بسم الله الرحمن الرحيم
من فتره وانا كنت استفسر عن كازا واماكن السياحية فيها والاخوان ماقصروا والله , جاء وقت السفر يوم
1562007م وكانت خطة السير ( لندن - مراكش ترانزيت - كازا ) عن طريق الخطوط الملكية المغربية
جزمنا امتعتنا انا وخويي واتجهنا للمطار . قصينا البوردنق وتوجهنا للطائرة مباشره لأن كنا متاخرين
ركبنا الطائرة وكانت الصدمه او ما اسميه اكلنا منكح طلعت الطائرة ليست للخطوط الغربية الطائرة لخطوط اطلس بلو والتي تعتبر من الخطوط الإقتصادية اخذنا مقاعدنا ولاحظنا الجو داخل الطائرة حار جداً مع ان الجو بارد جداً خارج الطائرة والسبب يعود لعدم تشغيل مكيفات الطائرة . كلمت المضيفه قالت مانقدر نشغل المكيفات إلا بعد الإقلاع لأن الطائرة قديمة ،، تحملنا وقلنا كله لعيون المغرب بنتحمل وكانت اول سفره لنا للمغرب اقلعت الطائرة وتم تشغيل المكيفات وحسينا بشوي راحه من الحر ،، بعد الإقلاع بساعه بدأ بيع الماكولات على الطائرة التي انخدعنا او انغشينا بحجزنا والله ياجماعه الخير اكل الطائرة سي جداً الخبزة الظاهر لها 5 ايام ملفوفه بالبلاستك ويابسه مره بس وش نسوي الجوع كافر ما اكلنا شي من الصبح وكل همنا نلحق الطيارة ،، وصلنا مطار مراكش الدولى وكان الجو حار جداً وكان هناك زحمة بالجوازات مسكنا سرا
مع الاوروبيين لما جاء دورنا اخذ الموظف الجوازات وقال هلاهلا بالسعوديين وصار يلمح على الكادو قلنا مامعنا كاش ينفع فيزا ختم الجوازات ومشانا وبعدها توجهنا لإستلام الشنط استلمنا الشنط وتوجهنا للجمارك وكان زحمه ولا في إلا موظف واحد واللي امامنا كلهم اوروبين ننتظر الدور إلا جاء واحد قالنا تعالوا من هنا ومشانا على الموجودين وقال وش فيها الشنط قلنا ملابس قال مافي هدية
قلنا مامعنا كاش تقبل فيزا كارد :112::112: قال عادي اي عمله بس هدية قلنا مافي شي حنا وافقين بالسرا تبي نرجع رجعنا ترى ماورانا شي قال سيدي روح الله يحفظك ومشينا وحنا نضحك عليه
توجهنا للصاله الداخليه وقصينا بوردنق كازا وتاخرت الرحله 40 دقيقه عن الوقت المحدد بعدها اعلنوا عن الرحله وكانت الرحله على الخطوط الملكية المغربية قلنا الحمد لله مو على اطلس بلو ،، خلال 25 دقيقه وصلنا مطار محمد الخامس الدولى نزلنا المطار ومرينا اخذنا مسار الرحلات الداخليه إلا يجينا موظف الجوازات قال الباسبورتات ( الجوازات ) عطيناه وقال من وين جايين قلنا مراكش قال مافي كادو قلنا ماكاينش والو كشر ورجع الجوازات مشينا لقسم الشنط واخذنا شنطنا ولازم نمر على الجمارك وهذيك اللحظة كانت رحله الخطوط السعودية توها واصله والموظفين في حاله استنفار يدورون البخاشيش من السعوديين وحنا وصل عفشنا قبلهم وكنا اول اللي مروا على الجمارك جانا الموظف بضحكه خبيثه قال تفتيش قلت رحله داخليه ( بدري عليك يابو الشباب ) ناظر الختم وكشر ومشانا وحنا نضحك في وجهه
مشينا وجاء دور موظف تشييك ختم الدخول وكانوا اثنين كل واحد اخذ جواز ومسكنا على جنب يلمح للبخشيش وكنا مسوين نفسنا ماندري عن السالفه وقال الهدية سيدي قلت ماكاينش والو وخويي نفس الشي ورجعوا الجوازات وكملنا طريقنا نبي طاكسي كبير يوصلنا للفندق ،، طلعنا برا واتفقنا مع سواق طاكسي يوصلنا ب 250 درهم وبالطريق جلس يقرق علينا منطقة الفندق مو كويسه وخطيرة انا اعرف لكم شقق فخمه ومن الكلام الفاضي وقلنا لا وصلنا الفندق وصافي ،، وصلنا الفندق ويوم جاء ينزل الشنط عطيناه 250 درهم قال لا انا متفق معكم على 300 درهم قلنا هع هع على مين يابو الشباب وكان الرجال عمره بالستينات يعني كبير بالسن ونهاوش معه قلنا نبي شرطة السياحة وطلبنا سكيورتي الفندق لأنه ماسك شنطه بيده ومعيي يطلقها جاء السكيورتي قالوا وش في قلنا عطيناه 250 ومو عاجبته واحنا متفقين معه على السعر 250 درهم قالوا حتى 250 كثيره عليه المهم قلت اطلبوا لي شرطة السياحة ( من اولها مشاكل ) السكيورتي سحبوا منه الشنطة وتهاوشوا معه قالوا انتم ادخلوا والباقي علينا المهم الرجال جلس يسب ومشينا وخليناه ..
