:smile002:
من فتره طويله وكنت أفكر في زيارة ماليزيا خصوصاً انها صارت مقصد سياحي لكثير من الناس من الدول العربيه وكذلك الأجنبية..
السفره بصراحه كانت فجائية مو مخطط لها من قبل كنت قاعد أفكر بيني وبين نفسي خلال زيارتي للصين بأنه وجب التغيير خصوصاُ انه كنا في مدينة تكتض بالأسواق والمصانع ونشاطها تجاري بالدرجه الأولى..
وقد تكاد تكون خاليه من الترفيه على حد علمي واقترحت على صديقي بأنه نطلع على أي دوله ثانيه غير الصين..
فكرنا وفكرنا وكل واحد يقترح على الثاني..
المالديف ولا اندونيسيا ولا الفلبين أو تايلند ولا ماليزيا..
كان القرار الأخير انه تكون وجهة السفر الى ماليزيا خصوصأ بأنها تعتبر الزيارة الأولى لي ولصديقي لماليزيا..
خط الرحله قوانزو ----> كوالالمبور
تكلفة التذاكر لشخصين على CHINA SOUTHERN AIRLINES
6رمبي مسار واحد فقط..
وهذا موقعهم
http://www.csair.com/en/
صور من مطار قوانزو والمطار بصراحه كبير ونظيف ومرتب..

بعد الانتهاء من الجمارك والتختيم وعند وصولنا لاخر نقطة تفتيش بالمطار كنت أحمل حقيبتين واحده فيها جهاز اللابتوب والثانيه فيها لوشن وعطور لاستخدامي الشخصي وكانت صغيرة الحجم..
أشارت الي الموظفه وكانت لاتجيد الانجليزية كثيراً بأن شنطة اللوشن والعطور ممنوع تطلع الطيارة قلت لها طيب هذي عطور سعرها غالي..مقدر اتركها ..
قالت طيب تقدر ترجع مره ثانيه للشحن وتشحنها وسمحت لي بالعوده للشحن وكانت متفهمه..
المهم اني رجعت مره ثانيه للشحن وغلفتها وشحنتها وكنت مره خايف على عطوري.. لانه في المسارات الثانيه ماسمحوا لكثير بحمل العطور معهم ورموها في الزباله قدام عيني..
انا قعدت احمد ربي ان الموظفه فهمت وضعي وسمحتلي بشحنها..
هذي نقطة حبيت أوضحها عشان محد يصير له نفس الموقف..
يعني حمل العطورات وأي لوشن على متن الطائرة ممنوع..
استمرت الرحله 3 ساعات و 40 دقيقه تقريباً..
عند وصولنا لمطار كوالالمبور كانت الاجواء رائعة خصوصاً أن الجو كان ممطر..
وعند نزولنا في صالة الاستقبال كانت عادية جداً بعكس ماسمعته عن مطار ماليزيا وانه من أجمل المطارات..
بنظري أشوف مطار هونج كونج ومطار قوانزوا اكبر وأجمل وارتب بكثير من مطار كوالالمبور..
بعد استلام الشنط والانتهاء من تختيم الجوازات شاورت صديقي في طريقة حجز الفندق خصوصاً انه رحلتنا كانت فجائية وماعندي فكره عن افضل الفنادق والمنطقة الي راح ننزل فيها..
قلت ياولد مالها الا نشوف مكتب سياحي من المطار وهو اكيد راح يدلنا على شي زين..
مريت على مكتب سياحي وسألته قبل خروجي من صالة القدوم قالي انت وش اسمك قلتله عدنان قلي لحظة ..
وراح ماسك التلفون واتصل في واحد وقله فيه واحد الحين يجيك اسمه عدنان يبي فندق وشوف له حجز..
المهم بعد ماطلعنا من صالة القدوم الا وفيه واحد كان في استقبالنا ماسك ورقه وكاتب عليها Mr. Adnan
على طول رحت له ورديت عليه السلام وقلتله انا عدنان..
رحب فيني واخذ شنطتي ووداني على مكتب اسمه Thirty Holidays

