المغروم ..
لو تعطينا برنامجك بشكل مختصر .. وكم كلفتك الرحلة .. وأحلى شي سويتوه وكمان أبرز السلبيات ..
كانت احلى احلى و اجمل شهر عسل بحياتي
ليش أنت كم مرة سافرت شهر عسل
أتمنى لك حياة هنية مع أحبابك ,,,

كان يا طويل العمر
باريس 7 ايام
جنيف 4 ايام طبعا يوم بشمونيه و انسي يوم و يومان تمشيت بجنيف
لوقانو 4 ايام منها يوم ميلانو
و انترلاكن 5 ايام
و زيورخ 3 ايام
اما الايجابيات اني اخذت كل اللي ابيه من المنتدى كل شي فالحمد لله ما كان فيه اي صعوبات بالسفر مع ان اول مره
اروح اوروبا و الانجليزي عندي ضعيف
ومن الايجابيات استأجار سياره بسوبسرا و الحمد لله ما كان في صعوبه بالسواقه عندهم بالعكس كانت متعه و انا انصحك فيها
و السلبيات ما اذكر حاليا
بس نصيحه جنيف لا تطول فيها لأنها مو حلوه ما عجبتني يعني تروح لها عشان تروح لشمونيه و انسي و المقاطعات الفرنسيه اللي اقرب لك اذا كنت بجنيف
و نصيحه يالغالي صدقني راح تذكرني فيها طول سفرتك لا تاخذ اكثر من شنطه لك و زوجتك اذا كنت متزوج
تخيل شكلك ساحب شنطتين و حالتك حاله اول ما توصل لأن ما عندهم مثلنا عربيات للشنط و لا حد يخدمك
فشنطه لك و لها تكفي
خاول ما تاخذ ملابس كثيره
و انت براحتك بس صدقني بتندم لو راحت باكثر من شنطه و سلامتك
اذا عجبك برنامجي اعطيك البرنامج بالتفصيل

إي والله ياريت تعطينا برنامج بالتفصيل .. وخصوصاً في المدن التالية :
جنيف : وش افضل مدينة فرنسية قريبة لها .. وكم تستاهل يوم ؟
انترلاكن : أبي برنامجك بالتفصيل في هذي المدينة لأني إن شاءالله جالس فيها مثلك 5 أيام
وافضل مدينة سويسرية من ناحية أسواقها وكافيهاتها والجلسة في الكافيهات من وجهة نظرك ؟
وإذا عندي حوالي 10 ايام سفر لسويسرا .. هل تستاهل باريس العنوة أم أكتفي بالمقاطعات الفرنسية القريبة لجنيف ؟
وبالنسبة للسيارة ماأظن أنها تصلح في شهر عسل .. ولا شرياك ؟
وأما الشنطة فأيضاً ماأظن أقدر أدمج أغراضي مع أغراض زوجتي خصوصاً وحنا طالعين شهر عسل واول مرة تطلع معي
وماقلت عن فندقك في انترلاكن وجنيف وهل أعجبوك ؟
وعموماً لو قالولك بترجع شهر عسل ثاني لمدة 8 - 9 أيام .. كيف بترتبها حسب معرفتك السابقة ؟
وكم كانت صرفيتك باليومية ... وتكاليف رحلتك بشكل عام ؟؟
أبتعبك صح ؟؟!
تحياتي لك ،،،

