- وهنا تاكدت انها فتاه ضائعه
- قلت له هذا ما زمزم من مكه المكرمه
السلام عليكم
هذا موضوع للاخوان اللي بيروحون بعوائلهم للفائده
وايضا العزاب اذا كانوا صادفوا موقف صعب يكتبونه حتي يتجنبه اخوانهم الذاهبين في الصيف
الموقف اللي بكتبه انا المتسبب فيه وهو صعب جدا يعلم الله كم هي صعوبته
كنت مع العائله ومعي اطفالي بنت وولد اعمارهم 5 و 6 سنوات
قبل العوده من السفر بكم يوم كنت اخذ هدايا في جاكرتا وفي سوق اتذكر كان اسمه بلوك ام
طبعا اهل اندونيسيا يعرفون ان فيه سوقين اظن اسمهم بلوك ام واحد راقي والثاني شعبي
انا كنت بالسوق الشعبي اللي فيه ممرات واسواق تحت الارض
بعد جهد اللفلفه علي المحلات مع المدام :112:جلست في مطعم مهو كبير وجبات سريعه وكان فيه عده مطاعم جنب بعض وزحمه شوي لان اليوم كان يوم اجازه عندهم
اخوكم بلله ترك بزارينه يلعبون بلعبه بلاي ستيشن اللي تنحط بشاشه كبيره طبعا بيني وبينهم يجي 6امتار بس
في لحظه وانا اشوف المنيو مااعلم كيف حصلت لكنه قدر الله
اناظر الا الشيخه البقطه بنتي الصغيره مهب موجوده مع اخوها :unsure:قمت طمرت لخلودي ..
اساله وين اختك قال مدري كنت العب :upset: قلت يا ولد يمكنها حولك دور فتش عنها
واسال يمين يسار واتلفت الا :m12: ايقنت بالامر الواقع وهذا امر الله
البنت ضاعت
اقسم بلله اتمني محد يصير له هذاالموقف
الواحد ينفجع لو ظاع بزره بديرته ما بالك باندونيسيا ولا اي بلاد غريبه
اقسم بلله ان الوقت يمكن يكون اللي مر كله اقل من دقيقه انا اركض يمين يسار ادورها لكنها في بالي كانها دهر
في اللحظه اللي تيقنت انها ضاعت ..تمنيت واعوذ بلله في ذيك اللحظه ان الارض تنشق وتبلعني
وتدور ببالي الشكوك كيف لو مالقيتها
كيف وكيف الله لا يحطكم بهذا الموقف
طبعا في لحظه اتخذت القرار واصرخ بالمطعم باعلي صوتي ..من يتكلم انجليزي بنتي ضاعت
هوز سبيك انجلش ماي بيبي از لوست
طبعا مااعرف اكتبها بالانجلش يلله تخرجت من الثانويه
الا واحد من اللي شغالين بالمطعم قال انا
قلت تعال معي
واطلع للسيب اللي بالنص كان طويل جدا ومليان امه محمد وفيه كشكات بالنص
واول كشك يبيع ساعات واقول للي معي قله بطلع بالنص عندك هنا جواالكشك فوق الطاوله وادخل يدي بجيبي واطلع كل اللي فيه يمكن اكثر من 300 دولا ر ومعها اكثر من مليون روبيه ابعطيها اياه
فكلمه وقال اوكي اطلع دام بزرك ضايع ولا ابي فلوس بس اش بتسوى
قمت طلعت وقلت خلاطلع واوريك
واطلع علي طاولته وباعلي صوتي اصارخ
:4: نوره نوره بليز هيلب مي ماي بيبي از لوست هير
طبعا نوره قلتها بالعربي لان البنت يمكن تسمعني اذا قريبه وتجي
وبليز هيلب لهم يمكن احد يشوفها واقول للي معي حق المطعم تكفي صارخ معي باسمها واطلب من الناس بصوت عالي اللي يشوفها يدلني عليها
دقيقتين او اكثر انا علي هلحال كانها الدهر كله ورب الكعبه
كل ثانيه تروح ولا اشوفها احس اني افقدها زود .. ومراح اشوفها خلاص
وبعد حدود دقيقتين جا سيكورتي ورجل امن من الصراخ وقالوا وش عندك ففهمهم الاندونيسي والناس اجتمعوا وتحلقوا حولي صرت فرجه بس ماعليه اصير فيل بعد بس القاها ما علي من احد
وبعضهم الحقيقه كان يسال المترجم ويصارخ يساعدني
راعي البوليس والسيكورتي قالوا فيه مركز يحطون فيه مفقودوات واطفال قلت ودني له
تعرفون يااخوان كل هذا حصل وانا ماني عارف شي مهم مسويته المدام
انا من فقدت البنت اخذت الولد وعشان اطمنها قلت خلك جالسه هنا لالالاتحركين مهما كان وقررت اني اسوي اللي سويته
هي كانت تبي تقول لي شي بس ماامداها تقوله انا عطيتها خالد واخذت المترجم من علباته ورحت للكشك
وهي كانت بتعلمني انها كانت كاتبه اسم البنت والولد بساعاتهم الجلديه حقت الاطفال من الخلف وكاتبه معه رقم التلفون حقي بالسعوديه وباندونيسيا
ونست تعلمني هلشي سووته هي من حرصها جزاهاالله خير
رحنا محل مفقدوين وسالنا وبقينا بعض الوقت وشوي الا يرن تلفوني :الو
ردت عجوز اندونيسيه ماتعرف الا اندونيسي قمت عطيت التلفون راعي المطعم المترجم
