لندن المسافرون العرب

أكتشف العالم بين يديك المسافرون العرب أكبر موقع سياحي في الخليج و الوطن العربي ، يحتوى على أكبر محتوى سياحي 350 ألف استفسار و نصائح عن السفر و السياحة, 50 ألف تقرير سياحي للمسافرون العرب حول العالم و أكثر من 50 ألف من الاماكن السياحية و انشطة وفعاليات سياحية ومراكز تسوق وفنادق، المسافرون العرب هو دليل المسافر العربي قبل السفر و اثناء الرحلة. artravelers.com ..
Abdullah_uk
23-06-2022 - 02:05 pm
  1. اليوم صحيت من النوم الصبح وقلت ليش ما اروح اشتري لي ملابس الشتاء ...


اليوم صحيت من النوم الصبح وقلت ليش ما اروح اشتري لي ملابس الشتاء ...

جلست افكر وين اروح اشتري لي ملابس شتوية ،، كنت اسمع عن سوق بلو واتر من المنتدى وبصراحة ما عرفت هل سوق إلا من المنتدى وبصراحة ماكان عندي معلومات عنه ،، سويت بحث بالنت ولقيت موقع السوق علشان ابي اطلع عنوان السوق لأني بروح على سيارتي ،، بصراحة الموقع يعيبه انهم ماحطوا العنوان كامل بس حاطين وصف المكان وبصراحة الطريق اللي حاطينه مو واضح كثير بالنسبه لي ولقيت رقم استعلامات السوق وكلمتهم وعطوني العنوان كامل وسالت عن السوق ومحلاته قلت ما ابي اروح وبالنهاية يطلع سوق مشي حالك وقالت لي الموظفة السوق فيه كل الماركات وحجم السوق كبير جداً وفيه مواقف سيارات تكفي 13 ألف سيارة والمواقف مجانية ....
غيرت ملابسي وركبت سيارتي وشغلت النفقيشن وحطيت العنوان طلع يبعد عن سنتر لندن 23 ميل 39 كيلو بالضبط
قلت بسيطة مو بعيد كأنه مشوار خفيف داخل الرياض
توكلت على الله متوجه الى بلو واتر وضاق صدري من الزحمه واستغرق الطريق حول الساعتين من زحمة السيارات ،، وصلت السوق وجلست 20 دقيقه ادور لي موقف ولا لقيت إلا بطلوع الروح
دخلت السوق وبصراحة انصدمت من حجم السوق كبير مره مره مره وانا لي اكثر من 3 سنوات في لندن ولا عمري دريت عن هل سوق وبصراحة اشكر جميع اللي علمونا عن هل سوق الكبير ..
لقيت كل شي احتاجه من ملابس شتوية ( بناطيل - شيرتات - جكيتات- جزم ...إلخ إلخ ) من كثر المحلات الواحد ما يدري وش يشتري وايش يختار فيها بضائع مره حلوة سواء رجالية او نسائية
لفيت السوق لما تعبت وانا امشي وصائم يوم جيت اطلع لقيت محل كرسبي كريم للدونات ويسوون الدونات قدامك يعني Fresh واخذت لي كرتون فيه 12 حبه وانا اناظرها واقول متى افطر علشان اتسلى عليهم
قربت الساعه تكون 5 عصراً قلت ياولد الحق رح البيت ضبط لك فطورك طلعت من السوق وانصدمت بالزحمه لأنه وقت ذروة
حاولت اختصر الطرق مافي فايدة ( قلبتها سواقه سعوديين في الرياض ) مساقط بين السيارات امسك اليسار كأني بدخل الخدمه وقبل نهاية الطريق اخش عرض على الإنجليز الوقت قرب للفطور وانا بعيد عن البيت ،، ياولد وش الحل ؟ وش اسوي ابي افطر بالوقت ،، الدعوى زحمه مره وجاء وقت الفطور الساعه 6.30 وباقي على البيت 13 ميل يعني يبغالي ساعه على هل زحمه واكون بالبيت
لقيت جنبي علبه موية قلت مالي إلا افطر عليها وافطرت على موية وادقها من الدونات حسيت له طعم رهيب لأني اكلته على جوع وتمنيت ان معي كفي كان يكون وبعدها قررت اغير اتجاهي لبكدللي علشان اشوف لي اي مطعم حلو آكل فيه ورحت مطعم بيلا إيطاليا وطلبت بطاطس مقليه و قارلك بريد مع تشيز ولازانيا وخويي طلب له سمك سالمون مع المقبلات اللي طلبتها واكلنا وحركنا انا رجعت الشقه وهو رجع بيته وقلت انقل لكم تجربتي المتعبه اليوم وكان بودي ان الكاميرا معي علشان اوريكم الصور بس خيرها بغيرها
ملاحظة مهمة جداً ( انصح جميع من يريد الذهاب الى بلو واتر ان يستخدم القطار لأنه بيكون اريح واسرع ويوفر عليكم وقت كثير وتستغلون هل وقت بالتسوق لأن بالسيارة مره زحمه والطريق فيه اصلاحات )
اخوكم
عبدالله


التعليقات (9)
أرياف
أرياف
افا اجل لندن قلبت الرياض على هالزحمة
انا ما قد رحت للبلو ووتر الله يكتب لي اتسوق فيه
تجربة حلووة و خشيت جو بالسالفة
موفق يا عبدالله و تتسحر بالعافية

اليازي-UAE
اليازي-UAE
الف شكر على عرض تجربتك
وانا على روحتي لندن سنويا ماعمري رحت له
بس كلامك شجعني
ماقصرت

النجلا
النجلا
يسلمو بس كيف اروح له بالقطار ؟

جامعي1
جامعي1
مشمور على المعلومات القيمة
وتروح وترجع بالسلامه

Abdullah_uk
Abdullah_uk
أرياف
والله زحمه كرهتني عمري بالطريق بس الحمد لله شفت شي جديد وانبسطت بالسوق
اخوك
عبدالله

Abdullah_uk
Abdullah_uk
اليازي-UAE
شكراً لك على المرور والمره الجاية انصحك تسيرين على السوق ترى بيعجبك
اخوك
عبدالله

Abdullah_uk
Abdullah_uk
النجلا
عن طريق واتر لو ستيشن وبعدها بالباص الى السوق بس للأسف ما اعرف اسم محطه الوصول لأني رحت بالسيارة
اخوك
عبدالله

Abdullah_uk
Abdullah_uk
جامعي1
شكراً لك على المرور

ميسون محمد
ميسون محمد
ماشاء الله حلو كثير هذا السوق
يعطيك العافية أخوي عبد الله
و في المرات القادمة لا تنسى الكاميرا
وبارك الله فيك


خصم يصل إلى 25%