مرحبا اخوي..
بالطياره طبعا افضل لكم..
بالنسبه للسياره الافضل انك تحجز من مكتب سياحي او اذا تبي تقارن الاسعار كلم المكاتب اللي في مطار دبي.. و الافضل طبعا انك تكلم الشركات العالميه المعروفه اضمن لك..
و بالنسبه للسعر اعتقد السياره الصغيره 100 باليوم و الفان 350
و الوثائق طبعا الجواز و الرخصه.. و ياخذون تأمين اعتقد على الفيزا
بالنسبه للصرف جيب معك ريالات و اصرف في الاسواق .. الصرف في المطار اغلا شوي..
و ممكن تصرف من الرياض عادي ما يفرق... سعر الصرف حاليا .97
نجي للميزانيه ..
ما اعرف وشلون احسبها بس بتعتمد على سعر الفندق و السياره .. و كمان عدد الافراد..
هذا اللي عندي و اي استفسار ثاني انا في الخدمه...
تحياتي

اعتذر لصاحب الموضوع بس حبيت اسوي مداخلة انا مثلك ناوي ان شاء الله اجي في العيد عائلة عددنا ستة 3 كبار و3 صغار وناوي اخذ شقة مفر وشة في الشارقة بس والله شفت موضوع هنا في المنتدى وخوفني من الاسعار يقول كل شي نار اذا ممكن تفيدونا عن الميزانية التقريبية للسفرة لمدة 7 ايام وجايين ان شاء الله بالسيارة ... ومشكورين وما نستغني والله عنكم وشكري مره ثانيه لصاحب الموضوع

السلام عليكم
اول شي اخوي اهلا فيك في بلدك الثاني الامارات
اكيد يا اخوي السفر يالطياره افضل واريح
وبالنسبه لتأجير السياره فتوجد مكاتب في المطار بس اشوي اغلها بس اضمن
واقترح انك اتأجر من الشركات العالميه مثل هرتز وشركة فاست لتأجير السيارات
وتقدر تحجزها عند وصولك إلى المطار بس تنتظر فترة بسيطه لين ما توصل السياره المطار
واذا كنت ما تبي تنتظر احجزها من الحين توجد في الكثير من المواقع على الانترنت لحجز السيارات
مثل موقع العربية للطيران
http://www.airarabia.com/arabic
الصرف ما فيه فرق بس يكون احسن اذا صرفت من الامارات عساس وقت الرجعه ليلادك ما تتورط بالدراهم الزايده اللي وياك
وبالنسبه للأماكن اللي تنفع للزياره فهي كثيره
ففي دبي
مول الامارات
ابن بطوطه سنتر
سوق مدينة جميرا
برج العرب (بس توجد رسوم للدخول ولازم تحجز عشا بس الاسعار مرتفعه)
ميركاتو سنتر
وايلد وادي (حديقة مائية)
ميركاتو سنتر
هذي الاماكن كلها قريبه من بعض
ديره ستي سنتر
وافي سنتر
مركز برجمان
مركز حمر عين
حديقة زعبيل
حديقة الخور (طبعا حديقة زعبيل افضل واحدث ولكن حديقة الخور تحتوي على تلفريك)
وهذي ايضا قريبه من بعض
السوق الصيني
وأب تاون مردف (هذا سوق في الهواء الطلق وما ينفع الظهر لأنه يكون الجو شوي حار)
واذا كنت حاب اتزور امارات ثانية مثل الشارقة او ابوظبي فنحن حاضرين
بس ابوظبي بعيده اشوي عن دبي مسافة ساعه ونصف تقريبا من بداية دبي
اما الشارقة فهي ملاصقة لدبي ولكن الشارع بين دبي والشارقة دوما مزدحم
ولكن توجد طرق بديله اخف ازدحاما مثل شارع الامارات وشارع بيروت
والسموحه