وبعدين قعد يسألني يقولي انت من وين جاي ؟؟
قلت له من السعوديه..
قالي غريبه مافي رحلات جايه من السعوديه الحين انتم على أي رحله جيتوا؟؟
قلت له جايين من الصين..
قالي اها..
قلت في بالي والله شكله هذا صادنا .. وراه سالفه..
المهم بدا يكلمني ويقلي انا اعرف جده والسعوديه ناسها كويسين ومن هالكلام ويمدح ويمدح..
قلت في بالي يالله خلصنا..
قلي وين تبون تسكنون؟؟
قلت أبي اكون في منطقه قريبه من الأسواق وفيها مطاعم عربية بعد..
طلع لي دفتر كبير فيه اسماء الفنادق وصور عنها..
المهم قلي أنا راح أسكنك في فندق جداً رائع.. وسعره حلو.
قلتله أبي خمس نجوم وراقي..
قالي ماعليك هذا من أفضل الفنادق وكل السعوديين يسكنون فيه وفي منطقه حلوة وراقيه بالمنطقة المركزيه.
وطلع لي اسم الفندق بس والله ناسي اسمه وطلع صور عنه وكانت حلوه قلت له أوك نبي يومين فيه وفي بالي يمكن مانرتاح فيه وقتها نقدر نغير فندق ثاني..
المهم كلم الفندق وعمل حجز.. الليله 280 رنقت
قالي طيب الحين أبي 120 رنقت رسوم تأكيد حجز..
قلتله طيب وهذا 120 رنقت..
وعطاني الفوتشر بداخل ظرف قلي اول ماتروح الفندق تعطيهم الظرف ذا..
قال تبون سيارة توصلكم للفندق؟؟
قلت أكيد.
قالي طيب هات 180 رنقت حق السيارة..
قلتله ليش كذا السعر غالي؟
قال لا مو غالي وأصلا انا معطيك سعر مره حلو ورخيص..
قلت ياولد يالله مشي خلنا نمشي بس ونروح نرتاح..
جاب لنا السيارة وعطاني رقمه وقلي أي خدمه وأي شي تبيه دق علي..
الشخص على ماعتقد كان اسمه فضل الرحمن مو متاكد من الاسم.. يلبس نظارات وصوته مبحوح وكبير بالسن.
وحنا ماشيين في شوارع كوالالمبور كان الجو ممطر.. ولما بدينا ندخل في وسط المدينه فجأة توقف
سائق السياره عند فندق شكله غريب.. ومظلم..
قلت هذا واقف هني ليش؟؟
الا الأخ يقول يالله وصلنا الفندق !!!
قلتله انت متأكد من العنوان ؟؟
قال ايه هذا هو الفندق..
طالع فيني صديقي وكنا مستغربين ..
حسيت وقتها ان احساسي كان في محله وانه انضحك علينا..
نزلنا الشنط وجاء واحد الله يكرمكم ريحته خايسه وشكله من الهندوس شال الشناط..
دخلنا الفندق وقسم بالله أقل مايقال عنه انه مزبله..
على طول رحت للريسبشن وعطيته الورقه قلتله قبل لاتطلع الشناط ممكن أشوف الغرفه..
قالي ممكن ليش لا.
انا طول ماني ماشي معه الى لحظة وصولنا للمصعد كنت في حالة غضب..
أول ماطلعنا المصعد كان متهالك وريحته غريبه..
وصلنا للغرفه ولما شفناها كان مستواها أقل من مستوى شقه مفروشه جار عليها الزمن..
ريحتها عفنه وأثاثها قديم وعلى يقين تام بأنه قاطني الفندق من الجاليه الهندوسيه..
قلتله اسف انا مابي أسكن في الفندق ذا..
وصور الفندق الي شفته بالمكتب مو هذا الفندق فندق خمس نجوم وشكله راقي..
قالي عادي مافي أي مشكله ممكن تسترجع فلوسك من نفس المكتب السياحي بالمطار لما تجي تسافر..
طلعنا وقتها ندور فندق ثاني وعلى طول رحت لكروان بلازا قالولي اسفين فل..
بعدها طلعت على فندق نوفيتيل 4 نجوم وهو تابع لمجموعة أكور العالمية..
أخذنا غرفه بسريرين منفصلين ب 449 رنقت شامله الافطار والخدمه..
وكنا موفقين في الاختيار لان الفندق يتميز بموقعه بوسط المنطقة المركزيه وقريب من Petronas Twin Towers وأمام مجمع PAVILION
مستوى الفندق كان جداً طيب.. بس للأسف ماصورت الغرفه وماتذكرت الا بعد مارجعت للسعوديه..
أول مانزلنا الفندق على طول نمنا لانه كان وقت وصولنا الفندق الساعه 2 صباحاً..
اطلالة من غرفة الفندق على كوالالمبور..

