1. بسم الله الرحمن الرحيم


2. اما الصاله فكان بها سريرين فكانت من نصيب بندر + (مجهول )

بسم الله الرحمن الرحيم

قبل فتره اتصل علي شخص عزيز على قلبي وقالي عبدالله بنجي بريطانيا كم يوم وطفشانين من ازعاج المدن الكبيرة ونبي تشوف لنا كرفان ثابت نستاجره في اي مكان في بريطانيا بس ما نبي نجلس في المدن الكبيرة نبي مكان هادئ وننبسط فيه ..
بدت رحلة البحث عن طريق الانترنت ولكن كانت المفاجأه كل شي محجوز واحنا متاخرين مره حاولت بشتى الطرق اني احصل على كرفان ولكن مالقيت شي والاعضاء هنا حاولوا يساعدوني بس للأسف مالقيت شي فاضي ..
وصولوا المهبل اقصد خويي وشلته وتكينا على النت 24 ساعه ندور لما حصلنا كرفان في دوفر جنوب غرب بريطانيا ويبعد عن لندن 160 ميل ..
كانت رحلتنا بتاريخ 392007 لمدة 3 ايام.. رحنا للسوق نجيب اغراض الكشته وشرينا لحم ودجاج ( حلال) وعدة فطور كاملة وكل شي نحتاجه بالطلعة من اغراض ضروروية ..
جاء وقت الكشته وكانت الساعه 12 الظهر واتصلوا الشباب قالوا يالله يادب حنا عند السيارة تعال خل نحرك
والعفش كنا مركبينه بالليل اليوم اللي قبله.. طلعت للشباب لقيتهم كلهم طاقه وحيويه متحمسين للرحله
ركبت انا قدام على اليمين علشان انا الكبتن حق الرحله وكان جنبي واحد وطلب مني عدم ذكر اي شي عنه ولا حتى تعرض صورة بالإنترنت اما بقية الشباب قالوا مافي اي مشكلة اني اعرض صورهم بالمنتدى ..
حركنا من شقتي بإتجاه دوفر تحديداً للمخيم اللي حاجزين فيه الكرفان. بعد مرور ساعه بالطريق الشباب بدأ عليهم التعب وانا نفس الشي لأني ما افطرت قبل ما اطلع وقلت لهم بنوقف في محطه بعد نص ساعه علشان نفطر ونصحصح وكان ردهم لي بالتصفيق من الفرحة لأني بوقف يمغطون رجلوهم وياكلون لأني اكتشفت انهم ما اكلوا شي وصاحين بدري مره.. وقفنا افطرنا وغسلنا وجهوهنا بموية بارده والكل نشيطين ومستعدين نحرك .. كملنا طريقنا وبعد 3 ساعات ونص من تحركنا من لندن وصلنا مقصدنا وكان الكرفان بإنتظارنا ..سلمنا صاحب المكتب الكرفان وقال رقم الكرفان 16 روحوا عنده ووقفوا سيارتكم جنبه مافي مشكلة .. رحنا نركض نبي نشوف الكرفان لأن اول مره نركب كرفان يوم فتحنا الكرفان انصدمنا ..........
ولا فندق 4 نجوم مجهز بكامل تجهيزانه مطبخ كامل + تدفئة كاملة + صاله كبيرة يوجد بها كنب وينقلب سرير وغرفتين نوم وحدة سرير دبل وكان من نصيب الكبتن عبدالله اللي هو انا لأني انا مدير الرحله
والغرفه الثانية كانت سريرين (Single) وكانت من نصيب سلطان ومحمد ..

اما الصاله فكان بها سريرين فكانت من نصيب بندر + (مجهول )

كان عدد افراد الرحله 5 اشخاص وكان كل واحد فيهم يقول انا مجنون الرحله وكانت رحله ما اقدر انساها ومرت علينا كأنها حلم والايام مرت بسرعة ولا حسينا فيها ..
اول ما وصلنا نزلنا عفشنا ورتبنا الكرفان واغراضنا رتبناها .. بعدها طلعت للشباب وقلت لهم يالله نجهز عدة العشا وكنا متفقين يكون اول يوم العشا مشاوي ( دجاج + لحم ) وكنت مجهز الدجاج واللحم من لندن متبل اللحم والدجاج ماعلينا إلا نولع الفحم ونشوي
وزعنا الشغله بيننا انا وبندر نشوي ونولع الفحم وسلطان يجهز القهوة والشاهي ومحمد يغسل المواعين اما مجهول خليناه يرتاح لأنه كان تعبان شوي ..
راح ابدأ ببعض الصور وراح اخلي الرحله على عدة اجزاء لأن الصور كثيرة ولا اقدر انزلها كلها بوقف واحد
هذي صور للناقل الرسمي لنا ( سيارتي المتواضعة )

وهذي صورة للكرفان من الخارج

هذي صورة جماعية لمهابيل الرحله او مجانين الرحله

راح اذكر لكم الاعضاء من اليمين لليسار
الاول محمد ( وكان عنده مشكلة تعبته شوي ) الرجال عنده بواسير ههه بالإضافه ان ضروسه تعورة
الثاني بندر ( وكان تحفة الرحله ) طول الوقت بالسيارة ما يناديني إلا ( يبه ) وكل شوي يقول يبه يبه اقوله نعم يقول ابي عصير تطريش قرد خرمان ما شربته اليوم .. وانا اقوله لأنك مانجحت هل سنه مافي عصير
الثالث سلطان وهذا القهوجي حقنا ملينا من شي اسمه قهوة من كثر ما صلح لنا قهوة
اما الرابع فهو انا الكبتن عبدالله مدير الرحله والطباخ
وهذي صورة كرفانات في قريبه مننا

والآن راح ابدأ بالصور الداخلية
هذي غرفتي

وهذي الغرفه الثانية ويظهر فيها سلطان ومحمد

هذي صورة لصالة الطعام

وصورة للمجلس

التلفزيون

هذي غرفة الشور

راح انهي الجزء الاول من الرحله وانتظروا باقي الاجزاء مع مهابيل الرحله وصور للريف البريطانيا
اخوكم
عبدالله