لندن المسافرون العرب

أكتشف العالم بين يديك المسافرون العرب أكبر موقع سياحي في الخليج و الوطن العربي ، يحتوى على أكبر محتوى سياحي 350 ألف استفسار و نصائح عن السفر و السياحة, 50 ألف تقرير سياحي للمسافرون العرب حول العالم و أكثر من 50 ألف من الاماكن السياحية و انشطة وفعاليات سياحية ومراكز تسوق وفنادق، المسافرون العرب هو دليل المسافر العربي قبل السفر و اثناء الرحلة. artravelers.com ..
zaman99s
16-07-2022 - 01:36 am
قررت اليوم أكون ضيف ثقيل عليكم وأروي لكم قصة رحلتي الأولى إلى بريطانيا- وهي الرحلة الأولى لي إلى أوربا - كان هذا الكلام في صيف عام 1999 م طبعا الرحلة كان الهدف المعلن منها دراسة اللغة الانجليزية بس خلوها على الله والاتفاق كان مع ثلاثة من الشباب ولكن بعض الناس ما عندهم إلا الكلام يوم جت الصملة ما بقي إلا أنا وواحد .
في البداية رحنا ندور معهد ومرينا على مكتب في شارع الضباب - تعمدنا نروح لهاذا الشارع على بالنا نمهد للروحة لمدينة الضباب - وراعي المكتب فلسطيني أو أردني اسمه رائد الله لا يو ... لا خلونا نقول الله يسامحه - وبتدرون بعدين ليش قلت ها الكلام - وجلسنا معه وحاطين في بالنا نروح لمدينة برايتون – والله ما نعرفها ولا شي بس واحد من ربعنا راح لها قبل - لكن على حظنا المعهد امتلا طلاب وما لقينا قبول بس الرجال بعدها أقنعنا بمدينة اسمها فولكوستون وجلس يمدح فيها وفي المعهد – انترناشيونال هاوس - ويقول ما يجيه عرب -؟؟؟؟؟آه بس - ويقول بعد بتتعلمون فيه بسرعة وحنا من الغشامة صدقناه على طول ودفعنا له وعطيناه الجوازات للتأشيرة ثم جلسنا ننتظر القبول وبعد أسبوع جاب لنا القبول والجوازات وكل شي جاهز وربعك مبسوطين .
و طبعا كنا حاجزين تذاكر على الخطوط الإماراتية يوم الأربعاء 30 /6 وفندق في لندن اسمه هيلتون كينزينجتون لمدة ليلتين – على بالنا بنتمشى في لندن قبل الدراسة - .
وإلى اللقاء في الحلقة الثانية بداية الرحلة


التعليقات (9)
مستر عبدالعزيز
مستر عبدالعزيز
متابع معاك وكلها حماس وفله
تحياتي ..

zaman99s
zaman99s
الله يسلمك وفي انتظار بقية الإخوان
اما والله كملت والا غطيت راسي وانحشت

Rawwwaf
Rawwwaf
أهلا بك أخوي زمان
متابع للتقرير ومتشوق له
طبعاً رحلتك من زمان .. وأكيد تغير أشياء كثيرة .. في السابق لم يكن الإنترنت وسيلة للتسجيل ولا حتى الحجز
والآن تغير الكثير .. الكثير
مع خالص احترامي

< عالي الهمة >
< عالي الهمة >
بداية رائعة أخوي وننتظر منك التكملة , ولا تتأخر علينا
عالي الهمة

ميسون محمد
ميسون محمد
يعطيك العافية اخوي zaman99s
من البداية تشويق واثارة وحماس
بارك الله فيك وفي انتظار البقية
تحياتي لك وللجميع ..

zaman99s
zaman99s
  1. بداية الرحلة


بداية الرحلة

بعد المغرب يوم 30/6 انطلقنا إلى المطار - حلوة انطلقنا هذي - طلعنا على رحلة دبي وسارت الأمور عادية جدا وصلنا دبي الساعة العاشرة على ما أتذكر ورحلتنا للندن الساعة ثمان الصباح يعني عندنا حوالي ثمان ساعات قلنا لبعض نبي نقضيها تمشية في دبي – الله من الاقتصاد على بالنا بنوفر أجرة فندق – وفعلا تمشينا في دبي وتعشينا في مطعم اسمه أنقره لكن ملينا قبل تجي الساعة وحدة رجعنا وتسدحنا في المطار بين ها العمال اللي ينتظرون رحلاتهم وصراحة ما استفدنا شي إلا ذبحنا البرد وبدت علينا أعراض الزكام وطبعا اللي أنهى ها المعاناة صوت المذيع الداخلي للمطار يعلن موعد إقلاع الرحلة الساعة الثامنة صباحا .
ركبنا الطيارة وكنت ماخذ خريطة للندن ونشرات تعريفيه وطريقة استخدام الباص والمترو – والله منت سهل يا البريطاني - بس للأسف ما كنت أعرف ولا كلمة انجليزية وخويي يعرف شوي – قال لك مترجم بس والله بتضيع علومنا - وأقلعنا إلى لندن وعشت في الطيارة لحظات سعيدة جدا ؟؟؟؟؟؟؟؟؟ كان جالس على الشباك شايب حمر والله ما أدري وش أصله وأنا في الوسط وصاحبي على الممر واثنينهم نايمين وأنا خايف والله ما أدري وش هو منه بس خايف ولا جاني النوم وكنت سهران الليلة اللي قبل الرحلة ومريض يعني كملت لكن اللي كان مريحنا ان احنا مدبرين أنفسنا في لندن مكلمين واحد من معارف أخو خويي اللي معي – هذي بكيفكم كل واحد يفهمها بطريقته – ومتفقين معه يستقبلنا في المطار – يعني بنسوي مهمين بس السحر بينقلب على الساحر - وجلست أهوجس وأتفرج على البرامج المرئية في شاشة الطائرة ولا قطع حبل أفكاري إلا إشارة ربط الأحزمة وإعلان الهبوط
وإلى اللقاء في الحلقة القادمة ( في لندن )

ميسون محمد
ميسون محمد
جزاك الله كل خير أخوي zaman99s
حسيت بتعبكم اثناء تواجدكم في المطار و الطائرة
متابعين ومنتظرين بفارغ الصبر الحلقة القادمة
تابع يااخوي واحنا معااك ..
دمت بود ..

lion55
lion55
تابع ياخوي ترانا معك

zaman99s
zaman99s
شكرا لجميع من قرأ وشكر خاص لأصحاب الردود والحلقة الثالثة في الطريق


خصم يصل إلى 25%