في نفس اليوم كنا معزومين على العشا عند ناس مغاربه ( صحبه الدراسه في بريطانيا ) جاء صاحبنا للفندق بعد وصولنا بربع ساعه واتصل يقول انا تحت بإنتظاركم آخذكم للبيت نتعشى سوا
طلعنا من الفندق وانتظرنا طاكسي صغير يوصلنا وجانا سواق طاكسي صغير محترم جداً وولد شبابي عمره بالثلاثينات وبعد ماوصلنا لبيت صاحبنا كلمت سواق الطاكسي وقلت له عندك استعداد تكون سواق لما الفتره كاملة ونبغى نجربك يوم اذا اعجبتنا كملنا معك الفتره كاملة وقال اوكيه واتفقنا على 300 درهم باليوم وبصراحه كان نعم السائق المهم تعشينا عند صاحبنا في منزله عند اهله وكان بودي اني معي الكاميرا كان اصور لكم الكسكسي والطاجين اللي تكلفوا فيه الله يجزاهم كل خير واكلنا لما دخنا لأننا كنا جوعانين مره مره مره واتصلنا على سواق الطاكسي وجاء ومشانا في كازا ساعه تقريباً بالليل ورجعنا الفندق وعطيناه 100 درهم وكان مبسوط مره واحنا ارتحنا له ..
اليوم الثاني طلبنا منه نبغى مكان نتغدى فيه وقلنا نبغى مشاوي قال في مكان بس ما اقدر اطلع فيه بالطاكسي الصغير نروح مكان الطكاسي في خط الجديدة ونروح بطاكسي كبير قلنا اوكي ودانا منطقة اسمها جورج فيها ملاحم كثيرة ومكان خلفي يشوون لك اللحم واللي تبي وكان ممتاز جداً واكل لذيذ
رجعنا الى كازا وتمشينا فيها الى الليل ورجعنا الفندق ( جلست انا وخويي نقول كازا مافيها شي يسوى العنوه من لندن الى كازا والمشكلة ان مبلغ الفندق مدفوع بالكامل عن طريق النت ) والفتره 10 ايام
في اليوم الثالث جاء السواق وودانا مسجد الحسن الثاني وعين دياب وباب مراكش والمعاريف وشفنا كازا كلها خلال 3 ايام طيب ال 7 ايام الباقيه وش بنشوف وصرنا كل يوم نروح للاماكن اللي شفناها
قررنا نقدم حجز العودة ونرجع الى لندن وذلك بسبب المضايقات اللي واجهناها من الدرك كل شوي جايينك يبغون بخاشيش على الفاضي وحنا نكرش فيهم واحد ورا الثاني والشحادين في كل مكان طفشونا واخويانا اللي نعرفهم مشغولين في اعمالهم ولا يفضون إلا بالويك اند فقررنا نقدم حجزنا ولا قدرنا نكمل 8 ايام ورجعنا بعد ما حصلنا بصعوبه جداً حجز عوده قبل الوقت المقرر والحمد لله رجعنا وبصراحة خلال هل تجربه بالنسبه لي اللي عاش بأوروبا المغرب بلد جميله لكن ما تجي شي عند اوروبا واكثر شي قاهرني استغلال المحلات برفع الاسعار علينا فكنا اذا بغينا شي نطلب من سواق الطاكسي يطلب لنا اللي نبي ولانتكلم حتى لايعرفون من وين احنا
وفي العوده لمطار محمد الخامس رحنا عند نقص البوردنق وانهينا الموضوع إلا يجي جندي يقول الجوازات
اخذ الجوازات وقال انتظروني هنا راح جاب ورقة تعبئة الجواز وعبيناها وجلس يتميلح وقلنا هع هع مامعنا ولا شي فلسنا انهبل الرجال ومشينا وخلينا محد قالك تعرض خدماتك
توجهنا للجوازات وكانوا يتسابقون الموظفين علينا رحنا عند واحد جلس يتكلم ويلمح وقلنا بإختصار ماكاينش والو كشر مثل بقيه الضحايا او الموظفين الذين انكشروا قبله وختم الجوازات ودخلنا الصاله بإنتظار الإعلان عن الرحله والحمد ركبنا الطائرة وكانت تابعه للخطوط الملكية المغربية والخدمه كانت ممتازة جداً والحمد لله وصلنا لندن بسلامة
وجهة نظري الخاصه لن اكرر العوده الى المغرب وذلك بسبب ماشفته في كازا وانا بصراحة مارحت لأماكن غير كازا واتوقع هذي غلطه بس تأتي الرياح بما لاتشتهي السفن
وآسف اني ما صورت شي والسبب اني انسدت نفسي ولا صار لي خلق اصور شي
اقبلوا موضوعي بصدر رحب ويظل اخواننا المغاربه لهم محبه ومعزة لما شفنا من طبيتهم وحسن استقبالهم لنا
اخوكم
عبدالله