الأخ الكريم mzoon و welld_SHJ :
لكما الشكر الجزيل من قلبي على مروركما وإفادتكما .
ولإيضاح ..
فنحن عائلة من 3 أطفال ( 8 - 5 - 2 ) .
الذهاب عن طريق الطائرة .
والسكن محجوز ومنتيهن منه .
بقينا في المصاريف لمدة أسبوع من أكل وشرب وتمشي وخلافه كم تتوقعون ؟
وبقينا في السيارة من وين آخذها ؟ وكم أسعارها ؟ من أي شركة ؟ وهل الكيلوات مفتوحة كما سمعت ؟
أما بالنسبة لمدن الإمارات الأخرى فإذا كان في الشارقة مكنا مميز يستحق الزيارة فممكن .. وأبو ظبي بعيد أن أزورها لبعدها .. وبقية المدن مثل الشارقة إن كان فيها شيء يستحق الزيارة فعلا فأرشدونا بارك الله في الجميع ..
باختصار شديد أنا أريد رحلة مميزة لعائلتي الصغيرة تتذكرها وتستمتع بذكراها ..
وللجميع تحيتي وتقديري

والله اخوي الميزانيه على حسب صرفك
وبالنسبه للسياره
فشركة فاست يوجد لها مكتب في مطار دبي الدولي
وهذا رقمهم
0(4) 971+
وبالنسبه للشارقة
ففيها الكثير من الاماكن
بالنسبه للمجمعات
يوجد صحارى سنتر
وميغا مول
وستي سنتر الشارقة
هذي افضل المجمعات في المدينه
وبالنسبه لأماكن الترفيه اللي انصح فيها للأطفال
المتحف العلمي
ومركز الإستكشاف
ومنتزه الصحراء واللي فيه
مركز حيوانات شبه الجزيره العربية
ومزرعة الاطفال
ومتحف التاريخ الطبيعي
واذا كنت من محبي المتاحف فيوجد في الشارقة الكثير من المتاحف
منها متحف الشارقة للآثار وهو ملاصق للمتحف العلمي
والمتحف الإسلامي
وبيت النابوده
والكثير غيرها
وبالنسبه لأماكن الترفيه الأخرى
نادي سكاي 24
هذي مركز ترفيهي فيه بولينج وصالة تزلج والعاب فيديو وهو مطل على بحيرة خالد
ونادي الشارقة للرماية والجولف وفيه رماية وجولف ومسبح ونادي صحي
والحدايق
منتزه الشارقة الوطني
ومنتزة الجزيرة
بس حدايق دبي افضل من حدايق الشارقة
واذا كنت من محبي الجت سكي فيوجد على بحيرة الممزر منطقة للتأجير
وهذا موقع هيئة الانماء التجاري والسياحي بالشارقة
وفيه معلومات اكثر عن الامارة

• هيئة الإنماء التجاري والسياحي بالشارقة | http://sharjah.org/index_ar.php

وهذا رابط خريطة الشارقة وبتفيدك وايد في جولاتك السياحيه
واذا ما قدرت تقرا الخريطة فاحفظها على جهازك وكبرها
واذا حبيت تستفسر عن الشارقة اتصل على مركز الاتصال التابع لهيئة الانماء التجاري والسياحي بالشارقة
اثناء تواجدك بالامارات والاتصال مجاني اذا كان عندك خط الامارات
4- 800
وحاليا ينظم في الشارقة فعاليات معرض الكتاب في مركز اكسبو الشارقة من 5 -14 ديسمبر
وايضا ينظم مهرجان الشارقة المائي من 10 -15 ديسمبر
ومن فعاليات المعرض عروض مناطيد وتزلج على الماء
وموقعه على ضفاف بحيرة خالد وحديقة المجاز
واي خدمه نحن حاضرين

1. السلام عليكم


2. مرحبابك اخوي في داركم الثاني الإمارات


3. &**& القرية العالمية (ماتتفوت)


4. بتفتح أبوابها: 2007-12-13 / ولغاية 2008-3-1


5. المطاعم:


6. لمحبي الدراجات النارية(منطقة البداير)

