نيويورك المسافرون العرب

أكتشف العالم بين يديك المسافرون العرب أكبر موقع سياحي في الخليج و الوطن العربي ، يحتوى على أكبر محتوى سياحي 350 ألف استفسار و نصائح عن السفر و السياحة, 50 ألف تقرير سياحي للمسافرون العرب حول العالم و أكثر من 50 ألف من الاماكن السياحية و انشطة وفعاليات سياحية ومراكز تسوق وفنادق، المسافرون العرب هو دليل المسافر العربي قبل السفر و اثناء الرحلة. artravelers.com ..
ماسك خط
09-12-2022 - 01:31 am
السلام عليكم كل اعضاء منتدى العرب المسافرون
جايبلكم تقرير مصور عن رحلتي لأمريكا
و الصراحة انصح الجميع بالذهاب هناك مع عائلته
ما اطول عليكم
رحلتي مع اهلي كانت في 10-8 من الرياض إلى نيويورك عبر الخطوط الجوية السعودية
و كانت زيارتي ل3 ولايات و هي أورلاندو لاس فيقاس و نيويورك
الرحلة خذت 11 ساعة متواصلة و انا نمت طول الرحلة ما حسيت في احد و الخطوط ما تقصر حاطه أفلام جديدة و حلوة
اول ما وصلنا مطار JFK New York على طول طلعنا من الطيارة لأن كنت عارف انه فيه سير طويل في الجوازات فنصيحة اللي يبي يخلص بدري يطلع من الطيارة على طول
المهم بعد ما طلعنا من الأسياب اللي ما كنا نعرف وينا فيه بس نمشي مع الناس
لقينا حقين الجوازات، و اشوا انا طلعنا بدري لأن لقينا قدامنا ركاب رحلة قادمة من الصين او كوريا لا و كانوا فيه فريقين لاعبين كورة قدم و ما تدري من خلص و من بقى لأنه كلهم يشبهون بعض لول، و أنا كانوا حاطين على تذكرتي SSSS يعني لازم تحقيق أما اهلي لأ
المهم بيجيكم واحد مغربي حاطينه السفارة السعودية في المطار يا حليله صدق، بيعطيكم ورقة للرجال فقط و مكتوب عليها اسئلة عادية (اسمك-تاريخ ميلادك-شغلك-طولك-لون عيونك الخ) اللي استغربته انهم يبون اسم ابوك و امك و تاريخ ميلادهم!!! فكل اللي معانا في الطيارة قاموا يدقون على اهلهم و يسألونهم!!
المهم جا دورنا بعد ساعة! بعدها شافوا جوازاتنا بس انهم جاديين يعني لا تسوي فيها نفسك و تضحك و تسولف بس جاوب على قد السؤال، بعد ما خذوا بصمتنا و عطوني ملف فيه اوراقي قالوا لنا روحوا لغرفة على اليمين و عطوهم الملف عشان تحقيق و التحقيق هذا للرجال فقط، المهم دخلت استغربت حتى الملاحين الطيارة معانا، عطيتهم الملف و قالوا استنى لين ما نادي اسمك، قعدت ساعة لين ما نادوا اسمي، و عطوني الملف و لا قالوا شي، بعدها رحنا للجوازات مره ثانية بس مو نفس المكان اللي كنا فيه، هناك حقين الجوازات حليلين ووسيعين صدر، سألوا اسئلة عادية و و فسرولي انه لما ارجع، لازم اشيّك في تيرمنال معين عشان لما ارجع لأمريكا ما يصيرلي كذا يعني ادخل بسهولة، المهم اخذنا شنطنا و كان لازم نروح لمطار ثاني اسمه La Guardia عشان رحلتنا لأورلاندو
وصلنا للمطار الثاني، و فيه حركة عشان ما تتبهذلون مع الشنط، فيه عمال لكل خطوط، و كانت الخطوط اللي بنسافر عليها هي American airlines المهم عندهم خدمة انهم ياخذون شنطك و يدخلونها بدل ما تسويها بنفسك بس بفلوس مع بخشيش، كان باقي على الرحلة 3 ساعات تغدينا و تمشينا في المطار و اشترينا كروت جوال t-mobile بس انصح بat&t لأنه يقعد ما يخلص الدقايق
المهم فتشونا هناك بس لأني عندي SSSS سألوني اسئلة زيادة على التفتيش بس كان عادي، و التفتيش عبارة انك تشيل اغراضك و جزمتك و انت بالكرامة و تحطها في علبة رمادية و بس
بعد ما طلعنا في الطيارة كان قدامنا وحده مسويه تسريحه غريبة عجيبة و كان لازم اصورها
المهم وصلنا لأولاندو و استاجرت من شركة dollar سيارة crysler sebring
و انا حاجز فندقنا اسمه Omni Hotel و هذا موقعهم
و لي رجعه لروحتنا لsea world


