حبيب قلبي الرخص مو كل شي,,
مثلا فيه ولايات ولا ارخص مثل لويزيانا وجورجيا واوكلاهوما بس ابصم لك ماتجلس 10 ايام الا وانت بعيادة طبيب نفسي
عموما,, اذا تبي اماكن رخيصة , ابتعد عن المدن الكبيرة مثل شيكاقو ولوس انجلس ونيويورك وسياتل وبوستن و
شف لك مدينة صغيرة في ولاية جميلة وفي الشمال مثل انديانا -ويسكنسن -اوريقن - واشنطن- اوهايو- مينسوتا-بنسلفينيا
تكساس ابعد عنها,, ناس متخلفة و Aggressive

شكرا eagle one
كنت زعلانه منك
بس الحين بشيل الكلافه وأسالك كل الولايات الي قلتها نفس المستوى المعيشي
طيب ممكن تجيب لي اسماء جامعات هناك اسعارها حلوة

اي افضل اوريقن ولا اوهايو
والله يسعدك شيك على طول لاني برسلك اي شي يصير معايا لاني والله محتارة
وخايفة

معليش والله ازعجتك بس اعذرني وساعدني
انا توني دخلت موقع الوزارة وشفت الجامعات الموصى بها واخترت بعض من الولايات الي ذكرتها لي ولكن للأسف
مافهمت ولا كلمه ولا عرفت التكاليف
ياليت تخدمني تدخل الموقع وتختار بعض الجامعات في اوهايو او اوريغن وتقولي بأسعارها
واحب اقولك ابي قبول للمعهد بس وابيك تقولي التكاليف بالترم او بالشهر مو بس للدراسة هم ابي تكاليف المعيشة
للترم الواحد
معليش اعذرني

هلا
بالنسبة لأسعار الجامعات,, راح اقول لك كيف تجيبها
ادخل على موقع الوزارة,, شوف الجامعات اللي تعجبك وادخل مواقعهم, وابحث عن كلمة Tuition في محرك البحث اللي في الموقع
او ممكن تجرب قوقل اكتب اسم الجامعة واضف لها كلمة Tuition
مثلا ناخذ مثال جامعة اوريقن ستيت, Oregon State University
تكتب في قوقل
Oregon State University tuition
وشوف اول كذا نتيجة
طلعت لنا هالصفحة
http://oregonstate.edu/admissions/shared/tuition.html
اخترت الخيار الثاني
http://oregonstate.edu/fa/businessaffairs/studentfinance/tuition/calculator
راح تطلع لك اداة الحساب اللي تطلب منك ادخال معلومات, مثل عدد الساعات والتخصص والسنة (الاولى-الثانية-الثالثة-الخ) وهل انت طالب ماستر ولا بكالريوس الخ
انا حطيت 18 ساعة طلعت التكاليف
Subtotal per term : $2218.36
طبعا كل جامعة لها طريقة تختلف ويبي لك تجرب بنفسك وتراها سهلة لو معك شوي لغة
اوريقن واوهايو كلهم حلوين,, عيب اوريقن بعيدة عن السعودية وفارق التوقيت مشكلة 10 ساعات بالصيف و11 بالشتاء يعني صعب تكلم اهلك, ايضا المطر في الشتاء مايوقف ويتعبك كثير والشمس ماتنشاف وهذا يسبب امراض نفسية
اوهايو حلوة عيبها الشتاء طويل يعني 6 شهور تقريبا وابرد من اوريقن بمراحل,, (بس احر منها بالصيف!! جو اوريقن بالصيف ولا اروع)
بالتوفيق

الحمد لله انا عايشة بتكساس والحمد لله ماشفنا هذا الي تقول عنه تخلف بالعكس الوضع مرة عادي وكل واحد حاله حال نفسه
احنا ماندخل في احد ولا أحد يدخل فينا وتمشي الحياة مافي ولاية راح تجيك على المزاج
والله يوفقنا جميعا

شكرا eagle one من جد ساعدتني الله يسهل امورك
والف شكر بعد لseema
بس ودي أسألك كيف المعيشه بتكساس رخيصة ؟
وكيف ولاية تكساس حلوة ولا لا انا سألتها وحدة راحت هناك تقول تكساس صحراء مررة مو حلوة تموتين فيها طفش؟
ياليت تجاوبيني

اهلين ياعيوني شوفي تكساس ماهي حلوة بالشي الي تتصورينه يعني مو مثل امريكا الي كنا نشوفها بالافلام ولاية عادية وفي نفس الوقت ماهي وحشة انا عن نفسي عايشة بأوستن العاصمه ومارحت مدن ثانية وبالنسبة للطفش احنا اصلا ماعندنا وقت للخروج لانه انا وزوجي ندرس فطول الاسبوع مشغولين والويكند نقضي نواقص البيت ونكمل المذاكرة واذا مرة طفشنا نرو ح مول او ملاهي عشان بنتي الصغيرة لكن انشالله بالاجازة الجاية حنروح فلوريدا يعني نعوض عن حياة الدراسة..وترى ماهي صحرا عادية فيها خضار وفيها حدايق بس طبعا اقل من الولايات الوسطى او الشمالية
من ناحية المعيشة وحده بكل الولايات يعني السوبرماركت ماتفرق اسعاره غير في الضريبة لكن السكن فيها رخيص مقارنة بالولايات الاخرى......
نصيحه لو لك خيار في ولاية اخرى روحي افضل عشان هنا مرة حر واحنا ودنا نغير من جو السعودية
والله يوفقك يارب

أشكرك من كل قلبي يالغاليه
والله يسعدك ويسهل امورك ويخلي لك بنتك يارب