السلام عليكم

مرحبابك اخوي في داركم الثاني الإمارات

اخوي بالنسبة للسايح الأسعار مرتفعه في الفنادق وسعر البترول ، أما الأماكن السياحية مثل الحدائق والمراكز التجاريه والمطاعم مثل باقي دول الخليج.أنا رحت أغلب دول الخليج كنت استغرب نفس اسعارنا تقريباً. وكل دولة فيها الغالي والرخيص وإنت تختار إلي يناسبك
وإذا بتأجر سيارة أفضل من المطار
سعر السيارة الصغيرة =100-120درهم
وحرص على إنك تاخذ الخارطة من المطار أو من محطات البترول
الأماكن السياحية:

&**& القرية العالمية (ماتتفوت)

بتفتح أبوابها: 2007-12-13 / ولغاية 2008-3-1

عبارة عن عدة قرى من دول العالم ، وكل قرية لها طابعها الخاص من عروض فلكلورية وملابس وغيره منها القريه(التايلندية - والسعودية - ولبنانية -والإماراتية- والهندية - والسورية - والإيطالية - والأفريقية وغيرهم من القرى ...........الخ)
وفيها عدة مطاعم ، وملاهي العاب للكبار والصغار
الموقع: شارع الإمارات
مواعيد الزياره:
الأحد+الأثنين+الثلاثاء+الأربعاء من الساعه 4عصراً - 12منتصف الليل
الخميس + الجمعة +السبت من الساعة 4عصراً - 1 منتصف الليل
طوال أيام الإسبوع للعامة (مختلط) ، ماعدا يوم الأثنين للعائلات فقط
http://www.globalvillage.ae/sponsors.html
صور من القرية
https://artravelers.com/p/re/53920

المطاعم:

&**&مطاعم مرسى دبي او تسمى المارينا .المكان رائع..في منطقة الصفوح بعد برج العرب ومدينة جميرا..قريب من مدينة الإعلام ، أو وإنت ماشي على شارع زايد توجد لوحات إرشادية تدلك عليه بيكون على اليمين..
عباره عن عدة مطاعم وأبراج تطل على قناه او بحيره بها مرسى لليخوت..والمطاعم الهم جلسات برع وإذا تحب الهدوء ولخصوصيه بإمكانك الجلوس داخل المطعم .المطاعم منها (الإيطالي,الهندي,العربي,الصيني,المكسيكي,الأكلا ت البحريه,وكوفي ستار بكس,وباسكن روبنز .....الخ) اسعارهم معقوله ماعدا السيفود اغلى عنهم.
(ويفضل لو يكون في المساء الجو يكون شاعري واروع)
..ومنظر النافوره الراقصه جميل.
مرسى دبي(المارينا) بالصور
https://artravelers.com/p/re/150025
المرسى بالصور
https://artravelers.com/p/re/158174
&**&مطاعم سوق جميرا ..جنب برج العرب..تابع لفنادق مدينة جميرا(مينا السلام,القصر,دار المصيف) له مدخل من الخارج..وله بوابات من داخل السوق ادخلك على ساحة الفنادق والمطاعم على الطراز التراثي..وفيه عدة مطاعم(العربي+الإيطالي+الهندي+المغربي.... الهم جلسات في الساحه الخارجيه للسوق اطل عالنهر..الجلسات حلوه و المكان رائع بمعنى الكلمه وبعد العشى تقدر تاخذ جوله بالعباره(القارب)في النهر الصناعي حول الفنادق,حتى لو ماكنت حاجز فيه مجرد جوله وتستاهل
ولمطاعم..(إلي فالسوق اسعارهم مناسبه)
وإذا تحبون البوفيهات عندهم بوفيه في فندق ميناء السلام ...حلو المطعم سعر الشخص 140درهم
الفندق+السوق ولمطاعم
https://artravelers.com/p/re/50211
الجولة فالعبره (القارب)بالصور
https://artravelers.com/p/re/67158
&**&مطعم البوم..عشاء بوفيه+جوله في خور دبي فالبوم..مدة الرحلة ساعتين.من 8:30 الى 10:30 سعر الشخص=100 او 120 ماذكر بالظبط
ومن 10:30 الى 12:30 الشخص =75درهم
والاكل يفرق في الرحله الاولى غير عن الرحله الثانيه ..ويفضل الحجز مسبقا من داخل الإمارات
3243000-04 جنب جسر القرهود وقريب من حديقة الوندرلاند..وحديقة الخور..الأطفال سعرهم أقل ماذكر بالظبط
&**& باتو دبي عباره عن سفينة زجاجيه تأخذك بجولة عشاء لمدة ساعتين في خور دبي
4009714 لازم بالحجز ... الأجواء رومانسيه (سعرها غالي شوي)
(أوقات العشاء))
8.00 مساءا .. تفتح السفينة أبوابها ..
8.30 مساءا .. تتحرك السفينة ..
1-00 مساءا .. ترجع السفينة ..
((الموقع))
بردبي - شارع السيف مقابل السفارة البريطانية
(( الأسعار ))
الكبار = 220 درهم (شاملة العشاء)
الصغار من 5 - 11 سنة = 110 درهم (شاملة العشاء)
الصغار من 0 - 5 سنوات = مجاناً
&**&مقهى شيل اوت الجليدي في مركز تايمز سكوير بدبي
الكافيه الثلجي=60درهم للشخص، لمدة 45دقيقه فقط
قريب من الإمارات مول (على شارع الإمارات) وإنت راجع من الإمارات مول يكون عاليمين
الكوفي بالصور
https://artravelers.com/p/re/143257
المراكز التجارية:
&**&الإمارات مول ..آخر سنتر افتتح كبير وحلو من أحلى السناتر.. ويقع في منتصف شارع الشيخ زايد (مطاعمهم حلوه وكوفيات+السينما+سكي دبي(المدينه الثلجيه)+تسوق+ العاب)
ولمطاعم متنوعه عندهم قسم للفود كورت(الوجبات السريعه)
وقسم للمطاعم المنفرده
سكي دبي(الحديقة الثلجية)بالصور
https://artravelers.com/p/re/48010
الإمارات مول...بالصور
https://artravelers.com/p/re/158174
ويوجد كذا مطعم يطل على لسكي منها كرم بيروت(عربي) وأكلهم ممتاز جهة الفندق
وفرايديز أمريكي في ردهة الألعاب
&**& مركز ابن بطوطه..يبعد بعض كيلو مترات عن مول الإمارات..على نهاية شارع زايد..(تسوق+مطاعم+العاب+سينما+سينما ثلاثية الأبعاد imax)ويتميز بديكوراته
مب شرط للتسوق.ممكن الواحد يروح يتمشى ويتفرج فيه بالإضافه لسينما كبيره وحلوه...على شارع زايد يبعد قليلا عن مول الإمارات على نفس الشارع
(سينما IMAX ثلاثية الأبعاد حلوة للأطفال)
مركز ابن بطوطة بالصور
https://artravelers.com/p/re/56380
&**& آوت ليت دبي ... مركز جديد وكبير ...وأسعارهم أرخص من نصف سعر السوق
الموقع : شارع الإمارات بالإتجاه للقرية العالمية. يبعد قليلاً عن وسط دبي
&**&مركز ميركاتو على الطراز الإيطالي(تسوق+مطاعم+سينما) في منطقة جميرا ،
ملاحظه: (قريب من سوق جميرا على نفس الشارع.
&**&مركز الستي سنتر(تسوق+سينما+العاب للأطفال+مطاعم على ردهتين)
&**& مركز الفستفال سيتي(ووتر فرونت سنتر) بالصور
https://artravelers.com/p/re/158174
&**&مركز وافي(تسوق+مطاعم وكوفيات+العاب) (اغلبه ماركات) بعد جسر القرهود...فيه بيت الرعب إذا تحبون مثل هالسوالف
&**& مركز برجمان متنوع(واغلبه ماركات) ... بعد جسر المكتوم
&**& سوق جميرا...تابع لفنادق مدينة جميرا(ميناء السلام+القصر+دار المصيف)على الطراز التراثي حلو للتمشيه وفيه كوفيات ومطاعم جلساتهم حلوه في الخارج عالنهر.الموقع جميرا جنب برج العرب.
&**& مركز الغرير - شارع الرقه
&**& السوق الصيني.. ومتنوع
https://artravelers.com/p/re/59437
سناتر أصغر عن المذكورات فالأعلى

