قطر المسافرون العرب

أكتشف العالم بين يديك المسافرون العرب أكبر موقع سياحي في الخليج و الوطن العربي ، يحتوى على أكبر محتوى سياحي 350 ألف استفسار و نصائح عن السفر و السياحة, 50 ألف تقرير سياحي للمسافرون العرب حول العالم و أكثر من 50 ألف من الاماكن السياحية و انشطة وفعاليات سياحية ومراكز تسوق وفنادق، المسافرون العرب هو دليل المسافر العربي قبل السفر و اثناء الرحلة. artravelers.com ..
FAHAD_2005
02-09-2022 - 12:10 am
مساء الخير جميعا
يا ليت من الاخوان اللى فى قطر يفيدوني عن بعض الاسئلة؟
انا بجي فى نهاية الاسبوع يوم الاربعاء لقطر علشان اشتري سيارة من المعارض؟
وين بحصل معارض قطر اللى فيها السيارات؟
هل اجراءات المرور فى قطر سريعة ؟ يعني فى امكانية ا ني اخلص منها فى صباح الخميس او العصر ااذا شريت السيارة؟
وهل فيه سكن قريب من المعارض شقق نظيفة او غرف نظيفة؟ لان المهمة بتاخذ مني يومين بس الاربعاء والخميس بس
واكون شاكر لجميع الاخوان فى المنتدى.


التعليقات (5)
Moyen Orient
Moyen Orient
مساك الله بالنور أخوي الغالي
المعارض تحصلها في طريق سلوى
أول ماتدخل قطر ، تحصل دوار القلعة ،
تكمل سيده ،، وراح تحصل السيارة
أو أنك تاخذ الدوار ( دوار القلعة ) وتروح يمين ،، وأنت جاي من طريق بوسمرة طبعاً ،،
بتجيك وكالة ال bmw وهي في المنطقة الصناعية ،،
روح لشارع رقم (10) وهو شارع بيع وشراء السيارات المستعملة ،،
وراح تحصل معارض في الصناعية ،،
بس تحمل لا ينصبون عليك ،، لأن الشريطية واجد اهناك
شئ ثالث ،، راح تحصل المعارض الي فيها سيارات حلوه مثل معرض النسور ومعرض الخليفي ، بجنب المتحف ،، وبجنب فندق موفنبيك ،، خلفة تماماً ،،
مرسيدسات بورشات وغيرها من السيارات الفخمة ،،
أما عن المرور ،، راح تاخذ منك 3 ساعات على أكثر تقدير ،، وكل ماتروح بدري تخلص بدري ، لأن الزحمة الشديد ماوصفها لك ،، بس توصل عند الشرطي راح يخلصك في اقل من 10 دقايق ،، بس اهم شئ عندهم الدور ، وبالأرقام الالكترونية تاخذها من كونتر رقم (5)
تحياتي لك وموفق اخوي ،،

FAHAD_2005
FAHAD_2005
تسلم والله يبو محمد والله يعطيك العافيه يالغالي
الله يعيني على الشريطية وان شاء الله اسلم منهم. وبالنسبة للسيارة فهي جيب لاندكروزر وان شاء الله اني اخلص ا موري فى نفس اليوم الله يسهلها.
وماقصرت يبو محمد على المعلومات

Moyen Orient
Moyen Orient
موديل كم تبيها ؟؟
ترى الوكالة عاملة عرض حلو عليها
Gx قير عادي ،، موديل 2004 ،، بليته 2004 ،، مكيفين ثلاجة فتحه ،، بسعر ( 118.000) ريال فقط !!
تخيل ،،
أصفار من الوكالة
ألحق ماتلحق الكمية محدودة ،،
( الوكالة هي : وكالة عبدالغني )
والمواتر برع الوكالة المستعملين ،، تحصلهم في حدود 108.000 و 110.000 ريال
تحياتي

FAHAD_2005
FAHAD_2005
يا هلا وغلا يبو محمد والله ما قصرت الله يعطيك العافية
ابو محمد اانا بجي ان شاء الله الاربعاء الليل او الخميس الفجر بمشي من السعودية علشان اكون الصباح فى المعارض وبصراحه انا ادور على
gx من 2001 الى 2002 يكون اوتوماتيك افضل واذا ما حصلت خذيت عادي ويكون فتحة واللون يكون ابيض او فضي او بيج.
يعني رحلتي لقطر بتكون صد و رد بس الله يعيني والاقي لي موتر نظيف واخلص وارجع بنفس اليوم .
ابو محمد هل الوكالات مثل وكالة عبدالغني عندهم سيارات مستعملة يعني من 2001 الى 2002 ؟
الله يعيني على شارع 10 فى الصناعية اذا ما حصلت فى المعارض ؟
وتسلم لي يالغالي

Moyen Orient
Moyen Orient
إذا بتجي يوم الخميس ، راح تحصل العالم كلها في الصناعية شارع (10) ،، بس تحمل ينصبون عليك ،، أنا أحذرك مرة ثانية ،، ترى الشريطية واجد ويعورون الراس ،،
وإذا تبي أي مساعدة أخوك موجود ترى ،، وحاضرلك في اي وقت اخوي ،


خصم يصل إلى 25%