رحلتي الى امريكا رحلتي الى الولايات المتحد
التعليقات (9)
Luxury_Traveller
Luxury_Traveller
اخوي ماسك خط ..... الحمدالله على سلامتكم ..... والله يعطيك العافية
بس الصور مو طالعة .... أفضل لك تحمل الصور في موقعنا المنتدى هني عندنا

Impact
Impact
اخوي ماسك خط
الحمد لله على السلامة ... نورت الرياض والسعودية كلها ...
انا اشارك اختي العزيزة Luxury_Traveller رأيها
لان صورك ما طلعت في الموضوع .... لازم تحملها عندنا على منتدى العرب المسافرون
وبعد علشان تقدر تشترك في مسابقة افضل تقرير ... هذي من شروطه
وبالتوفيق ان شاء الله في تقريرك
ومتابعين معاك ....تحياتي

اليازي-UAE
اليازي-UAE
ماشاء الله
من المتابعين بأذن الله
بس الصور ماطلعت لي انا بعد

@عاشق الخيال@
@عاشق الخيال@
بارك الله فيك اخوى الغالى
حتى انا الصور ماتطلع عندى ...... ؟؟
وبالتوفيق ان شاء الله

Dove La More
Dove La More
ألف الحمد لله على السلامة ياماسك خط
في إنتظار باقي التقرير.

KING 1
KING 1
لول:bounce8:
أنا أخر واحد :112:
أسبقوني الشباب
أعتبرها خيانه
ولا من سبق لبق:36_7_14:
ماسك خط:36_3_11:
الحمد لله على السلامه
ورحلتك من بدايتها مشوقه
لا تستعجل بذكر الأحداث
أذكر لنا كلش بالتفصيل الممل:36_13_3:
وكلنا ماسكين خط معك
وضاربين الوجهيه لوكس وفيري:36_7_12:
وعلى الطبلون كاشف الرادار
معك حتى النهايه

جامعي1
جامعي1
منتظرين التقرير
وليتك تبدل طقطق ذا
تراه مايصلح للتحميل
ربي يسعدك

KING 1
KING 1
موضوع رفع الصور للمنتدى https://artravelers.com/p/re/124283 برنامج تصغير حجم الصور
مشاركه رقم 4

ماسك خط
ماسك خط
السلام عليكم حبايبي المسافرين
انا آسف انه ما طلعت الصور و حاولت اني احطها هنا
و تراها بنفس الترتيب
ان شاء الله تعجبكم

ام التسريحة الغريبة العجيبة اللي ما خربت طول الرحلة

نسيت اصور سيارتنا بس هذي ويها بالضبط بس سيارتنا كانت بيضاء و جلدها أسود

واجهه الفندق

لوبي الفندق

غرفتي

الحمام الله يعزكم

منطقة الجولف

المسبح 1

نافورة قدام المسبح 1

المسبح 2
سعر الغرفة 115$ مع الضرائب، و الصراحة الفندق يستاهل 10 نجوم لخدمتهم الرائعة و صدق طايرين فينا حسيت اني vip صدق
قعدتي في اورلاندو كانت 19 يوم و اول يوم طلعنا ل sea world عالم البحار
راجعلكم مع روحتنا ل sea world


خصم يصل إلى 25%