عيناوي رسمي
06-07-2022 - 09:33 pm
السلام عليكم ورحمه الله وبركاته
اخوكم في الله مثل الباقين قال بسير سوريا ليش لانه حلوة وجميلة ورخيصة ويبي يهرب من هالحر ..
ع العموم حجزت ع العربية رايح جاي والمدة 6 ايام فقط
طلعت من الشارقة الى حلب .. ولاحظت انهم المسافرين كلهم سوريون واخوكم الوحيد مب سوري
عطوني قسيمة دخول لونها اخضر ,, عبيتها وخليتها مع الجواز
وولت الى مطار حلب الدولية
وقفت مثل الباقين في طابور الجنسيات العربية وكانو معظم عراقين او لبنانين .. مافي ولا جنسية خليجية
المهم جاني واحد من امن المطار جالس يسأل شو جنسياتكم لين ما وصل عندي .
قلتله جوازي يمني وجاي من الشارقة .. شل الجواز وبدأ يسألني اول مرة جاي ع السوريا قلته هيه اول مرة
ليش جاي؟ قلتله سياحة .. قال انزين معك حد قلتله لا بروحي قال انزين تعال معاي
طلعت من الطابور ودخلني مكتبه .. كان يقول انه رائد
المهم بدأ يسألني انت ليش جاي هون
قلتله سياحة واتمشى في بلدكم جان يقولي ليش ما رحت لبنان؟!
قلتله كنت مخطط ع سوريا وما بقعد كثير.
قالي لازم حد يكفلك مواطن سوري .. ما نقدر ندخلك ع سوريا بدون كفالة
قلتله ما عرف حد في سوريا
قالي لازم .. قلتله في واحد خلني اشوفه ( في واحد ساعدته في الوزن واحنا طالعين من سوريا وتمينا نسولف لين ما وصلنا المطار )
رحت عنده كان واقف في طابور السوريون قلتله يقولون لازم حد يكفلني عشان ادخل سوريا
جان يقول انا عندي مشاكل معاهم ماقدر اكفلك شوف حد غيري ( قهرني وايد )
رجعت للرائد وقلتله الريال مش راضي
فسألني انت تعرفه .. قلتله لا والله الرجال تعرفت عليه بالمطار وجي
قالي ما ينفع واخذ الجواز وينسخ منه صورة .. ويقولي صعب اندخلك ع سوريا
وتم يشيك ع الجواز ويشوف الاقامة ويسأن انت شو تشتغل
وشو تسوي في اليمن
قلتله انا ما اعيش في اليمن
كل حياتي بالامارات
الشباب ما نقدر ندخلهم وانت ما تعرف حد هني
قلتله ليش
قال يمكن تسير العراق ومادري شو
قلتله يا ريال انا شكلي ساير العراق؟
انا جاي سياحة وبس ما عندي شئ غيره
وشوي اتصل ع حد يقوله يا سيدي العميد او العقيد وقاله في واحد يمني عندنا وجاي ع مطار حلب كيف نسوي .
صكر التلفون قالي ما نقدر ندخلك
لازم ترجع .. قلتله ما في حل ثاني
قالي مافي ابد
عندنا اوامر نركز ع الشباب وما بندخل اي حد
حاولت معاه ما طاع لين ما كلم موظف وقاله خذ جوازه ووديه ع الطيارة
قلت خلاص اطلع ولا يسوون لي مشكلة كبيرة
سرت مع الموظف السوري لين البوابة
وعند البوابة في واحد ثاني يسأله شو صار شو مشكلته مخدرات ؟؟
قال لا مرتجع
المهم يوم اخذ بياناتي قالي شو اسمك قلتله اسمي وشوي قالي الاخ ليبي قلتله لا يمني
المهم ركبت الطيارة وانا مقهوور ع التذكرة والتعب اللي تعبته
الموظفة المصرية في الطيارة اخذت الجواز من موظف المطار وحجزته عنده وقالتلي لا تخاف بنعطيك اياه يوم نوصل
وفي الرحلة كل تفكيري بالموقف اللي حصلي
ومن القهر رقدت في الطيارة
ويوم وصلنا جاني موظف مطار الشارقة واخذ الجواز وقالي تعال وياي
وصلت الى مكتب تحويل المسافرين
جان يقولي الموظف لازم تدفع 750 درهم قلتله ليش
قال في برقية وصلت من سوريا انك لازم تدفع عشان ركبت الطيارة
قلتلهم عندي تذكرة 2 way ب1417 درهم ومدفووع حقها .. قالي لحظة واتصل ع كبيرهم
المهم رجع وقالي صح انت دافع بس الرجعة اللي بالتذكرة مالتك هي دمشق - الشارقة
والرحلة اللي رجعت منها هي حلب - الشارقة والفرق 408 دراهم
قلتلهم يا جماعة ما يصير كل هذا .. اروح وارجع في نفس اليوم وادفعووني بعد .. تراني خسران في الموضوع كله
قالي ادري بس ماقدر اسويلك اي شئ واذا ما دفعت ما بنعطيك جوازك
سرت عند موظف المطار وقلتله سالفتي جان يسير عندهم ويقوولهم كيف الموضوع قالوا رحلته المدفوعة من دمشق - الشارقة حقها 350 ولازم يدفع الفرق وهي 408 درهم والريال عليه deporking
وقتها قالي موظف المطار لازم تدفهم لانه عليه تقرير ومرتجع ومحد يقدر يساعدك في الموضوع ولا حتى ادارة المطار
ونصيحة احسن لك يوم بتسافر مرة ثانية سير من مطار دبي هني ما بيخلونك ابد
رجعت وانا هلكان من الرحلات المكوكية ومقهور من اللي صارلي
خسارة فلووس وتعب
نصيحة مني لكم
سوريا ما تنفع ابدا للسياحة ولا حتى تمر تراتزيت عليهم
ولا تسوون دعاية لها
واحد مقهور شاف حقيقة سوريا
المنطقة بأكملها في خط النار اليوم ..
أحداث صعبة تحيط المنطقة والأمور تغيرت سياسياً واقتصادياً وغيرها ..
ولا شك أن المصاعب في السفر لسوريا تتزايد والحق يقال ..
ونصيحة اللي ما له ضرورة في السفر ينتظر ..
وراحة البال هي المطلب في كل مكان ..