ثاني يوم لنا في ماليزيا نزلنا نمشي لانه كنا قريبين جداً من Twin Towers

نزلنا في مجمع KLCC SURIA وكان مجمع رائع بصراحه..

وهذا موقعهم على النت
http://www.suriaklcc.com.my/
تسوقنا فيه حتى وقت الغداء وتغدينا في نفس المجمع في بيتزا هت وكان أكلهم جداً لذيذ..
بعدين قلنا مابدهاش لازم نقعد في مكان رايق ونشرب كوفي ووقع الاختيار على ستار بكس ومكانه خارج المجمع أمام حديقه كبيره وقتها الجو كان خيالي وكان هتان يتساقط مع نسمة هواء عليله..

بعدين مشينا في الحديقة وكانت رائعه ومرتبه..

بعد قضاء وقت طويل هناك رجعنا الفندق لاخذ قسط من الراحه وتبديل ملابسنا بعد ماتسخت من الأمطار..
بعد نزولنا من الفندق لاحظت ان هناك كثير يتصيدون عند البوابه وخصوصاً أصحاب الليموزينات..
اوقفنا احدهم وقلنا له نبي نطلع مجمع يكون فيه مطاعم وكافيهات ..
قال اوكي راح اوصلكم أحلى مجمع ..
طيب بكم المشوار؟؟
قال ب 25 رنقت..
قلت له يارجل لالالا 15 رنقت.
قال خلاص 20 رنقت ولا شوفوا واحد ثاني غيري..
قلت يالله شكله مسكين وأكيد المشوار بعيد..
طلعنا معه ونفس الموال!!! انتم من الخليج؟؟
قلت له ايه من السعوديه..
المهم تجاهلته وماحبيت اتكلم معه زياده لانهم يحاولون يحتكون فينا بأي طريقه..
لف فينا لفه ماخذت 5 دقايق على بعض..
ونزلنا في مجمع تجاري..
قلت له المشوار شكله مره قريب قالي لا بعيد بس انت تحسه قريب..
حاسبناه ومشينا وبعدين تفجأت بأنه نحن في المجمع المقابل للفندق الي حنا فيه بس وصلنا لبوابه ثانيه من الخلف.. والمجمع هو PAVILION
قلت حسبي الله عليه..
أدركت وقتها بأن اللصوص منتشرين وبكثره في ماليزيا ويتربصون بالخليجيين في كل مكان..
لحظة وصولنا لماليزيا كانت النصبه الأولى في المطار وثاني يوم كان لنا موعد مع النصبه الثانية مع الليموزين..
تسوقنا وقضينا باقي اليوم في نفس المركز بس ماصورت لكم شي من هناك في هذا اليوم لانه شحن الكاميرا خلص..
انتظروني في تكملة اليوم الثالث..
عدنان