف .
اليوم الثاني فطرنا بسرعه وكان فطور الفندق بسيط بس حلو ..
بعد الفطور طلعنا نتمشى وحجزنا 3 تذاكر لرحله لبحيره ثون كانت
قيمتها 55 يورو للشخص استمرت 5 ساعات
مره مره انبسطنا فيها وكنا كل شوي نوقف في احد القرى الصغيره
على ضفاف البحيره وفي ناس ينزلون وناس يطلعون والجو كان خيالي
لو اقعد سنه اوصف ماقدرت مااقول الا سبحانك ربي مااعظمك
طبعا على متن الباخره هذه في مطعم وكفي شوب فكان لابد من تقطيع
الوقت بشرب شي الى جانب التصوير
وصلنا ثون وقالوا لنا نص ساعه وانتوا هنا عشان نرجع وهم قالوا والا ماقالوا
ماتشوفون الا غبارنا كلن يجري اللي يصور واللي يكتشف المنطقه هذي واللي
راح يشتري له اكل ههه بسرعه دخلنا Manor وشرينا اكل وعصيرات واخذنا لنا
كم صوره ورجعنا جري .
بعد كذا كملنا تمشيه لين تعبنا ورجعنا الفندق
وفي اليوم الثالث كانت رحلتنا لجنيف بس كانت
على الساعه 11 الظهر فاستغلينا الوقت الصبح ورحنا للمطل الزحليقه بجنب محطه انترلاكن الغربيه
وكانت خمس دقائق من الفندق .. استنينا العجوز تفتح كشك التذاكر واخذنا 3 تذاكر اعتقد كان
سعر التذكره10 يورو
اما انك تروح للمطل عن طريق الزلاجه ! او بعربه متحركه .. طبعا اختي كانت صاجتنا تبي ترروح
للمطل بالزلاجه خاصه وانه مافي وقت نروح ( اليونفروا) بس هي شافت الجد وطقتها ام الركب
شوفوا صوره الزلاجه
وهنا العربه
ياانا والوالد متنا عليها ضحك عجزت لاتطلع من العربه الا بشق الانفس ههه
المهم طلعنا للمطل وكان يطل على انترلاكن كلهاا بمافيها بحيرتي ثون وبيرنز مره الجو وقتها كان
حلو وهذي لقطات من اعلى المطل حيث يوجد مطعم ومحل والعاب اطفال .
طبعا خلصت رحلتنا هذه على عشر ونص الصبح وعقبها جري على الاوتيل عملنا التشك اوت وطلعنا
بسرعه لمحطه القطار . وكان توجهنا لجنيف زي ماذكرت .. الطريق كان حلو استغرق 3 ساعات وشوي
وكانت المناظرالطبيعيه بمافيها البحيرات والاكواخ والابقار خياليه .
والله ان الصور ولاشي ولاتعبر عن روعة ابداع خلق ربي .
ودعنا انترلاكن بحسره على فراقها وبشغف لزياره جنيف .

• همسة :

شكرا من القلب لابو عزيز وكل الرائعين هنا
نراكم في جنيف