كلمها وابتسم قلت وش فيه قال هذي الحرمه لقت بنتك وهي معها الحين اول شي سويته
: وامطخ ابو الشباب علي جبهته
11ughboun
وتدلناالعجوز علي المحل اللي هي واقفه فيه مع البنت مطعم قريب من ظمن ننفس المطاعم الصافه جنب بعض
يوم دخلت واشوف البنت تصيح بشويش مارفعت صوتها خايفه وعيونها طايشه واول ماشفتها وتفقع صياح
كان الروح رجعت لي ورب الكعبه
حسيت اني املك هلعالم كله
اني اسعد ادمي موجود علي وجه الارض
واهدي من خوف البنت واقولها وين رحتي يابابا
قالت كنت ابي اجي تعطيني ريال عشان العب الععبه وبعدين انتم ما جيتوا :110(((لاحظوا انتم ماجيتوا))
قلت ولله يا بنتي الغبي ابن الغبي انا اللي اخليكي تغفلين لحظه عن عيني بس الحمد لله جت سليمه
لا تسالوني كيف طلعت من المطعم وراحت للثاني اللي جا انودنيسيا يعرف ان عندهم مطاعم نظام مفتوح يعني بيبانها كبيره جدا ومفتوحه علي بعض فشكل البنت لخبطت بالطريق ظاعت
واقوم اكلم العجوز اللي لقتها ومعي المترجم وطبعا لاتنسون الشله اللي كانت مجتمعه وانااصارخ جت تلحقني طبعا الاندونيسيين فيهم عرق عربي والا وهو اللقافه :icon_lol:
قلت لها كيف وجدتيها قالت هي كانت تمشي بين الطاولات وساكته بس انا كنت المح بعينها انها بتصيح وخانقتهاالعبره بس ماسكه الصيحه واني التفت في المطعم ادور ناس اجانب مو اندونيسيين لان البنت مهي اندونيسيه فماشفت احد فقمت ناديتها ومن يوم ناديتها الا البنت تخر صياح
وهنا تاكدت انها فتاه ضائعه
وجلسناها وشربناها انا والزباين بالمطعم مويه وعصير وكنا نحاول نلاهيها بحلاوه فما هي عرفه احنا وش نقول ولا هي عارفه علينا فمع الكلام اللي تتكلمه تقول ابي بابا ابي ماما
كان فيه واحد من المارين او الزباين سمع الكلام وكان حافظ للقران وقال هذي لغتها لغه عربي وتبغي ابوها وهي ضائعه فقام قرب لها وسالها بالعربي اسمك ايش ياشاطره فقالت اناننوره وقام يسالها فين بابا وامك ومن هذي االاسئله يحاول يعرف منها شي يتوصلون فيه لنا بعدين وهذا من فضل الله عز وجل ولا احد سواه
قامت البنت وهي طفل عمرها 6 سنوات تقريبا بتذكر كلام امها وهي تكتب بساعتها وقالت: ابي الو با با
فقال لها الرجال كيف الو بابا فقالت هنا واشاره لساعتها
فقام الرجل قال فرجت ان شا الله وفك الساعه ووجد الرقم وكلموا علينا والحمد لله
قمت انا بست راس العجوز وخمخمت المطوع قاري القران وقلت له بعطيك هديه عمرك ما تحلم فيها
فقال لا هدايا هذا واجبي وكان يتكلم لغه عربيه فصحي فقلت له هذي الهديه لن تقبل بانك تردها
وكان معي قاروره حافظه مياه دايم احطها بجنبي مع الحافظه للنقود ولها حزام وانا من عشاق ولا استطيع ان اشرب سوي زمزم لا استسييغ اي ما غيره حتي في السفر رغم انه مسبب لي بعض الاملاح والدكتور ينصحني اشرب ما صحه بس مااستسيغه ولله فكان من فضل الله معي شوي منه باقي بالحافظه
وافك الحافظه واقول له خذ هذي تعرف وش فيها قال : لا لكن مراح اقبل هدايا منك
قلت له هذا ما زمزم من مكه المكرمه
ياجماعه ولله لحظه مؤلمه اللي شفتها انه مسك يدي وبغي يقبلها لو ما سحبتها منه
وقبل الهدبه والعجوز تشكرتها بقوه ورفضت تقبل اي هدايا واخذت البنت وتوكلت علي الله والحمد لله ان ام خالد كانت مطيعه ولا تحركت من مكانها ولا كان علوم ولمنا جيت سالتها فقالت اني كاتبه الرقم بساعتهم ومعلمتهم كثيرومحرصه عليهم اذا الواحد ضاع يقول لرجال كبير ابي اكلم بابا ويعطيه لساعهطبعا قصه طويله ويمكن ممله بس حبيت افصل لكم كل لحظه عشتها بالفرح والالم فيها
اتمن يالا تصيب احد منكم
اللي بيروح للخارج ومعك اطفال ممكن يضيعون لا تغفل عن هذي الطريقه ابدا او اخترع طريقه اخري تفيدك
وعندي اطرف موقف صار لي بالسفر بس ماراح اكتبه الحين اخاف انطرد من البوابه طولت عليكم السوالف وتلقاكم تقولون هذا عطيناه وجه رح نم
دمتم بود
جد جد قصة مؤثرة لابعد حد
سافرت بين كلماتك وحروفك ونالني ما نالني من تأثر داخلي .............. و ................ خارجي
والحمدلله اللي ردها لكم بالسلامة
وحلوة فكرة زوجتك ... جداً حلوة .
الله لايكدرلك خاطر طول عمرك
مغليك