• الريف مول
• حمر عين
• مركز آب تاون ... مركز صغير في منطقة مردف حلو

أجواءه وستايله أوروبي مفتوح مش مغلق . فيه مطاعم وكوفيات
&**& متحف دبي(قلعة الفهيدي) ... لمحبي التراث
يفتح من الساعه 8 صباحاً
بالإضافة إلى قرية التراث المكان حلو على خور دبي...تقدرون تأجرون قارب وتاخذون جوله فالخور
والأجواء حلوه للعشاء عالخور عندهم كذا مطعم فالقريه
الموقع بالقرب من نفق الشندغه
وفي نفس المكان بيت الشيخ سعيد-رحمة الله عليه
وفي فترة المهرجان يكون فيها فعاليات منها الفرق الشعبية
https://artravelers.com/p/re/31911
&**&الباص البرمائي...مكتبهم في مركز برجمان في الطابق الارضي..بعد جسر المكتوم..بالنسبة لأسعار الباص المائي
للكبار 95 درهم و الصغار 65 درهم
التذاكر العائلية (2كبار+2صغار) 290 درهم
https://artravelers.com/p/re/53920
الحدائق العامه:
&**& حديقة الخور..بعد جسر القرهود , قريبه من فندق جراند حياة وحديقة الوندرلاند..شاطئ الحديقه حلو للتمشيه...وتقدرن تركبون التلفريك وتاخذون جوله فيه.
بالإضافه لمدينة الطفل إذا معاكم أطفال ..مدينه تعليميه وترفيهيه في نفس الوقت
مدينة الطفل(تعليمية ترفيهية)
https://artravelers.com/p/re/53924
&**&حديقة الممزر..في منطقة الحمريه وبالتحديد في الممزر...شاطئ الحديقه حلو للتمشيه...وفيه شاليهات اليوم ب150درهم.. وتوجد أماكن للشواء
وإذا كنتو من هوات الرياضات البحريه..تقدرون تأجرون جت سكي ..على الشاطئ خارج الحديقه
&**&الألعاب المائيه الوايلد وادي في جميرا قريبه من برج العرب سعر الشخص =140درهم تفتح من 11ص لغاية 7م
&**&الوندرلاند(العاب كهربائيه+مائيه) قريبه من جسر القرهود وفندق جراند حياة ومطعم البوم
&**& حديقة زعبيل ... جديده وحلوه على بداية شارع زايد وتنقسم لقسمين

لمحبي الدراجات النارية(منطقة البداير)

https://artravelers.com/p/re/28601

• ____________
• امارة الشارقه:
• بحيرة خالد..تقدرون تاخذون جوله بالعباره في البحيره
• قناة القصباء...فيها عين الإمارات..تقدر تشوف الشارقه من فوق ... وأيضاً جولة فالقناة المائية
• مركز صحارى(سينما+مطاعم+تسوق+العاب)قريب جدا من دبي
• مركز الميغا مول(سينما+مطاعم+تسوق+العاب)
• بالإضافة للمتاحف :

المتحف العلمي
ومركز الإستكشاف
ومنتزه الصحراء : مركز حيوانات شبه الجزيره العربية
مزرعة الاطفال
ومتحف التاريخ الطبيعي
(كلهم جنب بعض ، جسر رقم 9 بالإتجاه للذيد)