1. لا تفكر ان صعب و الله اسهل شي

جنيف يالغالي : ما عجبتني كثير و تنفع يوم تتمشى بجنيف و يوم تروح لشمونيه و تطلع بالتلفريك لقمة مونت بلانك
و اليوم الثاني تروح لأنسي
سكنت بفندق الويرويك و هو قريب جدا من محطة القطار يعني تطلع من المحطه و تشوفه بوجهك
طبعا انسي و شمونيه مدن فرنسيه
طبعا الفندق اللي سكنته كان سيء جدا مع انه افضل الفنادق في انترلاكن اسم الفندق ريفاج قراند شوف لك فندق غيره
اليوم الاول : قمة يونفرا يوخ
اليوم الثاني : البحيره الزرقاء حلوه بس ما انصحك تروح لها اذا عجبك مكان ثاني
اليوم الثالث :شلالات رخن باخ
اليوم الرابع : منطقة stockhorn
اليوم الخامس :مغارات و كهوف st.beatus
و طبعا في مناطف اخرى مثل قرية murren و رحلة الجبال الثلاث grimse furka grimsel
طبعا عندك منطقة لوسيرن و هي تبعد عن انترلاكن 30 كيلو تقريبا
افضل مدينه سويسريه زيورخ و بدون نقاش اسواق و جلسات و كل شي
انا لما كنت بزيورخ شهر 8 كان تخفيضات رائعه صدقني ما تتوقع و لا تصدق الاسعار حلوه
مع اني متفق مع زوجتي ما راح نتسوق بس لما شفت كيف الاسعار غيرت رايي و انصحك تختمها بزيورخ
وإذا عندي حوالي 10 ايام سفر لسويسرا .. هل تستاهل باريس العنوة أم أكتفي بالمقاطعات الفرنسية القريبة لجنيف ؟
سؤالك صعب جدا عشر ايام ما تقدر تزيدها , المهم صعب في عشر ايام انك تروح باريس و جنيف و انترلاكن و زيورخ
صدقني كذا راح تطلع السفره مهب حلوه كل يومين متنقل لازم تحس بالاستقرار و تاخذ راحتك بالمدينه اللي بتروح لها
يعني لازم تضحي و انا انصحك خلها مدينتين انترلاكن و زيورخ
يعني انترلاكن خمس ايام و زيورخ نفس الشي
عندك زيورخ تسوق يومين صدقني التسوق ممتع انا ما كنت احبه اتمشي بالسوق حتى اقضي لي انا للعيد اوصي اخواني بس بزيورخ غير وناسه
و عندك الارياف هايدي بارك و يوم تروح لميونج المانيا تروح لليورو بارك
سكنت في فندق السوفيتيل و كان فندق حلو كثير
وبالنسبة للسيارة ماأظن أنها تصلح في شهر عسل .. ولا شرياك ؟
غلطان انا ترى رايح شهر عسل و اول مره اسافر اوروبا و ما اعرف انجليزي و الحمد لله مشت الامور
صدقني راح تندم انك ما استأجرت و اسال الاعضاء لا بد من السياره طبعا انت خذ رخصه دوليه كلها 100 ريال و راجع نفسك بس ما راح تندك خصوصا انترلاكن

لا تفكر ان صعب و الله اسهل شي

وأما الشنطة فأيضاً ماأظن أقدر أدمج أغراضي مع أغراض زوجتي خصوصاً وحنا طالعين شهر عسل واول مرة تطلع معي
وجهة نظر بس اسهل لك بالتنقل و انا مثلك شهر عسل و اتفقت مع زوجتي و بالعكس لما وصلنا اقتنعت ان كلامي كان صح صدقني راح تندم لا تروح تكشخ هناك انت رايح توسع صدرك خل الكشخه لما ترجع و هي زوجتك و عارفه مستوك المادي بدون كشخه
يكفي انك شهر العسل بسويسرا مو ماليزيا
شنطه وحده اسمع كلامي في ذي بس صدقني راح تتعب ما في حد يساعدك و يشيل عنك و لا في عربيات كيف بتسحب شنطتين و لا بتخليها تسحب شنطتها
و سو اللي يريحك لا تستأجر سياره و سو البرنامج براحتك بس تكفى شنطه
وعموماً لو قالولك بترجع شهر عسل ثاني لمدة 8 - 9 أيام .. كيف بترتبها حسب معرفتك السابقة ؟
ارجع انترلاكن و زيورخ
وكم كانت صرفيتك باليومية ... وتكاليف رحلتك بشكل عام ؟؟
تكاليف و الله تختلف بس حط ميزانيه 500 لليوم و اعتقد حلوه و بنفس الوقت مستحيل تصرف 500
لا تنسى لا تاخذ بكلامي اسال الاعضا هم اخبر مني انا ما رحت الا مره
و الله يوفقك
ايوا حلوه كم شهر عسل بحياتك عندنا وراثه اقل شي 3 زوجات ما تدري وش يصير